1. Ungawuchaza njani umndeni wakuboJakobe?

JAKOBE, lebekangumnakaboJesu, wakhulela emndenini lobewetsembekile kuJehova. * Batali bakhe, lebekunguJosefa naMariya bebamtsandza kakhulu Jehova futsi bebenta konkhe lebebangakwenta kuze bamkhonte. Jakobe bekabusiseke nangalenye indlela, umnakabo lomdzala bekatawuba nguMesiya lowetsenjisiwe. Jakobe bekabusiseke kakhulu ngekuba yincenye yalomndeni!

2. Yini lebeyingenta Jakobe afundze kumnakabo lomdzala?

² Kunyenti lobekungenta Jakobe afundze kumnakabo lomdzala. (Mat. 13:55) Nasi sibonelo, ngesikhatsi Jesu aneminyaka lengu-12, bekayati kahle imiBhalo kangangekutsi wamangalisa emadvodza lamadzala aseJerusalema lebekafundze kakhulu. (Luk. 2:46, 47) Kungenteka Jakobe bekabata naJesu. Nangabe kunjalo, bekamati kahle umnakabo. Nathan H. Knorr bekavame kutsi: “Umuntfu umati kahle nawusebenta naye.” * Kungenteka nekutsi Jakobe wanaka kutsi “Jesu wachubeka ahlakanipha, akhula, futsi atsandvwa nguNkulunkulu kanye nebantfu.” (Luk. 2:52) Ngako kungenteka sicabange kutsi Jakobe waba ngulomunye webafundzi bekucala baJesu. Kodvwa loko akuzange kwenteke.

3. Yini Jakobe layenta ngesikhatsi Jesu acala kushumayela?

³ Ngesikhatsi Jesu ashumayela emhlabeni, Jakobe akazange  abe ngumfundzi wakhe. (Joh. 7:3-5) Kungenteka Jakobe bekasekhatsi kuletihlobo taJesu lebetitsi “uyahlanya.” (Mak. 3:21) Kute lokukhombisa kutsi Jakobe bekanamake wabo, lokunguMariya, ngesikhatsi Jesu afa elugodvweni.—Joh. 19:25-27.

4. Ngutiphi tifundvo lesitawucoca ngato?

⁴ Ngekuhamba kwesikhatsi, Jakobe wakholwa kuJesu futsi waba ngulomdzala welibandla. Kulesihloko, sitawucoca ngetifundvo letimbili lesingatifundza kuJakobe: (1) Kungani kufanele sihlale sitfobekile nekutsi (2) yini lesingayenta kuze sibe bafundzisi labaphumelelako.

5. Yini Jakobe layenta ngesikhatsi Jesu lebekavusiwe abonakala kuye?

⁵ Wacala nini Jakobe kuba ngumlandzeli waJesu lowetsembekile? Ngemuva kwekutsi Jesu avuswe ekufeni, “wabonakala kuJakobe, wase ubonakala nakubo bonkhe baphostoli.” (1 Khor. 15:7) Ngemuva kwaloko, Jakobe waba ngumfundzi wakhe. Bekakhona ngesikhatsi baphostoli bamele kutfola umoya longcwele ekamelweni lelisetulu eJerusalema. (Imis. 1:13, 14) Ngekuhamba kwesikhatsi, Jakobe waba lilunga lesigungu lesibusako sangaleso sikhatsi. (Imis. 15:6, 13-22; Gal. 2:9) Ngaphambi kwa-62 C.E., waphefumulelwa kutsi abhale incwadzi lebeyiya kumaKhristu lagcotjiwe. Lencwadzi ilusito kitsi lamuhla ngisho sinelitsemba lekuphila ezulwini nobe emhlabeni. (Jak. 1:1) Ngekusho kwesati semlandvo lokutsiwa nguJosephus, Jakobe wabulawa ngemuva kwekutsi uMphristi Lophakeme wemaJuda Lokutsiwa ngu-Ananias the Younger atsi akabulawe. Jakobe wachubeka etsembekile kuJehova kwaze kwaba ngulapho kuphila kwakhe kwasemhlabeni kuphela.

