1-2. (a) Yini Jehova layibonako nangabe tigidzi tebantfu tisemkhosini weSidlo SeNkhosi Sakusihlwa? (Buka sitfombe lesisekhasini lekucala.) (b) Sitawucoca ngani kulesihloko?

CABANGA kutsi yini Jehova layibonako nangabe tigidzigidzi tebantfu emhlabeni wonkhe tiba khona emkhosini weSidlo SeNkhosi Sakusihlwa. Akabuki nje linani lebantfu labakhona kuphela, kodvwa unaka umuntfu ngamunye lokhona. Nasi sibonelo, uyababona labo lababa khona njalo ngemnyaka. Labanye beta ngisho nobe bahlushwa kabuhlungu. Labanye ababi khona njalo kuyo yonkhe imihlangano, kodvwa beta njalo eSikhumbutweni ngoba bayabona kutsi kubaluleke kakhulu kutsi babe khona. Jehova uyababona labo labacalako kuta eSikhumbutweni, mhlawumbe ngenca yekutsi bafuna kubona kutsi kwentekani.

² Siyaciniseka kutsi Jehova uyajabula nakabona bantfu labanyenti baba khona eSikhumbutweni. (Luk. 22:19) Nanobe kunjalo, akajatjuliswa linani lebantfu lababa khona, kodvwa unaka kakhulu sizatfu lesibenta babe khona noma tisusa tabo. Kulesihloko, sitawucoca ngemphendvulo yembuto lobaluleke kakhulu lotsi: Yini lesenta sibe khona emkhosini weSikhumbuto loba khona njalo ngemnyaka kanye nasemihlanganweni yamaviki onkhe Jehova layilungiselele bantfu labamtsandzako?

3-4. (a) Kungani siya emihlanganweni? (b) Kuba khona njalo emihlanganweni kukhombisa kutsi sibantfu labanjani? (c) Ngekusho kwa-1 Khorinte 11:23-26, kungani kufanele siye njalo eSikhumbutweni?

³ Sizatfu lesiyinhloko lesisenta siye emihlanganweni yelibandla kutsi kuyincenye yekukhonta Jehova. Lesinye sizatfu kutsi Jehova usebentisa imihlangano kute asifundzise. Bantfu  labatigcabhako abakholelwa kutsi tikhona tintfo lokufanele bafundziswe tona. (3 Joh. 9) Ngalokwehlukile, tsine siyakulangatelela kufundziswa nguJehova kanye nenhlangano yakhe layisebentisako.—Isa. 30:20; Joh. 6:45.

⁴ Nangabe siya emihlanganweni, sikhombisa kutsi sitfobekile, sikulungele futsi siyafisa kufundziswa. Entsambama ngelilanga leSikhumbuto sekufa kwaJesu, siba khona kulomkhosi lobalulekile, hhayi ngoba kufanele sibe khona, kodvwa ngoba sitfobekile futsi silalela umyalo waJesu lotsi: “Chubekani nikwenta, ningikhumbula.” (Fundza 1 Khorinte 11:23-26.) Sikhumbuto sicinisa litsemba letfu ngelikusasa siphindze sisikhumbute kutsi Jehova usitsandza kakhulu. Nobe kunjalo, Jehova uyati kutsi sidzinga kukhutsatwa nekucinisekiswa, hhayi nje kanye ngemnyaka. Kungako asilungiselele imihlangano yeliviki ngalinye futsi usikhutsata kutsi siye kuyo. Kutfobeka kusenta simlalele. Njalo ngeliviki, sicitsa ema-awa lamanyenti silungiselela imihlangano siphindze sibe khona kuyo.

