SIHLOKO LESIFUNDVWAKO 26
“Buyelani Kimi”
“Buyelani kimi, nami ngiyawubuyela kini.”—MAL. 3:7.
INGOMA 102 “Nisite Lababutsakatsaka”
LOKUTAWUCOCWA NGAKO KULESIHLOKO *
1. Jehova utiva njani nangabe munye wetikhonti takhe lobekadukile aphindze amkhonta?
NJENGOBE sicocile esehlukweni lesendlulile, Jehova utifananisa nemelusi lotinakekela kahle timvu takhe, futsi utifuna tonkhe timvu takhe letidukile. Jehova watjela ema-Israyeli lebekamshiyile watsi: “Buyelani kimi, nami ngiyawubuyela kini.” Siyati kutsi nalamuhla utiva ngendlela lefanako ngobe utsi: “Angigucuki.” (Mal. 3:6, 7) Jesu watsi Jehova netingilosi bajabula kakhulu nangabe munye wetikhonti taJehova lebetidukile abuyela kuYe.—Luk. 15:10, 32.
2. Yini lesitawucoca ngayo kulesihloko?
2 Asesicoce ngemifanekiso yaJesu lemitsatfu lefundzisa ngetifundvo letibalulekile tekutsi singabasita njani labo labadukile kuJehova. Sitawuphindze sicoce ngebuntfu lesibudzingako kuze sisite labo labamshiyile Jehova kutsi babuyele kuye. Sitawuphindze sibone kutsi kubaluleke ngani kwenta imetamo kuze sisite labo lababutsakatsaka.
FUNA LUHLAVU LWEMALI LOLULAHLEKILE
3-4. Kungani lomfati lokukhulunywa ngaye kuLukha 15:8-10 alufunisisa luhlavu lwakhe lwemali lobelulahlekile?
3 Kufanele sisebente kamatima kuze sitfole labo labafuna kubuyela kuJehova. Emfanekisweni lobhalwe eVangelini laLukha, Jesu uchaza indlela umfati lebekafuna ngayo intfo leligugu lebeyilahlekile, lebekuluhlavu lwesiliva. Incenye lebalulekile kulomfanekiso yindlela lomfati lebekafunisisa ngayo loluhlavu lwemali. Fundza Lukha 15:8-10.
4 Jesu uchaza indlela lomfati lativa ngayo nakatfola loluhlavu lwemali lobelulahlekile. Ngesikhatsi Jesu asaphila lamhlabeni, bomake labangemaJuda bebavame kuniketa emadvodzakati abo tinhlavu temali yelisiliva letingu-10 nakashada. Kungenteka loluhlavu lwesiliva belubalulekile kulomfati ngobe beluyincenye yetinhlavu telisiliva lebekatinikwe ngumake wakhe. Kungenteka lomfati bekacabanga kutsi loluhlavu lwesiliva beluwele phansi. Wakhanyisa sibani walibuka loluhlavu lwesiliva kodvwa kute lakutfola. Kungenteka kutsi lesibani sakhe besingamniketi kukhanya lokwenele kuze atfole loluhlavu loncane lwelisiliva. Ekugcineni watsanyela yonkhe lendlu. Kuletibi lebekatitsanyela, walubona loluhlavu lwemali futsi belumanyatela njengobe belukhanyiswa ngulesibane. Wajabula kakhulu nakalutfola. Wabita bangani bakhe nabomakhelwane kuze abatjele letindzaba letimnandzi.
5. Kungani kungase kube matima kutfola labo lesebalishiyile libandla?
5 Njengobe sibona kulomfanekiso waJesu, nangabe silahlekelwe ngulokutsite kudzingeka sisebente kamatima kuze sikutfole. Ngendlela lefanako, kungase kudzingeke sisebente kamatima kuze sitfole labo lesebalishiyile libandla. Kungenteka sekuphele iminyaka leminyenti solo bangatihlanganisi nelibandla. Kungenteka sebatfutsele endzaweni lapho khona bazalwane bakuleyo ndzawo bangabati. Kodvwa singaciniseka kutsi nyalo labanye balabo lesebapholile bafuna mbamba kubuyela kuJehova. Bayafuna kuphindze bakhonte Jehova bakanye nebazalwane nabodzadze, kodvwa badzinga lusito lwetfu.
6. Onkhe emalunga elibandla angasita njani kuze kutfolakale lesebapholile?
6 Ngubani longasita kuze kufunwe lesebapholile? Bonkhe bamemeteli ebandleni, lokufaka ekhatsi labadzala, emahlahlandlela, nalabo labanemalunga emndeni lasapholile bangasita kuze kutfolwe labapholile. Unaye yini umngani nobe sihlobo lesingaseti esifundvweni? Uke wahlangana yini nemuntfu lopholile nawenta umsebenti wekushumayela emtini ngemuti nobe nawushumayela etindzaweni tawonkhewonkhe. Nangabe lomuntfu angatsandza kutsi avakashelwe, mtjele kutsi ungajabula kuniketa labadzala belibandla lelisedvute imininingwane yakhe.
