1-2. (a) Kunini lapho sivame kumkhumbula kakhulu khona umuntfu lesimtsandzako lowashona? (b) Yini Jesu layicalisa ngebusuku lebebungaphambi kwekutsi afe?

NGISHO nobe sekuphele sikhatsi lesidze sashonelwa bantfu lesibatsandzako, kodvwa solo sisabakhumbula. Sivame kubakhumbula kakhulu nakufika lilanga labashona ngalo.

² Njalo ngemnyaka, siba yincenye yetigidzi tebantfu emhlabeni wonkhe letihlangana ngelilanga lokwafa ngalo umuntfu lesimtsandza kakhulu, lokunguJesu Khristu. (1 Phet. 1:8) Sihlangana ndzawonye kuze sikhumbule loyo lowanikela ngekuphila kwakhe kutsi kube yinhlawulo kuze sitawusindza esonweni nasekufeni. (Mat. 20:28) Ecinisweni, Jesu bekafuna kutsi balandzeli bakhe bakukhumbule kufa kwakhe. Ngebusuku lebebungaphambi kwekufa kwakhe wacalisa sidlo lesikhetsekile sakusihlwa futsi watsi: “Chubekani nikwenta, ningikhumbula.” *—Luk. 22:19.

3. Sitawucoca ngani kulesihloko?

³ Kulabo lababa khona eSikhumbutweni sekufa kwaKhristu, labambalwa banelitsemba lekuphila ezulwini. Kodvwa tigidzi letinyenti letinelitsemba lekuphila emhlabeni nato tiba khona. Kulesihloko, sitawucoca ngetizatfu letenta kutsi lamacembu lamabili akulangatelele kuba khona njalo ngemnyaka eSikhumbutweni. Sitawucoca nangekutsi sizuza njani  ngekuba khona. Ase sicale sicoce ngaletinye tizatfu letenta labagcotjiwe kutsi babe khona.

4. Kungani labagcotjiwe badla sinkhwa futsi banatsa liwayini ngeSikhumbuto?

⁴ Njalo ngemnyaka, labagcotjiwe bayakulangatelela kuba seSikhumbutweni futsi badle sinkhwa banatse neliwayini. Kungani badla lesinkhwa futsi banatsa naleliwayini? Kuze sitfole imphendvulo, cabanga ngaloko lokwenteka ngebusuku bekugcina Jesu angumuntfu. Ngemuva kweLiphasika, Jesu wacalisa Sidlo SeNkhosi Sakusihlwa. Wanika baphostoli bakhe labetsembekile labangu-11 sinkhwa, wabatjela kutsi basidle futsi wabanika neliwayini wabatjela kutsi balinatse. Jesu wabatjela ngetivumelwane letimbili, sivumelwane lesisha nesivumelwane seMbuso. * (Luk. 22:19, 20, 28-30) Letivumelwane tavulela labaphostoli nalabanye litfuba lekuba ngemakhosi nebaphristi ezulwini. (Semb. 5:10; 14:1) Ngulabagcotjiwe kuphela labaselamhlabeni, labanencenye kuletivumelwane letimbili, labadla sinkhwa futsi banatse liwayini ngeSikhumbuto.

5. Yini labagcotjiwe labayatiko ngelitsemba labo?

⁵ Nasi lesinye sizatfu lesenta labagcotjiwe bakulangatelele kuba khona eSikhumbutweni: Kubenta bacabange ngelitsemba labo. Jehova ubanikete litsemba lelihle kakhulu lekuphila phakadze ezulwini, lekusebenta naJesu Khristu lokhatinyulisiwe kanye nalabanye labangu-144 000 futsi ngetulu kwako konkhe lekuba naJehova Nkulunkulu! (1 Khor. 15:51-53; 1 Joh. 3:2) Labagcotjiwe bayati kutsi banikwe lelilungelo lelihle lekuphila ezulwini. Kodvwa kuze bavunyelwe kuphila ezulwini, kufanele bachubeke bahlala betsembekile kuze kube sekufeni. (2 Thim. 4:7, 8) Labagcotjiwe kubajabulisa kakhulu kucabanga ngalelitsemba labo lekuphila ezulwini. (Thit. 2:13) Kodvwa kutsiwani ‘ngaletinye timvu’? (Joh. 10:16) Ngutiphi letinye tizatfu letenta tibe khona eSikhumbutweni?

