1. Ngekusho kwaFiliphi 2:3, kutfobeka kutasisita njani kuze sibe nebuhlobo lobuhle nalabanye?

SIMLALELA ngekutfobeka Jehova ngobe uyakwati loko lokusilungelako. (Ef. 4:22-24) Kutfobeka kutawusenta sibone kutsi tintfo Jehova latifunako tibalulekile kunaleto tsine lesitifunako futsi kutawusenta sitsatse labanye njengalabakhulu kunatsi. Umphumela waloko utawuba kutsi sibe nebuhlobo lobuhle naJehova kanye nebazalwane nabodzadzewetfu ebandleni.—Fundza Filiphi 2:3.

2. Yini leyashiwo ngumphostoli Pawula, futsi yini lesitawucoca ngayo kulesihloko?

² Nangabe singakacapheli, bantfu labatigcabhako futsi labaticabangela bona lesiphila nabo kulelive laSathane, bangakutsintsa kuphila kwetfu. * Kubonakala shengatsi emaKhristu angelikhulu lekucala yawatsintsa indlela yekuphila yebantfu bangaleso sikhatsi, kungako umphostoli Pawula waze wabhalela baseRoma watsi: “Nginitjela nonkhe kutsi kubete emkhatsini wenu lotibona amkhulu kunaloko langiko, kodvwa akaticabange ngendlela lefanele.” (Rom. 12:3) Pawula watsi kufanele singatibukeli phansi. Nobe kunjalo, kutfobeka kutasisita kutsi sibe nembono lokahle ngatsi. Kulesihloko, sitawucoca ngetintfo letintsatfu kutfobeka lokutasisita kuto kuze singaticabangi sibakhulu kunaloko lesingiko. Sitawucoca (1) ngemshado, (2) ngemalungelo lesinawo enhlanganweni yaJehova (3) nangekusebentisa tekuchumana.

3. Kungani kungase kube netinkinga emshadweni, futsi labanye betama kuticatulula njani letinkinga?

³ Jehova ufuna kutsi indvodza nemfati bajabule emshadweni wabo. Ngenca yekutsi sinesono, tinkinga titawuba khona ngaletinye tikhatsi. Ecinisweni, Pawula washo kutsi labashadako batawuba nelusizi enyameni. (1 Khor. 7:28) Labanye bahlale balwa nalabashade nabo futsi ngaletinye tikhatsi bangase basho nekutsi vele bekungakafanele bashade kanyekanye. Nangabe bacabanga njengalelive, bangase bacabange kutsi idivosi ngiyo lesisombululo setinkinga tabo. Bangase baticabangele bona kuphela futsi batitjele nekutsi bangajabula kuphela nabangadivosa.

4. Yini lokufanele siyigweme?

⁴ Kufanele sikugweme kucabanga kutsi imishado yetfu ngeke iphumelele. Siyati kutsi liBhayibheli livumela sinye sizatfu sekudivosa, nangabe munye aphingile. (Mat. 5:32) Nangabe sibhekene netinkinga emshadweni njengobe Pawula asho, akukafanele sitigcabhe bese sitibuta kutsi: ‘Ngiyakutfola yini loko lengikudzingako kulomshado? Ngiyatsandvwa yini vele? Ngingajabula kakhulu yini nangingaba nalomunye umuntfu?’ Nasinemicabango lefana nalena, sisuke siticabangela tsine kuphela kodvwa singabacabangeli labo lesishade nabo. Kuhlakanipha kwalelive kutakukhutsata kutsi wente loko lukukujabulisako, ngisho nobe loko kusho kucedza umshado wakho. LiBhayibheli litsi: kufanele “ningaticabangeli nine kuphela, kodvwa cabangelani nalabanye.” (Fil. 2:4) Jehova akafuni kutsi umdivose loshade naye. (Mat. 19:6) Kunaloko ufuna kutsi umshado wakho uhlale sikhatsi lesidze. Ufuna kutsi ucabangele loshade naye kucala kunekutsi uticabangele wena kuphela.

