1. Ngusiphi simo lesimatima Davide latitfola akuso?

DAVIDE bekabaleka kuze asindzise kuphila kwakhe. Inkhosi lenemandla yaka-Israyeli lokutsiwa nguSawula beyifuna kumbulala. Ngesikhatsi Davide adzinga kudla, wafike wema edolobheni lokutsiwa yiNobi, wacela tinkhwa letisihlanu. (1 Sam. 21:1, 3) Ngekuhamba kwesikhatsi, yena nemadvodza lebekahamba nawo bakhosela emhumeni. (1 Sam. 22:1) Yini leyenta Davide waba kulesimo?

2. Sawula watibeka njani engotini? (1 Samuweli 23:16, 17)

² Sawula bekamdlela umona kakhulu Davide ngenca yekutsi bekatsandvwa bantfu futsi ancoba etimphini. Bekati kutsi kungalaleli kwakhe lokwenta Jehova wangasamemukeli kutsi abe yinkhosi yaka-Israyeli futsi wakhetsa Davide kutsi abe yinkhosi. (Fundza 1 Samuweli 23:16, 17.) Nobe kunjalo, Sawula bekasolo ayinkhosi, anelibutfo lelikhulu nebalandzeli labanyenti, ngako kwadzingeka kutsi Davide abaleke kuze asindzise kuphila kwakhe. Sawula bekacabanga kutsi vele kukhona yini lokungavimba Nkulunkulu angambeki Davide kutsi abe yinkhosi? (Isa. 55:11) LiBhayibheli alisho, kodvwa kunye lesingaciniseka ngako: Kutsi Sawula bekatibeka engotini. Labo labalwa naNkulunkulu abaphumeleli!

3. Yini Davide layenta ngisho nobe bekabhekene netimo letimatima?

³ Davide bekatfobekile. Akazange atikhetsele kuba yinkhosi yaka-Israyeli, nguJehova lowamkhetsa kutsi abe yinkhosi. (1 Sam. 16:1, 12, 13) Sawula bekatsatsa Davide njengesitsa sakhe lesikhulu. Kodvwa Davide akazange asole  Jehova ngekuba sengotini; futsi akazange akhonone ngekutsi unekudla lokuncane nekutsi ukhosele emhumeni. Kunaloko, kungenteka bekabhace kulomhume ngesikhatsi abhala ingoma lemnandzi yekudvumisa lenalamavi lokusekelwe kuwo lesihloko setfu latsi: “Labafuna Jehova ngeke beswele lutfo loluhle.”—Hla. 34:10.

4. Ngumiphi imibuto lesitawucoca ngayo, futsi ibaluleke ngani?

⁴ Lamuhla, tikhonti taJehova letinyenti tihle tiba bete kudla lokwenele naletinye tintfo letitidzingako. * Loku sikubone kwenteka kakhulu ngesikhatsi se-COVID-19. Njengobe ‘kuhlupheka lokukhulu’ kusondzela, singalindzela kubhekana netikhatsi letimatima kakhulu. (Mat. 24:21) Sinaloku etingcondvweni, ase siphendvule nayi imibuto lemine: Kungani sitsi Davide akazange ‘eswele lutfo loluhle’? Kungani kufanele senetiseke? Yini lesenta siciniseke kutsi Jehova utasinakekela? Yini lesingayenta nyalo kuze silungele sikhatsi lesitako?

5-6. Tihlabelelo 23:1-6 tisisita njani kutsi sikucondze loko Davide bekakusho ngesikhatsi atsi labakhonta Nkulunkulu ngeke ‘beswele lutfo loluhle’?

⁵ Bekasho kutsini Davide ngesikhatsi atsi labo labakhonta Jehova angeke ‘beswele lutfo loluhle’? Singawutfola umcondvo kuloko lokushiwo Tihlabelelo 23. (Fundza Tihlabelelo 23:1-6.) Emavi ekucala Davide lawasho kulesihlabelelo atsi: “Jehova unguMelusi wami. Angeke ngeswele lutfo.” Davide wabese ukhuluma ngetintfo letibaluleke kakhulu, njengetintfo letinhle Jehova lamuphe tona ngenca yekutsi uvumele Jehova waba nguMelusi wakhe. Jehova ‘umholela etindleleni tekulunga,’ futsi uyamsekela ngetikhatsi letimnandzi naletimatima. Davide uyavuma kutsi titawuba khona tinkinga nanobe aphila “emadlelweni laluhlata” aJehova. Ngaletinye tikhatsi utawudvumateka kube shengatsi uhamba “esigodzini  lesimnyama tsu” futsi utawuba netitsa. Kodvwa njengobe Jehova anguMelusi wakhe, angeke ‘esabe lutfo lolubi.’

