Jehova ufuna kutsi bantfu lababili labashadene bajabule futsi babe nebudlelwane lobutawuhlala njalo. (Mat. 19:4-6) Nangabe ufuna kushada, ungamtfola njani umuntfu lokahle longashada naye? Ngenca yekutsi Jehova unguMdali wetfu, uyakwati loko lokufanele sikwente kuze sihlale sijabulile emshadweni. Ngako, nangabe utisebentisa timiso lasinikete tona utawujabula mbamba. Cabanga nganati letinye timiso.

Kwekucala, kufanele sikwati loku: “Inhlitiyo ikhohlakele kwengca tonkhe tintfo futsi ingenta nobe ngabe yini lembi.” (Jer. 17:9) Nangabe bantfu lababili labafuna kushada sebacala kutsandzana, bangaba nemiva lejulile ngalomunye nalomunye, futsi nakwenteka loko kungaba lukhuni kutsi bente tincumo letihlakaniphile. Nangabe bancuma kushada ngenca nje yalemiva lejulile ngalomunye nalomunye, ngekuhamba kwesikhatsi bangahle badvumateke. (Taga 28:26) Kungako kungasiko kuhlakanipha kutsi basheshe bakhombisane lemiva lejulile nobe bente tetsembiso basengakatani kahle.

Taga 22:3 titsi: “Umuntfu lohlakaniphile utsi nakabona ingoti abaleke, kodvwa lote lwati ucondza ngco kuyo, bese ubhekana nemiphumela lebuhlungu.” Ikuphi ingoti yekufuna umuntfu longatsandzana naye ku-Internet? Lokubuhlungu kutsi labanye bantfu bahlangene nalabanye labangatsandzana nabo ku-Internet, futsi ngekuhamba kwesikhatsi babona kutsi lomuntfu bekabayenga. Ngetulu kwaloko, bantfu labangaketsembeki bakhe ema-account langasiwo kuze bayenge bantfu futsi bebe nemali yabo. Ngaletinye tikhatsi letigebengu titsi tiboFakazi.

Cabanga nganayi lenye ingoti. Lamanye ema-website lahlanganisa bantfu, asebentisa tibalo letikhombisa kutsi umuntfu angatsandzana nabani. Nanobe kunjalo, kute bufakazi lobukhombisa kutsi lendlela iyasebenta. Kungaba kuhlakanipha yini kusebentisa tindlela letikanjalo kuze wente sincumo lesibaluleke kakhulu kangaka njengesincumo semshado? Letibalo tingacatsaniswa yini netimiso teliBhayibheli?—Taga 1:7; 3:5-7.

 Simiso lesitfolakala kuTaga 14:15 sitsi: “Umuntfu lote lwati wetsemba konkhe lakuvako, kodvwa lohlakaniphile uyacabangisisa ngako konkhe lakwentako.” Ngaphambi kwekutsi uncume kushada nemuntfu, kufanele umati kahle. Kodvwa kusebentisa i-Internet kungakwenta kutsi kube matima loko. Ngisho nobe ungayibona imininingwane yalomuntfu, futsi nicitse sikhatsi nikhuluma ku-Internet, ungasho yini vele kutsi umati kahle? Ngisho nalabanye lebebacabanga kutsi sebamtfolile umuntfu labatawutsandzana naye, bamangele kakhulu nasebambona loyo muntfu.

Umhlabeleli watsi: “Angitihlanganisi nebantfu labanemanga, ngiyababalekela nebantfu labafihla loko labangiko.” (Hla. 26:4) Bantfu labanyenti bacabanga kutsi yintfo levamile kubhala imininingwane lengasiyo kuze labanye babatsandze. Bangatifihla kutsi banjani nobe kungenteka buntfu babo lobubi bungabonakali njengobe nicoca ku-Internet. Nanobe labanye bantfu batsi baBoFakazi BaJehova, kodvwa babhajatisiwe yini? Banebuhlobo lobuhle yini naJehova? Bayahlonishwa yini ebandleni labakulo? Benta tintfo letikabi yini nobe ‘kubi kutihlanganisa nabo’? (1 Khor. 15:33; 2 Thim. 2:20, 21) Timiso teliBhayibheli tiyabakhulula yini kutsi bangashada? Kufanele utati timphendvulo talemibuto, kodvwa kungaba lukhuni kutitfola nangabe ungakhulumi nalabanye boFakazi labamati kahle lomuntfu. (Taga 15:22) Kuliciniso kutsi sikhonti saJehova lesetsembekile angeke sikucabange ‘kuboshelwa ejokeni’ nemuntfu longasuye Fakazi.—2 Khor. 6:14; 1 Khor. 7:39.

Ngenca yekutsi kuyingoti kufuna umuntfu longashada naye ku-Internet, tikhona tindlela letincono longatisebentisa kuze utfole umuntfu longashada naye futsi umati kahle. Ungamtfolaphi umuntfu longashada naye? Nasesihlangana ndzawonye, singabati labanye bantfu ngekubabona emihlanganweni yelibandla, emihlanganweni yesigodzi neyesifundza nakuleminye imibutsano.

Nangabe singakhoni kuhlangana ndzawonye, njengakulesikhatsi semkhuhlane we-COVID-19, sisebentisa tebuchwephesha kuze sibe nemihlangano yelibandla, futsi lapho singabati labanye boFakazi labangakashadi. Ungabeva nababeka tinkhulumo emihlanganweni, nendlela labaphendvula ngayo. (1 Thim. 6:11, 12) Ningakhona nekucoca ku-breakout room ngemuva kwemihlangano. Naninembutsano nelicembu laboFakazi nisebentisa tintfo tebuchwephesha, unganaka kutsi lomuntfu lombukile ubaphatsa njani labanye, ngaleyondlela ungabona kutsi ungumuntfu lonjani. (1 Phet. 3:4) Ngekuhamba kwesikhatsi, nasewumati kahle lomuntfu, ungabona kutsi ninemigomo lefanako yini nekutsi kuyalunga yini kutsi nishade.

Nangabe bantfu labangakashadi basebentisa timiso teliBhayibheli nabafuna labatawushada naye, bangaba nemshado lokahle. Kunjengobe saga sisho nasitsi: “Loyo lotfole umfati sibili [nobe indvodza] utitfolele intfo lenhle, futsi Jehova utawumentela umusa.”—Taga 18:22.