1-2. Emavi aJehova laku-Isaya 65:16, 17 asikhutsata njani kutsi sichubeke sicinisela?

UMHLANGANO wesifundza wa-2017, bewunesihloko lesimnandzi lesitsi, “Ungalokotsi Uphelelwe Litsemba!” Loluhlelo lwasikhombisa kutsi singatibeketelela njani tinkinga lesibhekana nato. Sekuphele iminyaka lemine saba nalomhlangano futsi solo siyacinisela kulelive lelibi lesiphila kulo.

² Tikhona yini tinkinga loke wabhekana nato kulamalanga? Ushonelwe lilunga lemndeni yini nobe umngani lomtsandzako? Uphetfwe sifo lesimatima yini? Kumatima yini kuphila ngenca yekutsi sewukhulile? Uvelelwe sehlakalo semvelo yini, budlova nobe kuphatfwa kabi? I-COVID-19 ikubangele kuhlupheka yini nobe ubangelwe ngulokunye kugula? Silangatelela sikhatsi lapho khona tonkhe letinkinga titawuphela, sikhohlwe ngato futsi tingaphindzi tibe khona!—Fundza Isaya 65:16, 17.

3. Yini lokufanele siyente nyalo, futsi leni?

³ Kumatima kuphila kulelive futsi kungenteka esikhatsini lesitako sitawubhekana netinkinga letinyenti letimatima. (Mat. 24:21) Kuyacaca kutsi kufanele sichubeke sicinicela. Kungani? Kungobe Jesu watsi: “Ngekucinisela kwenu, nitawusindzisa kuphila kwenu.” (Luk. 21:19) Sitawukhona kuchubeka sicinisela nasicabanga ngendlela labanye labatibeketelela ngayo tinkinga letifana netetfu.

4. Kungani singatsi Jehova usibonelo lesihle sekucinisela?

⁴ Ngubani losibonelo lesihle kakhulu sekucinisela? NguJehova Nkulunkulu. Iyakumangalisa yini lemphendvulo? Kungenteka, kodvwa nawucabanga ngayo ungacondza kutsi kungani sisho njalo. Lelive libuswa nguDeveli, futsi ligcwele tinkinga. Jehova unemandla ekulibhubhisa lelive kodvwa umele sikhatsi  lesikahle sekukwenta loko. (Rom. 9:22) Kwanyalo, Nkulunkulu wetfu uyabeketela kuze kufike leso sikhatsi. Asesicoce ngetintfo letingu-9 Jehova latibeketelelako.

5. Lihlanjalatwe njani libito laNkulunkulu, futsi wena utiva njani ngaloko?

⁵ Kuhlanjalatwa kwelibito lakhe. Jehova uyalitsandza libito lakhe futsi ufuna bonkhe bantfu balihloniphe. (Isa. 42:8) Kodvwa sekuphele iminyaka lengaba ngu-6 000 solo lihlanjalatwa. (Hla. 74:10, 18, 23) Loku kwacala ensimini yase-Edeni ngesikhatsi Develi (lokusho kutsi “uMnyundzeli”) asola Nkulunkulu ngekutsi kukhona langabaniki kona bo-Adamu na-Eva labakudzingako kuze bajabule. (Gen. 3:1-5) Kusukela lapho, Jehova bekasolo asolwa ngentfo lengekho, kutsiwa akabaniki bantfu tintfo labatidzinga mbamba. Jesu bekakhatsatekile ngobe libito laBabe wakhe belisolo lihlanjalatwa. Ngenca yaloko, wafundzisa bafundzi bakhe kutsi bathantaze batsi: “Babe wetfu losemazulwini, alingcweliswe libito lakho.”—Mat. 6:9.

6. Kungani Jehova avumele kutsi kutsatse sikhatsi lesidze ngaphambi kwekutsi avete kutsi unelilungelo lekubusa emazulu nemhlaba?

