1. NjengeNkhosi Davide, singahle sibute muphi umbuto?

SONKHE siyafuna kuba nekuthula. Kute kitsi lokutsandzako kuhlale akhatsatekile. Kodvwa ngaletinye tikhatsi singahle sitive sikhatsatekile. Ecinisweni, tikhonti taJehova tingase titibute umbuto lofanako nalowabutwa yiNkhosi Davide kuJehova lotsi: “Kutawuze kube ngunini ngikhatsatekile, Ngilusizi enhlitiyweni yami onkhe emalanga?”—Hla. 13:2.

2. Sitawucoca ngani kulesihloko?

² Ngisho nobe sihle sikhatsateka, kukhona lesingakwenta kuze singakhatsateki kakhulu. Kulesihloko, sitawucale sicoce ngaletinye tintfo letingasenta sikhatsateke. Sitawubese sicoca ngetintfo letisitfupha letingasenta kutsi singakhatsateki kakhulu nasinetinkinga.

3. Ngutiphi tintfo letingasikhatsata futsi singakhona yini kutivimba?

³ Tinyenti tintfo letingasenta sikhatsateke futsi angeke sikhone kutivimba kutsi tenteke. Nasi sibonelo, ngeke sikhone kuvimba kukhula kwemali yekutsenga kudla, timphahla nobe kukhula kwemali yekubhadala indzawo yekuhlala njalo ngemnyaka. Ngeke sikhone kuvimba lesisebenta nabo nobe lesifundza nabo kutsi bayekele kwetama kusenta singetsembeki nobe sitiphatse kabi, futsi ngeke sikhone kuvimba bantfu kutsi bangenti bugebengu endzaweni lesihlala kuyo. Sinaletinkinga  ngobe siphila eveni lapho bantfu labanyenti bangenti tincumo ngekuvumelana netimiso teliBhayibheli. Sathane, longuNkulunkulu walelive uyati kutsi labanye bantfu batawuvumela “tinkinga talelive” tibente bangasamkhonti Jehova. (Mat. 13:22; 1 Joh. 5:19) Ngako asimangali kutsi lelive ligcwele tinkinga letenta bantfu bakhatsateke kakhulu!

4. Yini lengenteka nasingakhatsateka kakhulu ngetinkinga tetfu?

⁴ Singakhatsateka kakhulu ngetinkinga lesinato kangangekutsi kube bete lokunye lesicabanga ngako. Nasi sibonelo, singahle sikhatsateke ngekutsi ngeke sibe nemali leyenele yekutsenga tintfo lesitidzingako nobe sikhatsateke ngekutsi sitawugula bese asisakhoni kusebenta nobe silahlekelwe ngumsebenti. Kungenteka sikhatsateke nangekutsi singahle singetsembeki nasilingeka kutsi sephule umtsetfo waNkulunkulu. Madvutane, Sathane utawenta labo labalawulako kutsi bahlasele bantfu baNkulunkulu, ngako singahle sikhatsateke ngekutsi sitawenta njani nangabe labo labasekela Sathane basihlasela. Kungenteka sitibute, ‘Kukabi yini kukhatsateka ngaletintfo?’

5. Bekasho kutsini Jesu nakatsi: “Ningakhatsateki”?

⁵ Siyati kutsi Jesu watjela balandzeli bakhe watsi: “Ningakhatsateki.” (Mat. 6:25) Jesu bekasho kutsi kufanele kube bete yini lesikhatsateka ngako? Cha! Khumbula kutsi tikhonti taJehova letetsembekile tasesikhatsini lesendlulile betihle tikhatsateka, futsi Jehova wachubeka ajabula ngato. * (1 Khos. 19:4; Hla. 6:3) Jesu bekasidvudvuta. Bekangafuni sikhatsateke kakhulu ngekutfola tintfo lesitidzingako kangangekutsi kukhonta kwetfu Jehova kungasabi yintfo lebalulekile ekuphileni kwetfu. Ngako yini lesingayenta nasitiva sikhatsatekile?—Buka libhokisi lelitsi “ Indlela Yekukwenta.”

