1. Yini lekhombisa kutsi kuncane kutsandzana emindenini lamuhla?

LIBHAYIBHELI lasho kutsi emalangeni ekugcina, bantfu bebatawuba bete “lutsandvo.” (2 Thim. 3:1, 3) Lesiphrofetho siyagcwaliseka lamuhla. Sibonelo saloko kutsi batali labanyenti lamuhla badivosile, futsi bakwatelene nebantfwana babo bativa bangatsandvwa. Leminye imindeni lehlala ndzawonye kungenteka ingasondzelani. Lomunye loweluleka imindeni utsi: “Make, babe nebantfwana abakhulumisani futsi bacitsa sikhatsi lesinyenti bakuma-computer, basebentisa ema-tablet, tincingo tabo nobe badlala ema-video games. Ngisho nobe bahlala endlini yinye kodvwa abatani.”

2-3. (a) KubaseRoma 12:10, utsi bobani lokufanele sibatsandze? (b) Sitawucoca ngani kulesihloko?

² Asifuni kufana nebantfu balelive labete lutsandvo. (Rom. 12:2) Kunaloko, sifuna kuwatsandza kakhulu emalunga emindeni yetfu kanye nebazalwane nabodzadze ebandleni. (Fundza KubaseRoma 12:10.) Hlobo luni lwelutsandvo lolu? Lutsandvo emalunga emndeni lasondzelene laba nalo kuze ahlale abangani. Lolu lutsandvo lokufanele sibe nalo ngebazalwane nabodzadze ebandleni. Nasinalolutsandvo, sisita bonkhe bantfu kutsi bakhonte Jehova bajabulile.—Mik. 2:12.

³ Kuze natsi sibe nalolutsandvo, asesibone kutsi singafundzani etibonelweni letiseBhayibhelini.

4. UmBhalo waJakobe 5:11 usitjelani ngelutsandvo lwaJehova?

⁴ LiBhayibheli lisitjela ngebuntfu baJehova lobuhle. Sibonelo saloko kutsi litsi “Nkulunkulu ulutsandvo.” (1 Joh.  4:8) Nasifundza loko ngaJehova sifuna kuba bangani bakhe. LiBhayibheli liphindze litsi Jehova “unelutsandvo lolukhulu.” (Fundza Jakobe 5:11.) Loko kusikhombisa kahle kutsi Jehova usitsandza kanganani!

5. Jehova ukhombisa njani kutsi unemusa futsi singamlingisa njani?

⁵ Naka kutsi Jakobe 5:11 usitjela nangalobunye buntfu baJehova lobuhle lobusenta sisondzele kuye, lokungumusa wakhe. (Eks. 34:6) Lenye indlela Jehova lasikhombisa ngayo umusa wakhe kutsi uyasicolela emaphutsa lesiwentako. (Hla. 51:1) EBhayibhelini, umusa usho lokungetulu nje kwekumane ucolele umuntfu lowente intfo lembi. Umusa usho indlela umuntfu lativa ngayo nakabona lotsite acindzetelekile bese wetama kumsita. Jehova utsi sifiso lanaso sekusisita singetulu ngisho kwendlela umtali lativa ngayo ngemntfwana wakhe. (Isa. 49:15) Nangabe sicindzetelekile, umusa Jehova lanawo wenta kutsi asisite. (Hla. 37:39; 1 Khor. 10:13) Singaba nemusa kubazalwane nabodzadzewetfu ngekutsi sibacolele futsi singahlali sibatfukutselele nangabe basiphetse kabi. (Ef. 4:32) Indlela leyinhloko lesingakhombisa ngayo umusa kubazalwane nabodzadzewetfu kutsi sibasekele nababhekene nebumatima. Nangabe lutsandvo lusenta kutsi sibe nemusa kulabanye, sitawube silingisa Jehova losibonelo lesingasilingisa.—Ef. 5:1.

6. BoJonathani naDavide bakhombisa njani kutsi bebatsandzana kakhulu?

⁶ LiBhayibheli lisitjela ngebantfu lebebanesono lebebatsandzana kakhulu. Cabanga ngesibonelo saJonathani naDavide. LiBhayibheli litsi: “BoJonathani naDavide baba bangani labakhulu futsi Jonathani wacala kutsandza Davide njengobe abetitsandza yena.” (1 Sam. 18:1) Jehova bekakhetse Davide kutsi abe yinkhosi ngemuva kwaSawula. Ngemuva kwaloko, Sawula waba nemona ngaDavide waze wetama nekumbulala.  Jonathani loyindvodzana yaSawula akazange amsekele babe wakhe ngesikhatsi etema kubulala Davide. BoJonathani naDavide betsembisana kutsi batawuhlale babangani futsi basekelana.—1 Sam. 20:42.