⁶ Bantfu labanyenti bamelene naye nekubusa kwakhe. NguJehova kuphela lonelilungelo lekubusa emazulu nemhlaba futsi indlela labusa ngayo incono kakhulu. (Semb. 4:11) Kodvwa Develi wetame kudukisa tingilosi nebantfu kuze bacabange kutsi Nkulunkulu ute lilungelo lekubusa. Kutawutsatsa sikhatsi kukhombisa kutsi Jehova unelilungelo lekubusa nekutsi ungumbusi lokahle kakhulu. Ngekuhlakanipha, Nkulunkulu uvumele bantfu kutsi babuse sikhatsi lesidze kuze babone kutsi angeke bakhone kutibusa nangabe bangamlaleli uMdali. (Jer. 10:23) Ngenca yekutsi Nkulunkulu bekasolo abeketela, kutawuvele kucace kunobe ngubani kutsi unelilungelo lekubusa emazulu nemhlaba. Bonkhe batawati kutsi indlela Jehova labusa ngayo incono kakhulu nekutsi nguMbuso wakhe kuphela lotawuletsa kuthula nekulondzeka sibili emhlabeni.

7. Bobani labavukele Jehova, futsi yini latawuyenta kubo?

⁷ Kuvukela kwalabanye bantfwana bakhe. Jehova wadala tingilosi kanye nebantfu labete sono. Kodvwa ingilosi lebitwa ngekutsi nguSathane (lokusho kutsi “uMphikisi”) yavukela Jehova futsi yayenga bo-Adamu na-Eva lebebete sono kutsi nabo bavukele Jehova. Letinye tingilosi kanye nebantfu nabo bavukela. (Juda 6) Ngekuhamba kwesikhatsi, ngisho nesive sema-Israyeli lebesibantfu labakhetfwe nguNkulunkulu samvukela Jehova futsi sakhonta bonkulunkulu bemanga. (Isa. 63:8, 10) Jehova weva buhlungu, kepha solo uyacinisela futsi utawuchubeka acinisela kuze kube ngulapho ababhubhisa bonkhe labamvukelako. Ngemuva kwaloko, Jehova kanye nalabo labetsembekile kuye batawujabula kutsi sekute sidzingo sekutsi bachubeke bacinisela kulelive lelibi!

8-9. Ngumaphi emanga lacanjelwa wona Jehova, futsi yini lesingayenta?

⁸ Emanga aDeveli. Sathane wasola Jobe lobekayinceku yaJehova lecotfo kanye nato tonkhe tinceku taJehova letetsembekile kutsi tikhonta Nkulunkulu ngobe kukhona letitakutfola kuye. (Jobe 1:8-11; 2:3-5) Develi uyachubeka asola bantfu kuze kube ngulamuhla. (Semb. 12:10) Singakhombisa kutsi Sathane unemanga ngekutsi sicinicele nasibhekene netilingo futsi sihlale setsembekile kuJehova ngenca yekutsi siyamtsandza. Jehova wambusisa Jobe, futsi natsi utasibusisa nangabe sicinisela.—Jak. 5:11.

 ⁹ Sathane usebentisa baholi benkholo yemanga kuze atsi Jehova unelunya futsi nguye lobangela bantfu kutsi bahlupheke. Labanye baze batsi nakufa umntfwana, Nkulunkulu umtsetse ngobe udzinga tingilosi letinyenti ezulwini. Bamedzelela mbamba Nkulunkulu! Kodvwa tsine siyati kutsi Jehova unguBabe lonelutsandvo. Nangabe sigula kakhulu nobe sishonelwa ngulotsite lesimtsandzako asimsoli Nkulunkulu wetfu. Kunaloko, siyaciniseka kutsi ngalelinye lilanga utawelapha labagulako futsi avuse labafile. Singabatjela bonkhe labasilalelako kutsi Jehova unguNkulunkulu lonelutsandvo. Jehova angabese uyakhona kuphendvula loyo lomedzelelako.—Taga 27:11.

10. Tihlabelelo 22:23, 24 tisitjelani ngaJehova?

¹⁰ Kuhlupheka kwetikhonti takhe latitsandzako. Jehova unguNkulunkulu loneluvelo. Uva buhlungu kakhulu nakasibona sihlupheka, kungaba kutsi siphatfwa kabi, siyagula nobe senta emaphutsa. (Fundza Tihlabelelo 22:23, 24.) Jehova uyabati buhlungu lesibuvako, uyafuna kubucedza futsi utabucedza. (Catsanisa na-Eksodusi 3:7, 8; Isaya 63:9.) Sitawufika sikhatsi lapho khona atakwesula “tonkhe tinyembeti emehlweni [etfu], kufa ngeke kusaba khona, futsi kulila, nekukhala kanye nebuhlungu ngeke kusaba khona.”—Semb. 21:4.  