5. Kungani bantfu labatfobekile basemukela simemo sekufundziswa nguJehova?

⁵ Njalo ngemnyaka, bantfu labanyenti labatfobekile bayasemukela simemo sekufundziswa nguJehova. (Isa. 50:4) Bayakujabulela kuba khona eSikhumbutweni futsi babese bacala kuya nakuleminye imihlangano. (Zak. 8:20-23) Sonkhe siyakujabulela kufundziswa nekucondziswa nguJehova ‘longumsiti [wetfu] nemkhululi [wetfu.]’ (Hla. 40:17) Yini vele lengasenta sijabule noma lebaluleke kakhulu kwengca kwemukela simemo sekufundziswa nguJehova naJesu loyiNdvodzana yakhe layitsandza kakhulu?—Mat. 17:5; 18:20; 28:20.

6. Kutfobeka kwayisita njani lenye indvodza kutsi iye eSikhumbutweni?

⁶ Njalo ngemnyaka, senta imetamo kute simeme bantfu labanyenti kutsi babe khona eSikhumbutweni sekufa kwaJesu. Bantfu labanyenti labatfobekile kunyenti labakuzuzile ngekwemukela lesimemo. Cabanga nganasi sibonelo. Eminyakeni leminyenti leyendlulile, lenye indvodza yatfola simemo sekuba khona eSikhumbutweni, kodvwa yatjela lomzalwane lowayimema kutsi angeke ibe khona. Kodvwa ngelilanga leSikhumbuto, lomzalwane wamangala kakhulu nakabona lendvodza ingena eHholweni LeMbuso. Lendvodza yajabula kakhulu ngendlela leyemukelwa ngayo futsi yacala kuba khona njalo emihlanganweni. Ecinisweni ngemnyaka lowalandzela yalahlekelwa yimihlangano lemitsatfu nje kuphela. Yini leyayisita yancuma kuba khona kuyo yonkhe imihlangano? Yakhona kushintja indlela lebeyicabanga ngayo ngoba beyilungile. Lomzalwane lowayimema eSikhumbutweni watsi: “Lendvodza ingumuntfu lotfobeke kakhulu.” Asingabati kutsi nguJehova lowadvonsela lendvodza ekukhonteni kweliciniso futsi nyalo seyibhajatisiwe.—2 Sam. 22:28; Joh. 6:44.

7. Lesikufundza emihlanganweni kanye naseBhayibhelini kungasisita njani kutsi sitfobeke?

⁷ Loko lesikufundza emihlanganweni kanye nalesikufundza eBhayibhelini kusisita kutsi sitfobeke. Nasekusele emaviki lambalwa kufike Sikhumbuto, emihlanganweni sivame kufundza ngesibonelo saJesu kanye nekutfobeka lakukhombisa ngekutsi anikele ngekuphila kwakhe kube yinhlawulo. Nasekutawufika Sikhumbuto, sikhutsatwa kutsi sifundze tindzaba letiseBhayibhelini letiphatselene nekufa kanye nekuvuswa kwaJesu. Lesikufundza emihlanganweni kanye nalesikufundza etindzabeni letiseBhayibhelini kusenta simbonge kakhulu Jesu ngemhlatjelo lasentela wona. Sifuna kulingisa kutfobeka kwakhe futsi sente intsandvo yaJehova ngisho nobe sibhekana nebumatima.—Luk. 22:41, 42.

8. Jesu wakhombisa njani kutsi unesibindzi?

⁸ Siphindze setame kulingisa Jesu ngekutsi sibe nesibindzi. Cabanga ngesibindzi lasikhombisa ngemalanga angaphambi kwekufa kwakhe. Bekati kahle kutsi titsa takhe ngekushesha betitamhlambalata, timshaye, futsi timbulale. (Mat. 20:17-19) Nanobe kunjalo, bekatimisele kusifela. Nasifika leso sikhatsi, watjela baphostoli bakhe labebatsembekile labekanabo eGetsemane watsi: “Sukumani sihambe! Ngobe loyo lotangitsengisa sewusedvute.” (Mat. 26:36, 46) Ngesikhatsi emasotja lahlomile atombopha, wasondzela kuwo, wativeta wase utjela lamasotja kutsi ayekele baphostoli bahambe. (Joh. 18:3-8) Jesu wakhombisa kutsi unesibindzi. Lamuhla, emaKhristu lagcotjiwe kanye naletinye timvu tetama kamatima kulingisa Jesu ngekutsi tikhombise kuba nesibindzi. Bakwenta njani loko?

