1. Yini umphostoli Pawula layivuma?

UMPHOSTOLI Pawula wavuma kutsi ngaletinye tikhatsi bekaba butsakatsaka. Wavuma nekutsi umtimba wakhe ‘bewuhhohloka’ futsi bewulwisana nekwenta lokulungile, futsi naJehova bekangayiphendvuli imithandazo yakhe ngendlela lebekacabanga kutsi utayiphendvula ngayo. (2 Khor. 4:16; 12:7-9; Rom. 7:21-23) Pawula waphindze wavuma nekutsi bantfu lebebamphikisa bebamtsatsa njengemuntfu lobutsakatsaka. * Akazange avumele kutsi indlela labanye lebebamtsatsa ngayo nobe butsakatsaka bakhe bumente ative angasilutfo.—2 Khor. 10:10-12, 17, 18.

2. Ngekusho kwa-2 Khorinte 12:9, 10, ngusiphi sifundvo lesibalulekile Pawula lasifundza?

² Pawula wafundza sifundvo lesibalulekile sekutsi umuntfu angaba nemandla ngisho nobe abutsakatsaka. (Fundza 2 Khorinte 12:9, 10.) Jehova watjela Pawula kutsi ‘emandla akhe entiwe aphelela ebutsakatsakeni,’ lokusho kutsi Jehova bekangamniketa Pawula emandla lebekawadzinga. Kwekucala, asesibone kutsi kungani kungakafaneli sitfukutsele nangabe bantfu labasiphikisako basetfuka.

3. Kungani kufanele sijabule nasetfukwa?

³ Kute umuntfu lotsandza kwetfukwa. Nanobe kunjalo, nangabe titsa tetfu tisetfuka futsi loko letikushoko kusitfukutselisa,  singase siphelelwe ngemandla. (Taga 24:10) Ngako-ke, kufanele sente njani nangabe bantfu labasiphikisako basetfuka? NjengaPawula, ‘singajabula nasetfukwa.’ (2 Khor. 12:10) Kungani? Kungobe kwetfukwa nekuphikiswa kufakazela kutsi sibafundzi baJesu mbamba. (1 Phet. 4:14) Jesu washo kutsi balandzeli bakhe bebatawuphatfwa kabi. (Joh. 15:18-20) Loko kwenteka kumaKhristu angelikhulu lekucala. Ngaleso sikhatsi, bantfu lebebakhulele emasikweni emaGriki, bebatsatsa emaKhristu njengebantfu lebebangakahlakaniphi futsi lababutsakatsaka. KumaJuda, emaKhrsitu bekatsatfwa njengebantfu ‘lebebangakafundzi lokuyaphi nekutsi bebabantfukatana nje,’ njengemphostoli Phetro nemphostoli Johane. (Imis. 4:13) Bantfu labanyenti bebacabanga kutsi emaKhristu bekabantfu lababutsakatsaka futsi lebebangeke bakhone kutivikela ngobe bekangatingeneli tepolitiki, ngako kute lebekangasita ngako hulumende.

4. Yini leyentiwa ngemaKhristu angelikhulu lekucala ngesikhatsi bantfu basho tintfo letimbi ngawo?

⁴ EmaKhristu angelikhulu lekucala akazange avumele tintfo letimbi lebetishiwo bantfu labawaphikisako kutsi tibacedze emandla. Umphostoli Phetro nemphostoli Johane bakutsatsa njengelilungelo kuphatfwa kabi ngenca yekutsi bebalandzela Jesu futsi bafundzisa labanye ngaye. (Imis. 4:18-21; 5:27-29, 40-42) Labafundzi bebete emahloni. Ngekuhamba kwesikhatsi, lamaKhristu angelikhulu lekucala lebekatfobekile enta tintfo letinyenti letinhle kunaleto letentiwa baphikisi bawo kuze asite bantfu. Nasi sibonelo, tincwadzi letiphefumulelwe teliBhayibheli letabhalwa ngulamanye alamaKhristu tiyachubeka tisita tigidzi tebantfu futsi tibanika nelitsemba. LoMbuso lebekashumayela ngawo uyabusa nyalo futsi ngekushesha utawubusa emhlabeni wonkhe. (Mat. 24:14) Ngalokwehlukile, umbuso lonemandla waseRoma yakadzeni awuzange ube khona sikhatsi lesidze, kodvwa lamaKhristu letsembekile nyalo ayabusa ezulwini. Nobe kunjalo, labantfu lebebawaphikisa sebafa futsi nakutawenteka bavuswe, batawubuswa nguloMbuso lebebawenyanya, lowo lamaKhristu lebekashumayela ngawo.—Semb. 5:10.

