1. Singasicitsa njani sikhatsi naJehova?

SIYAKUTSANDZA kucitsa sikhatsi nebantfu lesibatsandzako. Labashadene bayakutsandza kucitsa sikhatsi ndzawonye. Labasebasha bayakutsandza kuba nebangani babo. Sonkhe siyasijabulela sikhatsi lesisicitsa nebazalwane betfu nabodzadze. Kodvwa ngetulu kwako konkhe, siyakutsandza kucitsa sikhatsi naNkulunkulu wetfu. Loku singakwenta ngekuthantaza kuye, ngekufundza liVi lakhe, ngekuzindla ngenjongo yakhe nangebuntfu bakhe lobuhle. Sibaluleke kakhulu sikhatsi lesisicitsa naJehova!—Hla. 139:17.

2. Nguyiphi inkinga lesinayo?

² Siyakutsandza kucitsa sikhatsi naJehova, kodvwa akusimelula ngaso sonkhe sikhatsi. Sihlale simatasatasa, ngako singahle singasitfoli sikhatsi sekwenta tintfo letiphatselene nekukhonta Nkulunkulu. Umsebenti wetfu wekutiphilisa, umsebenti wasekhaya, naletinye tintfo lokufanele sitente, kungatsatsa sikhatsi setfu lesinyenti, kangangekutsi singeva shengatsi site sikhatsi sekuthantaza, sekudadisha nobe sekuzindla.

3. Yini lenye lengadla sikhatsi setfu?

³ Kunalokunye lokungadla sikhatsi setfu. Nasingakanaki, singavumela letinye tintfo letingasitimbi kutsi tidle sikhatsi setfu lokufanele ngabe sisisebentisela kusondzelana naJehova. Cabanga nje ngekutijabulisa. Sonkhe siyasidzinga sikhatsi  sekuphumula. Kodvwa ngisho nekutijabulisa lokukahle kungasidla sikhatsi lokufanele ngabe sisisebentisela kwenta tintfo letiphatselene nekukhonta Jehova. Kudzingeka silinganisele nasitijabulisa.—Taga 25:27; 1 Thim. 4:8.

4. Sitawucoca ngani?

⁴ Kulesihloko, sitawucoca ngekutsi kungani kufanele sincume kutsi yini leta kucala ekuphileni kwetfu. Sitawucoca nangekutsi singasisebentisa njani kahle sikhatsi setfu naJehova nekutsi kungasisita njani kusisebentisa kahle ngalendlela.

5. Kucabanga ngeseluleko lesiKubase-Efesu 5:15-17 kungamsita njani losemusha kutsi akhetse indlela lekahle yekuphila?

⁵Khetsa indlela lekahle yekuphila. Bantfu labasebasha bavame kukhatsateka ngekutsi nguyiphi indlela lekahle yekuphila. Bothishela nemalunga emndeni langasibo boFakazi, bangase babakhutsate kutsi baye enyuvesi kuze batfole umsebenti lokahle, lotabanika imali lenyenti. Loko kungadla sikhatsi sabo lesinyenti. Ngakulokunye, batali nebangani labasebandleni bangase bakhutsate labasebasha kutsi bacitse sikhatsi sabo benta umsebenti waJehova. Yini lengasita umuntfu losemusha futsi lotsandza Jehova kutsi ente sincumo lesikahle? Kungamsita kufundza umbhalo waKubase-Efesu 5:15-17 futsi azindle ngawo. (Fundza.) Ngemuva kwekufundza lamavesi, umuntfu losemusha angatibuta: ‘Iyini “intsandvo yaJehova”? Ngusiphi sincumo lesitamjabulisa? Ngusiphi sincumo lesitangisita kutsi ngisisebentise kahle sikhatsi sami?’ Khumbula kutsi “emalanga mabi,” futsi lelive lelibuswa nguSathane litawubhujiswa ngekushesha. Kungaba kuhlakanipha kusebentisa sikhatsi setfu kuze sijabulise Jehova.

