1-3. Ngutiphi tintfo letingenta bantfu baJehova bakhale?

WAGCINA nini kukhala? Ngaletinye tikhatsi siyakhala nasijabulile, kodvwa etikhatsini letinyenti sikhala ngobe siva buhlungu. Sibonelo saloku kutsi siyakhala nasishonelwe ngumuntfu lesimtsandzako. Lomunye dzadze waseMelika lokutsiwa ngu-Lorilei wabhala watsi: “Bekuhle kuba netikhatsi lapho buhlungu bekushonelwa yindvodzakati yami bebuba bukhulu kakhulu kangangekutsi kute lebekungidvudvuta. Bengitibuta kutsi ngikhona njani kuphila nenhlitiyo lebuhlungu kangaka.” *

² Kunaletinye tintfo letingasenta sikhale. Hiromi, lolihlahlandlela eJapan utsi: “Ngihle ngidvumateka ngenca yekutsi bantfu abafuni kungilalela nangishumayela. Ngaletinye tikhatsi ngithantaza kuJehova emehlo ami agcwele tinyembeti, ngimcele angisite ngitfole umuntfu lofuna kwati liciniso.”

³ Wake wativa yini ngalendlela? Labanyenti betfu bake bativa ngalendlela. (1 Phet. 5:9) Sifuna ‘kukhonta Jehova sijabulile,’ kodvwa singahle simkhonte sikhala ngenca yebuhlungu, kudvumateka nobe kukhatsateka ngenca yetintfo letivivinya kwetsembeka kwetfu kuNkulunkulu. (Hla. 6:6; 100:2) Yini lesingayenta nasitiva ngalendlela?

4. Sitawucoca ngani kulesihloko?

⁴ Singafundza esibonelweni saJesu. Ngaletinye tikhatsi bekeva buhlungu kakhulu kangangekutsi ‘aze akhale.’ (Joh. 11:35; Luk. 19:41; 22:44; Heb. 5:7) Ase sicoce ngaloko lokwenteka kuze sibone tifundvo lesingatitfola. Sitawuphindze sicoce ngaloko lesingakwenta nasibhekene netimo letisenta kutsi sikhale.

5. Yini lesiyifundzako ngaJesu kulendzaba lebhalwe kuJohane 11:32-36?

⁵ Nga-32 C.E., umngani waJesu lomkhulu lokutsiwa nguLazaro, wagula futsi washona. (Joh. 11:3, 14) Lazaro bekanabosisi lababili, lokunguMariya naMata futsi Jesu bekawutsandza kakhulu lomndeni. BoMariya naMata beva buhlungu kakhulu ngekushonelwa ngubhuti wabo lebebamtsandza. Ngemuva kwekushona kwaLazaro, Jesu wahamba waya eBhetani lapho bekuhlala khona lomndeni. Ngesikhatsi Mata eva kutsi Jesu uyeta, wagijima wayomhlangabeta. Cabanga nje kutsi bekeva buhlungu kangakanani ngesikhatsi atsi: “Nkhosi, kube bewukhona, umnaketfu ngabe akakafi.” (Joh. 11:21) Ngemuva nje kwesikhashana watsi Jesu nakabona Mariya nalabanye bakhala, “wakhala tinyembeti.”—Fundza Johane 11:32-36.

6. Kungani Jesu akhala?

⁶ Kungani Jesu akhala? I-Insight on the Scriptures itsi: “Kufa kwemngani wakhe Lazaro kanye nebuhlungu lebebuviwa bosisi wakhe, kwenta Jesu ‘wadzabuka emoyeni futsi wakhala tinyembeti.’” * Kungenteka Jesu wacabanga ngebuhlungu umngani wakhe Lazaro labuva ngesikhatsi agula, nangendlela lativa ngayo nasabona kutsi sewutawukufa. Lokunye lokwenta Jesu wakhala, kubona indlela Mariya naMata lebebativa ngayo ngekushonelwa ngubhuti wabo. Nangabe uke washonelwa ngumngani wakho nobe lilunga lemndeni, siyaciniseka kutsi nawe uke wativa ngalendlela. Ase sicoce ngetifundvo letintsatfu longatifundza kulendzaba.