7. Yini lebeyingenta boJonathani naDavide kutsi bangabi bangani?

⁷ Kuyamangalisa kutsi boJonathani naDavide bebabangani labakhulu ngobe betitinyenti tintfo lebetingenta kutsi bangabi bangani. Sibonelo saloko kutsi Jonathani bekamdzala ngeminyaka lengaba ngu-30 kunaDavide. Jonathani bekangase acabange kutsi angeke sekabe ngumngani wemuntfu lomncane kakhulu kunaye. Kodvwa Jonathani akazange acabange ngaleyondlela futsi bekamhlonipha kakhulu Davide.

8. Ucabanga kutsi kungani Jonathani bekangumngani lokahle kakhulu kuDavide?

⁸ Jonathani bekangaba nemona ngaDavide. Njengobe bekayindvodzana yeNkhosi Sawula, Jonathani bekangatsi nguye lokufanele abe yinkhosi ngemuva kwaSawula. (1 Sam. 20:31) Kodvwa Jonathani bekatfobekile futsi etsembekile kuJehova. Ngako wasisekela sincumo saJehova sekukhetsa Davide kutsi abe yinkhosi lelandzelako. Wetsembeka kuDavide ngisho nobe loko kwamtfukutselisa kakhulu Sawula.—1 Sam. 20:32-34.

9. Sati ngani kutsi Jonathani bekete umona ngaDavide? Chaza.

⁹ Jonathani bekamtsandza kakhulu Davide, ngako akazange abe nemona ngaye. Jonathani bekanelikhono lelihle lekusebentisa butjoki futsi bekalichawe lelinesibindzi. Bantfu bebatsi yena nababe wakhe Sawula “bebanematubane kwendlula lusweti” futsi ‘banemandla kwendlula emabhubesi.’ (2 Sam. 1:22, 23) Ngako Jonathani bekangatigcabha ngetintfo lebekatentile. Nobe kunjalo, Jonathani akazange etame kutenta loncono kunaDavide futsi bekete umona ngetintfo letinhle Davide lebekatentile. Kunaloko, Jonathani wancoma Davide ngekuba nesibindzi kwakhe kanye nekwetsembela kwakhe kuJehova. Ecinisweni, ngemuva kwekutsi Davide abulale Goliyathi, Jonathani wacala kumtsandza kakhulu Davide. Singakhombisa njani kutsi siyabatsandza bazalwane betfu nabodzadzewetfu ngendlela Jonathani lebekamtsandza ngayo Davide?

10. Kusho kutsini ‘kutsandzana kakhulu ngalokusuka enhlitiyweni’?

¹⁰ LiBhayibheli litsi kufanele ‘sitsandzane kakhulu ngalokusuka enhlitiyweni.’ (1 Phet. 1:22) Jehova usibekele sibonelo kuloku. Jehova usitsandza kakhulu kangangekutsi nasetsembekile kuye angeke ayekele kusitsandza. (Rom. 8:38, 39) Ligama lesiGriki lelitsi “kakhulu” lendlulisela umcondvo wekwetama kakhulu kuze ukhombise kutsi uyamtsandza lomunye umuntfu. Ngaletinye tikhatsi kulukhuni kukhombisa bazalwane nabodzadzewetfu kutsi siyabatsandza. Nangabe labanye basitfukutselisa kufanele sichubeke ‘sibeketelelane ngelutsandvo, futsi sikhutsalele kugcina bunye bemoya ngesibopho sekuthula.’ (Ef. 4:1-3) Nasitimisela kuze sigcine ‘sibopho sekuthula’ angeke sinake kakhulu emaphutsa ebazalwane betfu. Sitawetama kubuka bazalwane betfu njengaJehova.—1 Sam. 16:7; Hla. 130:3.

11. Kungani ngalesinye sikhatsi kungase kube lukhuni kutsandza bazalwane nabodzadze?

¹¹ Akusimelula kutsandza bazalwane nabodzadzewetfu ikakhulukati nangabe sati emaphutsa abo. Lena yinkinga emaKhristu ekucala lebekanayo. Nasi sibonelo, bo-Evodiya  naSintike bebabonakala bete inkinga ‘yekusebenta [naPawula] ekumemeteleni tindzaba letimnandzi.’ Kodvwa bo-Evodiya naSintike bebanenkinga futsi bebahle bangevani. Ngako Pawula wabakhutsata “kutsi babe mcondvo munye eNkhosini.”—Fil. 4:2, 3.

12. Yini lesingayenta kuze sibatsandze kakhulu bazalwane nabodzadzewetfu?

¹² Yini lesingayenta kuze sichubeke sibatsandza bazalwane nabodzadze lamuhla? Nasesibati kancono bazalwane nabodzadzewetfu, kungase kube melula kuticondza timo tabo futsi sibatsandze kakhulu. Singaba bangani nabo ngisho nobe babadzala nobe babancane futsi ngisho nobe banemasiko langafani newetfu. Khumbula kutsi Jonathani bekamdzala ngeminyaka lengaba ngu-30 kunaDavide kodvwa baba bangani labakhulu. Ebandleni lokulo, kukhona yini lomncane nobe lomdzala kuwe longaba ngumngani naye? Nawenta njalo, usuke ukhombisa kutsi ‘ubatsandza bonkhe bazalwane.’—1 Phet. 2:17.