⁶ Nyalo sesinayo imphendvulo yembuto lotsi: Kungani sitsi Davide akazange ‘eswele lutfo loluhle’? Itsi: Bekanako konkhe lakudzingako kuze ahlale asondzelene naJehova. Bekangadzingi kuba netintfo letinyenti kuze ajabule. Davide bekenetiseka ngaloko lebekakunikwa nguJehova. Lebekubaluleke kakhulu kuye kutsi Nkulunkulu bekambusisa futsi amvikela.

7. Ngekusho kwaLukha 21:20-24, ngusiphi simo lesimatima emaKhristu lebekahlala eJudiya labhekana naso?

⁷ Kulamavi aDavide, siyabona kutsi kubaluleke kakhulu kutsi sibe nembono lokahle ngetintfo lesinato. Singaba nato, kodvwa akukafaneli tibaluleke kakhulu ekuphileni kwetfu. EmaKhristu lebekahlala eJudiya alicondza leliciniso lelibaluleke kakhulu. (Fundza Lukha 21:20-24.) Jesu wawecwayisa ngekutsi bekutawufika sikhatsi lapho iJerusalema ‘beyitawutungeletwa ngemabutfo.’ Nawakubona loko kwenteka, bekufanele ‘abalekele etintsabeni.’ Nangabe abaleka, bekatawusindza, kodvwa bekutawudzingeka ashiye tintfo letinyenti. Eminyakeni leyendlulile, Sicongosekulindza satsi: “Bashiya emasimu, emakhaya netintfo lebebanato etindlini tabo. Bebetsemba kutsi Jehova utawubavikela futsi abasite, ngako benta kukhonta yena kweta kucala ekuphileni kwabo.”

8. Ngusiphi sifundvo lesibalulekile lesingasifundza kulokwenteka kumaKhristu lebekahlala eJudiya?

⁸ Ngusiphi sifundvo lesibalulekile lesingasifundza kulokwenteka kumaKhristu lebekahlala eJudiya? Le-Sicongosekulindza saphindze satsi: “Kungenteka kube neluvivinyo esikhatsini lesitako lolutasikhombisa kutsi tintfo lesinato tibaluleke kanganani; tibaluleke kakhulu yini kitsi, nobe lokubaluleke kakhulu kutsi setsembeke kuNkulunkulu futsi sisindze? Kuze sisindze, kutawudzingeka sibeketelele timo letimatima futsi sitidzele. Kutawudzingeka kutsi sikulungele kwenta nobe yini njengobe kwenta emaKhristu labaleka eJudiya.” *

9. Sikukhutsata njani seluleko saPawula lasitjela emaHebheru?

⁹ Cabanga nje kutsi bekumatima kanganani ngalamaKhristu kutsi ashiye tonkhe tintfo lebekanato futsi ayocala imphilo lensha kulenye indzawo? Kwadzingeka etsembe kutsi Jehova utawasita kuze atfole tintfo latidzingako. Kodvwa kukhona lebekungawasita kutsi akhone kukwenta loko. Eminyakeni lesihlanu ngaphambi kwekutsi emaRoma avimbetele iJerusalema, umphostoli Pawula waniketa emaHebheru seluleko lesibalulekile lesitsi: “Indlela leniphila ngayo ayingabi yekutsandza imali, kodvwa yenetiswani tintfo leninato. Ngobe Nkulunkulu utsite: ‘Ngeke ngize ngikushiye, futsi ngeke ngize ngikulahle.’ Ngako singakhuluma ngesibindzi sitsi: ‘Jehova ungumsiti wami; angeke ngesabe. Umuntfu angangentani nje?’” (Heb. 13:5, 6) Siyaciniseka kutsi labo labalalela seluleko saPawula ngaphambi kwekuhlasela kwemaRoma, bakutfola kumelula kuphila ngalebebanako lapho babalekela khona. Bebaciniseka kutsi Jehova utawubanika loko bebakudzinga. Emavi aPawula ayasicinisekisa natsi kutsi Jehova utasinika loko lesikudzingako.