6. KubaseFiliphi 4:6, 7, utsi yini lengasisita kutsi singakhatsateki kakhulu?

⁶ (1) Hlale uthantaza. Nangabe unenkinga lekukhatsatako, ungathantaza kuJehova umcele akusite. (1 Phet. 5:7) Jehova angayiphendvula imithantazo yakho ngekukunika “kuthula kwaNkulunkulu lokwendlula konkhe kucondza.” (Fundza KubaseFiliphi 4:6, 7.) Jehova utakunika kuthula asebentisa umoya wakhe longcwele lonemandla.—Gal. 5:22.

7. Yini lokufanele siyikhumbule nasithantaza kuNkulunkulu?

⁷ Nawuthantaza kuJehova, mtjele indlela lotiva ngayo. Mtjele kutsi yini inkinga yakho futsi umchazele kutsi utiva njani ngayo. Nangabe ikhona indlela yekucatulula lenkinga, mcele kutsi akuphe kuhlakanipha kuze wati kutsi yini lokufanele uyente futsi akuphe emandla ekukwenta. Kodvwa nangabe kute longakwenta kuze ucatulule lenkinga, cela Jehova akusite kuze ungakhatsateki kakhulu. Nawuyisho ngalokucondzile inkinga yakho nawuthantaza, ngekuhamba kwesikhatsi utawubona kahle kutsi Jehova uwuphendvule njani lomthantazo. Nangabe imphendvulo ungayitfoli ngekushesha ngemuva kwekuthantaza, ungayekeli kuthantaza. Jehova akagcini nje ngekufuna kutsi siyisho ngalokucondzile inkinga lesinayo, kodvwa ufuna nekutsi sichubeke sithantaza ngayo.—Luk. 11:8-10.

8. Yini lesingayisho nasithantaza?

 ⁸ Nawuthantaza kuJehova umtjela ngetintfo letikukhatsatako, ciniseka kutsi usho nemavi ekubonga. Kuhle kucabanga nangetintfo letinhle lesinato ngisho nobe sinetinkinga letinyenti. Nangabe ngaletinye tikhatsi ungakhoni kutjela Jehova indlela lotiva ngayo, khumbula kutsi Jehova utawuphendvula umthantazo wakho ngisho nobe ungavele utsi ‘Ngicela ungisite!’—2 Khr. 18:31; Rom. 8:26.

9. Yini lokufanele siyente nasitiva sesaba?

⁹ (2) Tsembela ekuhlakanipheni kwaJehova, hhayi ekuhlakanipheni kwakho. Ngesikhatsi kusaphila umphrofethi Isaya, bantfu bakaJuda bebesaba kuhlaselwa ngema-Asiriya. Bantfu bakaJuda bebangafuni kuncotjwa ngema-Asiriya ngako bacela emaGibhithe kutsi abasite. (Isa. 30:1, 2) Jehova wabecwayisa kutsi kwetsembela kwabo kubantfu baseGibhithe bekutawubaletsela inhlekelele. (Isa. 30:7, 12, 13) Asebentisa Isaya, Jehova watjela labantfu kutsi bebatasitfola njani sivikelo lesingiso. Isaya watsi: “Nitawuba nemandla nangabe ningeke nesabe futsi nitawetsembela” kuJehova.—Isa. 30:15b.

10. Ngutiphi timo lapho kungadzingeka sikhombise khona kutsi setsembele kuJehova?

¹⁰ Kunini lapho singakhombisa khona kutsi setsembele kuJehova? Nati letinye tibonelo. Asesitsi utfola umsebenti lotakuholela imali lenyenti kodvwa lotawenta kutsi ube bete sikhatsi sekukhonta Jehova. Nobe asesitsi kukhona umuntfu losebenta naye longamkhonti Jehova kodvwa lokhombisa kutsi uyakutsandza. Nobe asesitsi lilunga lemndeni litsi litakulahla nawuchubeka ukhonta Jehova. Kuto tonkhe letimo kungadzingeka kutsi wente sincumo lesimatima, kodvwa kunobe ngusiphi simo Jehova utakuniketa sicondziso losidzingako. (Mat. 6:33; 10:37; 1 Khor. 7:39) Nangu umbuto, utametsemba yini Jehova futsi ulalele setsembiso sakhe?

