1. Njengobe kuvetiwe ku-3 Johane 3, 4, yini lesenta sijabule?

UMPHOSTOLI Johane wajabula kakhulu ngesikhatsi eva kutsi labo lebekabasitile kuze bafundze liciniso bebachubeka bakhonta Jehova ngekwetsembeka. Bahlangabetana netinkinga letinyenti, futsi Johane wachubeka asebenta kamatima kuze acinise kukholwa kwalamaKhristu letsembekile lebekawatsatsa njengebantfwana. Ngendlela lefanako, natsi siyajabula nangabe bantfwana betfu, kungaba ngulesibatalako nobe lesibafundzise liciniso, batinikela kuJehova futsi bachubeka bamkhonta.—Fundza 3 Johane 3, 4.

2. Beyiyini injongo yaletincwadzi letabhalwa nguJohane?

² Nga-98 C.E., kungenteka Johane bekahlala e-Efesu nobe eceleni kwakhona. Kungenteka waya kuyohlala khona ngemuva kwekukhulwa eJele lebelisesihlengeni sasePhatmose. Ngaleso sikhatsi, umoya longcwele waJehova wamsita kuze abhale letincwadzi letintsatfu. Injongo yaletincwadzi letintsatfu bekukusita emaKhristu letsembekile kutsi achubeke akholwa kuJesu futsi achubeke ahamba ecinisweni.

3. Ngumiphi imibuto lesitayiphendvula?

³ Johane bekangumphostoli wekugcina lobekasaphila, futsi bekakhatsatekile ngetintfo letimbi lebetentiwa bafundzisi bemanga ebandleni. * (1 Joh. 2:18, 19, 26) Labafundzisi bemanga bebatsi bayamati Nkulunkulu, kodvwa bebangayilaleli imiyalo yakhe. Nyalo, asesicoce ngeseluleko lesiphefumulelwe  lesashiwo nguJohane. Njengobe sicoca ngaso, sitawuphendvula imibuto lemitsatfu: Kusho kutsini kuhamba ecinisweni? Ngutiphi tinkinga lesihlangabetana nato? Singasitana njani kuze sihlale ecinisweni?

4. Ngekusho kwa-1 Johane 2:3-6 na-2 Johane 4, 6, yini lokufanele siyente kuze sihambe ecinisweni?

⁴ Kuze sihambe ecinisweni, kufanele siwati emaciniso latfolakala eVini laNkulunkulu, liBhayibheli. Ngetulu kwaloko, kufanele ‘sigcine imiyalo yaJehova,’ lokusho kutsi siyihloniphe. (Fundza 1 Johane 2:3-6; 2 Johane 4, 6.) Jesu wasibekela sibonelo lesihle sekuhlonipha Jehova. Lenye indlela lesihlonipha ngayo Jehova kutsi silingise Jesu Khristu.—Johane 8:29; 1 Phetro 2:21.

5. Yini lokufanele siciniseke ngayo?

⁵ Kuze sichubeke sihamba ecinisweni, kufanele siciniseke kutsi Jehova unguNkulunkulu weliciniso nekutsi konkhe lasitjela kona eVini lakhe liBhayibheli kuliciniso. Kufanele setsembe nekutsi Jesu unguMesiya lowetsenjisiwe. Labanyenti lamuhla bayangabata kutsi Jesu uyiNkhosi lebusako yeMbuso waNkulunkulu. Johane wecwayisa kutsi bekutawuba ‘nebakhohlisi labanyenti’ lebebatawudukisa labo lebebanekukholwa lokungakacini ecinisweni ngaJehova nangaJesu. (2 Joh. 7-11) Johane wabhala watsi: “Ngubani longumcambimanga, ngaphandle kwaloyo lophika kutsi Jesu unguKhristu?” (1 Joh. 2:22) Lenye indlela lesingagwema ngayo kuyengwa kutsi sitadishe liVi laNkulunkulu. Nasenta njalo, sitawumati Jehova naJesu. (Joh. 17:3) Sitawubese siyaciniseka kutsi siyalati liciniso.

