1-3. (a) Kungani Jehova bekamtsandza Solomoni, futsi ngutiphi tibusiso latitfola? (b) Kulesihloko sitawucoca ngetimphendvulo tamiphi imibuto?

NGESIKHATSI asemusha, Solomoni waba yinkhosi yaka-Israyeli. Nakacala kubusa, Jehova watibonakalisa kuye ephusheni watsi: “Cela nome ngabe yini lofuna kutsi ngikuphe yona.” Solomoni watsi: “Mine ngisengumfanyana nje, ngimncane, angati nekwati kutsi ngitawenta kanjani umsebenti wami  . . . Ngako-ke nika inceku yakho inhlitiyo lehlakaniphile  . . . kuze yehlulele kahle lesive sakho.” (1 Khos. 3:5-10) Solomoni wakhombisa kutsi abetfobekile ngekutsi acele “inhlitiyo lehlakaniphile.” Kungako Jehova bekamtsandza kakhulu Solomoni! (2 Sam. 12:24) Nkulunkulu wajabula kakhulu ngalesicelo seNkhosi Solomoni, ngako wabese uyiniketa “inhlitiyo lehlakaniphile nengcondvo lehlutekile.”—1 Khos. 3:12.

² Solomoni watfola tibusiso letinyenti ngesikhatsi etsembekile kuJehova. Waba nelilungelo lekwakha lithempeli lebelibitwa ngeligama laJehova “Nkulunkulu wema-Israyeli.” (1 Khos. 8:20) Bekadvumile ngenca yekuhlakanipha lebekakunikwe nguNkulunkulu. Tonkhe tintfo Nkulunkulu laphefumulela kutsi atisho, tabhalwa etincwadzini letintsatfu teliBhayibheli. Incwadzi yeTaga ingulenye yato.

³ Kulencwadzi kukhulunywa ngenhlitiyo tikhatsi letinyenti. Sibonelo saloko kutsi Taga 4:23 titsi: “Ngetulu kwako konkhe londvolota inhlitiyo yakho.” Kulelivesi, lisho kutsini ligama lelitsi “inhlitiyo”? Kulesihloko sitawucoca ngemphendvulo yalombuto. Sitawuphindze sicoce ngetimphendvulo tanayi imibuto lemibili: Sathane wetama njani konakalisa tinhlitiyo tetfu? Yini lesingayenta kute sivikele tinhlitiyo tetfu?  Kucondza timphendvulo talemibuto lebalulekile kutasisita sihlale setsembekile kuNkulunkulu.

4-5. (a) Umbhalo weTihlabelelo 51:6 usisita njani sicondze kutsi ligama lelitsi “inhlitiyo” lisho ini? (b) Kunakekela imitimba yetfu kusisita njani kutsi sibone kubaluleka kwekunakekela inhlitiyo yetfu lengekwemfanekiso?

⁴ Ligama lelitsi “inhlitiyo” lelisembhalweni weTaga 4:23 lisho umuntfu lesinguye ngekhatsi noma loko lesingiko. (Fundza Tihlabelelo 51:6.) Ngalamanye emagama “inhlitiyo” isho imicabango yetfu lejulile, indlela lesitiva ngayo, tisusa tetfu, kanye naloko lesikufisako. Liphindze lisho luhlobo lwemuntfu lesingilo ngekhatsi hhayi nje loko bantfu labakubonako kitsi.

⁵ Cabanga ngekutsi kunakekela imitimba yetfu kusisita njani kutsi sibone kubaluleka kwekunakekela tinhlitiyo tetfu letingekwemfanekiso. Kwekucala, kuze imitimba yetfu ihlale iphilile kufanele sidle kudla lokunemphilo siphindze sitivocavoce. Ngendlela lefanako, kuze inhlitiyo yetfu lengekwemfanekiso ihlale iphilile, kufanele sihlale sifundza liBhayibheli kanye netincwadzi letisekelwe kulo bese siyakhombisa kutsi sinekukholwa. Kute sikhombise kutsi sinekukholwa kuJehova kufanele sikusebentise loko lesikufundzako, siphindze sikhulume ngetintfo lesitikholelwako. (Rom. 10:8-10; Jak. 2:26) Kwesibili, imitimba yetfu ingabonakala iphilile kodvwa sibe sinekugula lokutsite. Ngendlela lefanako, singahle sicabange kutsi sinekukholwa lokucinile ngenca yeluhlelo lesinalo lwekukhonta Nkulunkulu ngisho sinetifiso letimbi. (1 Khor. 10:12; Jak. 1:14, 15) Kufanele sikhumbule kutsi Sathane ufuna kusenta sicabange njengaye. Sathane angetama njani kukwenta loko, futsi yini lesingayenta kute sitivikele?

