1-2. (a) Sikhutsato lesiku-Isaya 41:10 samsita njani Yoshiko? (b) Lesikhutsato sisita bobani?

YOSHIKO, umKhristu lowetsembekile watfola tindzaba letibuhlungu. Dokotela wakhe wamtjela kutsi bekatawushona ngemuva kwetinyanga letimbalwa. Wativa njani? Yoshiko wakhumbula livesi leliseBhayibhelini lebekalitsandza leliku-Isaya 41:10. (Fundza.) Wabese utjela dokotela wakhe kutsi bekangesabi ngobe Jehova bekambambe ngesandla. * Lamavi ladvudvutako latfolakala kulelivesi amsita kutsi achubeke etsembele kakhulu kuJehova. Natsi lelivesi lingasisita kutsi singesabi nasibhekana nekuvivinywa lokumatima. Kute sibone kutsi lelivesi lingasidvudvuta njani, ase sihlole kutsi kungani Nkulunkulu asho lamavi latfolakala encwadzini ya-Isaya.

² Ekucaleni, Jehova watjela Isaya kutsi abhale lamavi kute advudvute emaJuda labetawutfunjelwa eBhabhulona. Nanobe kunjalo, Jehova lamavi bekangakawabhaleli kutsi advudvute emaJuda kuphela, kodvwa ayabadvudvuta ngisho nebantfu labaphila esikhatsini setfu. (Isa. 40:8; Rom. 15:4) Lamuhla siphila ‘etikhatsini letibucayi lokumatima kubhekana nato,’ ngako sisidzinga kakhulu sikhutsatako lesikulombhalo wa-Isaya.—2 Thim. 3:1.

3. (a) Ngutiphi tetsembiso letitfolakala embhalweni wa-Isaya 41:10 losihloko semnyaka wa-2019? (b) Kungani sitidzinga leticinisekiso Jehova lasinika tona?

³ Kulesihloko, sitawucoca ngetetsembiso letintsatfu letiku-Isaya 41:10 letingasisita sicinise kukholwa kwetfu:  (1) Jehova utawuba natsi, (2) unguNkulunkulu wetfu futsi (3) utasisita. Siyatidzinga leticinisekiso * ngoba sonkhe siyabhekana nekuvivinywa njengaYoshiko. Kufanele sibeketelele tinkinga letibangelwa ngulelive lelibi lesiphila kulo. Labanye babeketelela kuhlushwa babusi labanemandla. Asesicoce ngaleticinisekiso letintsatfu.

4. (a) Ngusiphi sicinisekiso sekucala lesitawucoca ngaso? (Buka umbhalo longentasi.) (b) Jehova uyichaza njani indlela lativa ngayo ngatsi? (c) Lamavi akwenta utive njani?

⁴ Jehova usicinisekisa ngemavi latsi: “Ungesabi, ngobe mine nginawe.” * Jehova ukhombisa kutsi utasisita ngoba uyasinaka futsi uyasitsandza. Naka kutsi uyichaza njani indlela lasitsandza ngayo nendlela lativa ngayo ngatsi. Jehova utsi: “Wena uligugu kimi, uhloniphekile emehlweni ami, nanjengobe ngikutsandza.” (Isa. 43:4) Kute lokungenta Jehova ayekele kutsandza tikhonti takhe ngoba wetsembekile. (Isa. 54:10) Sinebindzi ngenca yekutsi Jehova uyasitsandza futsi ungumngani wetfu. Utawuchubeka asivikela njengoba avikela Abrama (Abrahama) umngani wakhe. Jehova watsi kuye: “Abrama, ungesabi. Ngisihlangu sakho.”—Gen. 15:1.

5-6. (a) Sati ngani kutsi Jehova uyafuna kusisita sibhekane nekuvivinywa? (b) Ngusiphi sifundvo lesisitfola esibonelweni saYoshiko?