6. Jakobe bekahluke njani kubaholi benkholo bangesikhatsi sakhe?

⁶Jakobe bekatfobekile. Kungani sisho njalo? Cabanga ngemehluko lokhona emkhatsini waJakobe nakubaholi labanyenti benkholo. Ngesikhatsi Jakobe abona bufakazi bekutsi Jesu uyiNdvodzana yaNkulunkulu, wabemukela. Baphristi labakhulu baseJerusalema abazange bakwente loko. Nasi sibonelo, bebangeke baphike kutsi Jesu wavusa Lazaro ekufeni. Kunekutsi bemukele kutsi Jesu bekatfunywe nguJehova, betama kubulala Jesu naLazaro. (Joh. 11:53; 12:9-11) Ngemuva kwaloko, ngesikhatsi Jesu avuswe ekufeni, betama kufihlela bantfu kutsi uvusiwe. (Mat.  28:11-15) Kutigcabha kwalabaholi benkholo kwenta kutsi bangamemukeli Mesiya.

7. Kungani kungakafaneli sitigcabhe?

⁷Lesikufundzako: Ungatigcabhi, bani nesifiso sekufundziswa nguNkulunkulu. Njengobe kugula lokutsite kungenta kube matima ngenhlitiyo yemuntfu kutsi isebente kahle, kutigcabha kungenta kube matima kutsi silalele ticondziso taJehova. BaFarisi bavumela tinhlitiyo tabo taba lukhuni kangangekutsi bala kwemukela bufakazi lebebucacile lebebabukhonjiswa ngumoya longcwele. (Joh. 12:37-40) Loko labakwenta bekuyingoti ngobe kwabavimbela kutsi batfole kuphila lokuphakadze. (Mat. 23:13, 33) Kubaluleke kakhulu kutsi sichubeke sivumela liVi laNkulunkulu nemoya longcwele kutsi kushintje buntfu betfu futsi kutsintse indlela lesicabanga ngayo netincumo lesitentako! (Jak. 3:17) Ngenca yekutsi Jakobe bekatfobekile, wavumela Jehova kutsi amfundzise. Ngetulu kwaloko, ngenca yekutsi bekatfobekile, waba ngumfundzisi lophumelelako njengobe sitawubona.

8. Yini lengasisita kutsi sibe bafundzisi labakahle?

⁸ Jakobe bekangakafundzi kakhulu. Kungenteka baholi benkholo bangaleso sikhatsi bebamtsatsa ngendlela bebatsatsa ngayo umphostoli Phetro naJohane, lebebatsi “abakafundzi lokuyaphi nekutsi babantfukatana nje.” (Imis. 4:13) Kodvwa Jakobe wafundza kuba ngumfundzisi lophumelelako, njengobe loko sikubona nasifundza incwadzi lebitwa ngelibito lakhe. NjengaJakobe, kungenteka asikafundzi lokuyaphi. Nobe kunjalo, sisitwa ngumoya waJehova kanye nekuceceshwa lesikutfola enhlanganweni yakhe, natsi singaba bafundzisi labakahle. Ase sicoce ngesibonelo Jakobe lasibekela sona njengemfundzisi futsi sibone kutsi yini lesingayifundza.

9. Ungayichaza njani indlela Jakobe bekafundzisa ngayo?

⁹Jakobe bekangawasebentisi emagama lalukhuni nobe tinchazelo letiyinkimbinkimbi. Umphumela waloko waba kutsi labo lebebamlalela bebati kutsi kufanele benteni nekutsi bakwente kanjani. Cabanga ngendlela lemelula  Jakobe lafundzisa ngayo emaKhristu kutsi kufanele akulungele kuphatfwa kabi kodvwa angatfukutseli. Wabhala watsi: “Sitsi bayajabula labo labacinisele. Nivile ngekucinisela kwaJobe, nawubona nemphumela Jehova lawuletsa, ngaleyo ndlela nabona kutsi Jehova unelutsandvo lolukhulu futsi unemusa.” (Jak. 5:11) Naka kutsi Jakobe bekakusekela emiBhalweni loko bekakusho. Wasebentisa liVi laNkulunkulu kuze asite labo bebamlalele babone kutsi Jehova uhlale abaniketa umvuzo labo labetsembekile kuye, njengaJobe. Jakobe wasebentisa emagama lamelula nendlela lemelula yekuchaza kuze asite bantfu bakucondze loko bekakusho. Ngekwenta njalo, wenta kutsi bantfu banake Jehova kunekutsi banake yena.