6. Uyini umgomo waSathane futsi wetama njani kuwufeza?

⁶ Sathane ufuna sibe njengaye, sivukele Jehova, singatinaki timiso takhe, futsi sibe nebugovu. Sathane angeke akhone kusiphocelela kutsi sicabange njengaye futsi sente tintfo ngendlela yakhe. Ngako usebentisa letinye tindlela kuze afeze  umgomo wakhe. Nasi sibonelo, bantfu lesiphila nabo sebavele bonakaliswe yindlela Sathane lacabanga ngayo. (1 Joh. 5:19) Sathane unelitsemba lekutsi sitatihlanganisa nabo ngisho noma sati kutsi kutihlanganisa nabo “kona” indlela lesicabanga ngayo nalesenta ngayo tintfo. (1 Khor. 15:33) Nguloko Sathane lakwenta nakadukisa iNkhosi Solomoni. LeNkhosi yashada nebafati lebebakhonta bonkulunkulu bemanga futsi kancane kancane ‘bayiphambukisa’ kuJehova.—1 Khos. 11:3.

7. Yini lenye Sathane layisebentisako kute ente bantfu labanyenti bacabange njengaye?

⁷ Sathane usebentisa ema-movie kanye netinhlelo te-TV kute ente bantfu labanyenti bacabange njengaye. Uyati kutsi kucoca indzaba kuyabajabulisa bantfu futsi kuyayitsintsa indlela labacabanga ngayo, labativa ngayo, kanye netintfo labatentako. Jesu bekanelikhono lekucoca indzaba kute afundzise bantfu tifundvo letibalulekile. Cabanga ngendzaba yemSamariya lolungile kanye neyendvodzana leyahamba ekhaya futsi yadlabhatisa lifa layo. (Mat. 13:34; Luk. 10:29-37; 15:11-32) Nanobe kunjalo, bantfu labonakaliswe yindlela Sathane lacabanga ngayo bangasebentisa tindzaba letitsite kute basidukise. Ngako kufanele sicabangisise. Akhona ema-movie kanye netinhlelo te-TV letingasijabulisa kanye naletingasifundzisa ngaphandle kwekonakalisa indlela lesicabanga ngayo. Kodvwa kufanele sicaphele. Nasikhetsa tekutijabulisa, senta kahle ngekutsi sitibute: ‘Le-movie nobe luhlelo lwe-TV lungifundzisa kutsi kukahle yini kulandzela tifiso tami?’ (Gal. 5:19-21; Ef. 2:1-3) Yini lokufanele uyente nangabe ubona kutsi luhlelo lolutsite lukhutsata imicabango yaSathane? Kufanele wente ngendlela lebewutawenta ngayo kute utivikele ekutfoleni sifo lesitsatselwanako.

8. Batali bangabasita njani bantfwana babo kutsi bavikele tinhlitiyo tabo?

⁸ Batali, ninikwe umsebenti lokhetsekile wekuvikela bantfwana benu emetameni yaSathane yakonakalisa tinhlitiyo tabo. Asingabati  kutsi wenta konkhe lokusemandleni akho kute uvikele bantfwana bakho bangatfoli tifo. Ugcina likhaya lakho lihlobile, futsi ulahla nobe yini lengenta wena nobe bantfwana bakho bagule. Ngendlela lefanako, kufanele uvikele bantfwana bakho etintfweni letingabenta bacabange njengaSathane. Letintfo tingafaka ekhatsi ema-movie, tinhlelo te-TV, imidlalo ledlalwa etintfweni tebuchwephesha kanye nema-website layingoti. Jehova ukunikete umsebenti wekusita bantfwana bakho babe bangani bakhe. (Taga 1:8; Ef. 6:1, 4) Ngako ungesabi kubekela umndeni wakho imitsetfo lesekelwe etimisweni letiseBhayibhelini. Tjela bantfwana bakho labasebancane tintfo labangatibukela kanye netintfo lokungakafaneli batibukele, bese ubachazela sizatfu lesikwenta usho kanjalo. (Mat. 5:37) Njengoba bantfwana bakho bakhula, baceceshe kutsi basebentise timiso taJehova kute behlukanise lokulungile nalokungakalungi. (Heb. 5:14) Khumbula kutsi bantfwana bakho batawufundza lokunyenti kuloko lokushoko, kodvwa batawuzuza lokunyenti kakhulu kuloko lokwentako.—Dut. 6:6, 7; Rom. 2:21.