6. Ngusiphi sincumo lesentiwa nguMariya, futsi kungani bekusincumo lesihlakaniphile?

⁶Ncuma kutsi yini lebalulekile ekuphileni. Ngalesinye sikhatsi, kusebentisa kahle sikhatsi setfu kufaka ekhatsi kukhetsa emkhatsini wetintfo letimbili letingasitimbi. Loku sikubona kahle kulokwenteka ngesikhatsi Jesu avakashela Mariya naMata. Mata bekajabulile ngekuvakashelwa nguJesu, ngako waba matasa enta kudla lokunyenti. Kodvwa Mariya wahlala phasi, walalela Jesu njengobe afundzisa. Nanobe Mata bekanetisusa letinhle, kepha Mariya ‘wakhetsa lokuncono kakhulu.’ (Luk. 10:38-42) Kungenteka ngekuhamba kwesikhatsi Mariya wakhohlwa kutsi wadlani ngalelo langa, kodvwa siyaciniseka kutsi akazange akukhohlwe loko lakufundza kuJesu. Njengobe besibalulekile kuMariya sikhatsi lasicitsa naJesu, nakitsi sibalulekile sikhatsi lesisicitsa naJehova. Singasisebentisa njani kahle lesikhatsi?

7. Kungani kufanele sitinike sikhatsi sekuthantaza, sekudadisha nesekuzindla?

⁷Khumbula kutsi umthantazo, kudadisha nekuzindla kuyincenye yekukhonta Jehova. Nasithantaza, sisuke sikhuluma naBabe wetfu wasezulwini lositsandza kakhulu. (Hla. 5:7) Nasidadisha liBhayibheli, sisuke singenisa “lwati ngaNkulunkulu,” longuMtfombo wako konkhe kuhlakanipha. (Taga 2:1-5) Nasizindla, sicabanga ngebuntfu baJehova lobuhle futsi sikhumbule tintfo letinhle lafuna kusentela tona. Lena yindlela lekahle yekusebentisa sikhatsi setfu. Kodvwa yini lengasisita kutsi sisisebentise kahle sikhatsi lesincane lesinaso?

8. Yini lesingayifundza endleleni Jesu lasisebentisa ngayo sikhatsi sakhe nakasehlane?

 ⁸Nakungenteka, bani sendzaweni lethulile. Cabanga ngesibonelo saJesu. Ngaphambi kwekutsi Jesu acale umsebenti wekushumayela emhlabeni, wacitsa emalanga langu-40 asehlane. (Luk. 4:1, 2) Njengobe bekasendzaweni lethulile, wakhona kuthantaza kuJehova futsi wazindla ngaloko Babe wakhe lebekafuna akwente. Siyaciniseka kutsi kwenta njalo kwamsita walungela luvivinyo lobeluseta. Singakusita njani sibonelo saJesu? Nangabe ulilunga lemndeni lomkhulu, kungahle kube matima kutfola indzawo lethulile ekhaya. Nangabe kunjalo, ungafuna indzawo lethulile ngephandle. Nguloku lokwentiwa nguJulie nangabe afuna kuthantaza kuJehova. Yena nemyeni wakhe bahlala endlini lencane eFrance, futsi akukavami kutsi abe yedvwa, angaphazamiseki. Julie utsi: “Onkhe malanga ngivame kuya e-park. Nangilapho, ngiba ngedvwa, ngingaphazamiseki futsi ngikhulume kahle naJehova.”

9. Nanobe Jesu bekamatasa, wakhombisa njani kutsi buhlobo bakhe naJehova bubalulekile?

⁹ Jesu bekamatasa kakhulu. Nobe ngukuphi labekashumayela khona bekalandzelwa ticumbi tebantfu lebetifuna sikhatsi sakhe. Ngalelinye lilanga ‘bonkhe bantfu bakulelinye lidolobha babutsana emnyango’ kuze batombona. Nanobe kunjalo, Jesu bekaciniseka kutsi uba naso sikhatsi sekuthantaza kuJehova. Ekuseni ngeluvivi, watfola ‘indzawo lethulile’ kuze acitse sikhatsi ayedvwa naBabe wakhe.—Mak. 1:32-35.

10-11. Ngekusho kwaMatewu 26:40, 41, ngusiphi seluleko lesibalulekile Jesu lasiniketa bafundzi bakhe ensimini yaseGetsemane, kodvwa kwentekani?

¹⁰ Ngebusuku bekugcina baJesu asemhlabeni futsi sekatawucedza umsebenti wakhe wekushumayela, wafuna indzawo lethulile kuze azindle futsi athantaze. Lendzawo wayitfola ensimini yaseGetsemane. (Mat. 26:36) Ngaleso sikhatsi, Jesu watjela bafundzi bakhe intfo lebalulekile lemayelana nemthantazo.