6. Kungani letinye timvu tiba khona njalo ngemnyaka eSikhumbutweni?

⁶ Nanobe letinye timvu tiba khona eSikhumbutweni, kodvwa atisidli sinkhwa nobe tinatse liwayini. Nga-1938, labanelitsemba lekuphila emhlabeni bamenywa kutsi babe khona eSikhumbutweni kwekucala ngca. Sicongosekulindza saMarch 1, 1938, satsi: “Kukahle [ngaletinye timvu] kutsi tibe khona kulomhlangano futsi tibuke kutsi kwentiwani. . . . Lesi sikhatsi lesimnandzi nakuto.” Njengobe nalabamenyiwe bakujabulela kuba khona emshadweni, naletinye timvu tiyakujabulela kuba khona eSikhumbutweni.

7. Yini leyenta letinye timvu tiyilangatelele inkhulumo yeSikhumbuto?

⁷ Letinye timvu nato ticabanga ngelitsemba lato. Tiyayilangatelela inkhulumo yeSikhumbuto ngobe ikhuluma kakhulu ngaloko Khristu nalabangu-144 000 labatawubusa naye labatawukwentela bantfu labetsembekile ngesikhatsi Sekubusa Kweminyaka Lengu-1 000. Njengobe Jesu Khristu atawube ayiNkhosi, labo labatawubusa naye ezulwini, batawusita ekushintjeni lomhlaba ube lipharadisi, basite nebantfu labalalelako kutsi babe bete sono. Tigidzi tebantfu letiba khona eSikhumbutweni tijabula kakhulu naticabanga ngesikhatsi lesitako nasekugcwaliseka  tiphrofetho teliBhayibheli, njengaleto letiku-Isaya 35:5, 6; 65:21-23; neSembulo 21:3, 4. Kuticabanga baseveni lelisha banebantfu lababatsandzako, kubenta baciniseke kakhulu ngelitsemba labo lesikhatsi lesitako futsi kubenta batimisele kakhulu kuchubeka bakhonta Jehova.—Mat. 24:13; Gal. 6:9.

8. Ngusiphi lesinye sizatfu lesenta letinye timvu tibe khona eSikhumbutweni?

⁸ Cabanga nganasi lesinye sizatfu lesenta letinye timvu kutsi tibe khona eSikhumbutweni. Tifuna kukhombisa kutsi tiyabatsandza labagcotjiwe futsi tiyabasekela. LiVi laNkulunkulu latsi kutawuba nebudlelwane lobuhle emkhatsini walabagcotjiwe nalabo labanelitsemba lekuphila emhlabeni. Kanjani? Ase sicoce ngetibonelo letimbalwa.

9. Siphrofetho lesikuZakhariya 8:23 siyichaza njani indlela letinye timvu letitiva ngayo ngalabagcotjiwe?

⁹ Fundza Zakhariya 8:23. Lesiphrofetho siyichaza kahle indlela letinye timvu letitiva ngayo ngebazalwane bato nabodzadze labagcotjiwe. Ligama lelitsi ‘umJuda’ nalelitsi “nani” asho licembu lelifanako, lokungulabagcotjiwe labaselapha emhlabeni. (Rom. 2:28, 29) “Emadvodza langu-10 lavela kuto tonkhe tilwimi netive” amelela letinye timvu. ‘Tibambisisa’ labagcotjiwe, tinamatsele kubo, tikhonte nabo Jehova ngendlela lehlantekile. Ngako ngebusuku beSikhumbuto, letinye timvu tiyakhombisa kutsi tisondzelene kakhulu nalabagcotjiwe ngekutsi tibe kanye nabo.

10. Yini Jehova layentile kuze agcwalise lesiphrofetho lesikuHezekeli 37:15-19, 24, 25?

¹⁰ Fundza Hezekeli 37:15-19, 24, 25. Jehova ugcwalise lesiphrofetho ngekutsi ente labagcotjiwe naletinye timvu kutsi tibe nebunye. Lesiphrofetho sikhuluma ngetindvuku letimbili. Labo labanelitsemba lekuphila ezulwini bafananiswa nendvuku ‘yaJuda’ (lobekusive lebekakhetfwa kuso emakhosi aka-Israyeli), kani labo labanelitsemba lekuphila emhlabeni bafananiswa nendvuku “ya-Efrayimu.” * Jehova utawahlanganisa lamacembu abe “yindvuku yinye.” Loku kusho kutsi bakhonta ngebunye babuswa yiNkhosi yinye, lokunguKhristu Jesu. Njalo ngemnyaka, labagcotjiwe naletinye timvu baba khona eSikhumbutweni, bangasiwo emacembu lamabili, kodvwa ‘bangumhlambi munye lonemelusi munye.’—Joh. 10:16.