9. Sathane ufuna sicabange kutsini, futsi kungani kucabanga ngalendlela kuyingoti?

⁹ Sathane wetama konakalisa tinhlitiyo tetfu ngekutsi asente setsembele ekuhlakanipheni kwebantfu kunekutsi setsembele kuJehova. (Khol. 2:8) Ufuna kusenta sicabange kutsi kunjinga kufanele kube yintfo lebaluleke kakhulu ekuphileni. Bantfu labacabanga ngalendlela, bangahle banjinge noma banganjingi. Nanobe kunjalo, basengotini. Kungani? Kungobe banganaka kakhulu kwakha imali bagcine bangasayinaki imphilo yabo, imindeni yabo kanye nebuhlobo babo naNkulunkulu kuze bafeze imigomo yabo. (1 Thim. 6:10) Siyajabula kutsi Babe wetfu losezulwini lohlakaniphile uyasisita sibe nembono lokahle ngemali.—Shu. 7:12; Luk. 12:15.

10-11. (a) Yini lokufanele siyente kute sitivikele? (b) Yini lebeyentiwa bogadzi basendvulo futsi bonembeza betfu bafana njani nabo?

¹⁰ Kuze sikhone kuvikela tinhlitiyo tetfu, kufanele sisheshe sitibone tingoti futsi sitsatse sinyatselo kute sitivikele kuto. Loku kusikhumbuta umsebenti lowentiwa ngumuntfu logadzile. Ngesikhatsi saSolomoni, gadzi bekema elubondzeni lwelidolobha futsi bekamemeta kute acwayise labanye ngengoti lebeyisondzela. Kwetama kukubona ngeliso lengcondvo loku lobekwentiwa ngulogadzi kutasisita sicondze kutsi yini lokufanele siyente kute Sathane angonakalisi indlela lesicabanga ngayo.

¹¹ Endvulo, bogadzi bebasebenta ndzawonye nalabo lebebasemasangweni elidolobha. (2 Sam. 18:24-26) Bebabambisana kute basite ekuvikeleni lidolobha ngekutsi baciniseke kutsi emagede avaliwe nakusondzela sitsa. (Neh. 7:1-3) Ngalokufanako, bonembeza * betfu labaceceshwe ngeliBhayibheli bangasecwayisa nangabe Sathane etama kulawula imicabango yetfu, indlela lesitiva ngayo, tisusa tetfu noma loko lesikufisako. Nangabe bonembeza betfu basecwayisa kufanele sibalalele futsi sitsatse sinyatselo kute sitivikele.

12-13. Yini lesingalingeka kutsi siyente, kodvwa yini lokufanele siyente?

¹² Cabanga ngesibonelo lesimayelana nendlela yekutivikela emicabangweni yaSathane. Jehova usifundzisa kutsi: “Budlundlulu nayo yonkhe inhlobo yekungcola [kufanele]  kungaphatfwa ngisho nekuphatfwa emkhatsini wetfu.” (Ef. 5:3) Yini lokufanele siyente nangabe bontsanga yetfu esikolweni nobe emsebentini bacala kukhuluma ngekutiphatsa kabi ngekwelicasi? Siyati kutsi kufanele “sikulahle kungamhloniphi Nkulunkulu netifiso talelive.” (Thit. 2:12) Nembeza wetfu lofana nagadzi ungahle usecwayise ngengoti lesondzelako. (Rom. 2:15) Sitawulalela yini nangabe nembeza wetfu usicondzisa? Singahle silingeke kutsi singawulaleli futsi silalele bontsanga yetfu nobe sibuke titfombe labasikhombisa tona. Lesi kusuke kusikhatsi sekutsi sibalekele ingoti ngekutsi sicoce ngalokunye noma sikhweshe kubo.

¹³ Kudzingeka sibe nesibindzi kute sincobe kucindzetelwa bontsanga futsi singacabangi ngetintfo letimbi nobe sitente. Singaciniseka kutsi Jehova uyayibona imetamo lesiyentako futsi utasiniketa emandla kanye nekuhlakanipha lesikudzingako kute simelane nemicabango yaSathane. (2 Khr. 16:9; Isa. 40:29; Jak. 1:5) Yini lesingayenta kute sichubeke sivikela tinhlitiyo tetfu?

14-15. (a) Kute silondvolote tinhlitiyo tetfu, yini lokufanele siyente futsi singakwenta njani? (b) Umbhalo weTaga 4:20-22 usisita njani kutsi sitfole lokunyenti nasifundza liBhayibheli? (Buka libhokisi lelitsi “ Indlela Yekuzindla.”)