11. Ngutiphi tindzaba letiseBhayibhelini lesingatifundza kuze singesabi nangabe labanye basiphikisa?

¹¹ (3) Fundza etibonelweni letinhle nasetibonelweni letimbi. LiBhayibheli linetindzaba letinyenti letikhombisa kutsi kubaluleke kakhulu kuhlale singesabi futsi setsembele kuJehova. Njengobe ufundza letindzaba, cabanga kutsi yini leyasita tikhonti taNkulunkulu kutsi tingesabi natiphikiswa. Nasi sibonelo, ngesikhatsi inkantolo lephakeme yemaJuda itjela baphostoli kutsi bayekele kushumayela, abazange besabe. Kunaloko, ngesibindzi batsi: “Kufanele silalele Nkulunkulu njengobe angumbusi kunekutsi silalele bantfu.” (Imis. 5:29) Ngisho nangemuva kwekutsi bashaywe, labaphostoli abazange besabe. Leni? Kungobe bebati kutsi Jehova uyabasekela futsi uyajabula ngabo. Ngako bachubeka bashumayela tindzaba letimnandzi. (Imis. 5:40-42) Ngendlela lefanako, ngesikhatsi umfundzi Stefano sekatawubulawa, wachubeka anekuthula futsi nebuso bakhe ‘bebunjengebuso bengilosi.’ (Imis. 6:12-15) Kungani? Kungenca yekutsi bekaciniseka kutsi Jehova uyajabula ngaye.

12. Ngekusho kwa-1 Phetro 3:14; 4:14, yini lesenta sijabule ngisho nobe siphatfwa kabi?

¹² Baphostoli bebaciniseka kutsi Jehova unabo. Bekabanike emandla ekwenta timangaliso. (Imis. 5:12-16; 6:8) Kodvwa lamuhla, Jehova akasiniketi emandla ekwenta timangaliso. Nobe kunjalo, asebentisa liVi lakhe, Jehova uyasicinisekisa kutsi nangabe sihlushwa ngenca yekulunga uyajabula ngatsi futsi nemoya wakhe unatsi. (Fundza 1 Phetro 3:14; 4:14.) Kunekutsi sikhatsateke kakhulu ngekutsi sitawenta njani nasiphikiswa esikhatsini lesitako, kufanele sente konkhe  lesingakwenta kuze sicinise indlela lesimetsemba ngayo Jehova kutsi utasisekela futsi asisindzise. Njengobe bafundzi bekucala benta, natsi kufanele sisetsembe setsembiso saJesu lesitsi: “Ngitaninika loko lenitakusho ngiphindze ngininike nekuhlakanipha, futsi bonkhe labaniphikisako ngeke bakhone kumelana nani nobe kuniphikisa.” Jesu wasetsembisa watsi: “Ngekucinisela kwenu, nitawusindzisa kuphila kwenu.” (Luk. 21:12-19) Jehova ugcina ngisho nemininingwane lemincane engcondvweni yakhe yetikhonti letife tetsembekile. Ngalemininingwane lanayo, Jehova utawukhona kutivusa.

13. Singazuza njani ngekufundza etibonelweni talabo labehluleka kuba nesibindzi futsi betsembele kuJehova?

¹³ Singaphindze sifundze etibonelweni talabo labehluleka kuba nesibindzi futsi betsembele kuJehova. Kufundza etibonelweni tabo kutasisita kutsi singawenti emaphutsa labawenta. Nasi sibonelo, ngesikhatsi Asa ayiNkhosi yakaJuda, libutfo lelikhulu leta latomhlasela kodvwa wetsembela kuJehova futsi Jehova wambusisa ngobe wancoba. (2 Khr. 14:9-12) Ngekuhamba kwesikhatsi, iNkhosi Bhasha yaka-Israyeli yeta yatohlasela Asa ngelibutfo lelincane, kodvwa ngaleso sikhatsi Asa akazange etsembele kuJehova kutsi amsindzise njengobe bekentile esikhatsini lesendlulile, kunaloko wabhadala emaSiriya kuze amsite. (2 Khr. 16:1-3) Nalapho sekakhulile futsi agula kakhulu akazange etsembele kuJehova kuze amsite.—2 Khr. 16:12.