6. Ngutiphi tinkinga emaKhristu lasemasha labhekana nato?

⁶ Onkhe emaKhristu kufanele acaphele kuze angadukiswa timfundziso tebantfu. (1 Joh. 2:26) EmaKhristu lasemasha kufanele acaphele kuze angadukiswa. Lomunye dzadze lokutsiwa ngu-Alexia, * loneminyaka lengu-25 utsi: “Nangisesesikolweni, ngafundza ngekutigucukela kwemvelo  nangaleminye imibono yebantfu, futsi loko kwangenta ngalingabata liciniso. Ngaletinye tikhatsi, letimfundziso betingitsintsa. Kodvwa ngabona kutsi akukafanele ngilalele kuphela loko lengifundziswa kona esikolweni, kepha kufanele ngikufundze naloko lokushiwo liBhayibheli.” Alexia wafundza incwadzi letsi Life—How Did It Get Here? By Evolution or by Creation? Ngemuva kwemaviki lambalwa, kungabata kwakhe kwaphela. Alexia uchubeka utsi: “Ngatifunela mine bufakazi bekutsi konkhe lokuseBhayibhelini kuliciniso. Ngabona nekutsi kuphila ngetimiso talo kutangisita kutsi ngijabule futsi ngibe nekuthula.”

7. Yini lokufanele sicaphele kutsi singayenti, futsi leni?

⁷ Onkhe emaKhristu, lasemasha nalasakhulile, kufanele acaphele kuze angenti shengatsi akhonta Jehova kantsi enta tintfo letimbi. Johane waveta kutsi angeke sihambe ecinisweni futsi ngesikhatsi lesifanako sibe sitiphatsa kabi. (1 Joh. 1:6) Nangabe sifuna kwemukelwa nguNkulunkulu nyalo nasesikhatsini lesitako, kufanele sikhumbule kutsi Jehova ukubona konkhe lesikwentako. Ngisho nobe bantfu bangakuboni lesikwenta emasitseleni, Jehova ubona konkhe.—Heb. 4:13.

8. Yini lokufanele singayemukeli?

⁸ Kufanele singawemukeli umbono walelive mayelana nesono. Umphostoli Johane wabhala watsi, “Nangabe sitsi: “Site sono,” sisuke sitiyenga.” (1 Joh. 1:8) Ngesikhatsi kusaphila Johane, bafundzisi bemanga bebatsi umuntfu bekangatenta tintfo letimbi kodvwa achubeke angumngani waNkulunkulu. Lamuhla siphila nebantfu labanembono lofanako. Labanyenti batsi bayakholelwa kuNkulunkulu, kodvwa abavumelani naloko Jehova lakushoko ngekuya ecasini. Loko Jehova latsi kusono, bona batsi kuyindlela lekahle yekuphila futsi kusuke kuyintfo umuntfu latikhetsele yona.

9. Kungani kukahle ngebantfu labasha kwenta loko liBhayibheli lelitsi kuhle?

 ⁹ Kungase kube matima ngemaKhristu lasemasha kutsi abe nembono lokahle ngekuya ecasini nangabe bantfu lafundza nabo nobe lasebenta nabo bangawemukeli umbono weliBhayibheli ngekuya ecasini. Naku lokwenteka ku-Aleksandar, utsi: “Lamanye emantfombatana esikolweni bekangicindzetela kutsi ngilale nawo. Bebatsi ngisitabani ngobe bekute umuntfu lebengitsandzana naye.” Nangabe ubhekene nesimo lesifanako, khumbula kutsi nangabe wenta loko liBhayibheli lelikushoko, utawenta bantfu bakuhloniphe, utawube uvikela nemphilo yakho, simo sakho sengcondvo kanye nebuhlobo bakho naJehova. Ngaso sonkhe sikhatsi nangabe umelana nesilingo, kutawuba melula kutsi wente lokulungile. Khumbula kutsi nguSathane lowenta bantfu babe nembono lokabi ngekuya ecasini. Ngako-ke, nangabe ukubalekela kufana nebantfu balelive, utawube ‘umncobile lomubi.’—1 Joh. 2:14.