13. Kungani singase sitive sisondzelene kakhulu nalabanye kunendlela lesisondzelane ngayo nalabanye ebandleni?

¹³ Kubatsandza kakhulu bazalwane nabodzadze kusho kutsi sitawuba bangani nabo bonkhe yini bazalwane ebandleni? Cha, loko angeke sekwenteke. Kuvamile kutsi usondzelane kakhulu nalabanye kunendlela losondzelana ngayo nalabanye ngesizatfu sekutsi nitsandza tintfo letifanako. Jesu wabita bonkhe baphostoli bakhe ngekutsi ‘bangani,’ kodvwa bekasondzelene kakhulu naJohane. (Joh. 13:23; 15:15; 20:2) Kodvwa Jesu akazange amphatse ngendlela lekhetsekile Johane kunalalabanye. Nasi sibonelo, ngesikhatsi Johane nemnakabo Jakobe bacela sikhundla lesiphakeme eMbusweni waNkulunkulu, Jesu watsi kubo: “Akusimi loncumako kutsi ngubani lotawuhlala ngesekudla nobe ngesencele sami.” (Mak. 10:35-40) NjengaJesu, kufanele singabaphatsi ngendlela lekhetsekile bangani betfu kunendlela lesiphatsa ngayo labanye. (Jak. 2:3, 4)  Nasenta njalo, sitawube asilisiti libandla kutsi libe nekuthula.—Juda 17-19.

14. KubaseFiliphi 2:3 ungasisita njani kutsi singetami kuba ncono kunalabanye?

¹⁴ Nasitsandzana kakhulu, angeke setame kuba ncono kunalabanye ebandleni. Khumbula kutsi Jonathani akazange abe nemona ngaDavide futsi afune kube nguye inkhosi esikhundleni sakhe. Sonkhe singasilingisa sibonelo saJonathani. Ungabi nemona ngemakhono ebazalwane bakho, ‘kodvwa ngekutfobeka batsatse njengalabakhulu kunawe.’ (Fundza KubaseFiliphi 2:3.) Khumbula kutsi sonkhe kunalokutsite lesingakwenta kuze sisite libandla. Nasitfobekile, sitawukhona kubona buntfu lobuhle bebazalwane nabodzadzewetfu futsi sizuze etibonelweni tabo tekwetsembeka.—1 Khor. 12:21-25.

15. Yini loyifundzako kulokwenteka kuTanya nemndeni wakhe?

¹⁵ Nangabe kwenteka intfo lembi ekuphileni kwetfu, Jehova uyasidvudvuta futsi asisite ngelutsandvo asebentisa bazalwane nabodzadzewetfu. Cabanga ngaloko lokwenteka kulomunye umndeni lobewubuya eMhlanganweni Wetive wanga-2019 lobewuse-United States lobewunesihloko lesitsi “Lutsandvo Aluyoke Luphele!” Tanya lonebantfwana labatsatfu utsi: “Besesibuyela ehhotela ngesikhatsi lenye imoto ingena embikwetfu futsi isishayisa. Kute lowalimala kodvwa setfuka kakhulu futsi saphuma emotweni sema eceleni kwemgwaco. Kunalotsite lowasibita kutsi site emotweni yakhe kuze siphephe. Bekungulomunye webazalwane betfu lobekasandza kuphuma emhlanganweni, futsi akusiye yena kuphela lowema. Bazalwane  labasuka eSweden nabo bema. Labodzadze basihaga futsi sativa sesincono. Ngabacinisekisa labazalwane nabodzadze kutsi sitawuba kahle ngako abahambe kodvwa bachubeka bahleti natsi. Bachubeka bahleti natsi ngisho sekufike ema-paramedics futsi bebaciniseka kutsi sinako konkhe lesikudzingako. Kulesikhatsi lesimatima, seva kutsi Jehova uyasitsandza. Loku kwenta sabatsandza kakhulu bazalwane nabodzadzewetfu, futsi kwacinisa nendlela lesimtsandza ngayo nalesimbonga ngayo Jehova.” Sikhona yini sikhatsi lapho bewudzinga khona lusito futsi lomunye umKhristu wakukhombisa kutsi uyakutsandza?

16. Ngutiphi tizatfu lesinato tekutsandza labanye?

¹⁶ Cabanga ngalokuhle lokwentekako nangabe sitsandzana. Siyabadvudvuta bazalwane nabodzadzewetfu nangabe babhekene netimo letimatima. Senta kutsi kuhlale kunebunye emkhatsini webantfu baNkulunkulu. Sikhombisa kutsi sibafundzi baJesu futsi loko kwenta bantfu bafune kukhonta Jehova. Ngetulu kwako konkhe sidvumisa ‘Babe wemusa, naNkulunkulu wayo yonkhe indvudvuto,’ lokunguJehova. (2 Khor. 1:3) Shengatsi sonkhe singachubeka sibatsandza labanye!