Bufakazi bukhombisa kutsi Jesu waba nguMphristi Lophakeme ngesikhatsi abhajatiswa nga-29 C.E. Sikwati njani loku? Ngesikhatsi abhajatiswa, Jesu wakhombisa kutsi bekatimisele kunikela ngekuphila kwakhe e-altare lelingekwemfanekiso lelimelela ‘intsandvo’ yaNkulunkulu. (Gal. 1:4; Heb. 10:5-10) Kusukela laba khona leli-altare lelingekwemfanekiso ngesikhatsi Jesu abhajatiswa, lithempeli laNkulunkulu lelingekwemfanekiso, lokulilungiselelo lekutsi bantfu bakhone kukhonta Jehova ngesihlengo saJesu kungenteka nalo laba khona ngaleso sikhatsi.—Mat. 3:16, 17; Heb. 5:4-6.

Njengobe lithempeli laNkulunkulu beselibekiwe, besekutawudzingeka umphristi. Kuze loMphristi abe khona, Jehova wagcoba Jesu “ngemoya longcwele, wamnika nemandla” kuze abe ngumphristi lophakeme. (Imis. 10:37, 38; Mak. 1:9-11) Nobe kunjalo, singaciniseka njani kutsi Jesu wagcotjwa kutsi abe nguMphristi Lophakeme ngaphambi kwekufa nekuvuswa kwakhe? Sibonelo sa-Aroni kanye nalabanye baphristi labaphakeme labalandzela emvakwakhe sitasisita kuze siphendvule lombuto.

UMtsetfo Jehova lebekawunikete Mosi bewutsi ngumphristi lophakeme kuphela lobekangangena eNgcwelengcwele yelithende lekukhontela futsi ngekuhamba kwesikhatsi bese ungena eNgcwelengcwele yelithempeli. INgcwelengcwele beyehlukaniswa yindvwangu nendzawo leNgcwele. Umphristi bekangena ngale kwalendvwangu ngeLilanga Lekubuyisana. (Heb. 9:1-3, 6, 7) Njengobe Aroni nalabanye baphristi labamlandzela bagcotjwa kutsi babe baphristi labaphakeme ngembi ‘kwekudzabula endvwangwini [mbamba]’ yelithende lekukhontela, kungenteka kutsi Jesu wabekwa kutsi abe nguMphristi Lophakeme welithempeli laJehova ngaphambi kwekufa kwakhe futsi ngemuva kwaloko ‘wadzabula endvwangwini, lokuyinyama yakhe,’ kuze ayophila ezulwini. (Heb. 10:20) Ngenca yaloku, umphostoli Pawula watsi Jesu uta “njengemphristi lophakeme” futsi udzabula “ethendeni lelikhulu naleliphelele kakhulu lelingakentiwa ngetandla,” wangena “ezulwini lucobo.”—Heb. 9:11, 24.

Kute umehluko lokhona emkhatsini walapho lesivumelwane lesisha sicinisekiswa nalapho sisungulwa khona. Kungani? Ngesikhatsi Jesu enyukela ezulwini futsi anikela ngekuphila kwakhe ngenca yetfu, watsatsa sinyatselo sekucala kuletintsatfu lebesitawenta kutsi lesivumelwane lesisha sisebente. Letintfo latenta ngito letenta kutsi sisebente lesivumelwane. Ngutiphi letinyatselo?

Sekucala, Jesu wema embikwaJehova; sesibili, Jesu wanikela umhlatjelo kuJehova; sekugcina, Jehova wawemukela umnikelo waJesu lokwaba kucitseka kwengati yakhe. Sivumelwane lesisha besingasebenti ngesikhatsi tisengakentiwa letintfo.

LiBhayibheli alisitjeli ngalokucondzile kutsi kunini lapho khona Jehova emukela umhlatjelo waJesu. Ngako-ke, ngeke sisho ngalokucondzile kutsi sacinisekiswa nini lesivumelwane lesisha nekutsi sacala nini kusebenta. Nanobe kunjalo, siyati kutsi Jesu wenyukela ezulwini kusesele emalanga langu-10 kube liPhentekhoste. (Imis. 1:3) Kuleso sikhashana, Jesu wanikela ngemhlatjelo wakhe kuJehova futsi wawemukela. (Heb. 9:12) Bufakazi bekutsi sivumelwane lesisha besesicalile kusebenta babonakala ngeliPhentekhoste. (Imis. 2:1-4, 32, 33) Kuyacaca kutsi lesivumelwane lesisha besesisebenta ngaleso sikhatsi.

Ngalamafishane, sivumelwane lesisha sacinisekiswa futsi sasungulwa ngemuva kwekutsi Jehova emukele umhlatjelo waJesu wekucitseka kwengati yakhe leligugu futsi loko kwenta kutsi labagcotjiwe babe yincenye yalesivumelwane. Lesivumelwane sase sicala kusebenta kuloMphristi Lophakeme, lokunguJesu ngobe ‘nguye lowente kutsi sivumelwane lesisha sisebente.’—Heb. 7:25; 8:1-3, 6; 9:13-15.