11. ‘Letimvu’ lokukhulunywa ngato kuMatewu 25:31-36, 40 tikhombisa njani kutsi tiyabasekela bomnakaboKhristu?

¹¹ Fundza Matewu 25:31-36, 40. ‘Letimvu’ lokukhulunywa ngato kulomfanekiso timelela labalungile labaphila ngemalanga ekugcina labanelitsemba lekuphila emhlabeni, lokunguletinye timvu. Tibasekela ngekwetsembeka bomnakaboKhristu labagcotjiwe labaselapha emhlabeni ngekubasita kutsi bafeze umsebenti lomkhulu lowentiwa emhlabeni wonkhe wekushumayela newekwenta bafundzi.—Mat. 24:14; 28:19, 20.

12-13. Ngutiphi letinye tindlela letinye timvu letikhombisa ngato kutsi tiyabasekela bomnakaboKhristu?

¹² Njalo ngemnyaka nasekusele emaviki lambalwa ngaphambi kwekutsi kufike Sikhumbuto, letinye timvu tikhombisa kutsi tiyabasekela bomnakaboKhristu ngekutsi tiwente ngemfutfo umsebenti lowentiwa emhlabeni wonkhe wekumema bantfu kutsi babe khona eSikhumbutweni. (Buka libhokisi lelitsi, “ Uyasilungiselela Yini Sikhatsi SeSikhumbuto?”) Tenta onkhe emalungiselelo kuze onkhe emabandla lasemhlabeni wonkhe  akhone kugubha Sikhumbuto nanobe emabandleni lamanyenti kute labadla sinkhwa futsi banatse liwayini. Letinye timvu tiyakujabulela kusekela bomnakaboKhristu ngaletindlela. Tiyati kutsi Jesu ukutsatsa ngekutsi tikwentela yena loko letikwentela bomnakaboKhristu labagcotjiwe.—Mat. 25:37-40.

¹³ Ngutiphi letinye tizatfu letenta kutsi sonkhe sibe khona eSikhumbutweni ngisho nobe sinaliphi litsemba?

14. Jehova naJesu bakhombise njani kutsi basitsandza kakhulu?

¹⁴Sibonga kakhulu ngelutsandvo Jehova naJesu labasikhombise lona. Jehova usikhombise ngetindlela letinyenti kutsi uyasitsandza, kodvwa yinye lehamba embili. Nkulunkulu wetfu ukhombise kutsi uyasitsandza ngekutsi atfumele iNdvodzana yakhe leligugu emhlabeni kuze ihlupheke ngenca yetfu futsi isifele. (Joh. 3:16) Siyati nekutsi naJesu ukhombisile kutsi usitsandza kakhulu ngekutsi avume kunikela ngekuphila kwakhe ngenca yetfu. (Joh. 15:13) Jehova naJesu bakhombise kutsi basitsandza kakhulu futsi asiyoze sikhone kubabuyisela ngaloko labasentele kona. Kodvwa singakhombisa kutsi siyabonga ngendlela lesiphila ngayo onkhe malanga. (Khol. 3:15) Siba khona eSikhumbutweni kuze sikhumbule indlela labakhombise ngayo kutsi bayasitsandza futsi natsi sikhombise kutsi siyabatsandza.