10. Nguyiphi “imfihlo” Pawula lasitjela yona?

¹⁰ Pawula waniketa Thimothi seluleko, futsi  siyasebenta nakitsi. Wabhala watsi: “Kufanele seneliswe kuba nekudla nekwekwembatsa.” (1 Thim. 6:8) Loko kusho kutsi akukafaneli yini kutsi sidle kahle, sihlale endzaweni lenhle nobe sihle sitsenga timphahla letinsha? Pawula bekangasho njalo, bekatsi kufanele senetiseke nganobe yini lesinayo. (Fil. 4:12) Loko ‘bekuyimfihlo’ yakhe. Intfo leligugu kakhulu kitsi buhlobo betfu naNkulunkulu, hhayi tintfo lesinato.—Hab. 3:17, 18.

11. Ngusiphi sifundvo lesimayelana nekwenetiseka lesisitfola kuloko Mosi lakutjela ema-Israyeli?

¹¹ Kungenteka kunemehluko emkhatsini waloko Jehova lacabanga kutsi siyakudzinga naloko tsine lesicabanga kutsi siyakudzinga. Cabanga ngaloko Mosi lakutjela ema-Israyeli ngemuva kwekutsi kuphele iminyaka lengu-40 asehlane, watsi: “Jehova Nkulunkulu wenu unibusisile kuko konkhe lenikwentile. Yena ulwati kahle neluhambo lwenu lwakulelihlane lelikhulu. Kuleminyaka lengu-40, Jehova Nkulunkulu wenu abesolo anani, futsi anikaze neswele lutfo.” (Dut. 2:7) Kuleminyaka lengu-40, Jehova wanika ema-Israyeli imana. Timphahla tawo laphuma nato eGibhithe atizange tiguge. (Dut. 8:3, 4) Nanobe labanye bebabona ngatsi letintfo atikeneli, Mosi watjela ema-Israyeli kutsi bekanako konkhe lakudzingako. Jehova utawujabula kakhulu nasenetiseka futsi sibonga ngetintfo lasipha tona ngisho titincane, sititsatse njengesibusiso.

12. Yini lekhombisa kutsi Davide bekangatetsembi yena kodvwa etsembele kuJehova?

¹² Davide bekati kutsi Jehova wetsembekile futsi uyabanakekela labo labamtsandzako. Ngisho nobe imphilo yakhe beyisengotini ngesikhatsi abhala Tihlabelelo 34, kwaba shengatsi ubona “ingilosi yaJehova” ‘imise lithende lelimtungeletile.’ (Hla. 34:7, umbhalo longentasi) Kungenteka Davide bekacatsanisa ingilosi yaJehova nelisotja lelimise lithende futsi lelihlale ligadze sitsa. Nanobe Davide bekalichawe, futsi Jehova ametsembise kuba yinkhosi, kodvwa akazange etsembele ekhonweni lakhe lekusebentisa sidubulelo nobe inkemba kuze ancobe sitsa. (1 Sam. 16:13; 24:12) Bekametsemba Nkulunkulu futsi bekaciniseka kutsi ingilosi yaJehova ‘iyabakhulula labo labamesabako.’ Kuliciniso kutsi asikakulindzeli kusindziswa ngalokusimangaliso lamuhla. Kodvwa siyati kutsi labo labetsemba Jehova batawutfola kuphila lokuphakadze ngisho nobe bangafa nyalo.

13. Ngesikhatsi Gogi wakaMagogi asihlasela, kungani kutawubonakala shengatsi kute longasisita, kodvwa yini lesiciniseka ngayo? (Buka sitfombe lesisekhasini lekucala.)