7. Njengobe Jesu akhalela bangani bakhe, yini lesiyifundzako ngaJehova?

⁷Jehova uyayicondza indlela lotiva ngayo. Jesu ‘unguwo kanye umfanekiso’ waBabe wakhe. (Heb. 1:3) Ngesikhatsi Jesu akhala, bekakhombisa indlela Babe wakhe lativa ngayo. (Joh. 14:9) Nangabe ushonelwe ngumuntfu lomtsandzako, ciniseka kutsi  Jehova akagcini ngekubona kutsi uva buhlungu, kodvwa uvelana kakhulu nawe. Ufuna kuyelapha inhlitiyo yakho leyephukile.—Hla. 34:18; 147:3.

8. Yini lesenta siciniseke kutsi Jesu utabavusa bantfu labashonile lesibatsandzako?

⁸Jesu ufuna kubavusa bantfu lobatsandzako labashonile. Ngaphambi nje kwekutsi Jesu akhale, wacinisekisa Mata watsi: “Umnakenu utawuvuka.” Mata wamkholwa Jesu. (Joh. 11:23-27) Njengobe Mata bekasikhonti saJehova lesetsembekile, siyaciniseka kutsi bekati ngalabo labavuswa ngumphrofethi Elija na-Elisha eminyakeni leminyenti leyendlulile. (1 Khos. 17:17-24; 2 Khos. 4:32-37) Kungenteka bekevile nangalabo lebebavuswe nguJesu. (Luk. 7:11-15; 8:41, 42, 49-56) Nawe ciniseka kutsi utawuphindze ubabone bantfu lobatsandzako labashonile. Ngesikhatsi Jesu akhala futsi advudvuta bangani bakhe labaselusizini, loko kwakhombisa kutsi kuvuswa kwebantfu kubalulekile kuye!

9. NjengaJesu, ungabasekela njani labo labaselusizini? Niketa sibonelo.

⁹Ungabasekela labo labaselusizini. Jesu akagcinanga ngekukhala naMata naMariya, kodvwa waphindze wabalalela futsi wabadvudvuta. Singenta lokufanako kulabo labaselusizini. Lomunye lomdzala welibandla lohlala e-Australia, lokutsiwa nguDan utsi: “Ngemuva kwekushonelwa ngumkami, bengidzinga kusekelwa. Labashadene labehlukahlukene bebatinika sikhatsi sekungilalela busuku nemini. Bengitiva ngikhululekile kuveta lusizi lwami futsi bebangabi nemahloni nangikhala. Bebangisita ngetintfo letehlukene nangingakhoni kutenta njengekuwasha imoto, kungiyela etitolo nekungiphekela kudla. Bebavame kuthantaza nami. Bakhombisa kutsi babangani sibili futsi ‘babanaketfu lengingetsembela kubo ngesikhatsi sekuhlupheka.’”—Taga 17:17.

10. Chaza loko lokwenteka njengobe kubhalwe kuLukha 19:36-40.

¹⁰ Jesu wafika eJerusalema ngaNisani 9, 33 C.E. Watsi nakasondzela kulelidolobha, kwabutsana sicumbi futsi bantfu bendlala tingubo tabo embikwakhe kuze bamemukele njengeNkhosi yabo. Leso bekusikhatsi lesimnandzi. (Fundza Lukha 19:36-40.) Kungenteka bafundzi baJesu bebangakakulindzeli loko lokwase kuyenteka. “Nasekasondzela, walibuka lelidolobha futsi walikhalela.” Emehlo akhe agcwele tinyembeti, Jesu wakhuluma ngetintfo letibuhlungu lebetitakwenteka kubantfu baseJerusalema.—Luk. 19:41-44.

11. Kungani Jesu akhalela bantfu baseJerusalema?

¹¹ Jesu weva buhlungu ngobe bekati kutsi nanobe bekamukelwa kahle, emaJuda lamanyenti bekangeke awemukele umlayeto weMbuso. Ngenca yaloko, iJerusalema beyitawubhujiswa futsi emaJuda lebekatuwusindza bekatawutfunjwa. (Luk. 21:20-24) Lokubuhlungu kutsi kwenteka loko Jesu lakusho, bantfu labanyenti abamemukelanga. Lawuhlala khona, bantfu labanyenti bayawulalela yini umlayeto weMbuso? Nangabe babancane labalalelako, yini longayifundza kuJesu ngesikhatsi akhalela bomakhelwane bakhe? Ase sicoce ngaletinye tifundvo letintsatfu.

