1-2. Ingilosi yabatjela kutsini bafati lebebasethuneni laJesu, futsi ngusiphi sicondziso Jesu labanika sona?

BEKUSEKUSENI kakhulu, ngaNisani 16, 33 C.E ngesikhatsi bafati labesaba Nkulunkulu futsi lebebeva buhlungu baya ethuneni ngemuva kwema-awa langu-36 sidvumbu saJesu singcwatjiwe. Nabefika emathuneni, bebafuna kugcobisa sidvumbu saJesu ngemakha nangemafutsa lanuka kahle, kodvwa bamangala nabakhandza kute lutfo ethuneni. Ingilosi yatjela labafati kutsi Jesu uvukile kulabafile, yachubeka yatsi: “Usendleleni uya eGalile; nitamkhandza khona.”—Mat. 28:1-7; Luk. 23:56; 24:10.

² Batsi labafati nabesuka ethuneni, Jesu weta kubo futsi watsi: “Hambani niyewubikela bafundzi bami kute baye eGalile lapho batangikhandza khona.” (Mat. 28:10) Intfo yekucala Jesu layenta ngemuva kwekuvuswa kwakhe kwaba kutsi ahlele umhlangano emkhatsini wakhe nebafundzi bakhe. Kulomhlangano, waniketa bafundzi bakhe ticondziso letibaluleke kakhulu.

3-4. Kungani sitsi umyalo lobhalwe kuMatewu 28:19, 20 bewungakacondziswa kuphela kubafundzi? (Buka sitfombe lesisekhasini lekucala.)

³ Fundza Matewu 28:16-20. Kulomhlangano Jesu lawuhlela nebafundzi bakhe, wakhuluma ngemsebenti lobalulekile lobekufanele bawente ekhulwini lekucala, umsebenti natsi lesiwentako lamuhla. Jesu watsi: “Ngako-ke hambani nente bantfu bato tonkhe tive babe bafundzi, . . . nibafundzise kugcina konkhe lenginitjele kona.”

⁴ Jesu ufuna kutsi bonkhe balandzeli bakhe bashumayele. Lomyalo akazange awunike baphostoli bakhe labangu-11 lebebatsembekile kuphela. Sikwati njani loko? Ngesikhatsi Jesu akhipha umyalo wekutsi kwentiwe bafundzi, bekangakahlali  nebaphostoli kuphela entsabeni eGalile. Khumbula kutsi ingilosi yatsi kulabafati, ‘nitamkhandza eGalile.’ Ngako-ke, kungenteka kutsi nebafati lebebatsembekile bebakhona kulomhlangano. Akusiko loko kuphela ngobe nemphostoli Pawula waveta kutsi Jesu “wabonakala ngesikhatsi sinye kubazalwane labangetulu kwemakhulu lasihlanu.” (1 Khor. 15:6) Bebahlangene kuphi labazalwane labangetulu kwemakhulu lasihlanu?

5. Yini lesiyifundzako emBhalweni wa-1 Khorinte 15:6?

⁵ Sinetizatfu letikahle tekukholwa kutsi umBhalo wa-1 Khorinte 15:6 ukhuluma ngemhlangano lobewuseGalile lobhalwe encwadzini yaMatewu sehluko 28. Ngutiphi letizatfu? Sekucala, linyenti lebafundzi baJesu bebabaseGalile. Ngako bekutawuba melula ngekutsi bantfu labanyenti bahlangane entsabeni eGalile kunekutsi bahlangane ekhaya lemuntfu eJerusalema. Sesibili, ngemuva kwekutsi Jesu avusiwe, besekavele ahlangene nebaphostoli bakhe labangu-11 ekhaya lemuntfu lebeliseJerusalema. Kube Jesu bekafuna kutjela baphostoli bakhe kuphela kutsi bente umsebenti wekushumayela nekwenta bafundzi, ngabe wabatjela ngesikhatsi akanye nabo eJerusalema kunekutsi abatjele nasebahlangene nalabanye eGalile, lokufaka ekhatsi nalabanye bafati.—Luk. 24:33, 36.

6. UmBhalo waMatewu 28:20 ukhombisa njani kutsi umyalo wekwenta bafundzi usasebenta nalamuhla, futsi bantfu bawulalela njani lomyalo lamuhla?