¹⁴ Kuze silondvolote tinhlitiyo tetfu akukafaneli sigcine ngekuyekela kwenta tintfo letimbi kodvwa kufanele sente tintfo letinhle. Cabanga ngalomfanekiso welidolobha lelibiyelwe. Gadzi bekavala emasango elidolobha kute bantfu bangahlaselwa titsa, kodvwa ngaletinye tikhatsi bekufanele avule emagede kute bantfu baletse kudla naletinye tintfo labatidzingako. Nangabe gadzi angawavuli emasango alelidolobha, bantfu bebatawubulawa yindlala. Ngendlela lefanako natsi kufanele sivule tinhlitiyo tetfu kute sicabange ngendlela Nkulunkulu lacabanga ngayo.

¹⁵ EBhayibhelini, sifundza ngendlela Jehova lacabanga ngayo, ngako nangabe silifundza sisuke sivumela indlela Jehova lacabanga ngayo ilawule tintfo lesiticabangako, indlela lesitiva ngayo kanye netintfo lesitentako. Yini lesingayenta kute sizuze kakhulu nasifundza liBhayibheli? Kubalulekile kutsi sithantaze. Lomunye dzadze utsi: “Ngaphambi kwekutsi ngifundze liBhayibheli, ngiyathantaza kuJehova ngimcele angisite ‘ngitibone ngalokucacile timangaliso’ letiseVini lakhe.” (Hla. 119:18) Kufanele sizindle ngalesikufundzako. Nangabe sithantaza, sifundza futsi sizindla ngalesikufundzako, liVi laNkulunkulu lisitsintsa “enhlitiyweni,” futsi loko kusenta siyitsandze indlela Jehova lacabanga ngayo.—Fundza Taga 4:20-22; Hla. 119:97.

16. Bantfu labanyenti bazuze njani ngekubukela Umsakato We-JW?

¹⁶ Lokunye lesingakwenta kute sicabange ngendlela Nkulunkulu lacabanga ngayo kutsi sibukele Umsakato We-JW. Lomunye umndeni utsi: “Jehova uyiphendvulile imithantazo yetfu asebentisa luhlelo lwemsakato we-JW lesilubukela njalo ngenyanga. Sihlale sidlala tingoma te-JW Broadcasting^® ekhaya letfu. Sitidlala nasipheka, sihlanta indlu noma nasinatsa litiya.” Loluhlelo lusisita kutsi sigadze tinhlitiyo tetfu. Luphindze lusifundzise kutsi sicabange ngendlela Nkulunkulu lacabanga ngayo futsi sincobe kucindzetelwa kutsi sicabange njengaSathane.

17-18. (a) Umbhalo wa-1 Emakhosi 8:61 utsi yini lengenteka nangabe sisebentisa loko Jehova lasifundzisa kona? (b) Yini lesingayifundza esibonelweni seNkhosi Hezekiya? (c) Ngekuvumelana nemthantazo waDavide lotfolakala kuTihlabelelo 139:23, 24, yini lesingayithantazela?

¹⁷ Njalo nasibona kutsi kuyasizuzisa kwenta tintfo letilungile, kukholwa kwetfu kuyacina. (Jak. 1:2, 3) Kuyasijabulisa kubona  kutsi Jehova uyatigcabha ngatsi futsi usibita ngekutsi sibantfwana bakhe. Loko kusenta sifune kumjabulisa. (Taga 27:11) Njalo nasilingwa, siba nelitfuba lekukhombisa kutsi sitimisele ngalokugcwele kukhonta Babe wetfu lonelutsandvo. (Hla. 119:113) Sikhombisa kutsi sitsandza Jehova ngenhlitiyo yetfu yonkhe futsi sitimisele kulalela umyalo wakhe siphindze sente intsandvo yakhe.—Fundza 1 Emakhosi 8:61.

¹⁸ Kuliciniso kutsi sitawenta emaphutsa ngoba sinesono. Nangabe kwenteka senta emaphutsa, kufanele sikhumbule sibonelo seNkhosi Hezekiya. Yawenta emaphutsa, kodvwa yaphendvuka yaphindze yachubeka ikhonta Jehova “ngayo yonkhe inhlitiyo” yayo. (Isa. 38:3-6; 2 Khr. 29:1, 2; 32:25, 26) Shengatsi singabalekela tonkhe tintfo Sathane latentako kuze asente sicabange njengaye. Ngako asithantaze kuJehova simcele asiphe “inhlitiyo lehlakaniphile.” (1 Khos. 3:9; fundza Tihlabelelo 139:23, 24.) Singakhona kuhlale setsembekile kuJehova nangabe silondvolota tinhlitiyo tetfu.