10. Nguyiphi lenye indlela lesingamlingisa ngayo Jakobe nasifundzisa?

¹⁰Lesikufundzako: Umlayeto wakho awuhlale umelula futsi ukutsatse eVini laNkulunkulu loko lokufundzisako. Umgomo wetfu akukafaneli kube kukhombisa bantfu kutsi sati kanganani, kodvwa sifuna kubakhombisa kutsi Jehova wati kangakanani nekutsi ubakhatsalela kakhulu. (Rom. 11:33) Loko singakhona kukwenta nangabe sihlale sikusekela emiBhalweni loko lesikushoko. Nasi sibonelo, kunekutsi sitjele lesibafundzisa liBhayibheli loko lesingakwenta esimeni labakuso, kufanele sibasite kutsi bacabange ngetibonelo letiseBhayibhelini futsi sibasite bacondze indlela Jehova lativa ngayo nalacabanga ngayo. Nasenta njalo, batawuba nesifiso sekujabulisa Jehova, hhayi tsine.

11. Ngutiphi tinkinga lamanye emaKhristu bekanato, futsi Jakobe waweluleka njani? (Jakobe 5:13-15)

¹¹Jakobe bekabuka tintfo njengobe tinjalo. Encwadzini layibhala, kuyabonakala kutsi bekatati tinkinga bazalwane bakhe lebebabhekana nato, futsi wabaniketa sicondziso lesicacile sekutsi bangatincoba njani. Nasi sibonelo, lamanye emaKhristu bekangasheshi kusebentisa seluleko. (Jak. 1:22) Labanye bebabaphatsa ngendlela leyehlukile labanjingile. (Jak. 2:1-3) Labanye bebasolo banenkinga yekwehluleka kulawula lulwimi lwabo. (Jak. 3:8-10) LamaKhristu bekanetinkinga letimatima kepha Jakobe beketsemba kutsi asengashintja. Waniketa seluleko sakhe ngendlela lenemusa kodvwa lecondzile futsi wakhutsata labo bebadzinga lusito kutsi balucele kulabadzala belibandla kuze bente lushintjo.—Fundza Jakobe 5:13-15.

12. Yini lengasenta sibe nembono lokahle nasisita labo lesidadisha nabo liBhayibheli?

¹²Lesikufundzako: Buka tintfo njengobe tinjalo kodvwa ube nembono lokahle ngalabanye. Kungenteka labanyenti lesidadisha nabo liBhayibheli bakutfola kumatima kusebentisa seluleko salo. (Jak. 4:1-4) Kungenteka kubatsatse sikhatsi kuyekela imikhuba lemibi futsi babe nebuntfu lobuhle bebuKhristu. NjengaJakobe, kufanele sibe nesibindzi sekutjela labo lesidadisha nabo liBhayibheli lakufanele batfutfukise khona. Kufanele sihlale sinembono lokahle, setsembe kutsi Jehova utabadvonsela kuye bantfu labatfobekile, setsembe nekutsi utabaniketa emandla ekwenta lushintjo ekuphileni kwabo.—Jak. 4:10.

13. Ngekusho kwaJakobe 3:2 nembhalo longentasi, yini Jakobe layivuma?

¹³Jakobe bekangaticabangi ancono kunalabanye. Jakobe akazange acabange kutsi umndeni lakhulela kuwo nobe imisebenti bekayenta bekumenta abe ncono kunalabanye bazalwane nabodzadze. Nakakhuluma ngebazalwane bakhe bekatsi: “Bazalwane bami labatsandzekako.” (Jak. 1:16, 19; 2:5) Bekangenti ngatsi ute sono,  kunaloko naye watifaka ekhatsi nakatsi: “Sonkhe siyawenta emaphutsa.”—Fundza Jakobe 3:2, nembhalo longentasi.

14. Kungani kufanele siwavume emaphutsa etfu?

¹⁴Lesikufundzako: Khumbula kutsi sonkhe sinesono. Akukafaneli sicabange kutsi sincono kunalabo lesibafundzisako. Kungani? Nangabe senta lesidadisha naye liBhayibheli abone ngatsi asiwenti emaphutsa, angahle acabange kutsi angeke akhone kwenta loko Nkulunkulu lakufunako. Kodvwa nangabe sivuma kutsi akukabi melula ngaso sonkhe sikhatsi kusebentisa timiso letisemiBhalweni futsi simchazele indlela Jehova lasisite ngayo kuze sincobe tinkinga tetfu, sitawube siyamsita abone kutsi naye angakhona kukhonta Jehova.

