1-2. Yini lomunye lomdzala welibandla layifundza mayelana nekuniketa seluleko?

 EMINYAKENI leminyenti leyendlulile, labadzala belibandla lababili bavakashela dzadze lobesekanesikhatsi angabi khona njalo emihlanganweni yelibandla. Lomunye walaba labadzala wafundza leminye imibhalo nalodzadze lekhuluma ngekubaluleka kwekuba khona emihlanganweni. Bekacabanga kutsi ukhutsatekile lodzadze, kodvwa batsi nasebahamba, lodzadze watsi: “Anisicondzi simo lengikuso.” Labazalwane baniketa lodzadze seluleko bangakambuti kutsi ngutiphi tinkinga labhekene nato. Ngako lodzadze weva shengatsi leseluleko asimsiti.

² Lolomdzala welibandla lowafundzela lodzadze imibhalo utsi: “Ngaleso sikhatsi, bengicabanga kutsi lodzadze akasihloniphi. Kodvwa ngabese ngiyabona kutsi nanobe bengimfundzele imibhalo lekahle langayisebentisa, bekufanele ngabe ngicale ngambuta imibuto lenjengaletsi: ‘Ihamba njani imphilo?’ ‘Ngingakusita njani?’” Lomzalwane wafundza sifundvo lesihle kuloku lokwenteka. Lamuhla ungumelusi loneluvelo futsi lobasitako labanye.

3. Bobani ebandleni labanganiketa seluleko?

 ³ Njengobe babelusi, labadzala belibandla banemsebenti wekuniketa labanye seluleko nakudzingekile. Nanobe kunjalo, kunetikhatsi lapho khona labanye ebandleni kungadzingeka kutsi banikete seluleko. Sibonelo nje, umzalwane nobe dzadze anganiketa umngani wakhe seluleko lesisekelwe eBhayibhelini. (Hla. 141:5; Taga 25:12) Nobe dzadze losakhulile ‘angeluleka bafati labasebasha’ mayelana naletinye tintfo, letinjengaleto  lokukhulunywa ngato KuThithusi 2:3-5. Ngaletinye tikhatsi batali kuyadzingeka kutsi beluleke bantfwana babo. Nanobe lesihloko sicondziswe kakhulu kulabadzala belibandla, sonkhe singazuza ngekufundza ngetindlela lesingasiniketa ngato seluleko lesilusito ‘nalesitakwenta inhlitiyo ijabule.’—Taga 27:9.

4. Sitawucoca ngani kulesihloko?

⁴ Kulesihloko, sitawucoca ngemibuto lemine lokufanele sitibute yona nasifuna kuniketa seluleko: (1) Ngusiphi sizatfu lesivakalako sekuniketa leseluleko? (2) Siyadzingeka yini vele leseluleko? (3) Ngubani lokufanele anikete leseluleko? (4) Ungasiniketa njani seluleko lesilusito?

5. Nangabe lomdzala welibandla anesizatfu lesihle sekunika seluleko, loko kungamsita njani kutsi eluleke ngendlela lekahle? (1 KubaseKhorinte 13:4, 7)

⁵ Labadzala belibandla bayabatsandza bazalwane babo nabodzadze. Ngaletinye tikhatsi, lolutsandvo balukhombisa ngekutsi beluleke lotsite losengotini yekwenta intfo lembi. (Gal. 6:1) Ngaphambi kwekutsi lomdzala welibandla akhulume nalotsite, kungaba kahle kutsi acale acabange ngaletinye tintfo Pawula latisho mayelana nelutsandvo, nakatsi: “Lutsandvo luyabeketela futsi lunemusa. . . . Lucinisela kuto tonkhe tintfo, lukholwa ngito tonkhe tintfo, lwetsemba tonkhe tintfo, lubeketelela tonkhe tintfo.” (Fundza 1 KubaseKhorinte 13:4, 7.) Kuzindla ngalamavesi kutawusita lomdzala welibandla kutsi acabangisise ngesizatfu sakhe sekuniketa seluleko futsi akhulume nalomzalwane ngendlela lekahle. Nangabe lona lowelulekwako abona kutsi lomzalwane lomdzala welibandla uyamkhatsalela, manyenti ematfuba ekutsi asemukele leseluleko.—Rom. 12:10.