⁶ Nasi sizatfu sesitsatfu lesibalulekile. Umyalo waJesu wekwenta bafundzi bewungakacondzi kuphela kumaKhristu angelikhulu lekucala. Sati njani? Jesu waphetsa lomyalo lebekawucondzise kubalandzeli bakhe ngemavi latsi: “Mine nginani onkhe emalanga kute kube sekupheleni kwalelive.” (Mat. 28:20) Njengobe Jesu asho, bantfu labanyenti benta bafundzi lamuhla. Njalo ngemnyaka, bantfu labangaba ngu-300 000 baba balandzeli baJesu Khristu, bayabhajatiswa futsi babe BoFakazi BaJehova. Loko kumangalisa kakhulu!

7. Yini lesitawucoca ngayo nyalo, futsi leni?

⁷ Bantfu labanyenti labafundza liBhayibheli bayatfutfuka futsi babhajatiswe. Noma kunjalo, labanye lesifundza nabo liBhayibheli bayesaba kuba bafundzi. Bayakujabulela kufundza kodvwa abatfutfuki kuze babhajatiswe. Nangabe kukhona umuntfu lofundza naye liBhayibheli, siyaciniseka kutsi ufuna kumsita kuze akusebentise loko lakufundzako futsi abe ngumlandzeli waKhristu. Kulesihloko, sitawucoca ngekutsi singamsita njani lesifundza naye liBhayibheli kutsi atsandze Jehova futsi atfutfuke. Kungani kufanele sicoce ngalesihloko? Kungobe kutawufika sikhatsi lapho khona kutawufanele sincume kutsi siyachubeka yini nalesifundvo nobe siyasiyekela.

8. Kungani ngaletinye tikhatsi kungaba matima kusita lesifundza nabo kutsi batsandze Jehova?

⁸ Jehova ufuna kutsi bantfu bamkhonte ngobe bamtsandza. Ngako-ke umgomo wetfu kusita bantfu lesifundza nabo bacondze kutsi Jehova ubakhatsalela mbamba nekutsi ubatsandza kakhulu. Sifuna batsatse Jehova ‘njengeyise wetintsandzane, nemlondvoloti webafelokati.’ (Hla. 68:5) Kutawutsi lapho lesifundza nabo liBhayibheli babona indlela Jehova labatsandza ngayo, batawucala bamtsandze kakhulu. Labanye lesifundza nabo liBhayibheli bangakutfola kumatima kutsatsa Jehova njengaBabe lonelutsandvo ngenca yekutsi bobabe babo abazange babatsandze. (2 Thim. 3:1, 3) Nawufundza nalotsite liBhayibheli, gcizelela buntfu baJehova lobutsandzekako. Sita lofundza naye liBhayibheli acondze kutsi Babe wetfu lonelutsandvo ufuna kutsi atfole kuphila lokuphakadze, futsi utimisele kumsita awufeze lomgomo. Yini lenye lesingayenta?

9-10. Ngutiphi tincwadzi lokufanele sitisebentise nasifundza nebantfu liBhayibheli, futsi leni?

 ⁹ Sebentisa incwadzi letsi “Lingasifundzisani LiBhayibheli?” naletsi “Tigcineni Elutsandvweni LwaNkulunkulu.” Letincwadzi tibhalwe ngalokukhetsekile kuze tisisite sikhone kusita lesifundza nabo liBhayibheli kutsi batsandze Jehova. Sehluko 1 sencwadzi letsi Lingasifundzisani siphendvula nayi imibuto: Nkulunkulu uyasikhatsalela yini nome unelunya?, Kumphatsa njani Nkulunkulu kubona bantfu bahlupheka?, nalotsi Ungakhona yini kuba ngumngani waNkulunkulu? Kutsiwani ngencwadzi letsi Tigcineni Elutsandvweni LwaNkulunkulu? Lencwadzi ingasita lofundza naye liBhayibheli acondze kutsi kusebentisa timiso letiseBhayibhelini kungayitfutfukisa njani indlela laphila ngayo nekutsi angasondzela njani kuJehova. Ngisho nobe letincwadzi uke watisebentisa nawufundza nalabanye, kufanele ulungiselele sifundvo ngasinye kuze usite umfundzi ngamunye akusebentise loko latakufundza.