5. Ngekusho kwa-Efesu 5:33, indvodza nemfati kufanele baphatsane njani?

 ⁵ Indvodza nemfati kufanele batsandzane futsi bahloniphane. (Fundza Efesu 5:33.) LiBhayibheli lifundzisa kutsi kunenjabulo ekupheni kunasekwamukeleni. (Imis. 20:35) Ngubuphi buntfu lobutawusita labashadene kutsi batsandzane futsi bahloniphane? Batawusitwa kutsi batfobeke. Emadvodza nebafati labatfobekile batawufuna loko “lokusita lomunye” kunaloko lokusita bona kuphela.—1 Khor. 10:24.

6. Yini lesiyifundzako kuloko lokwashiwo nguSteven kanye naStephanie?

⁶ Kutfobeka kusite emaKhristu lamanyenti lashadene kutsi ajabule emshadweni wawo. Nasi sibonelo, lenye indvodza lokutsiwa nguSteven itsi: “Nangabe nimunye, niyakhona kubambisana ikakhulukati nakunetinkinga. Kunekutsi ucabange kutsi ‘yini lengilungelako mine?’ ungase ucabange kutsi yini lesilungelako?” Umfati wakhe Stephanie naye utiva ngendlela lefanako, utsi: “Kute umuntfu lofuna kuhlala nemuntfu lohlale amphikisa. Nangabe kukhona lesingavumelani ngako siyetama kutfola kutsi kubangelwa yini. Siyathantaza, sicwaninge bese siyakhuluma kutsi singayilungisa njani lenkinga. Setama kucatulula lenkinga kunekutsi silwisane sodvwa. Emadvodza nebafati batawujabula nangabe bangaticabangi babakhulu kunaloko labangiko.

7. Yini lokufanele yentiwe ngumzalwane nangabe atfola emalungelo enhlanganweni yaJehova?

⁷ Kulilungelo kukhonta Jehova nganobe nguyiphi indlela lesingakhona ngayo. (Hla. 27:4; 84:10) Kuyintfo lenhle kutsi umzalwane abe nesifiso sekwenta lokunyenti enhlanganweni yaJehova. Ecinisweni liBhayibheli litsi: “Nangabe umuntfu afisa kuba ngumbonisi, usuke afisa umsebenti lomuhle.” (1 Thim. 3:1) Nobe kunjalo, nangabe atfola sabelo kufanele angaticabangi amkhulu kunalo langiko. (Luk. 17:7-10) Umgomo wakhe kufanele kube kusita labanye ngekutfobeka.—2 Khor. 12:15.

8. Yini lesiyifundzako esibonelweni saDiyotrefesi, Uziya kanye na-Absalomu?

⁸ LiBhayibheli linetibonelo tebantfu lebebaticabanga babakhulu kunaloko lebebangiko. Diyotrefesi bekangakatfobeki, wetama kuba sembili ebandleni. (3 Joh. 9) Uziya wetama kwenta umsebenti Jehova lebekangakasho kutsi awente. (2 Khr. 26:16-21) Absalomu bekafuna kuba yinkhosi, ngako wenta shengatsi uyabatsandza bantfu kuze batomsekela kulelisu lakhe. (2 Sam. 15:2-6) Letindzaba letiseBhayibhelini tikhombisa ngalokucacile kutsi Jehova akajabuli ngebantfu labatifunela bona ludvumo. (Taga 25:27) Ngekuhamba kwesikhatsi, bantfu labatigcabhako futsi labafuna kunakwa ngulabanye batawuba netinkinga.—Taga 16:18.

9. Ngusiphi sibonelo Jesu lasibekela sona?

⁹ Ngalokungafani naletibonelo letisecwayiso, cabanga ngaJesu “lokwatsi nanobe anesimo saNkulunkulu, wangakucabangi kuchwaga, lokukutsi alingane naNkulunkulu.” (Fil. 2:6) Ngisho nobe kunguJehova kuphela lomkhulu kunaJesu, Jesu akaticabangi amkhulu kunaloko langiko. Watsi kubafundzi bakhe: “Loyo lotiphatsa njengalomncane emkhatsini wenu nonkhe nguye lomkhulu.” (Luk. 9:48) Kusibusiso lesikhulu kukhonta kanye nemahlahlandlela, tinceku letisebentako, labadzala kanye nebabonisi betigodzi labatfobekile njengaJesu! Nangabe sitfobekile, sitabatsandza kakhulu labanye. Jesu washo  kutsi tikhonti taNkulunkulu betitawubonakala ngekutsi titsandzane.—Joh. 13:35.