6. Ngusiphi sibonelo lesihle umphostoli Pawula lasibekela sona?

⁶ Njengobe umphostoli Pawula bekangulomdzala welibandla, wasibekela sibonelo lesihle. Sibonelo nje, wabeluleka bazalwane baseThesalonika ngesikhatsi badzinga kwelulekwa. Nanobe kunjalo, etincwadzini lababhalela tona, Pawula wacale wabancoma ngemsebenti lebebawenta ngekwetsembeka, ngekutikhandla kwabo ngelutsandvo nangekucinisela kwabo. Wacabanga nangetimo lebebakuto, wavuma kutsi kuphila kwabo bekumatima nekutsi bebacinisela ngisho baphatfwa kabi. (1 Thes. 1:3; 2 Thes. 1:4) Waphindze wabatjela labazalwane kutsi basibonelo lesihle kulamanye emaKhristu. (1 Thes. 1:8, 9) Bajabula kakhulu ngalokunconywa nguPawula! Siyaciniseka kutsi Pawula bekabatsandza kakhulu bazalwane bakhe. Kungako akhona kuniketa leseluleko sakhe lesihle kuletincwadzi takhe letimbili lebetiya kubaseThesalonika.—1 Thes. 4:1, 3-5, 11; 2 Thes. 3:11, 12.

7. Yini lengenta lotsite angasemukeli seluleko?

⁷ Yini lengenteka nangabe seluleko singakasiniketi ngendlela lekahle? Lomunye umzalwane losanesikhatsi angulomdzala welibandla utsi: “Labanye abasemukeli seluleko, hhayi ngobe kukhona lokubi ngaleseluleko, kodvwa ngenca yekutsi asikaniketwa ngendlela lekahle.” Yini lesingayifundza kuloku? Kumelula kusemukela seluleko nangabe siniketwe ngelutsandvo, hhayi nangabe lona losiniketako acansukile.

8. Yini lomdzala welibandla lokufanele atibute yona ngaphambi kwekutsi eluleke lotsite?

⁸ Labadzala belibandla akukafaneli bajake kuniketa seluleko. Ngaphambi kwekutsi lomdzala welibandla eluleke lotsite, kufanele atibute: ‘Kuyadzingeka yini vele kutsi ngisho  lokutsite? Ngiyaciniseka yini kutsi wenta intfo lekabi? Ukhona yini umyalo loseBhayibhelini langawulaleli? Nobe umane nje wenta tintfo ngendlela leyehlukile kuneyami?’ Labadzala belibandla bayakubalekela ‘kujaka kukhuluma.’ (Taga 29:20) Nangabe lomdzala welibandla angaciniseki kutsi lotsite uyasidzinga yini seluleko, angabuta lomunye lomdzala kutsi ucabanga kutsi lomzalwane wenta intfo lekabi yini nekutsi uyakudzinga yini kwelulekwa.—2 Thim. 3:16, 17.

9. Yini lesiyifundza kuPawula ngendlela lesingasiniketa ngayo seluleko lesimayelana nekugcoka nekutilungisa? (1 KuThimothi 2:9, 10)

⁹ Cabanga nganasi sibonelo. Asesitsi lomdzala welibandla ukhatsatekile ngendlela ummemeteli lagcoka ngayo nobe latilungisa ngayo. Lona lomdzala angahle atibute: ‘Sikhona yini sizatfu lesisekelwe eBhayibhelini lesingangenta ngisho lokutsite?’ Ngenca yekutsi akafuni kwentiwe lokufunwa nguye, angahle acele umbono walomunye lomdzala welibandla nobe ummemeteli lovutsiwe. Bangabese babuka seluleko saPawula lesimayelana nekugcoka nekutilungisa. (Fundza 1 KuThimothi 2:9, 10.) Pawula washo timiso letiveta kutsi umKhristu kufanele agcoke ngendlela lekahle, lezitsile naleveta kutsi uvutsiwe. Kodvwa akazange abeke imitsetfo yekutsi umuntfu kufanele agcoke ini nobe angagcoki ini. Bekati kutsi emaKhristu angagcoka nobe yini layifunako, kuphela nje nakuvumelana naloko lokushiwo liBhayibheli. Ngako nabancuma kutsi seluleko siyadzingeka yini, labadzala belibandla kufanele bacabange ngekutsi loko umuntfu lakukhetsile kuveta kutsi uzitsile yini nekutsi uvutsiwe yini.