¹⁰ Yini longayenta nangabe lofundza naye liBhayibheli anesifiso sekufundza ngalesinye sihloko lesingekho etincwadzini Letisemathulusini  Etfu Ekufundzisa? Ungamkhutsata kutsi ayifundze lencwadzi lekhuluma ngalesihloko ngesikhatsi sakhe kuze nitewukhona kuchubeka nifundza incwadzi letsi Lingasifundzisani nobe letsi Tigcineni Elutsandvweni LwaNkulunkulu.

11. Kufanele sicale nini kuthantaza nasifundza nalotsite, futsi singamsita njani kutsi acondze kubaluleka kwemthantazo?

¹¹ Cala ngekuthantaza ngaphambi kwekutsi nifundze. Ngalokuvamile, kuba kahle kakhulu nawucala ngekuthantaza ngaphambi kwekutsi nifundze, ikakhulukati ngemuva kwemaviki lambalwa nanisandza kucala kufundza ngalokuchubekako. Kufanele sisite lesifundza naye abone kutsi liVi laNkulunkulu singakhona kulicondza kuphela nasisitwa ngumoya waNkulunkulu. Labanye bafundzisi beliBhayibheli nabachaza kutsi kungani sithantaza nasifundza nemuntfu, bafundza umBhalo waJakobe 1:5 lotsi: “Nangabe lomunye wenu eswele kuhlakanipha, akachubeke akucela kuNkulunkulu.” Umfundzisi weliBhayibheli angabese ubuta lafundza naye liBhayibheli kutsi: “Singakucela njani kuhlakanipha kuNkulunkulu?” Lona lokufundvwa naye liBhayibheli utawusho kutsi kufanele sithantaze kuNkulunkulu.

12. Ungawusebentisa njani umBhalo weTihlabelelo 139:2-4 kuze usite lofundza naye liBhayibheli kutsi akhulume ngekukhululeka naJehova ngemthantazo?

¹² Fundzisa lofundza naye liBhayibheli kuthantaza. Mcinisekise kutsi Jehova ufuna kuva imithantazo yakhe lesuka enhlitiyweni. Mchazele kutsi emithantazweni lesitentela yona, singamtjela Jehova indlela lesitiva ngayo, futsi simtjele nangetintfo lesingeke sifune kutitjela lomunye umuntfu. Ngetulu kwako konkhe, Jehova uyayati indlela lesitiva ngayo. (Fundza Tihlabelelo 139:2-4.) Singaphindze sikhutsate lesifundza naye liBhayibheli kutsi acele lusito lwaNkulunkulu kuze ashintje indlela lacabanga ngayo futsi alwisane nemikhuba lemibi. Ase sitsi umuntfu lofundza naye liBhayibheli utsandza imikhosi emaKhristu lokungakafaneli ayigubhe nobe ahlanganyele kuyo. Lomuntfu uyati kutsi kubi kugubha lemikhosi, kodvwa kunetintfo letitsite latitsandzako ngayo. Mkhutsate kutsi atjele Jehova indlela lativa ngayo nekutsi amncenge kuze amsite atsandze tintfo Nkulunkulu latitsandzako.—Hla. 97:10.

13. (a) Kungani kufanele simeme lesifundza naye liBhayibheli kutsi abekhona emihlanganweni yelibandla ngekushesha nje nasisandza kucala kufundza naye?(b) Singamsita njani lesifundza naye liBhayibheli kutsi ative akhululekile nakaseHholweni leMbuso?

¹³ Mema lofundza naye kutsi abe khona emihlanganweni yelibandla nanisandza nje kucala kufundza. Loko umuntfu lofundza naye liBhayibheli latakuva futsi akubone nakasemhlanganweni yebuKhristu, kungamkhutsata kutsi akhonte Jehova futsi kumsite kuze atfutfuke. Mkhombise i-video letsi Yini leyentekako EHholweni LeMbuso? bese ngemusa uyammema kutsi ahambe nawe eHholweni leMbuso. Nangabe ungakhona, msite ngekwekuhamba nakaya emhlanganweni webuKhristu. Kuyintfo lekahle kumema bamemeteli labehlukahlukene kutsi bakuphekeletele nawuyofundza nalotsite. Nawenta njalo, umuntfu lofundza naye utawetayelana nalabanye ebandleni, futsi kungenteka ative akhululekile nakasemihlanganweni yebuKhristu.