10. Umbhalo wa-1 Johane 1:9 usisita njani kutsi sikhonte Jehova nganembeza lohlantekile?

¹⁰ Siyati kutsi nguJehova lonelilungelo lekusitjela loko lokusono. Senta kahle nangabe singasenti sono. Nangabe sente sono, kufanele sisivume kuJehova ngemthantazo. (Fundza 1 Johane 1:9.) Nangabe sente sono lesikhulu, sicela labadzala belibandla kutsi basisite ngobe babekwe nguJehova kuze basinakekele. (Jak. 5:14-16) Nobe kunjalo, akukafaneli sihlale sitiva sinelicala ngenca yetono lesatenta esikhatsini lesendlulile. Kungani? Kungobe babe wetfu lonelutsandvo wasentela umhlatjelo wesihlengo ngeNdvodzana yakhe kuze tono tetfu titsetselelwe. Nakatsi Jehova utatitsetsela toni letiphendvukako, usuke acinisile. Kute intfo lengasivimba kutsi sikhonte  Jehova nganembeza lohlantekile.—1 Joh. 2:1, 2, 12; 3:19, 20.

11. Singativikela njani tingcondvo tetfu etimfundzisweni letingalimata kukholwa kwetfu?

¹¹ Kufanele sitigweme tintfo letifundziswa bafundzisi bemanga. Kusukela kwacaliswa libandla lebuKhristu, Develi bekasolo etama kwenta emaKhristu kutsi aphelelwe kukholwa kwawo. Ngako-ke, kufanele sikwati kubona umehluko emkhatsini wemanga neliciniso. * Titsa tetfu tingase tisebentise i-Internet nobe tindlela tekuchumama kuze tisente singasametsembi Jehova futsi singasabatsandzi bazalwane betfu. Khumbula kutsi ngubani lobangela konkhe loku, futsi ukugweme!—1 Joh. 4:1, 6; Semb. 12:9.

12. Kungani kufanele sicinise kukholwa kwetfu emacinisweni lesiwafundzile?

¹² Kuze silwisane nemachinga aSathane ekucedza kukholwa kwetfu, kufanele sicinise kukholwa kwetfu kuJesu nakuloko lakwentako kuze kufezeke injongo yaNkulunkulu. Kufanele sibetsembe nalabo Jehova labasebentisako kuze bacondzise enhlanganweni yakhe. (Mat. 24:45-47) Sicinisa kumetsemba kwetfu Nkulunkulu ngekutsi sitadishe liVi lakhe. Nasenta njalo kukholwa kwetfu kutawufana netimphandze tesihlahla letingene tajula emhlabatsini. Pawula washo intfo lefanako ngesikhatsi abhalela libandla laseKholose. Watsi: “Njengobe senemukele Khristu Jesu iNkhosi, chubekani nihamba ebunyeni naye, nicine futsi nakhiwe kuye, nisime nasekukholweni.” (Khol. 2:6, 7) Nangabe sitimisela kuze sicinise kukholwa kwetfu, kutawuba matima ngaSathane kanye nebalandzeli bakhe kutsi basivimbe ekuhambeni ngeliciniso.—2 Joh. 8, 9.

13. Yini lokufanele siyilindzele, futsi leni?

¹³ Kufanele sikulindzele kwenyanywa ngulelive. (1 Joh. 3:13) Johane uyasikhumbuta kutsi “lonkhe live lisemandleni alomubi.” (1 Joh. 5:19) Njengobe lelive liya ngasekupheleni, Sathane utfukutsele uyabila. (Semb. 12:12) Usihlasela ngetindlela letinyenti letibhacile, njengekutiphatsa kabi nobe asebentise bafundzisi bemanga. Uphindze asihlasele ngalokucondzile. Sathane uyati kutsi uselelwe sikhatsi lesincane sekwetama kusiyekelisa kwenta umsebenti wekushumayela nesekucedza kukholwa kwetfu. Akusimangalisi kutsi umsebenti wetfu wekushumayela uvinjelwe kulamanye emave. Nanobe kunjalo, bazalwane betfu labakulawo mave bayachubeka bacinisela. Ngako-ke, noma ngabe yini Sathane letama kuyenta kubantfu baJehova, batawuchubeka betsembekile.