⁵ Siyati kutsi Jehova ufuna kusisita sikhone kubhekana netinkinga ngoba naku lakwetsembisa bantfu bakhe: “Nawudzabula ekhatsi emantini, mine ngitawuba nawe; nanawudzabula ekhatsi emifuleni, ingeke ikukhukhule. Nawuhamba udzabula ekhatsi emlilweni, ngeke ushe, emalangabi ngeke akulumekele.” (Isaya 43:2) Usho kutsini lombhalo?

⁶ Jehova aketsembisi kutsi utawutisusa tinkinga lesibhekana nato, kodvwa ngeke avumele kutsi tinkinga letifananiswa  ‘nemfula noma nemlilo’ kutsi tisente siyekele kumkhonta. Uyasicinisekisa kutsi utasisita sikhone kubhekana netinkinga. Yini Jehova latawuyenta? Utawusenta singesabi kuze sichubeke setsembekile kuye ngisho noma singafa. (Isa. 41:13) Yoshiko, lesicoce ngaye ekucaleni wabona kutsi loko kuliciniso. Indvodzakati yakhe itsi: “Iyasijabulisa indlela make labekanesibindzi ngayo. Siyaciniseka kutsi Jehova bekamsita. Make waze washona acocela bonesi naletinye tigulane ngaJehova nangetetsembiso takhe.” Sisifundzisani sibonelo saYoshiko? Nangabe sisetsemba sicinisekiso saNkulunkulu lesitsi “Ngitawuba nawe,” sitawuba nesibindzi kanye nemandla ekubhekana nekuvivinywa.

7-8. (a) Ngusiphi sicinisekiso sesibili lesitawucoca ngaso, futsi sisho kutsini? (b) Kungani Jehova atsi emaJuda labetfunjiwe angakhatsateki? (c) Ngumaphi emavi laku-Isaya 46:3, 4 labetawusita bantfu baNkulunkulu kutsi bangesabi?

⁷ Naka nasi sicinisekiso sesibili lesisencwadzini ya-Isaya: “Ungajabhi, ngobe mine nginguNkulunkulu wakho.” Asho kutsini lamavi? Kulelivesi, ligama lelitsi “kukhatsateka” lingasho “kubuka emuva ngenca yekwesaba kutsi umuntfu lotsite noma intfo leyingoti ingakulimata.”

⁸ Yini leyenta Jehova watjela emaJuda labetawutfunjelwa eBhabhulona kutsi angakhatsateki? Kungenca yekutsi bekati kutsi takhamuti taleyondzawo betitawesaba. Yini lebeyitawutenta tesabe? Betitawesatjiswa kutsi ngasekupheleni kweminyaka lengu-70 kutfunjwe emaJuda, liBhabhulona belitawuhlaselwa titsa letingemaMede nemaPheresiya. Jehova bekatawusebentisa lelibutfo kute akhulule bantfu bakhe eBhabhulona. (Isa. 41:2-4) Ngesikhatsi bantfu baseBhabhulona kanye naletinye tive tangaleso sikhatsi beva kutsi batawuhlaselwa sitsa sabo, betama kucinisana batsi: “Cina!” Baphindze batakhela tithico letinyenti ngobe bebanelitsemba lekutsi titawubavikela. (Isa. 41:5-7) Jehova wadvudvuta emaJuda labetfunjiwe watsi: “Wena, Israyeli, nceku yami [awufani nabomakhelwane bakho] . . . Ungajabhi, ngobe mine nginguNkulunkulu wakho.” (Isa. 41:8-10) Naka kutsi Jehova watsi: “Mine nginguNkulunkulu wakho.” Ngalamavi, Jehova bekacinisekisa bantfu bakhe labetsembekile kutsi bekufanele bangakhatsateki ngobe bekasolo anguNkulunkulu wabo, futsi nabo babantfu bakhe. Watsi: “ngitanetfwala . . . nginisindzise.” Asingabati kutsi lamavi ladvudvutako nalakhutsatako awacinisa emaJuda labetfunjiwe.—Fundza Isaya 46:3, 4.

9-10. Kungani site sizatfu sekwesaba? Shano sibonelo.