12. Yini lesingayifundza ngaJehova ngesikhatsi Jesu akhalela bomakhelwane bakhe?

¹²Jehova uyabakhatsalela bantfu. Tinyembeti taJesu tisikhumbuta kutsi Jehova ubakhatsalela kakhulu bantfu. “Akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (2 Phet. 3:9) Lamuhla, sikhombisa kutsi siyabatsandza  bomakhelwane betfu ngekutsi sihlale setama kubasita kutsi bati tindzaba letimnandzi teMbuso.—Mat. 22:39. *

13-14. Jesu wakhombisa njani kutsi uyabavela bantfu, futsi yini lesingayenta kuze simlingise?

¹³Jesu watikhandla emsebentini wekushumayela. Wakhombisa kutsi uyabatsandza bantfu ngekutsi asebentise lonkhe litfuba lelivelako kuze abashumayele. (Luk. 19:47, 48) Yini leyamenta kutsi ente njalo? Bekabavela bantfu. Ngaletinye tikhatsi labo bebafuna kuva loko Jesu lakushoko bebaba banyenti kangangekutsi yena nebafundzi bakhe ‘bebangalitfoli ngisho nelitfuba lekudla.’ (Mak. 3:20) Lenye indvodza lebekacoca nayo beyitfolakala ebusuku futsi bekakulungele kucoca nayo ngaleso sikhatsi. (Joh. 3:1, 2) Linyenti lalabo labalalela Jesu, alizange libe bafundzi bakhe. Kodvwa bonkhe labo labamuva, bashunyayelwa. Lamuhla sifuna kuniketa bonkhe bantfu litfuba lekuva tindzaba letimnandzi. (Imis. 10:42) Kuze sikhone kukwenta loku, kungahle kudzingeke sishintje indlela lesishumayela ngayo.

¹⁴Kulungele kwenta lushintjo. Nasingasishintjashintji sikhatsi lesishumayela ngaso, kungenteka singabatfoli labangatsandza kulalela tindzaba letimnandzi. Lelinye lihlahlandlela lokutsiwa nguMatilda litsi: “Mine nendvodza yami setama kuvakashela bantfu ngetikhatsi letehlukahlukene. Ekuseni sishumayela etindzaweni temabhizinisi. Emini nasekunebantfu labanyenti, sisebentisa incola. Entsambama sitfola bantfu labanyenti emakhaya abo.” Kunekutsi sishumayele ngesikhatsi lesitawulungela tsine, kufanele sikulungele kushumayela ngesikhatsi lapho sitawutfola khona bantfu labanyenti. Nasenta njalo, singaciniseka kutsi Jehova utawujabula.

15. Yini leyenteka ngebusuku lobebungaphambi kwekutsi Jesu afe, njengobe kubhalwe kuLukha 22:39-44?

¹⁵ Ebusuku bangaNisani 14, 33 C.E., Jesu waya ensimini yaseGetsemane. Nakalapho,  wathantaza kuJehova. (Fundza Lukha 22:39-44.) Ngaleso sikhatsi Jesu “wancusa, . . . loku wakwenta ngekukhala lokukhulu nangetinyembeti.” (Heb. 5:7) Yini Jesu layithantazela kulobo busuku lobebungaphambi kwekufa kwakhe? Wathantazela emandla ekuhlala atsembekile kuJehova futsi ente intsandvo yakhe. Jehova wawuva umthantazo losuka enhlitiyweni weNdvodzana yakhe futsi watfuma ingilosi kuze imcinise.