11. Jehova utiva njani ngetinceku takhe letetsembekile letishonile?

¹¹ Kwehlukana nebangani bakhe labashonile. Jehova utiva njani ngemadvodza nebafati labetsembekile labashonile? Uyakulangatelela kuphindze ababone! (Jobe 14:15) Cabanga kutsi Jehova umkhumbula kangakanani umngani wakhe Abrahama. (Jak. 2:23) Cabanga nekutsi umkhumbula kangakanani Mosi lakhuluma naye “buso nebuso”?  (Eks. 33:11) Uyakulangatelela nekuva Davide nalabanye bahlabeleli bahlabela tingoma tabo letimnandzi tekumdvumisa! (Hla. 104:33) Nanobe labangani baNkulunkulu bashona, Jehova akabakhohlwa. (Isa. 49:15) Ubukhumbula kahle buntfu babo. LiBhayibheli litsi “ngekwembono wakhe bonkhe bayaphila.” (Luk. 20:38) Ngalelinye lilanga utawubavusa ekufeni futsi utawuphindze alalele imithantazo yabo lesuka enhlitiyweni aphindze emukele indlela labatamkhonta ngayo. Nangabe ushonelwe ngumuntfu lomtsandzako, shengatsi lamavi angakudvudvuta.

12. Yini lemvisa buhlungu kakhulu Jehova kulamalanga lamabi ekugcina?

¹² Bantfu lababi bacindzetela labanye. Nakucala kuvukela e-Edeni, Jehova bekati kutsi timo titawucale tibe timbi kakhulu ngaphambi kwekutsi tibe ncono. Jehova uyabenyanya bubi, kungalungi kanye nebudlova lokukhona emhlabeni lamuhla. Solo ubakhatsalela kakhulu bantfu labacindzetelwako, njengalababutsakatsaka nalabangakhoni kutivikela, njengetintsandzane nebafelokati. (Zak. 7:9, 10) Jehova uva buhlungu kakhulu nakabona tinceku takhe letetsembekile ticindzetelwa futsi tifakwa emajele. Cinisekani kutsi unitsandza nonkhe nine lenicinisela kanye naye.

13. Ngukuphi kutiphatsa lokubi Nkulunkulu lakubona kwentiwa bantfu, futsi yini latayenta ngako?

¹³ Bantfu sebatiphatsa kabi kakhulu. Bantfu bangumfanekiso waNkulunkulu, kodvwa Sathane uyatsandza kubentisa tintfo letimbi. Ngesikhatsi Nkulunkulu ‘abona kutsi umuntfu bekenta tintfo letimbi kakhulu’ ngemalanga aNowa, “Jehova watisola ngekutsi udale umuntfu emhlabeni, futsi weva buhlungu enhlitiyweni yakhe.” (Gen. 6:5, 6, 11) Sesincono yini simo emhlabeni? Cha! Develi ujabula kakhulu nakabona tonkhe tinhlobo tekutiphatsa kabi ngekwelicansi tandze kakhulu, lokufaka ekhatsi kutiphatsa kabi kwebantfu bebulili lobehlukene nebebulili lobufanako! (Ef. 4:18, 19) Sathane ujabula kakhulu nakabona labo labakhonta Jehova benta sono lesikhulu. Nasekuphelile kubeketela kwaJehova, utawukhombisa kutsi uyakwenyanya kutiphatsa kabi ngekutsi asuse bonkhe bantfu labatiphatsa kabi labangafuni kushintja.

14. Bantfu bayentani indalo yaNkulunkulu?

¹⁴ Bantfu bona umhlaba lawudalile. Umuntfu akagcini nje ‘ngekubusa lomunye umuntfu bese uyamlimata’ kodvwa akawunakekeli umhlaba kanye netilwane njengobe Jehova acela bantfu kutsi bakunakekele. (Shu. 8:9; Gen. 1:28) Labanye bososayensi batsi ngenca yetintfo letentiwa bantfu, letinye tintfo letidaliwe letingabangu-1 000 000 titawufa tiphele nya kuleminyaka lembalwa letako. Akumangalisi-ke kutsi labanye bakhatsatekile ngemhlaba! Sibonga kakhulu kutsi Jehova wetsembise kubhubhisa labo labalimata umhlaba futsi awushintje ube lipharadisi.—Semb. 11:18; Isa. 35:1.