10. Yini lokufanele uyente nangabe uva shengatsi tinkinga ebandleni aticatulwa ngendlela lekahle?

¹⁰ Yini lokufanele uyente nangabe uva shengatsi tinkinga ebandleni aticatulwa ngendlela lekahle? Kunekutsi ukhonone, ungakhombisa kutfobeka ngekutsi ubasekele labo labaholako. (Heb. 13:17) Kuze ukhone kukwenta loko, tibute: ‘Letinkinga lengitibonako setinkhulu kangangekutsi tifuna kulungiswa yini? Lesi sikhatsi lesikahle yini sekutilungisa? Kungumtfwalo wami yini kutilungisa? Ngetama kwenta libandla libe nebunye yini noma ngetama kutiveta njengalobalulekile?’

11. Ngekusho kwa-Efesu 4:2, 3 ngumuphi umphumela lobakhona nasikhonta Jehova ngekutfobeka?

¹¹ Kutfobeka kubaluleke kakhulu kuJehova kunemakhono lesinawo futsi kubalulekile kutsi sibe nebunye, nebunye bubalulekile kunemisebenti lesiyentako. Ngako-ke, yenta konkhe lokusemandleni akho kuze ukhonte Jehova ngekutfobeka. Nawenta njalo utawube ukhutsata bunye ebandleni. (Fundza Efesu 4:2, 3.) Khutsala emsebentini wekushumayela. Hlale ufuna tindlela tekusita labanye ngekutsi ubentele tintfo letitsite. Batsandze bonkhe bantfu lokufaka ekhatsi labo labete tikhundla letitsite nobe emalungelo ebandleni. (Mat. 6:1-4; Luk. 14:12-14) Njengobe usebenta nelibandla ngekutfobeka, labanye batawanaka emakhono akho kanye nendlela lotfobeke ngayo.

12. Chaza kutsi liBhayibheli liyasikhutsata yini kutsi sibe nebangani.

¹² Jehova ufuna sikujabulele kucitsa sikhatsi setfu lesinyenti nebangani betfu  nemindeni yetfu. (Hla. 133:1) Jesu bekanebangani labakahle. (Joh. 15:15) LiBhayibheli lichaza tinzuzo lesititfolako nasinebangani labakahle. (Taga 17:17; 18:24) Liphindze lisitjele kutsi akusiko kahle kutehlukanisa nalabanye. (Taga 18:1) Labanyenti beva shengatsi tekuchumana ngito letikwenta ube nebangani labanyenti futsi ugweme kuba nesitunge. Nobe kunjalo, kufanele sicaphele nasisebentisa tekuchumana.

13. Kungani bantfu labasebentisa tekuchumana bahlala banesitunge futsi bacindzetelekile?

¹³ Lucwaningo luveta kutsi bantfu labacitsa sikhatsi lesinyenti babuka tintfo letibhalwe bantfu kanye netitfombe talabanye bantfu kutekuchumana bangase bative banesitunge futsi bacindzetelekile. Kungani? Lesinye sizatfu kutsi bantfu bavame kufaka titfombe tetintfo letinhle letentekako ekuphileni kwabo, ekuphileni kwebangani babo kanye netetindzawo letinhle labake bativakashela. Umuntfu lobuka letitfombe angase aphetse ngekutsi kuphila kwakhe akujabulisi nakakucatsanisa nekwalabanye. Lomunye dzadze loneminyaka lengu-19 utsi: “Bengingajabuli nangibona labanye bajabula ngetimphelasontfo futsi mine ngibe ngisekhaya nginesitunge.”

