Ngatalwa nga-1941, eParis, eFrance futsi umndeni wakitsi bewute imali lenyenti. Bengikutsandza kufundza, ngako ngadvumateka kakhulu ngesikhatsi ngineminyaka lengu-10 nangiphetfwe yi-TB futsi kwadzingeka kutsi ngingayi esikolweni. Bodokotela batsi angihlale embhedzeni ngobe emaphaphu ami bekabutsakatsaka. Ngako kuleto tinyanga bengicitsa sikhatsi sami ngifundza i-dictionary futsi ngilalela luhlelo emsakatweni lebelukhuluma ngemfundvo yase-University of Paris. Ngesikhatsi dokotela angitjela kutsi sengiphilile futsi sengingabuyela esikolweni, ngajabula kakhulu. Ngatsi: ‘Bodokotela benta umsebenti lomuhle kakhulu!’ Kusukela lapho, ngaba nesifiso sekwelapha bantfu. Njalo babe nakangibuta kutsi ngifuna kuba yini nasengimdzala, bengihlale ngitsi: “Ngifuna kuba ngudokotela.” Ngacala kanjalo-ke kutsandza budokotela.

Ekhaya besingemaKatolika. Kodvwa kute lokunganani lebengikwati ngaNkulunkulu, futsi benginemibuto leminyenti lebengingatitfoli timphendvulo tayo. Ngacala kuciniseka kutsi ukhona uMdali ngemuva kwekucala kufundzela budokotela enyuvesi.

Ngikhumbula ngesikhatsi ngicala kubukisisa ema-cell esitjalo lesitsite ngisebentisa i-microscope. Yangimangalisa indlela ema-cell lativikela ngayo nakushisa nobe nakubandza. Ngaphindze ngabona kutsi sitaputapu lesingekhatsi kule-cell siyancipha nangabe sineluswayi futsi siyakhula nangabe sisemantini. Ngenca yaloku nalokunye, tintfo letincane letiphilako tiyakhona kuvumelana netimo letishintjako. Nangibona indlela  onkhe ema-cell layinkimbinkimbi ngayo, ngaciniseka kutsi tonkhe tintfo tadalwa.

Ngemnyaka wami wesibili ngifundzela budokotela, ngatfola bufakazi lobunyenti bekutsi Nkulunkulu ukhona. Ngesikhatsi sifundza ngemtimba wemuntfu, ngabona indlela umkhono kusukela engcoseni kuya esandleni lowenta ngayo iminwe yetfu kutsi ikhone kugobana nobe kululeka. Iyamangalisa indlela emamasela lahlangene ngayo nematsambo nangendlela konkhe lokubambisana ngayo. Nasi sibonelo, ngafundza kutsi lelinye lemamasela lelisemkhonweni kusuka engcoseni kuya esandleni, lihlanganiswa ngumsipha ulihlanganisa nelitsambo lesibili lelisemnweni. Lomsipha uyehlukana ube ngu-2 kuze umsipha loya ekugcineni kwemuno ungene ngephansi kwawo. Lemisipha inamatsela ematsanjeni aleminwe. Kube iminwe yetfu ayakhiwanga ngalendlela, imisipha lekuyo beyitawucina futsi icondze, neminwe yetfu beyingeke ikhone kusebenta kahle. Ngabona ngalokucacile kutsi kuneMuntfu lohlakaniphile lowadala umtimba wemuntfu.

Yangimangalisa kakhulu nendlela umntfwana lacala ngayo kuphefumula ngemuva nje kwekutsi atalwe. Ngafundza kutsi umntfwana nakasesiswini uphefumula ngenongwane. Ngaleso sikhatsi kusuke kusete umoya emaphashini alomntfwana. Kodvwa nasekusele emaviki lambalwa ngaphambi kwekutsi atalwe, kuba nalokunjengemanti ngekhatsi emaphashini akhe. Nasekatelwe lomntfwana futsi aphefumula kwekucala ngca, kwenteka tintfo letinyenti letimangalisako. Kuvaleka imbobo enhlitiyweni yalomntfwana lokwenta kutsi ingati iye emaphashini. Loku lokunjengemanti kusita lamaphaphu kutsi akhone kugcwala umoya ngekushesha. Kusukela ngaleso sikhatsi lomntfwana ubese uyakhona kutiphefumulela.