10. Yini lokufanele sihlale siyikhumbula mayelana netincumo talabanye?

¹⁰ Kufanele sikhumbule kutsi emaKhristu lamabili angenta tincumo letingafani kodvwa letikahle. Kufanele singabaphoceleli bazalwane betfu kutsi bente tintfo ngendlela tsine lesicabanga kutsi ikahle.—Rom. 14:10.

11-12. Nangabe seluleko sidzingeka, ngumiphi imibuto lomdzala welibandla lokufanele atibute yona, futsi yini leyenta kudzingeke atibute lemibuto?

¹¹ Nakubonakala kutsi seluleko siyadzingeka, singatibuta: Ngubani lokufanele anikete leseluleko? Ngaphambi kwekutsi lomdzala welibandla eluleke dzadze loshadile nobe umntfwana, angakhuluma nenhloko yemndeni futsi kungenteka itsandze kutsi kube ngiyo lekhipha leseluleko. * Nobe kungenteka lenhloko yemndeni icele kuba khona lapho lolomdzala welibandla akhipha leseluleko. Njengobe sibonile  kusigaba 3, kungenteka kube netimo lapho kuba ncono khona kutsi kube  ngudzadze losakhulile loluleka dzadze losemusha.

¹² Kunalokunye lomdzala welibandla lokufanele acabange ngako. Angatibuta: ‘Kukahle yini kutsi kube ngimi lokhipha leseluleko, nobe lona lowelulekwako angasemukela kahle yini nakangelulekwa ngulomunye?’ Nasi sibonelo, kungaba melula ngalotsite lotibukela phasi kwemukela seluleko salomdzala welibandla lobekanenkinga lefanako. Lomzalwane longulomdzala lobekanenkinga lefanako angakhona kuvelana naye kakhudlwana futsi loko lakushoko kungemukelwa kahle. Nanobe kunjalo, bonkhe labadzala belibandla banemsebenti wekukhutsata bazalwane babo nabodzadze kuze bente lushintjo, bente tintfo ngendlela levumelana nemiBhalo. Lokubaluleke kakhulu kutsi siniketwe seluleko nakudzingekile.

13-14. Kubaluleke ngani kutsi lomdzala welibandla alalele?

¹³ Kulungele kulalela. Nangabe lomdzala welibandla afuna kuyoniketa lotsite seluleko, kufanele atibute: ‘Ngutiphi tinkinga lanato lomzalwane? Kwentekani ekuphileni kwakhe? Unetinkinga lengingatati yini? Yini layidzinga kakhulu nyalo?’

¹⁴ Simiso lesibhalwe kuJakobe 1:19 siyasebenta kulabo labaniketa seluleko. Jakobe wabhala watsi: “Wonkhe umuntfu kufanele asheshe kulalela, ephute kukhuluma, ephute nekutfukutsela.” Lomdzala welibandla angase acabange kutsi uwati onkhe emaciniso endzaba, kodvwa uwati onkhe yini vele? Taga 18:13 titsi: “Loyo lophendvula indzaba letsite angakaweva emaciniso ayo usilima futsi utihlaza yena.” Kukahle kutfola onkhe emaciniso kumnikati wendzaba. Kuze uwatfole, kufanele ulalele ngaphambi kwekutsi ukhulume. Khumbula sifundvo lesafundvwa ngulomzalwane lesikhulume ngaye ekucaleni kwalesihloko. Wabona kutsi kunekutsi afike asho loko lebekakulungiselele, bekufanele ngabe wabuta lodzadze imibuto lefana naletsi: “Ihamba njani imphilo?” “Ngingakusita njani?” Nangabe labadzala belibandla batinika sikhatsi sekutfola onkhe emaciniso, bangabasita bazalwane babo nabodzadze futsi babakhutsate.