15. Kungani labagcotjiwe naletinye timvu babonga kakhulu ngenhlawulo?

¹⁵Sibonga kakhulu ngenhlawulo. (Mat. 20:28) Inhlawulo iligugu kakhulu kulabagcotjiwe ngobe yenta babe nalelitsemba labanalo. Ngenca yekutsi bayakholwa kulomhlatjelo waKhristu, Jehova utsi balungile futsi ubafake esiswini baba bantfwana bakhe. (Rom. 5:1; 8:15-17, 23) Naletinye timvu tiyabonga ngenhlawulo. Ngenca yekutsi tiyakholwa emhlatjelweni waKhristu, tinebuhlobo lobuhle naNkulunkulu, tingamentela imisebenti lengcwele futsi tinelitsemba lekuphuma “ekuhluphekeni lokukhulu.” (Semb. 7:13-15) Lenye indlela labagcotjiwe naletinye timvu labakhombisa ngayo kutsi bayabonga ngenhlawulo, kuba khona eSikhumbutweni njalo ngemnyaka.

16. Ngusiphi lesinye sizatfu lesisenta sibe khona eSikhumbutweni?

¹⁶ Lesinye sizatfu lesisenta sibe khona eSikhumbutweni kutsi sifuna kulalela Jesu. Ngisho nobe sinaliphi litsemba, siwutsatsa njengalobalulekile umyalo Jesu lawusho ngebusuku lacalisa ngabo Sikhumbuto nakatsi: “Chubekani nikwenta, ningikhumbula.”—1 Khor. 11:23, 24.

17. Sikhumbuto sisisita njani kutsi sisondzele kakhulu kuJehova?

¹⁷Sisondzela kakhulu kuJehova. (Jak. 4:8) Njengobe sifundzile, Sikhumbuto sisiniketa litfuba lekucabanga ngelitsemba Nkulunkulu lasinikete lona futsi sizindle ngelutsandvo lolukhulu lasikhombise lona. (Jer. 29:11; 1 Joh. 4:8-10) Nasicabanga ngelitsemba lesinalo ngelikusasa kanye nendlela Nkulunkulu lasitsandza ngayo, kusenta simtsandze kakhulu Jehova futsi sicinise buhlobo betfu naye.—Rom. 8:38, 39.

18. Kuzindla ngesibonelo saJesu kusikhutsata kutsi senteni?

¹⁸Kusenta sifune kulingisa Jesu. (1 Phet. 2:21) Ngemalanga langaphambi kweSikhumbuto, sinaka kakhulu tindzaba letiseBhayibhelini letimayela neliviki lekugcina Jesu asemhlabeni, kufa kwakhe nekuvuswa  kwakhe. Ngelilanga leSikhumbuto, inkhulumo isikhumbuta ngendlela Jesu lasitsandza ngayo. (Ef. 5:2; 1 Joh. 3:16) Njengobe sifundza ngesibonelo saJesu sekutidzela futsi sizindla ngaso, sitiva siphocelelekile kutsi ‘sihambe ngendlela naye lebekahamba ngayo.’—1 Joh. 2:6.

19. Yini lesingayenta kuze Nkulunkulu ahlale asitsandza?

¹⁹Sitimisele kakhulu kutsi Nkulunkulu ahlale asitsandza. (Juda 20, 21) Nkulunkulu utawuhlale asitsandza nangabe senta konkhe lesingakwenta kuze simlalele, singcwelise libito lakhe futsi simjabulise. (Taga 27:11; Mat. 6:9; 1 Joh. 5:3) Sikhumbuto sisikhutsata kutsi sitimisele kakhulu kutsi indlela lesiphila ngayo onkhe malanga kube ngatsi sitsi kuJehova, ‘Ngifuna kuhlale ngitsandvwa nguwe!’

20. Ngutiphi tizatfu letivakalako tekuba khona eSikhumbutweni?

²⁰ Ngisho nobe sinelitsemba lekuphila phakadze ezulwini nobe emhlabeni, sinetizatfu letivakalako tekuba khona eSikhumbutweni. Njalo ngemnyaka nasihlangana ndzawonye ngalelo langa, sikhumbula kufa kwemuntfu lesimtsandzako, lokunguJesu Khristu. Ngetulu kwako konkhe, sikhumbula lutsandvo lolukhulu kakhulu lesake sakhonjiswa lona, njengobe Jehova asiniketa iNdvodzana yakhe kuze ibe yinhlawulo. Kulomnyaka, Sikhumbuto sitawuba ngaLesihlanu, April 15, 2022. Siyamtsandza Jehova kanye neNdvodzana yakhe. Ngako ngelilanga Jesu lafa ngalo, kute lokutawubaluleka kakhulu kitsi kwendlula kuba khona eSikhumbutweni.