9. (a) Yini lengasenta sidzinge sibindzi kute sibe khona njalo emihlanganweni? (b) Sibonelo setfu singabatsintsa njani bazalwane lababoshiwe ngenca yekukholwa kwabo?

⁹ Nasibhekene netimo letimatima, kungahle kudzingeke kutsi sibe nesibindzi kute sibe khona njalo emihlanganweni. Labanye bazalwane nabodzadze baba khona emihlanganweni ngisho noma babhekene nelusizi, timo leticedza emandla noma tinkinga temphilo. Labanye badzinga sibindzi kute babe khona emihlanganweni nabaphikiswa kabuhlungu ngemalunga emindeni yabo noma tiphatsimandla. Ase ucabange nje kutsi sibonelo setfu sekuba nesibindzi sibatsintsa njani bazalwane lababoshwe ngenca yekukholwa kwabo. (Heb. 13:3) Nabeva kutsi sichubeka setsembekile kuJehova nanobe sivivinywa bayakhutsateka kutsi bahlale banekukholwa lokucinile, babe nesibindzi futsi betsembeke. Kwenteka lokufanako nakumphostoli Pawula. Ngesikhatsi asejele laseRoma, wajabula nakeva kutsi bazalwane bakhe bebachubeka bakhonta Jehova ngekwetsembeka. (Fil. 1:3-5, 12-14) Nasekatawukhululwa, noma ngekushesha nje ngemuva kwekukhululwa kwakhe, umphostoli Pawula wabhala incwadzi lebeyiya kumaHebheru. Kuleyo ncwadzi, wakhutsata emaKhristu labetsembekile kutsi ahlale ‘anelutsandvo lwebuzalwane’ futsi angayekeli kuhlangana ndzawonye.—Heb. 10:24, 25; 13:1.

10-11. (a) Bobani lokufanele sibamemele eSikhumbutweni? (b) Ngutiphi tizatfu letiku-Efesu 1:7 letisenta sibameme?

¹⁰ Sisuke sikhombisa kutsi sinesibindzi nangabe simema tihlobo tetfu, lesisebenta nabo kanye nabomakhelwane betfu kutsi babe khona eSikhumbutweni. Kungani kufanele sibameme? Kungobe siyajabula ngaloko Jehova naJesu labasentela kona, ngako ngeke siyekele kumema labanye kutsi babe khona eSikhumbutweni. Sifuna nabo bafundze kutsi bangazuza ‘emseni lomkhulu’ Jehova lasikhombisa wona ngenhlawulo.—Fundza Efesu 1:7; Semb. 22:17.

¹¹ Nangabe sikhombisa kuba nesibindzi ngekutsi sihlangane ndzawonye, sisuke sikhombisa kutsi sinebuntfu Jehova naJesu lababukhombisako ngetindlela letehlukene.

12. (a) Imihlangano isenta njani simtsandze kakhulu Jehova naJesu? (b) Umbhalo wa-2 Khorinte 5:14, 15 usikhutsata kutsi senteni kute silingise Jesu?

¹² Kutsandza Jehova naJesu kusenta sibe khona njalo emihlanganweni. Tintfo lesitifundzako emihlanganweni tisenta simtsandze kakhulu Jehova kanye neNdvodzana yakhe. Emihlanganweni sihlale sikhunjutwa ngaloko labasentela kona. (Rom. 5:8) Ngalokukhetsekile, Sikhumbuto sisisita sikhumbule kutsi Jehova naJesu batsandza ngisho nebantfu labangati kutsi inhlawulo ibaluleke kangakanani. Setama kulingisa Jesu onkhe malanga kute sikhombise kutsi siyabonga ngenhlawulo. (Fundza 2 Khorinte 5:14, 15.) Ngetulu kwaloko, siyakhutsateka kutsi simdvumise ngalokusuka enhlitiyweni Jehova ngenca yenhlawulo. Lenye indlela lesingamdvumisa ngayo kutsi siphendvule nasisemihlanganweni.