15. Labadzala belibandla bangasisebentisa njani simiso lesikuTaga 27:23?

¹⁵ Wati umhlambi. Njengobe sibonile ekucaleni, kuniketa seluleko lesikahle kusho lokungetulu nje kwekufundza imibhalo lembalwa nobe kusho imibono yakho. Bazalwane nabodzadze kufanele babone kutsi uyabatsandza, uyasicondza simo sabo nekutsi ufuna kubasita. (Fundza Taga 27:23.) Labadzala belibandla kufanele bente konkhe labangakwenta kuze bakhe bungani nebazalwane babo nabodzadze.

16. Yini lengasita labadzala belibandla kutsi banikete seluleko lesihle?

¹⁶ Labadzala belibandla abafuni kutsi  bazalwane babo bacabange kutsi bakhuluma nabo kuphela nangabe bafuna kubeluleka. Kunaloko, bahlale bakhuluma nabo, bakhombise kutsi bayabakhatsalela nababhekana netinkinga. Lomunye umzalwane losekanesikhatsi angulomdzala welibandla utsi: “Nawenta njalo, utawuba ngumngani wabo. Kutawuba melula kutsi ubeluleke nakudzingeka.” Nalona lowelulekwako utakutfola kumelula kwemukela leseluleko.

17. Kunini lapho lomdzala welibandla kudzingeka abe nesineke khona futsi abe nemusa?

¹⁷ Bani nesineke futsi ube nemusa. Kuba nesineke nekuba nemusa kuyadzingeka nangabe lotsite angafuni kwemukela seluleko lesivela eBhayibhelini. Lomdzala welibandla akukafaneli atfukutsele nangabe umzalwane nobe dzadze angasemukeli ngekushesha seluleko nobe angasisebentisi. LiBhayibheli nalikhuluma ngaJesu litsi: ‘Ngeke awufohlote umhlanga lofafabukile, ngeke ayicime nentsambo yesibane lelotitako.’ (Mat. 12:20) Ngako nakatithantazela, lomdzala welibandla angacela Jehova asite lona lodzinga seluleko kutsi acondze sizatfu lesenta adzinge leseluleko nekutsi asisebentise. Kungenteka lomzalwane lonikwa seluleko udzinga sikhatsi sekutsi acabange ngaloko latjelwe kona. Nangabe lomdzala welibandla anesineke futsi anemusa, kutawuba melula kutsi lomzalwane lowelulekwako anake lomlayeto hhayi indlela lelulekwa ngayo. Kodvwa ngaso sonkhe sikhatsi, seluleko kufanele sisekelwe eVini laNkulunkulu.

18. (a) Yini lokufanele siyikhumbule nasiniketa seluleko? (b) Njengobe sibona kulesitfombe lesikulelibhokisi, labatali bakhuluma ngani?

¹⁸ Fundza emaphutseni akho. Njengobe sisenesono, angeke sikhone kukwenta kahle konkhe loku lesifundze ngako kulesihloko. (Jak. 3:2) Sitawenta emaphutsa, futsi nasiwenta, kufanele setame kufundza kuwo. Nangabe bazalwane betfu nabodzadze babona kutsi siyabatsandza, kungaba melula kusicolela nangabe sibaphetse kabi ngaloko lesikukhulumile nobe lesikwentile.—Buka nelibhokisi lelitsi “ Umlayeto Loya Kubatali.”

19. Singayenta njani inhlitiyo yebazalwane betfu nabodzadze ijabule?

¹⁹ Njengobe sibonile, akusimelula kuniketa seluleko lesihle. Sinesono, futsi nalabo lesibelulekako banesono. Hlale utikhumbula timiso lesicoce ngato kulesihloko. Ngaphambi kwekutsi unikete seluleko, ciniseka kutsi unesizatfu lesihle. Ngetulu kwaloko, ciniseka kutsi leseluleko sidzingeka mbamba nekutsi nguwe lokufanele usinikete. Ngaphambi kwekukhipha seluleko, buta imibuto futsi ulalelisise kuze ucondze tinkinga talona lofuna kumeluleka. Yetama kubuka tintfo ngendlela latibuka ngayo. Bani nemusa, futsi ube ngumngani webazalwane bakho nabodzadze. Khumbula kutsi umgomo wetfu akusiko nje kuniketa seluleko lesilusito kodvwa sifuna nekutsi ‘sente inhlitiyo ijabule.’—Taga 27:9.