⁹ Lamuhla, bantfu besaba kakhulu ngenca yekutsi timo talelive tiyachubeka nekuba timbi kakhulu. Kuliciniso kutsi natsi loko kuyasikhatsata, kodvwa akukafaneli sesabe ngobe Jehova utsi: “Mine nginguNkulunkulu wakho.” Kungani leso kusizatfu lesicinile lesisenta singakhatsateki?

¹⁰ Cabanga nganasi sibonelo, Jim naBen basendizeni futsi kufika umoya lomkhulu. Njengobe lomoya ucala kuphephula indiza, umshayeli wendiza utjela bonkhe bantfu labasendizeni utsi: “Fasani emabhande ngoba lomoya mkhulu futsi kusetawutsatsa sikhatsi kutsi uphele.” Jim ukhatsateka kakhulu. Kepha lomshayeli wendiza utsi: “Ningakhatsateki.” Jim unikina inhloko utsi: “Sicinisekiso lesinjani lesi?” Uyabona kutsi Ben akakhatsateki ngalutfo. Jim ubuta Ben kutsi kungani angakhatsateki.  Ben uyamoyitela bese utsi: “Ngimati kahle lomshayeli ngoba ngubabe wami.” Ngako Ben watsi: “Ngiyati kutsi babe uyishayela kahle indiza. Ngeke wesabe nasewumati kahle futsi sewati nekutsi unelikhono lelihle kangakanani.”

11. Ngutiphi tifundvo lesingatifundza kulesibonelo lesimayelana nebagibeli bendiza lababili?

¹¹ Yini lesiyifundza kulesibonelo? NjengaBen asikhatsateki ngoba simati kahle kakhulu Babe wetfu losezulwini Jehova. Siyati kutsi utasisita sitincobe tinkinga letimatima lesihlangabetana nato kulamalanga ekugcina. (Isa. 35:4) Siyametsemba Jehova, ngako kufanele singesabi ngisho noma bantfu balelive besaba. (Isa. 30:15) Senta njengaBen nangabe sitjela bomakhelwane betfu tizatfu letisenta semetsembe Jehova. Nabo bangaciniseka kutsi Jehova utawubasita ngisho nobe bangahlangabetana natiphi tinkinga.

12. (a) Ngusiphi sicinisekiso sesitsatfu lesitawucoca ngaso? (b) Incwadzi ya-Isaya isikhumbutani nayikhuluma ‘ngemkhono’ waJehova?

¹² Cabanga ngesicinisekiso sesitsatfu lesashiwo ngu-Isaya: “Ngitakucinisa ngikusite.” Isaya besekavele ayichazile indlela Jehova lebekatawucinisa ngayo bantfu bakhe, watsi: “Simakadze longuSomandla ute ngemandla, nangemkhono wakhe uyabusa.” (Isa. 40:10) LiBhayibheli livamise kusebentisa ligama lelitsi “umkhono” nangabe likhuluma ngemandla. Ngako emavi latsi “ngemkhono wakhe uyabusa” asikhumbuta kutsi Jehova uyiNkhosi lenemandla. Wasebentisa emandla akhe langehlulwa lutfo kute acinise aphindze avikele tinceku takhe tasesikhatsini lesendlulile. Nalamuhla uyabacinisa aphindze abavikele labo labetsembela kuye. Dut. 1:30, 31; Isa. 43:10.

13. (a) Ngalokukhetsekile Jehova usigcwalisa njani setsembiso sakhe sekusicinisa? (b) Ngusiphi setsembiso lesisenta sibe nemandla kanye nesibindzi?

 ¹³ Nangabe titsa tetfu tisihlupha, Jehova uyasigcina setsembiso sakhe ‘sekusicinisa.’ Kulamanye emave titsa tetfu tetama kusiyekelisa kwenta umsebenti wekushumayela futsi tivale inhlangano yetfu. Ngisho nobe loku kwenteka, asikhatsateki ngalokwecile. Jehova usiniketa sicinisekiso lesisenta sibe nemandla kanye nesibindzi. Uyasetsembisa: “Kute sikhali lesilolelwa kulwa nawe lesiyawuphumelela.” (Isa. 54:17) Lesetsembiso sisikhumbuta ngemaciniso lamatsatfu labalulekile.