14. Seluleko lesiseBhayibhelini lesiku-1 Phetro 3:8 singasisita njani kutsi sisebentise tekuchumana ngekuhlakanipha?

¹⁴ Kuliciniso kutsi tekuchumana tingasetjentiswa ngendlela lekahle, sibonelo saloko kutsi siyakhona kuchumana nemindeni yetfu kanye nebangani. Unakile yini kutsi labanye bantfu batfumela imilayeto, titfombe kanye nema-video kuze bente labanye bantfu babanake? Nabafaka letintfo kutekuchumana, kungase kufanane nekutsi batsi, “asewungibuke phela.” Labanye babhala imilayeto lengatsandzeki etitfombeni labatifakile nobe etitfombeni letifakwe ngulabanye. EmaKhristu akhutsatwa kutsi atfobeke futsi abe neluvelo. Ngako angeke asebentise tekuchumana ngendlela lekabi.—Fundza 1 Phetro 3:8.

15. LiBhayibheli lingasisita njani kuze sigweme kutibona sibakhulu kunaloko lesingiko?

¹⁵ Nangabe usebentisa tekuchumana, tibute: ‘Lengikubhalako, titfombe lengitifakako  nema-video kukhombisa labanye kutsi ngiyatigcabha yini? Ngingabenta yini labanye kutsi babe nemona?’ LiBhayibheli litsi: “Tonkhe tintfo letiseveni—sifiso senyama, sifiso semehlo kanye nekugabisa ngetintfo umuntfu lanato, akuveli kuBabe kodvwa kuvela eveni.” (1 Joh. 2:16) Lelinye lihumusho leliBhayibheli libeka lomusho lotsi ‘kugabisa ngetintfo umuntu lanato’ ngekutsi, “kufuna kubonakala ubalulekile.” EmaKhristu akasiboni sidzingo sekufuna kubonakala abalulekile nobe sekunakwa ngulabanye. Alandzela seluleko lesiseBhayibhelini lesitsi: “Asingatigabatisi, singabhebheteli kuncintisana, futsi singadlelani umona.” (Gal. 5:26) Nangabe sitfobekile ngeke sifane nebantfu balelive lesiphila kulo labatigcabhako futsi labafuna labanye bababone babakhulu kunaloko labangiko.

16. Kungani kufanele sikugweme kutigcabha?

¹⁶ Kufanele sitfobeke ngobe bantfu labatigcabhako abaticabangi “ngendlela lefanele.” (Rom. 12:3) Bantfu labatigcabhako batsandza kulwa nekutigabatisa. Tintfo labaticabangako kanye netento tabo tivame kubalimata bona kanye nalabanye. Nabangakacapheli, bangatigcabha futsi Sathane angadukisa tingcondvo tabo. (2 Khor. 4:4; 11:3) Umuntfu lotfobekile ucabanga ngendlela lefanele. Uticabanga ngendlela lekahle futsi uyakhumbula kutsi labanye bakhulu kunaye. (Fil. 2:3) Uyati nekutsi “Nkulunkulu umelene nalabatigcabhako kodvwa ubanika umusa wakhe labo labatfobekile.” (1 Phet. 5:5) Bantfu labacabanga ngendlela lefanele abafuni kutsi Jehova abe sitsa sabo.

17. Yini lokufanele siyente kuze sihlale sitfobekile?

¹⁷ Kuze sihlale sitfobekile kufanele sisebentise seluleko seliBhayibheli lesitsi, “Khumulani buntfu lobudzala kanye nemikhuba yabo, nigcoke buntfu lobusha. Loko kudzinga kutsi sisebente kamatima.” Kufanele sifundze ngesibonelo saJesu futsi setame kumlingisa. (Khol. 3:9, 10; 1 Phet. 2:21) Nasenta njalo sitawujabula kakhulu, futsi njengobe setama kuba bantfu labatfobekile, imindeni yetfu itawujabula, kutawuba nebunye ebandleni futsi sitowati kutsi singakugwema njani kusebentisa tekuchumana ngendlela lekabi. Ngetulu kwako konkhe, Jehova utasibusisa futsi utasitsandza.