¹¹ Cabanga ngalokwenteka. Nabafika ensimini yaseGetsemane, besekusebusuku kakhulu, kungenteka besekashayile na-12. Jesu watjela baphostoli kutsi ‘balindze,’ futsi yena wahamba wayothantaza. (Mat. 26:37-39) Kodvwa ngesikhatsi asathantaza, bona balala. Ngesikhatsi abatfola balele, Jesu waphindze wabakhutsata kutsi ‘bahlale balindzile futsi bachubeke bathantaza.’ (Fundza Matewu 26:40, 41.) Wabona kutsi bebacindzeteleke kakhulu futsi badziniwe. Ngemusa, Jesu wavuma kutsi “inyama ibutsakatsaka.” Waphindze wabuyela tikhatsi letimbili wayothantaza, kodvwa bekatsi  nakabuya atfole bafundzi bakhe balele, bangathantazi.—Mat. 26:42-45.

12. Yini lesingayenta nangabe ngaletinye tikhatsi sitiva sicindzeteleke kakhulu nobe sidzinwe kakhulu kutsi singathantaza?

¹²Khetsa sikhatsi lesikahle. Ngaletinye tikhatsi singahle sitive sicindzeteleke kakhulu nobe sidzinwe kakhulu kutsi singathantaza. Nangabe loku kuke kwenteka kuwe, awusiwedvwa. Yini longayenta? Labanye lebebavame kuthantaza nasebayolala bakutfole kulusito kuthantaza naseliyoshona basengakadzinwa kakhulu. Labanye bakutfole kulusito kuthantaza bahleti nobe bagucile. Kodvwa kutsiwani nangabe ukhatsateke kakhulu nobe udvumateke kakhulu kutsi ungathantaza? Tjela Jehova indlela lotiva ngayo. Ungaciniseka kutsi Babe wetfu lonemusa utasicondza simo sakho.—Hla. 139:4.

13. Tintfo tebuchwephesha tingasiphazamisa njani nasicitsa sikhatsi naJehova?

¹³Gwema tintfo letingakuphazamisa nawudadisha. Akusiwo umthantazo kuphela longacinisa buhlobo betfu naJehova. Kudadisha liVi laNkulunkulu nekuba khona emihlanganweni yelibandla nako kungasisita sisondzelane naNkulunkulu. Kukhona yini longakwenta kuze usisebentise kahle sikhatsi losicitsa udadisha, nalosicitsa usemihlanganweni yelibandla? Tibute, ‘Yini lengiphazamisako nangisemihlanganweni yelibandla nobe nangidadisha?’ Kungenteka yini kutsi uphazanyiswa kubamba lucingo, ngema-email, nobe imilayeto lengena ecingweni lwakho nobe kulenye intfo yebuchwephesha? Lamuhla, tigidzigidzi tebantfu tinato letintfo tebuchwephesha. Labanye bacwaningi batsi kuba nje nelucingo eceleni kwakho kungakuphazamisa. Lesinye sati lesifundzisa ngengcondvo satsi: “Awukhoni kunaka loko lokwentako. Ingcondvo yakho ikuletinye tintfo.” Ngaphambi kwekutsi kucale umhlangano wesigodzi newesifundza, sivame kucelwa kutsi sibeke tintfo tetfu tebuchwephesha esimeni lesingeke siphazamise labanye. Singenta lokufanako yini nasisodvwana kuze tintfo tetfu tebuchwephesha tingasiphazamisi nasicitsa sikhatsi naJehova?

14. Ngekusho kwembhalo waKubaseFiliphi 4:6, 7, Jehova utasisita njani sikhone kunaka?

¹⁴Cela Jehova akusite unake. Nawubona kutsi ingcondvo yakho iyazula nawudadisha nobe nawusemhlanganweni welibandla, cela  Jehova akusite. Nasikhatsatekile, kubalulekile kunaka liVi laNkulunkulu ngisho nobe kumatima kuyekela kucabanga ngetintfo letisikhatsatako. Thantazela kuthula lokungeke kugcine ngekulondvolota inhlitiyo yakho kodvwa lokutawulondvolota ‘nengcondvo’ yakho.—Fundza KubaseFiliphi 4:6, 7.

15. Kusisita njani kucitsa sikhatsi naJehova?

¹⁵ Utawusitakala kakhulu nawutinika sikhatsi sekukhuluma naJehova, sekumlalela nesekucabanga ngaye. Kanjani? Kwekucala, utawenta tincumo letikahle. LiBhayibheli liyasicinisekisa kutsi “loyo lohamba nalabahlakaniphile naye utawuhlakanipha.” (Taga 13:20) Ngako njengobe ucitsa sikhatsi naJehova, longuMtfombo wekuhlakanipha, nawe utawuhlakanipha kakhulu. Utayicondza kancono indlela yekumjabulisa nekutsi ungakubalekela njani kwenta tincumo letimvisa buhlungu.