¹³ Esikhatsini lesitako, sitawuvivinywa kutsi simetsemba mbamba yini Jehova kutsi utasivikela. Ngesikhatsi Gogi wakaMagogi, lokutive letihlangene, ahlasela bantfu baNkulunkulu, kuphila kwetfu kutawubonakala shengatsi kusengotini. Kutawudzingeka siciniseke kutsi Jehova utasivikela. Tive titawubona shengatsi sifana netimvu letite longativikela. (Hez. 38:10-12) Sitawube singakahlomi futsi singakaceceshelwa kulwa. Tive titawubona shengatsi kutawuba melula kusicotfula. Titawube tingati kutsi tingilosi taJehova tilungele kusisita. Kodvwa tsine sitawube sikwati loko ngenca yekutsi sinekukholwa. Tive angeke titibone letingilosi ngobe atikholwa kuNkulunkulu. Titawetfuka kakhulu natibona emabutfo asezulwini asivikela!—Semb. 19:11, 14, 15.

14. Yini lesingayenta nyalo kuze sitilungiselele lokutawenteka esikhatsini lesitako?

¹⁴ Yini lesingayenta nyalo kuze sitilungiselele loko lokutawenteka esikhatsini lesitako? Kwekucala nje, kudzingeka sibe nembono lokahle ngetintfo lesinato, sihlale sikhumbula kutsi ngalelinye lilanga sitawehlukana nato. Ngetulu kwaloko, kufanele senetiseke futsi sijabule ngekutsi sinebuhlobo lobuhle naJehova. Nasimati kahle Nkulunkulu wetfu, sitawuciniseka kakhulu kutsi utasivikela nakuhlasela Gogi wakaMagogi.

15. Yini leyenteka kuDavide nakasemusha leyamfundzisa kutsi Jehova akayuze amdvumate?

¹⁵ Cabanga ngalokunye lokwasita Davide futsi lokungasisita natsi kutsi silungele luvivinyo. Davide watsi: “Nambitsani futsi nibone kutsi Jehova muhle; uyajabula umuntfu lokhosela kuye.” (Hla. 34:8) Lamavi asenta sibone kutsi kungani Davide beketsemba kutsi Jehova utamsita. Davide bekavame kwetsembela kuJehova, futsi Nkulunkulu wakhe akazange amdvumate nakancane. Ngesikhatsi asemusha futsi atokulwa nemFilitsi losidlakela lokutsiwa nguGoliyathi, Davide watsi: “Lamuhla, Jehova utakunikela esandleni sami.” (1 Sam. 17:46) Ngekuhamba kwesikhatsi, Davide waba sisebenti seNkhosi Sawula, leyetama kumbulala tikhatsi letinyenti. Kodvwa “Jehova abenaDavide.” (1 Sam. 18:12) Ngenca yekutsi Davide bekambonile Jehova amsita esikhatsini lesendlulile,  bekati kutsi angetsembela kuye nakanetinkinga.

16. Ngutiphi tindlela ‘lesingabunambitsa’ ngato buhle baJehova?

¹⁶ Nasetsembela kuJehova nyalo kutsi asicondzise, sitawuciniseka kakhulu kutsi utawukhona kusikhulula esikhatsini lesitako. Kudzingeka sibe nekukholwa futsi sitimisele kwetsembela kuJehova kuze sicele umcashi wetfu kutsi asiphe sikhatsi sekuya emhlanganweni wesigodzi nobe wesifundza, nobe asiphe sikhatsi sekuya kuyo yonkhe imihlangano yelibandla nasemsebentini wekushumayela. Asesitsi umcashi uyala futsi siphelelwe ngumsebenti. Siyakholwa yini kutsi Jehova akayuze asishiye futsi utawuhlale asipha tintfo lesitidzingako? (Heb. 13:5) Labanyenti labasemsebentini wasikhatsi sonkhe bangakucocela indlela Jehova labasite ngayo nabamdzinga kakhulu. Jehova wetsembekile.

17. Utsini umbhalo wemnyaka wa-2022, futsi kungani kube kahle kutsi kukhetfwe wona?

¹⁷ Nangabe Jehova anatsi, site sizatfu sekwesaba lokutakwenteka esikhatsini lesitako. Nkulunkulu wetfu akayuze asishiye, kuphela nje nangabe senta kukhonta yena kute kucala ekuphileni kwetfu. Kuze Sigungu LeSibusako sisikhumbute ngesidzingo sekutilungiselela nyalo kulokutawenteka esikhatsini lesitako, futsi setsembe kutsi Jehova angeke aze asishiye, sikhetse Tihlabelelo 34:10 kutsi tibe ngumbhalo wemnyaka wa-2022, lotsi: “Labafuna Jehova ngeke beswele lutfo loluhle.”