Bengifuna kumati Lona lodale letintfo letimangalisako, ngako ngacala kufundza liBhayibheli. Yangichaza imitsetfo lemayelana nekuhlanteka Nkulunkulu lebekayinike sive sema-Israyeli eminyakeni lengetulu kwalengu-3 000 leyendlulile. Nkulunkulu watjela ema-Israyeli kutsi ambhonye emangcoliso awo, ageze, nekutsi umuntfu lonetimphawu tesifo lesitsatselwanako atehlukanise nalabanye. (Lev. 13:50; 15:11; Dut. 23:13) LiBhayibheli lakhuluma ngaletintfo, kodvwa bososayensi babone eminyakeni lengaba ngu-150 leyendlulile kutsi tifo titsatselwana njani. Ngabona nekutsi imitsetfo lemayelana nekuya ecansini lebhalwe kuLevithikhusi beyisita sonkhe sive sema-Israyeli kutsi sihlale siphilile. (Lev. 12:1-6; 15:16-24) Ngabona kutsi uMdali wanika ema-Israyeli lemitsetfo kuze avikeleke nekutsi labo lebebayilalela bebabusiswa. Ngaciniseka kutsi liBhayibheli liphefumulelwe nguNkulunkulu, ngisho nobe bengingalati libito lakhe ngaleso sikhatsi.

Ngesikhatsi ngisafundzela budokotela, ngahlangana nalomunye sisi lokutsiwa nguLydie, futsi ngamtsandza. Sashada nga-1965 ngisengakacedzi kufundza. Nga-1971, bese sinebantfwana labatsatfu, bekuseta labanye labatsatfu. Lydie ungisite kakhulu ngisenta umsebenti webudokotela kanye nasekhaya.

 Ngasebenta esibhedlela iminyaka lemitsatfu ngaphambi kwekutsi ngibe nesami sibhedlela. Ngekushesha nje ngemuva kwaloko, laba labashadene lengikhulume ngabo ekucaleni beta esibhedlela batokwelashwa. Bengisatobhala imitsi lokufanele itfolwe ngulendvodza ngesikhatsi umfati wayo atsi: “Sicela lemitsi ibe bete ingati.” Ngamangala, ngabuta ngatsi: “Usho mbamba? Leni?” Watsi: “SiBoFakazi BaJehova.” Bengicala kuva ngaBoFakazi BaJehova nobe ngaloko labakukholelwako ngengati. Lomfati wakhipha liBhayibheli lakhe wangikhombisa livesi lebelibenta bangayisebentisi ingati. (Imis. 15:28, 29) Bangikhombisa loko lokutawentiwa nguMbuso waNkulunkulu, kutsi utawucedza kuhlupheka, kugula nekufa. (Semb. 21:3, 4) Ngimangele ngatsi: “Loku leningitjela kona bengisolo ngikufisa kusukela ngisemncane! Lokwangenta ngaba ngudokotela kutsi bengifuna kusita bantfu bangahlupheki kakhulu.” Ngajabula kakhulu kangangekutsi sacoca li-awa nehhafu. Batsi nabahamba, bengingasafuni kuba liKatolika futsi ngafundza kutsi loMdali lebengimtsandza bekaneligama lelitsi Jehova!

Lalabashadene beta esibhedlela sami tikhatsi letintsatfu futsi njalo nabefikile besicoca sikhatsi lesingetulu kweli-awa. Ngabacela kutsi bete ekhaya lami kuze sibe nesikhatsi lesinyenti sekucoca ngeliBhayibheli. Nanobe Lydie avuma kuba khona nasidadisha liBhayibheli, kodvwa bekangavumi kutsi letinye timfundziso temaKatolika lebesifundziswe tona betingemanga. Ngako ngacela umphristi kutsi asivakashele ekhaya. Saphikisana ngetintfo letifundvwa esontfweni kwaze kwaba sebusuku kakhulu, sisebentisa nje liBhayibheli. Loko besicoca ngako kwenta Lydie waciniseka kutsi BoFakazi BaJehova bafundzisa liciniso. Ngemuva kwaloko, samtsandza kakhulu Jehova Nkulunkulu futsi sabhajatiswa nga-1974.

Loko lengakufundza ngenjongo yaNkulunkulu ngebantfu kwatitsintsa tintfo lebetita kucala ekuphileni kwami. SinaLydie sakhetsa kutsi sente kukhonta Jehova kute kucala ekuphileni kwetfu. Satimisela kukhulisa bantfwana betfu ngekuvumelana netimiso letiseBhayibhelini. Safundzisa bantfwana betfu kutsandza Nkulunkulu kanye nebantfu futsi loko kwasenta saba ngumndeni lonebunye.—Mat. 22:37-39.