5. Ngekusho kwaJohane 15:19, kungani bantfu bangabahloniphi bantfu baJehova?

⁵ Lamuhla, bantfu labanyenti ababahloniphi BoFakazi BaJehova futsi bahlekisa ngabo ngobe bacabanga kutsi babantfu labangakahlakaniphi futsi lababutsakatsaka. Kungani? Kungobe asenti tintfo letentiwa bantfu lesiphila nabo. Siyetama kutfobeka futsi silalele. Lamuhla, bantfu batsandza bantfu labatigcabhako, labatiphakamisako futsi labavukelako. Ngetulu kwaloko, asitingeneli tepolitiki futsi asibi yincenye yembutfo wemasotja. Sehlukile kubantfu labaseveni lamuhla, kungako bacabanga kutsi sibantfu labaphansi.—Fundza Johane 15:19; Rom. 12:2.

6. Ngumuphi umsebenti lomkhulu Jehova lasita bantfu bakhe kutsi bawente?

⁶ Ngisho nobe bantfu bakulelive bacabanga kutsi sibutsakatsaka, Jehova uyasisebentisa kuze ente tintfo letinkhulu. Uyawuphumelelisa umsebenti lomkhulu wekushumayela lowentiwa emhlabeni wonkhe. Lamuhla, tikhonti takhe tikhicita bomagazini labanyenti futsi labahunyushelwe etilwimini letinyenti letikhona emhlabeni, futsi basebentisa liBhayibheli kuze basite tigidzi tebantfu kutsi titfutfukise kuphila kwato. Lonkhe ludvumo luya kuJehova ngobe nguye lowenta lomsebenti kutsi uphumelele, usebentisa sicumbi sebantfu lababonakala baphansi kuze ente umsebenti lomnyenti kangaka. Kutsiwani  ngatsi? Jehova angasisita yini kutsi sibe nemandla? Nangabe kunjalo, yini lokufanele siyente kuze asisite? Nyalo asesicoce ngetintfo letintsatfu lesingatifundza esibonelweni lesasibekelwa ngumphostoli Pawula.

7. Ngusiphi sifundvo lesisitfolako esibonelweni saPawula?

⁷ Nasi lesinye sifundvo lesingasitfola esibonelweni saPawula: Akukafaneli setsembele emandleni etfu nobe emakhonweni etfu nasikhonta Jehova. Bantfu labanyenti bebamtsandza Pawula ngenca yemakhono akhe, bekungaba melula ngaye kutsi atigcabhe nobe atetsembe. Wakhulela eThasusi enhloko dolobha yaseRoma. IThasusi beyinjingile futsi beyinenyuvesi lebeyatiwa kakhulu. Pawula bekafundze kakhulu, futsi wafundziswa ngulomunye umholi wemaJuda lobekahlonishwa kakhulu lobekutsiwa nguGamaliyeli. (Imis. 5:34; 22:3) Ngalesinye sikhatsi, Pawula wake waba ngumuntfu lobalulekile kumaJuda. Utsi: “Bengitfutfuka kakhulu kuleNkholo kwendlula bontsanga yami labanyenti esiveni sakitsi.” (Gal. 1:13, 14; Imis. 26:4) Nobe kunjalo, Pawula akazange atetsembe.

8. Ngekusho kwaFiliphi 3:8, Pawula bekatitsatsa njani tintfo latishiya, futsi kungani ‘ajabula nakanebutsakatsaka’?

⁸ Pawula wajabula kakhulu ngekutsi ashiye tonkhe tintfo lebetimenta abonakale abalulekile kulabanye. Ecinisweni, wabona kutsi tonkhe letintfo lebekanato ‘betinjengencumbi yetibi.’ (Fundza Filiphi 3:8.) Bunyenti bumatima Pawula lahlangabetana nabo ngenca yekuba ngumlandzeli waKhristu. Wenyanywa bantfu bakubo. (Imis. 23:12-14) EmaRoma amshaya futsi amvalela eJele. (Imis. 16:19-24, 37) Ngetulu kwaloko, Pawula wabona kutsi bekanesono futsi bekumatima kutsi ente lokuhle. (Rom. 7:21-25) Akazange ayekele kulandzela Khristu ngisho nobe bekanetinkinga, kunaloko ‘wajabula nakanebutsakatsaka.’ Kungani? Kungobe nakabutsakatsaka bekayibona indlela Nkulunkulu lebekamsita ngayo.—2 Khor. 4:7; 12:10.