16. Kucitsa sikhatsi naJehova kuyitfutfukisa njani indlela lesifundzisa ngayo?

¹⁶ Kwesibili, utawuba ngumfundzisi lokahle. Nasidadisha liBhayibheli nalotsite, lomunye umgomo wetfu lomkhulu kumsita asondzele kuJehova. Nasitinika sikhatsi lesinyenti sekukhuluma naBabe wetfu wasezulwini, sitamtsandza kakhulu futsi sitawukhona kufundzisa labanye kutsi bamtsandze. Nguloko lokwentiwa nguJesu. Wakhuluma kahle ngaBabe wakhe, asebentisa emagama laveta lutsandvo, lokwenta bafundzi bakhe kutsi nabo bamtsandze Jehova.—Joh. 17:25, 26.

17. Kuthantaza nekudadisha kusisita njani kutsi sicinise kukholwa kwetfu?

¹⁷ Kwesitsatfu, kukholwa kwakho kutawucina. Cabanga ngaloko lokwentekako nawucela Nkulunkulu kutsi akucondzise, akudvudvute nobe akusekele. Njalo nakaphendvula lemithantazo, kukholwa kwakho kuyacina. (1 Joh. 5:15) Yini lenye lengacinisa kukholwa kwakho? Kutidadishela liBhayibheli. Khumbula kutsi “umuntfu ukholwa nangabe sekeve livi.” (Rom. 10:17) Nobe kunjalo, kuze sibe nekukholwa lokucinile, kufanele sente lokungetulu kwekungenisa lwati. Yini lenye lokufanele siyente?

18. Niketa sibonelo lesikhombisa kutsi kungani kufanele sizindle.

¹⁸ Kufanele sizindle ngalesikufundzako. Cabanga ngalokwenteka kumbhali weTihlabelelo 77. Bekakhatsatekile ngobe bekacabanga kutsi Jehova bekangasamemukeli yena kanye nalamanye ema-Israyeli. Lemicabango beyimenta angasakhoni ngisho nekulala. (Emavesi 2-8) Yini layenta? Watjela Jehova watsi: “Ngitawucabangisisa ngayo yonkhe imisebenti yakho, ngicabangisise  nangalokwentile.” (Vesi 12) Kuliciniso kutsi lomhlabeleli bekatati tintfo Jehova lebekatentele bantfu bakhe esikhatsini lesengcile, nobe kunjalo watibuta watsi: “Nkulunkulu sewukhohliwe yini kusentela umusa, nobe intfukutselo yakhe yente kutsi umusa wakhe uphele?” (Vesi 9) Lomhlabeleli wazindla ngetintfo lebetentiwe nguJehova nangekutsi wabentela umusa esikhatsini lesendlulile. (Vesi 11) Waba yini umphumela? Waciniseka kutsi Jehova angeke abalahle bantfu bakhe. (Vesi 15) Ngendlela lefanako, kukholwa kwakho kutawucina nawuzindla ngaloko Jehova lakwentele bantfu bakhe nangaloko lakwentele kona.

19. Nguyiphi lenye indlela lokungasisita ngayo kucitsa sikhatsi naJehova?

¹⁹ Kwesine, nalokubaluleke kakhulu, kutsi utamtsandza kakhulu Jehova. Lutsandvo lutakwenta kutsi ulalele Jehova, udzele lokutsite kuze umjabulise, futsi ubeketelele nobe nguluphi luvivinyo. (Mat. 22:37-39; 1 Khor. 13:4, 7; 1 Joh. 5:3) Kute lokubaluleke kakhulu kwendlula kuba nebuhlobo lobusedvute naJehova!—Hla. 63:1-8.

20. Uhlela kusisebentisa njani sikhatsi sakho naJehova?

²⁰ Khumbula kutsi kuthantaza, kudadisha nekuzindla kuyincenye yekukhonta Jehova. NjengaJesu, funa indzawo lethulile kuze ucitse sikhatsi naJehova. Gwema tintfo letingakuphazamisa. Cela Jehova akusite kutsi unake nawenta tintfo letiphatselene nekukhonta yena. Nawusebentisa kahle sikhatsi sakho nyalo, Jehova utakubusisa ngekuphila lokuphakadze emhlabeni lomusha waNkulunkulu.—Mak. 4:24.