SinaLydie sihle sihleka nasikhumbula indlela bantfwana betfu bebabona ngayo kutsi sinebunye. Bebati kutsi siyasisebentisa ekhaya seluleko saJesu lesitsi ‘“yebo” wakho akabe nguyebo,  na-“Cha” wakho abe ngucha.’ (Mat. 5:37) Nasi sibonelo, Lydie walela indvodzakati yetfu lebeyineminyaka lengu-17 kutsi ihambe nalabanye labangangayo. Lomunye wabo watjela indvodzakati yetfu watsi: “Nangabe make wakho angafuni, cela kubabe wakho!” Yona yatsi: “Angeke kusite ngobe bahlale bavumelana.” Bantfwabetfu bebabona kutsi sibambisene ekusebentiseni timiso teliBhayibheli. Sijabula kakhulu lamuhla ngekutsi umndeni wetfu semkhulu futsi sikhonta Jehova.

Nanobe liciniso latishintja tintfo letita kucala ekuphileni kwami, kodvwa bengifuna kusebentisa lwati lwami lwebudokotela kuze ngisite bantfu baNkulunkulu. Ngako ngavolontiya kuba ngudokotela waseBethel leseParis futsi ngekuhamba kwesikhatsi ngasita eBethel leseLouviers. Sekuphele iminyaka lengaba ngu-50 ngisita eBethel emalanga latsite. Kulesikhatsi, ngitfole bangani labangemalunga emndeni waseBethel futsi labanye babo sebaseminyakeni yabo-90. Ngamangala ngalelinye lilanga nangihlangana nalelinye lilunga lelisha lemndeni waseBethel. Ngeva kutsi bengisite make wakhe kutsi ambeleke eminyakeni lengaba ngu-20 leyendlulile!

Kuyo yonkhe leminyaka, ikhulile indlela lengimtsandza ngayo Jehova nangibona indlela labacondzisa ngayo bantfu bakhe nalabavikela ngayo asebentisa inhlangano yakhe. Ekucaleni kwabo-1980, Sigungu LeSibusako sasungula luhlelo eMelika lolwasita kutsi kube nekukhulumisana emkhatsini wabodokotela naBoFakazi BaJehova.

Ngemuva kwaloko, nga-1988, Sigungu LeSibusako sasungula litiko lelisha eBethel lelibitwa ngekutsi liHhovisi Lelinakekela Tindzaba Tetibhedlela. Ekucaleni lelihhovisi belibuke iKomidi Yekubonisana Netibhedlela lebeyisungulwe eMelika kuze kusitwe boFakazi kutsi belashwe kahle. Ngesikhatsi lamaKomidi Ekubonisana Netibhedlela asungulwa emhlabeni wonkhe, yaba khona naseFrance. Kwangijabulisa kubona indlela inhlangano yaJehova lebasekela ngayo bazalwane nabodzadze labagulako nabadzinga lusito!

Bengibutsandza kakhulu budokotela. Kodvwa njengobe bengicabanga ngalebekuta kucala ekuphileni kwami, ngabona kutsi lebekubaluleke kakhulu bekukusita bantfu kutsi bati futsi bakhonte Jehova Nkulunkulu, longuMtfombo wekuphila. Ngemuva kwekutsatsa umhlalaphansi, mine naLydie saba ngemahlahlandlela kuze sifundzise bantfu tindzaba letimnandzi teMbuso waNkulunkulu. Nalamuhla siyachubeka senta konkhe lesingakwenta kulomsebenti lobalulekile.

Ngiyachubeka nekwenta konkhe lengingakhona kukwenta kuze ngisite labagulako. Kodvwa ngiyati kutsi ngisho nadokotela lonelikhono angeke akhone kukwelapha konkhe kugula nobe kuvimba bantfu kutsi bangafi. Ngako ngisibuke ngalabovu sikhatsi lapho khona buhlungu, kugula nekufa kutawube kungasekho. Kuleso sikhatsi lesisondzela ngekushesha, ngitawuba nelitfuba lekufundza lokunyenti ngendalo yaNkulunkulu, lokufaka ekhatsi indlela lemangalisako ladala ngayo umtimba wemuntfu. Lokunye kwaloko bengikufisa nangisemncane sekufezekile. Ngiyaciniseka kutsi kuseta lokuncono kakhulu!