14. Kungani kungakafaneli setfuke nangabe titsa tetfu tisihlasela?

¹⁴ Kwekucala, njengebalandzeli baJesu sikulindzele kutsi bantfu basitondze. (Mat. 10:22) Jesu washo kutsi bafundzi bakhe batawuhlushwa kabuhlungu ngemalanga ekugcina. (Mat. 24:9; Joh. 15:20) Kwesibili, siphrofetho sa-Isaya sisicwayisa kutsi titsa tetfu ngeke tigcine ngekusitondza, kodvwa titawuphindze tisebentise tikhali letehlukahlukene kute tisilimate. Letitsa tetfu tingetama kusikhohlisa ngemanga kute abonakale aliciniso, tingaphindze tisicambele emanga noma tisihluphe kabuhlungu. (Mat. 5:11) Jehova ngeke ativimbe titsa tetfu ekusebentiseni letikhali kute tilwe natsi. (Ef. 6:12; Semb. 12:17) Kodvwa akukafaneli sesabe. Leni?

15-16. (a) Nguliphi liciniso lesitsatfu lokufanele silikhumbule, futsi umbhalo wa-Isaya 25:4, 5 ukusekela njani loko? (b) Umbhalo wa-Isaya 41:11, 12 utsi sitawuba yini siphetfo sebantfu labalwa natsi?

¹⁵ Cabanga ngeliciniso lesitsatfu lokufanele sihlale silikhumbula. Jehova watsi, “kute sikhali” lesimelene natsi “lesiyawuphumelela.” Njengobe lubondza lusivikela nakunesivunguvungu lesinemandla, Jehova uyasivikela ‘esivunguvungwini lesitimukula elubondzeni.’ (Fundza Isaya  25:4, 5.) Titsa tetfu angeke tiphumelele ekwenteni tintfo letitawuhlale tisivisa buhlungu.—Isa. 65:17.

¹⁶ Jehova wenta simetsembe kakhulu ngekutsi asichazele kabanti loko lokutawenteka kubantfu labasitfukutselele. (Fundza Isaya 41:11, 12.) Ngisho noma titsa tetfu tingalwa kangakanani natsi nome tisihluphe kamatima, titawutfola umphumela. Tonkhe titsa tebantfu baNkulunkulu ‘tiyawuba lite, tibhubhe tiphele.’

17-18. (a) Kufundza liBhayibheli kungakusita njani kutsi umetsembe kakhulu Jehova? Shano sibonelo. (b) Kucabangisisa ngesihloko semnyaka wa-2019 kungasisita njani?

¹⁷ Sitametsemba kakhulu Jehova nangabe simati kahle. Indlela lekuphela kwayo lesingamati kancono ngayo Jehova kutsi sitinike sikhatsi sifundze liBhayibheli siphindze sizindle ngalesikufundzako. LiBhayibheli linekwatiswa lesingakwetsemba kwendlela Nkulunkulu lavikela ngayo bantfu bakhe esikhatsini lesendlulile. Loko kusicinisekisa kutsi natsi utasivikela.

¹⁸ Cabanga ngemfanekiso lofanelekako Isaya lawusebentisa kuze asichazele kutsi Jehova usivikela kanjani. Wafananisa Jehova nemelusi, waphindze wafananisa tikhonti taNkulunkulu nemazinyane emvu. Isaya utsi: “[Jehova] ugona emazinyane akhe ngemikhono yakhe, awasondzete edvutane nenhlitiyo yakhe.” (Isa. 40:11) Nasibona kutsi Jehova unatsi, sitiva sivikelekile. Kute sisisite singesabi ngisho nobe sihlangabetana netinkinga, sisebenti lesetsembekile nalesihlakaniphile sikhetse umbhalo wa-Isaya 41:10 kutsi ube sihloko semnyaka wa-2019. LomBhalo utsi: “Ungajabhi, ngobe mine nginguNkulunkulu wakho.” Cabangisisisa ngalamavi lasicinisekiso. Atakucinisa njengobe utawuhlangabetana netinkinga.