14. Yini lesingayifundza emaphutseni a-Asa?

¹⁴ Ekucaleni, Asa wetsembela kuJehova ngesikhatsi anetinkinga. Kodvwa ngekuhamba kwesikhatsi wehluleka kwetsembela kuNkulunkulu kuze amsite, kunaloko wetama kuticatululela yena tinkinga takhe. Lisu la-Asa lekucela emaSiriya kutsi amsite kungenteka lacale labonakala liphumelela. Kodvwa Juda waba nekuthula kwesikhashana. Jehova wamtjela asebentisa umphrofethi watsi: “Ngobe wetsembele enkhosini yaseSiriya wangetsembeli kuJehova Nkulunkulu wakho, libutfo lenkhosi yaseSiriya seliphunyukile esandleni sakho.” (2 Khr. 16:7) Kufanele singacabangi kutsi singakhona kuticatululela tsine tinkinga tetfu kunekutsi sicele Jehova asisite asebentisa liVi lakhe. Ngisho nobe kufanele sente sincumo ngekushesha kufanele setsembele kuJehova futsi utasisita kutsi sente sincumo lesikahle.

15. Yini lesingayenta nasifundza liBhayibheli?

¹⁵ (4) Wabambe ngenhloko emavesi eliBhayibheli. Nangabe utfola emavesi lakhombisa kutsi kubalulekile kwetsembela kuJehova futsi ungesabi, yetama kuwabamba ngenhloko. Kuze ukhone kuwabamba ngenhloko, ungawafundza uphimisele nobe uwabhale phansi futsi uhle uwafundza. Jehova watjela Joshuwa kutsi afundze incwadzi yeMtsetfo ngaso sonkhe sikhatsi kuze ente tintfo ngekuhlakanipha. Loko lebekatakufundza encwadzini yeMtsetfo bekutamsita kutsi angesabi kodvwa abe nesibindzi sekuhola bantfu baNkulunkulu. (Josh. 1:8, 9) Emavesi lamanyenti laseVini laNkulunkulu angakusita kutsi ungesabi nawubhekene netimo letingakwenta kutsi ukhatsateke nobe wesabe.—Hla. 27:1-3; Taga 3:25, 26.

16. Jehova ulisebentisa njani libandla kuze asisite singesabi futsi setsembele kuye?

¹⁶ (5) Tihlanganise nebantfu baNkulunkulu. Jehova usebentisa bazalwane betfu nabodzadze kuze basisite kutsi singesabi futsi setsembele kuye. Emihlanganweni, siyazuza etinkhulumeni, etimphendvulweni tebazalwane nabodzadzewetfu futsi siphindze sikhutsateke nasicoca nebazalwane nabodzadzewetfu.  (Heb. 10:24, 25) Singaphindze sikhutsateke nasitjela bangani betfu labasedvute ebandleni ngaloko lokusikhatsatako. “Emavi lamnandzi” lavela kumngani angasisita kuze singakhatsateki kakhulu.—Taga 12:25.

17. Ngekusho kwemaHebheru 6:19, litsemba lesinalo ngeMbuso lingasisita njani nasibhekene netinkinga?

¹⁷ (6) Gcina litsemba lakho licinile. Litsemba lesinalo ngeMbuso ‘linjengelihhuka lemkhumbi emiphefumulweni,’ futsi lisenta sikhone kubhekana netimo letimatima nobe imicabango lesikhatsatako. (Fundza KumaHebheru 6:19.) Zindla ngelikusasa Jehova lasetsembisa lona. Ngaleso sikhatsi kute lokutasikhatsata. (Isaya 65:17) Ticabange usemhlabeni lomusha lonekuthula, lapho khona tingeke tenteke tintfo letimbi. (Mikha 4:4) Litsemba lakho litawucina nawutjela labanye ngemhlaba lomusha. Yenta konkhe longakwenta emsebentini wekushumayela newekwenta bafundzi. Nawenta njalo, ungaciniseka ‘ngalokuphelele ngelitsemba letfu kuze kube sekugcineni.’—Heb. 6:11.

18. Ngutiphi tinkinga lesingatilindzela esikhatsini lesitako futsi yini lesingayenta kuze sibhekane nato?

¹⁸ Njengobe sesiya ekupheleni kwalelive, sitawuba netinkinga letinyenti letitawusenta sikhatsateke. Sihloko setfu semnyaka sa-2021 singasisita kutsi singesabi nasibhekene naletinkinga, singatetsembi tsine kodvwa setsembele kuJehova. Kulomnyaka, asikhombise ngetento tetfu kutsi siyawetsemba emavi aJehova latsi: “Nitawuba nemandla nangabe ningeke nesabe futsi nitawetsembela kimi.”—Isa. 30:15.