14. Nguyiphi lenye indlela lesingasita ngayo bazalwane nabodzadzewetfu kuze bahlale ecinisweni?

¹⁴ Kuze sisite bazalwane nabodzadzewetfu kutsi bahlale ecinisweni, kufanele sibavele. (1 Joh. 3:10, 11, 16-18) Kufanele singagcini nje ngekutsandzana nangabe tintfo tihamba kahle, kodvwa kufanele sitsandzane ngisho nalapho kuvela tinkinga. Nasi sibonelo, kukhona yini lomatiko loshonelwe sihlobo sakhe futsi lodzinga kudvudvutwa nome kusitwa? Uke weva yini kutsi bazalwane betfu balahlekelwe tintfo tabo letinyenti ngenca yetehlakalo temvelo futsi badzinga lusito kuze bakhe kabusha emaHholwa abo eMbuso nobe emakhaya abo? Sikhombisa kutsi sibatsandza kakhulu bazalwane betfu nekutsi siyabavela ngaloko lesikushoko nalesikwentako.

15. Njengobe kuvetiwe ku-1 Johane 4:7, 8, yini lokudzingeka siyente?

¹⁵ Silingisa Babe wetfu losezulwini futsi  lonelutsandvo nangabe sibatsandza labanye. (Fundza 1 Johane 4:7, 8.) Lenye indlela lesikhombisa ngayo lutsandvo kutsi sicolelane. Nasi sibonelo, lomunye umuntfu angasivisa buhlungu kodvwa bese uyacolisa. Sitawube sikhombisa lutsandvo nangabe simcolela futsi singacabangi ngaloko lasente kona. (Khol. 3:13) Lomunye umzalwane lokutsiwa ngu-Aldo waphatseka kabi ngesikhatsi umzalwane lebekamhlonipha asho intfo lebuhlungu ngebuve bakhe. Utsi: “Bengihlale ngithantaza kuJehova ngimcela kutsi angisite ngingabi nemicabango lemibi ngalomzalwane.” Aldo wenta intfo lemangalisako. Wacela kuhamba nalomzalwane emsebentini wekushumayela. Njengobe bachubeka bashumayela, Aldo wamchazela indlela lokwamphatsa kabi ngayo loko lakusho. Aldo utsi: “Ngesikhatsi lomzalwane eva kutsi kwangiphatsa kabi njani loko lakusho, wacolisa. Bengimuva ngendlela lakhuluma ngayo kutsi bekatisola ngaloko lakusho. Ngemuva kwaloko, saphindze saba bangani labakhulu.”

16-17. Yini lokufanele sitimisele kuyenta?

¹⁶ Umphostoli Johane bekabatsandza kakhulu bazalwane bakhe futsi bekafuna babe nekukholwa lokucinile. Kuyasikhutsata kwati kutsi emadvodza kanye nebafati labafana naJohane batawubusa naJesu ezulwini!—1 Joh. 2:27.

¹⁷ Shengatsi singacabangisisa ngalesibonelo lesikhulume ngaso. Kufanele sitimisele kuhamba ecinisweni, lokusho kulalela Jehova kuko konkhe lesikwentako. Tadisha liVi lakhe futsi uletsembe. Bani nekukholwa lokucinile kuJesu. Ungatemukeli timfundziso tebantfu netetihlubuki. Ungenti shengatsi ukhonta Jehova ube wenta tintfo letimbi, futsi ungabalaleli labo labetama kukwentisa tintfo letimbi. Kufanele uphile ngetimiso taJehova tekutiphatsa. Kufanele sisite bazalwane betfu kuze babe nemandla ngekutsi sicolele labo labasivisa buhlungu nangekutsi sisite labo labadzinga lusito. Nasenta njalo, ngisho noma singabhekana nabuphi bumatima, sitawuchubeka sihamba ecinisweni.