9. Kufanele sitive njani ngetintfo letisenta sibe butsakatsaka?

 ⁹ Nangabe sifuna kutsi Jehova asiphe emandla, akukafanele sicabange kutsi emandla, imfundvo, emasiko etfu nobe umcebo ngiko lokutawuveta indlela lesibaluleke ngayo. Letintfo atisenti sibe bantfu lababalulekile kuJehova. Ecinisweni, “abasibanyenti labahlakaniphile ngembono webantfu, abasibanyenti nalabahlonipheke ngekutalwa.” Kunaloko, Jehova ukhetse kusebentisa ‘tintfo letibutsakatsaka kulelive.’ (1 Khor. 1:26, 27) Ngako-ke, nanobe ute letintfo lesesikhulume ngato, usengamkhonta Jehova. Sibuke ngendlela lekahle simo lokuso. Ungakwenta njani loku? Khumbula kutsi nangabe ute tintfo letenta bantfu babaluleke kulelive, utayibona indlela Jehova lakunika ngayo emandla. Nasi sibonelo, nangabe ubesaba bantfu labakuphikisako, thantaza kuJehova umcele akuphe sibindzi sekukhuluma. (Ef. 6:19, 20) Nangabe ugula, cela Jehova kutsi akuphe emandla ekuhlala umatasa emsebentini wakhe. Nobe nini lapho ubona Jehova akusita, kukholwa kwakho kutawucina futsi utawuba nemandla.

10. Kungani kufanele sifundze ngetibonelo tebantfu baJehova labetsembekile, njengalabo lokukhulunywa ngabo kumaHebheru 11:32-34?

¹⁰ Pawula bakangumfundzi weliBhayibheli lotimisele. Tinyenti tintfo latifundza futsi wafundza nasetibonelweni tebantfu labetsembekile lokubhalwe ngabo eBhayibhelini. Ngesikhatsi abhalela emaKhristu langemaHebheru, Pawula wawacela kutsi acabange ngetibonelo letinyenti tebantfu baJehova labetsembekile. (Fundza Hebheru 11:32-34.) Cabanga ngalomunye waletikhonti taJehova, iNkhosi Davide. Wahlaselwa titsa takhe kanye nalabanye bantfu labake baba bangani bakhe. Njengobe sitawube sifundza ngesibonelo saDavide, sitawubona kutsi Pawula wawatfola njani emandla ngekucabanga ngaloko lokwenteka kuDavide nekutsi singamlingisa njani.

11. Kungani Davide bekabonakala abutsakatsaka? (Buka sitfombe lesisekhasini lekucala.)

¹¹ Davide bekabonakala abutsakatsaka kulelichawe lebelinemandla lobekutsiwa nguGoliyathi. Ngesikhatsi Goliyathi abona Davide, ‘wambuka wamedzelela.’ Goliyathi bekamkhulu, ahlomile futsi bekaceceshelwe imphi. Davide bekasengumfana lomncane futsi bekasengakaceceshelwa imphi. Davide washintja loko lobekubonakala kubutsakatsaka, wakwenta kwaba ngemandla. Wetsemba kutsi Jehova utamnika emandla futsi wasincoba sitsa sakhe.—1 Sam. 17:41-45, 50.

12. Nguyiphi lenye inkinga lokwadzingeka kutsi Davide abhekane nayo?

¹² Kwadzingeka kutsi Davide abhekane nalenye inkinga lebeyitawumenta ative aphelelwa ngemandla. Davide waba sisebenti lesetsembekile senkhosi yaka-Israyeli lokutsiwa nguSawula lebeyibekwe nguJehova. INkhosi Sawula yacale yamhlonipha Davide. Ngekuhamba kwesikhatsi, kutigcabha kwenta Sawula waba nemona ngaDavide. Sawula wamphatsa kabuhlungu Davide waze wetama nekumbulala.—1 Sam. 18:6-9, 29; 19:9-11.

13. Yini Davide layenta ngesikhatsi iNkhosi Sawula imphatsa kabuhlungu?

¹³ Ngisho nobe Davide aphatfwa kabuhlungu yiNkhosi Sawula, wachubeka ayihlonipha ngobe beyibekwe nguJehova. (1 Sam. 24:6) Akazange amsole Jehova ngenca yetintfo letimbi letentiwa nguSawula. Kunaloko, Davide wetsemba kutsi Jehova bekatamnika emandla  lebekawadzinga kuze acinisele ngesikhatsi lesimatima.—Hla. 18:1.

14. Ngusiphi simo lesifana nesaDavide umphostoli Pawula labhekana naso?

¹⁴ Umphostoli Pawula wabhekana nesimo lebesifana nesaDavide. Titsa taPawula betinemandla kakhulu kunaye. Baholi labadvumile bangesikhatsi sakhe bebamenyanya. Washaywa tikhatsi letinyenti futsi wavalelwa eJele. NjengaDavide, Pawula waphatfwa kabuhlungu bantfu lebebabangani bakhe. Ngisho nasebandleni lebuKhristu, labanyenti bebamphikisa. (2 Khor. 12:11; Fil. 3:18) Nobe kunjalo, Pawula wabancoba bonkhe labo lebebamphikisa. Kanjani? Wachubeka ashumayela ngisho nobe aphikiswa. Wahlala etsembekile kubazalwane bakhe nabodzadzewakhe ngisho nobe bebamdvumata. Ngetulu kwako konkhe, wetsembeka kuNkulunkulu kwaze kwaba sekufeni kwakhe. (2 Thim. 4:8) Wakhona kukwenta konkhe loku, hhayi ngenca yemakhono akhe kodvwa ngenca yekutsi wetsembela kuJehova.