13. Singakhombisa njani kutsi simtsandza kakhulu Jehova neNdvodzana yakhe? Chaza.

¹³ Sikhombisa kutsi simtsandza kakhulu Jehova neNdvodzana yakhe nangabe sitimisele kudzela nome yini ngenca yabo. Ngalokuvamile sidzela tintfo letehlukahlukene kute sibe khona emihlanganweni. Emabandla lamanyenti aba namunye umhlangano entsambama, futsi labanyenti betfu kungenteka basuke badziniwe njengobe basuke babuya emisebentini. Lomunye umhlangano uba ngemphelasontfo ngesikhatsi labanye labaphumula ngaso. Jehova uyabona yini kutsi siyatikhandla kute sibe khona emihlanganweni ngisho noma sidziniwe? Siyaciniseka kutsi uyabona! Ecinisweni, Jehova uyibona yonkhe imetamo lesiyentako kute sibe khona njalo emihlanganweni futsi uyayijabulela.—Mak. 12:41-44.

14. Jesu wasibekela njani sibonelo sekukhombisa lutsandvo lwekutidzela?

¹⁴ Jesu wasibekela sibonelo lesihle kakhulu sekukhombisa lutsandvo lwekutidzela. Bekatimisele kufela bafundzi bakhe, futsi onkhe malanga bekabeka tidzingo tabo kucala kunetakhe. Sibonelo saloko kutsi bekaya kubo ngisho noma adziniwe nobe acindzetelekile. (Luk. 22:39-46) Bekanaka kakhulu loko bekangakwentela labanye, hhayi loko labangamentela kona. (Mat. 20:28) Nangabe simtsandza kakhulu Jehova nebazalwane betfu, sitawenta konkhe lokusemandleni etfu kute sibe khona eSikhumbutweni nakuyo yonkhe imihlangano yelibandla.

15. Bobani lesifuna kubasita ngalokukhetsekile?

 ¹⁵ Siyincenye yebazalwane labasenkholweni yeliciniso futsi siyakujabulela kucitsa sikhatsi lesinyenti sisita labanye kutsi nabo babe kuyo. Nobe kunjalo, sifisa ngalokukhetsekile kusita bantfu “labahlobene natsi ekukholweni” kodvwa labangasayi ensimini kanye nasemihlanganweni. (Gal. 6:10) Sikhombisa kutsi siyabatsandza nasibakhutsata kutsi babe khona emihlanganweni ikakhulukati eSikhumbutweni. Silingisa Jehova naJesu ngekutsi sijabule nangabe ummemeteli lopholile abuyela kuJehova longuBabe wetfu lositsandzako neMelusi wetfu.—Mat. 18:14.

16. (a) Singakhutsatana njani, futsi imihlangano yetfu itasisita njani? (b) Kungani lesi kusikhatsi lesikahle sekukhumbula emavi aJesu lakuJohane 3:16?

¹⁶ Kulamaviki letako, yenta konkhe lokusemandleni akho kute umeme bantfu labanyenti kutsi babe khona eSikhumbutweni lesitawuba ngaLesihlanu, April 19, 2019. (Buka libhokisi lelitsi “Utawubamema Yini?”) Kuwo wonkhe lomnyaka shengatsi singenta konkhe lesingakwenta kute sikhutsatane ngekutsi sibe khona kuyo yonkhe imihlangano Jehova lasilungiselele yona. Njengobe kuphela kwelelive kusondzela, imihlangano yetfu itasisita kutsi sihlale sitfobekile, sinesibindzi futsi sibatsandza labanye. (1 Thes. 5:8-11) Shengatsi singahlale sikhombisa kutsi simtsandza ngalokusuka enhlitiyweni Jehova naJesu siyabonga ngaloko labasentela kona!—Fundza Johane 3:16.