16. Kungani Jesu bekakhatsatekile ngesikhatsi athantaza ensimini yaseGetsemane?

¹⁶ Siyaciniseka kutsi Jesu wakhala nakathantaza ensimini yaseGetsemane ngobe bekakhatsateke ngekutsi bantfu bebatomtsatsa njengemuntfu longalihloniphi libito laNkulunkulu. Bekati nekutsi kubaluleke kangakanani kutsi ahlale etsembekile futsi angcwelise libito laBabe wakhe. Nangabe ubhekene nesimo lesimatima lesivivinya kwetsembeka kwakho kuJehova, yini longayifundza kuJesu? Ase sicoce ngaletinye tifundvo letintsatfu.

17. Yini lesingayifundza ngaJehova endleleni lawuphendvula ngayo umthantazo waJesu losuka enhlitiyweni?

¹⁷Jehova uyayiva imithantazo yakho lesuka enhlitiyweni. Jehova wamlalela Jesu ngesikhatsi athantaza ngalokusuka enhlitiyweni. Kungani? Kungobe Jesu bekakhatsateke kakhulu ngekuhlale etsembekile kuBabe wakhe futsi angcwelise libito lakhe. Nangabe sikhatsateka kakhulu ngekuhlale setsembekile kuJehova, futsi singcwelise libito lakhe, utayiphendvula imithantazo yetfu.—Hla. 145:18, 19.

18. Jesu ufana njani nemngani lovelana natsi?

¹⁸Jesu uyayicondza indlela lotiva ngayo. Nasikhatsatekile, siyajabula nasidvudvutwa ngumngani lovelana natsi, ikakhulukati loke wabhekena nesimo lesifana nesetfu. Jesu ungulomngani. Uyati kutsi kunjani kuba butsakatsaka futsi udzinge lusito. Uyayati indlela lesakheke ngayo futsi utawucinisekisa kutsi silutfola “ngesikhatsi lesifanele” lusito lesiludzingako. (Heb. 4:15, 16) Njengobe naJesu avuma kusitwa yingilosi ensimini yaseGetsemane, natsi kufanele silwemukele lusito lesilutfola kuJehova kungaba ngetincwadzi, nge-video, ngenkhulumo, nobe sikhutsato lesisitfola kulomdzala welibandla nobe ngemzalwane nobe dzadze.

19. Yini lengakusita kutsi ube nemandla ekubhekana nesimo lesimatima lesivivinya kwetsembeka kwakho kuNkulunkulu? Niketa sibonelo.

 ¹⁹Jehova utakunika “kuthula kwaNkulunkulu.” Utasicinisa njani Jehova? Nasithantaza, sitawutfola “kuthula kwaNkulunkulu lokwendlula konkhe kucondza.” (Fil. 4:6, 7) Kuthula lesikunikwa nguJehova kusenta sitive sincono futsi sikhone kucabanga kahle. Nguloko lokwenteka kulomunye dzadze lokutsiwa nguLuz. Utsi: “Ngihle ngitiva nginesitunge. Ngenca yaloko, ngihle ngiva shengatsi Jehova akangitsandzi. Kodvwa nakwenteka loko, ngekushesha ngivele ngitjele Jehova indlela lengitiva ngayo. Umthantazo ungenta ngitive sengincono.” Lokwenteka kuye kusikhombisa kutsi umthantazo ungasisita sibe nekuthula.

20. Kukhala kwaJesu kusifundzise tiphi tifundvo?

²⁰ Kukhala kwaJesu kusidvudvuta kakhulu futsi kunetifundvo lesesitifundzile. Sikhunjutwe ngekutsi kufanele sibasekele bangani betfu labaselusizini, futsi setsembe nekutsi Jehova naJesu batasisekela nasishonelwe ngumuntfu lesimtsandzako. Sikhutsatwe kutsi sibavele bantfu lesibashumayelako, nalesibafundzisako ngobe Jehova Nkulunkulu naJesu Khristu banalobuntfu lobuhle. Kuyasidvudvuta kwati kutsi Jehova neNdvodzana yakhe bayayicondza indlela lesitiva ngayo, bayavelana natsi futsi bafuna kusisita sicinisele. Shengatsi singachubeka sikusebentisa loku lesikufundzile kuze kube ngulapho Jehova afeza setsembiso sakhe lesihle ‘sekwesula tonkhe tinyembeti emehlweni etfu’!—Semb. 21:4.