15. Uyini umgomo wetfu, futsi singawufeza njani?

¹⁵ Kuyenteka yini uhlushwe nobe wetfukwe bantfu lofundza nabo, losebenta nabo nobe ngemalunga emndeni langasibo BoFakazi? Kukhona yini loke wakuphatsa kabi ebandleni? Nangabe kunjalo, khumbula sibonelo saDavide naPawula. ‘Ungachubeka uncoba lokubi ngalokuhle.’ (Rom. 12:21) Nangabe bantfu basiphikisa, ngeke setame kulwisana nabo njengobe Davide alwa naGoliyathi. Kunaloko, sitawuchubeka sincoba lokubi ngekutsi setame kusita bantfu kutsi bafundze ngaJehova nangeliBhayibheli. Ungakwenta loko ngekutsi usebentise liBhayibheli nawuphendvula imibuto bantfu labanayo ubahloniphe futsi ube nemusa kulabo labakuphatsa kabi nangekutsi wente lokuhle kubo bonkhe ngisho netitsa takho.—Mat. 5:44; 1 Phet. 3:15-17.

16-17. Yini Pawula langazange ayikhohlwe?

¹⁶ Ngaphambi kwekutsi umphostoli Pawula abe ngumlandzeli waKhristu, bekalijaha lelingahloniphi futsi lebelihlupha balandzeli baJesu. (Imis. 7:58; 1 Thim. 1:13) Jesu wavimba Pawula lobekatiwa ngekutsi  nguSawula kutsi angalihlaseli libandla lebuKhristu. Jesu wakhuluma naSawula asezulwini futsi Pawula waba yimphumphutse. Kuze aphindze abone emehlweni, kwadzingeka kutsi atfole lusito kulabantfu lebekabahlupha. Ngekutfobeka, walwemukela lusito kumfundzi lobekutsiwa ngu-Ananiyase lowamsita kuze aphindze abone.—Imis. 9:3-9, 17, 18.

¹⁷ Ngekuhamba kwesikhatsi, Pawula waba lilunga lelatiwako lelibandla lebuKhristu, futsi akazange asikhohlwe sifundvo Jesu lamfundzisa sona ngesikhatsi asendleleni leya eDamaseku. Pawula wahlala atfobekile, futsi bekalwemukela lusito lwebazalwane bakhe nabodzadze. Wavuma kutsi ‘baba yindvudvuto lenkhulu kuye.’—Khol. 4:10, 11.

18. Kungani kungase kube matima ngatsi kutsi semukele lusito lwalabanye?

¹⁸ Yini lesingayifundza kuPawula? Ngesikhatsi sisacala kufundza liciniso, kungenteka besilufuna lusito lwalabanye ngobe besati kutsi kusekunyenti lokufanele sikufundze. (1 Khor. 3:1, 2) Kusenjalo yini nyalo? Nangabe sekuphele iminyaka leminyenti sikhonta Jehova futsi sekukunyenti lokwentekile ekuphileni kwetfu, kungase kube matima ngatsi kutsi semukele lusito ikakhulukati nasilinikwa ngumuntfu lote sikhatsi lesidze njengatsi akhonta Jehova. Nanobe kunjalo, Jehova uvame kusebentisa bazalwane betfu nabodzadzewetfu kuze basicinise. (Rom. 1:11, 12) Nangabe sifuna kutsi Jehova asiphe emandla, kufanele semukele lusito lwebazalwane betfu nabodzadzewetfu.

19. Kungani Pawula bekaphumelela?

¹⁹ Kungani Pawula enta tintfo letinyenti letinhle ngemuva kwekutsi abe ngumKhristu? Kungobe wafundza kutsi kuphumelela kwemuntfu akuyi ngekutsi unemandla kanganani, ufundze kanganani, unjinge kanganani nobe watiwa kanganani, kodvwa kuya ngekutsi utfobeke kanganani nekutsi umetsemba kanganani Jehova. Shengatsi sonkhe singalingisa Pawula, (1) ngekutsi setsembeke kuJehova, (2) sifundze etibonelweni letiseBhayibhelini nekutsi (3) semukele lusito kubazalwane nabodzadzewetfu. Ngisho nobe singase sitive sibutsakatsaka, Jehova utawusenta sibe nemandla.