15. Ungayichaza njani imifanekiso leyasetjentiswa nguJakobe? (Jakobe 3:2-6, 10-12)

¹⁵Jakobe wasebentisa imifanekiso letsintsa inhlitiyo. Siyaciniseka kutsi Jakobe wasitwa ngumoya longcwele kodvwa kungenteka wafundza lokunyenti ngendlela yekufundzisa ngekunaka imifanekiso lebeyisetjentiswa ngumnakabo lomdzala, lokunguJesu. Imifanekiso leyasetjentiswa nguJakobe encwadzini yakhe imelula futsi nalesikufundza kuyo kucacile.—Fundza Jakobe 3:2-6, 10-12.

16. Kungani kufanele sisebentise imifanekiso letsintsa inhlitiyo?

¹⁶Lesikufundzako: Sebentisa imifanekiso letsintsa inhlitiyo. Nawusebentisa imifanekiso lekahle, wenta labakulalele kutsi bakubone ngemehlo engcondvo loko lokushoko. Wakha sitfombe etingcondvweni tabo. Lesitfombe sisita labakulalele kutsi bakhumbule emaciniso labalulekile laseBhayibhelini. Jesu bekanelikhono lekusebentisa imifanekiso letsintsa inhlitiyo, futsi umnakabo walandzela etinyatselweni takhe. Ase sicoce ngalomunye umfanekiso waJakobe futsi sibone kutsi kungani uphumelela.

17. Kungani uphumelela umfanekiso lobhalwe kuJakobe 1:22-25?

¹⁷ Fundza Jakobe 1:22-25. Tinyenti tizatfu letenta umfanekiso waJakobe lomayelana nesibuko kutsi uphumelele. Ngesikhatsi awusho, bekaneliphuzu lelitsite engcondvweni, lelikutsi, kuze sizuze eVini laNkulunkulu kufanele sente lokungetulu nje kwekulifundza, kufanele sikwente loko lesikufundzako. Jakobe wakhetsa umfanekiso lebekumelula kutsi labo bebamlalele bawucondze, wasebentisa  umfanekiso wemuntfu lotibuka esibukweni. Beliyini liphuzu? Kungaba bulima kutsi umuntfu atibuke esibukweni, abone lakufanele alungise khona kodvwa angalungisi. Ngendlela lefanako, kungaba bulima kutsi nasifundza liVi laNkulunkulu, sibone lakufanele sente khona lushintjo mayelana nebuntfu betfu, kodvwa singashintji.

18. Ngutiphi tintfo letintsatfu lokufanele sitente nasisebentisa umfanekiso?

¹⁸ Nawusebentisa umfanekiso, ungasilingisa sibonelo saJakobe ngekutsi wente nati tintfo letintsatfu: (1) Ciniseka kutsi lomfanekiso uyahambisana neliphuzu lokhuluma ngalo. (2) Sebentisa umfanekiso lokumelula kutsi bawucondze labakulalele. (3) Yenta kucace kutsi bangakusebentisa njani loko labakufundza kulomfanekiso. Nangabe kumatima kucabanga imifanekiso lekahle longayisebentisa, buka i-Watch Tower Publications Index. Ngephansi kwesihloko lesitsi “Illustrations,” utawutfola imifanekiso leminyenti longayisebentisa. Kodvwa khumbula kutsi imifanekiso injengesikhulisamavi (microphone), yenta kutsi kuvakale kancono loko lokushoko. Ngako ciniseka kutsi umfanekiso uwusebentisa nangabe ufuna kugcizelela emaphuzu layinhloko. Kuliciniso kutsi sizatfu lesihamba embili lesisenta sitfutfukise emakhono etfu ekufundzisa kutsi sifuna kusita bantfu labanyenti kutsi babe yincenye yemndeni waJehova lojabulako, akusiko kutsi sifuna kunakwe tsine.

19. Sikhombisa njani kutsi siyabatsandza bazalwane betfu nabodzadze?

¹⁹ Asikakhuli nabhuti lomdzala lote sono, kodvwa siyakujabulela kukhonta Jehova sikanye nemndeni lomkhulu webazalwane betfu nabodzadze. Sikhombisa kutsi siyabatsandza ngekutsi sicitse sikhatsi nabo, sifundze kubo futsi siwente nabo umsebenti wekushumayela newekufundzisa. Nasitimisela kulingisa sibonelo saJakobe endleleni lesicabanga ngayo, lesitiphatsa ngayo nalesifundzisa ngayo, sitawudvumisa Jehova futsi sitawube sisita labanetinhlitiyo leticotfo basondzelane naBabe wetfu wasezulwini lonelutsandvo.