14. Yini lengakhutsata umuntfu lofundza naye liBhayibheli kutsi atfutfuke?

¹⁴ Umgomo wetfu kusita lesifundza nabo liBhayibheli kutsi batfutfuke ebuhlotjeni babo naNkulunkulu. (Ef. 4:13) Nangabe lotsite avuma kutsi sifundze naye liBhayibheli, kungenteka intfo lengamjabulisa kakhulu kwati loko lokutamsita. Njengobe indlela lamtsandza ngayo Jehova ikhula, kungenteka acale acabange ngendlela langakhona kusita ngayo labanye, lokufaka ekhatsi nalabo labanesikhatsi bangemalunga  elibandla. (Mat. 22:37-39) Ngesikhatsi lesifanele, ungamtjela lofundza naye liBhayibheli kutsi unelitfuba lekusekela umsebenti weMbuso ngetimali.

15. Singabasita njani lesifundza nabo liBhayibheli kutsi bente lokulungile nakuvela tinkinga?

¹⁵ Fundzisa lofundza naye liBhayibheli loko lokufanele akwente nakuvela tinkinga. Nasi sibonelo, asesitsi lofundza naye liBhayibheli ungummemeteli losengakabhajatiswa, ukutjela kutsi kukhona lotsite lomphetse kabi ebandleni. Kungaba kahle kungamtjeli kutsi ngubani lowente lokukahle nobe lokukabi, kodvwa kufuna umchazele ngaloko liBhayibheli lelitsi kufanele akwente. Mhlawumbe angakhetsa kucolela lomzalwane, nobe akhohlwe ngaleyo ndzaba. Nangabe angeke akhone kukwenta loko, angahamba ayokhuluma nalomzalwane anemgomo ‘wekumzuza.’ (Catsanisa naMatewu 18:15.) Sita lofundza naye kutsi akulungele loko latakusho. Mkhombise indlela yekusebentisa i-JW Library^® app, lithuluzi lekucwaninga laBoFakazi BaJehova, ne-jw.org^® kuze afundze tindlela langatisebentisa kuze abhekane nalesimo. Nakafundza indlela yekucatulula tinkinga nalabanye asengakabhajatiswa, angaba nebuhlobo lobuhle nalabanye ebandleni ngisho nome sekabhajatisiwe.

16. Kungani kukahle kuhamba nalabanye bamemeteli nawuyochuba sifundvo?

¹⁶ Cela labanye ebandleni kutsi bahambe nawe nawuyofundza nalotsite, futsi ungacela nembonisi wesigodzi nangabe avakashele libandla lenu. Leni? Ngobe labanye bamemeteli bangakhona kusita lofundza naye kutsi acondze letinye tintfo longeke ukhone kumsita kuto. Nasi sibonelo, asesitsi lomfundzi sewetame kanyenti kuyekela kubhema, kodvwa solo uyehluleka. Ungahamba nemmemeteli lowakhona kulwisana nalomkhuba wekubhema, mhlawumbe naye lowake wehluleka emahlandla lamanyenti. Kungenteka lommemeteli anganiketa lona lofundza naye seluleko lesingamsita. Nangabe utiva ungakhululeki kuchuba lesifundvo nangabe uhamba nemmemeteli losekanesikhatsi lesidze akhonta Jehova, ungamcela kutsi achube lesifundvo ngalelo langa. Nangabe ucela labanye kutsi bahambe nawe nawuyofundza nalotsite, lofundza naye angazuza lokunyenti kubo. Khumbula, umgomo wetfu kusita lona lesifundza naye kutsi akhule ebuhlotjeni bakhe naNkulunkulu.

17-18. Yini lokufanele ucabange ngayo nawufuna kuncuma kutsi kufanele yini uyekele kufundza nemuntfu?