15-16. Yini lokufanele isente kutsi sicinisele kanye naJehova? Fanekisa.

¹⁵ Cabanga ngato tonkhe tinkinga Babe wetfu wasezulwini bekasolo atibeketelela kuleminyaka letinkhulungwane. (Buka libhokisi lelitsi “ Loko Jehova Lakubeketelelako.”) Jehova angalibhubhisa nobe kunini lelive lelibi. Kodvwa kubeketela kwakhe kusisite kakhulu! Cabanga nganasi sibonelo. Ase sitsi indvodza nemkayo batjelwa kutsi umntfwana wabo losengakatalwa utawuba netinkinga letinkhulu temphilo futsi utawusheshe ashone. Nobe kunjalo, labatali batawujabula kakhulu nakatalwa lomntfwana ngisho nobe kutawuba matima kumnakekela. Ngenca yekutsi  bayamtsandza lomntfwana, batawubeketelela nobe ngabe ngubuphi bumatima kuze bamnike imphilo lencono.

¹⁶ Ngendlela lefanako, sonkhe situkulwane sa-Adamu na-Eva sitalwa sinesono. Nanobe kunjalo, Jehova uyasitsandza futsi uyasinakekela. (1 Joh. 4:19) Ngalokwehlukile kulabatali lesibekise ngabo, Jehova angakucedza kuhlupheka kwebantfwana bakhe. Sewuvele usibekile sikhatsi latawucedza ngaso konkhe kuhlupheka kwebantfu. (Mat. 24:36) Lutsandvo lwaJehova kufanele lusente kutsi natsi sicinisele yingci nje natisekhona letinkinga.

17. Indlela Jesu lachazwe ngayo KumaHebheru 12:2, 3 isikhutsata njani kutsi natsi sichubeke sicinisela?

¹⁷ Jehova usibonelo lesihle sekucinisela. Jesu wacinisela njengaBabe wakhe. Ngesikhatsi alamhlabeni, Jesu wabeketelela inkhulumo lelimatako, lihlazo futsi wabetselwa elugodvweni ngenca yetfu. (Fundza KumaHebheru 12:2, 3.) Siyaciniseka kutsi sibonelo saJehova sekucinisela saniketa Jesu emandla ekutsi naye acinisele. Natsi singasiniketa emandla ekucinisela.

18. Umbhalo wa-2 Phetro 3:9 usisita njani kutsi sicondze lokwentekile ngenca yekubeketela kwaJehova?

¹⁸ Fundza 2 Phetro 3:9. Jehova uyasati sikhatsi lesikahle sekubhubhisa lelive lelibi. Ngenca yekutsi uyabeketela, bantfu labanyenti sebayamati futsi nyalo kunesicumbi lesikhulu lesakhiwa tigidzi tebantfu labamkhontako. Bonkhe bayajabula ngekutsi Jehova ubeketele baze batalwa, bafundza kumtsandza futsi batinikela kuye. Nasekunetigidzi tebantfu leticinisele kwaze kwaba sekugcineni, kutawuba sebaleni kutsi Jehova wenta sincumo lesihle ngekukhetsa kubeketela!

19. Yini lokufanele sitimisele kuyenta, futsi yini lesitayitfola?

¹⁹ Sikufundza kuJehova kucinisela sibe sijabulile. Ngetulu kwabo bonkhe buhlungu nekuhlupheka lokubangelwe nguSathane, Jehova uhlale ‘anguNkulunkulu lojabulako.’ (1 Thim 1:11) Natsi singahlala sijabulile njengobe silindzele Jehova ngesineke kutsi angcwelise libito lakhe, angcwelise bukhosi bakhe, acedze bonkhe bubi futsi acedze nato tonkhe tinkinga lesinato nyalo. Shengatsi singatimisela kucinisela futsi kusidvudvute kwati kutsi naBabe wetfu losezulwini uyacinisela. Nasenta njalo, atawuba liciniso kitsi lamavi latsi: “Uyajabula umuntfu lochubeka abeketelela kuvivinywa, ngobe utawutsi nakemukelwa atfole umchele wekuphila, loyo Jehova lawetsembise labo labachubeka bamtsandza.”—Jak. 1:12.