¹⁷ Nangabe lofundza naye liBhayibheli angenti lushintjo endleleni laphila ngayo, kufika sikhatsi lapho kufanele utibute khona kutsi: ‘Kufanele ngiyekele yini kufundza nalomuntfu?’ Ngaphambi kwekutsi wente sincumo, kufanele ucabange ngelikhono lalomuntfu. Labanye bantfu batsatsa sikhatsi kutsi batfutfuke kunalabanye. Tibute: ‘Lengifundza naye utfutfuka ngelizinga lelifanele yini nangibuka simo sakhe?’ ‘Uyakunaka yini nobe uyakusebentisa yini loko lesikufundzako?’ (Mat. 28:20) Labanye lesifundza  nabo liBhayibheli kungabatsatsa sikhatsi kutsi babe bafundzi, kodvwa kufanele bachubeke benta lushintjo ekuphileni kwabo.

¹⁸ Yini lokufanele siyente nangabe sesifundze nemuntfu sikhatsi lesidze, kodvwa angakhombisi kutsi lesifundvo sibalulekile kuye? Ase ucabange nganasi simo: Umuntfu lofundza naye sewucedzile kufundza incwadzi letsi Lingasifundzisani, mhlawumbe sewucalile nekufundza incwadzi letsi Tigcineni Elutsandvweni LwaNkulunkulu, kodvwa akakase aye emhlanganweni yelibandla ngisho naseSikhumbutweni! Kungenteka lomuntfu uvame kukuvimba kutsi nifundze ngenca yetizatfu letingavakali. Nangabe kunjalo, kufanele uhlale phansi nalomuntfu umtjele emaciniso. *

19. Yini longayisho kumuntfu longakuboni kubaluleka kwekutsi ufundze naye liBhayibheli, futsi yini lokufanele ucabange ngayo?

¹⁹ Ungacala ngekumbuta utsi: ‘Yini leyenta kube lukhuni ngawe kutsi ube ngulomunye waBoFakazi BaJehova?’ Mhlawumbe lomfundzi angaphendvula atsi: ‘Ngiyakutsandza kufundza liBhayibheli, kodvwa angiyoze ngibe ngulomunye waBoFakazi BaJehova!’ Nangabe anembono lokanjalo, kute sizatfu sekuchubeka nalesifundvo. Ngalesinye sikhatsi, umuntfu lofundza naye liBhayibheli mhlawumbe angase akutjele kutsi kungani solo angatfutfuki. Nasi sibonelo, mhlawumbe angativa shengatsi angeke akhone kushumayela umuti ngemuti. Ngako nasewati indlela lativa ngayo, utayati nendlela longamsita ngayo.

20. Incwadzi yeMisebenti 13:48 ingasisita njani kuze sincume kutsi kufanele yini sichubeke sifundza nemuntfu lotsite?

²⁰ Lokudzabukisako kutsi labanye lesifundza nabo liBhayibheli bafana nema-Israyeli lebekaphila ngemalanga aHezekeli. Naka loko Jehova lakusho kuHezekeli ngabo, watsi: “Yebo, kubo awusilutfo, ufanana nemuntfu lohlabela tingoma telutsandvo ngeliphimbo lelimnandzi, adlale nemntjingozi kamnandzi, ngobe emavi akho bayaweva, kodvwa bangawenti.” (Hez. 33:32) Kungahle kube matima kutjela umuntfu kutsi sitawuyekela kufundza naye. Nobe kunjalo, “sikhatsi lesisele sesinciphile.” (1 Khor. 7:29) Kunekutsi sicitse sikhatsi lesinyenti sifundza nemuntfu longatfutfuki, kufanele sitfole bantfu labakhombisako kutsi ‘batimisele kutfola kuphila lokuphakadze.’—Fundza Imisebenti 13:48.

21. Sitsini sihloko semnyaka wa-2020, futsi sitasisita kutsi senteni?

²¹ Ngemnyaka wa-2020, sihloko semnyaka sitasisita kutsi sinake kakhulu kutfutfukisa lizinga lesenta ngalo umsebenti wekwenta bafundzi. Lesihloko sinemavi Jesu lawakhuluma ngesikhatsi banemhlangano lobalulekile lobewusentsabeni eGalile. Latsi: ‘Ngako-ke hambani nente bantfu babe bafundzi, nibabhabhatise.’—Mat. 28:19.