7. Yini loyifundzako kulomunye lomdzala welibandla lokutsiwa nguThomas?
7 Ngutiphi tintfo labadzala labangatenta kuze batfole bantfu labafuna kubuyela kuJehova? Naka naku lokwashiwo ngulomunye lomdzala lokutsiwa nguThomas, * lohlala eSpain futsi usite boFakazi labangetulu kwalabangu-40 kutsi babuyele ebandleni. Thomas utsi: “Ngicale ngibute bazalwane nabodzadze labehlukahlukene lokungenteka banelwati mayelana nebantfu labapholile kutsi bahlala kuphi.” Ngalesinye sikhatsi, ngibuta bamemeteli kutsi kute yini labamatiko longasayi emihlanganweni. Labanyenti ebandleni bayakujabulela kusita ngoba beva shengatsi balusito lolukhulu kuze kutfolakale labapholile. Nangivakashela bazalwane nabodzadze lasebapholile ngiyababuta kutsi banjani bantfwana babo netihlobo tabo. Labanye labapholile bebeta nebantfwana babo emihlanganweni futsi kungenteka labantfwana bake baba bamemeteli. Nabo bangasitwa kuze babuyele kuJehova.
SITA EMADVODZANA NEMADVODZAKATI ANKULUNKULU LALAHLEKILE KUTSI ABUYE EBANDLENI
8. Kulomfanekiso wendvodzana leyahamba ekhaya lotfolakala kuLukha 15:17-24, lobabe wayiphatsa njani indvodzana yakhe lebeseyiphendvukile?
8 Ngubuphi buntfu lokufanele sibe nabo nasifuna kusita labo labafuna kubuyela kuJehova. Naka tifundvo lesingatitfola emfanekisweni waJesu wendvodzana leyahamba ekhaya. (Fundza Lukha 15:17-24.) Jesu uyachaza kutsi lendvodzana yabese iyabona kutsi beyente sincumo lesikabi, yase ibuyela ekhaya. Lobabe wagijima waya kulendvodzana yakhe wafike wayigaca ayicinisekisa kutsi uyayitsandza. Lendvodzana yativa inelicala ngaloku lebeyikwentile futsi beyicabanga kutsi ayisakufanelekeli kuphatfwa njengendvodzana. Lobabe wayivela lendvodzana yakhe njengobe beyiveta indlela lebeyitiva ngayo. Lobabe wenta lokutsite kuze acinisekise indvodzana yakhe kutsi uyayemukela ekhaya hhayi njengesisebenti, kodvwa njengelilunga lemndeni lelitsandvwako. Kuze acinisekise kutsi uyayitsandza indvodzana yakhe futsi uyayemukela, lobabe wenta lidzili futsi wayilungisela netimphahla letinhle tekugcoka.
9. Ngubuphi buntfu lokufanele sibe nabo kuze sisite labo labafuna kubuyela kuJehova? (Buka libhokisi lelitsi “ Sita Labafuna Kubuyela KuJehova.”)
9 Kulomfanekiso, singasho kutsi Jehova ungubabe. Uyabatsandza bazalwane nabodzadze lesebapholile futsi labafuna kubuyela kuye. Nasilingisa Jehova singakhona kubasita babuye. Kuze sikhone kwenta kanjalo, kufanele sibeketele, sibe neluvelo, umusa nelutsandvo. Kungani kufanele sibe nalobo buntfu futsi singabukhombisa njani?
10. Kungani kudzingeka sibeketele kuze sisite umuntfu kutsi abuyele kuJehova?
10 Kudzingeka sibeketele ngobe kutsatsa sikhatsi kutsi umuntfu abuyele kuJehova. Labanyenti lebesebapholile batsi bavakashelwa ngulabadzala tikhatsi letinyenti ngaphambi kwekutsi baphindze bakhonte Jehova. Lomunye dzadze wase-Asia lokutsiwa nguNancy utsi: “Lomunye umngani wami wasebandleni wangisita kakhulu. Bekangitsandza kakhulu. Wangikhumbuta ngetikhatsi letimnandzi lebesivame kuba nato. Bekavame kungilalelisisa nangiveta indlela lengitiva ngayo, futsi bekangesabi kungeluleka. Wakhombisa kutsi bekangumngani mbamba futsi lobekalungele kungisita nobe kunini.”
11. Kungani kudzingeka sibe neluvelo kuze sisite umuntfu lophatseke kabi?
11 Luvelo lufana nemutsi longasita umuntfu kuze ative ancono. Sekuphele iminyaka leminyenti labanye labapholile beva buhlungu ngesizatfu sekutsi baphatfwa kabi ngulomunye ebandleni. Ngesizatfu saloko, bete sifiso sekuphindze babuyele kuJehova. Labanye kungenteka bacabanga kutsi abazange baphatfwe kahle. Bangase badzinge umuntfu lotabalalela futsi ayicondze indlela labativa ngayo. (Jak. 1:19) María lowake waphola utsi: “Bengidzinga umuntfu lotangilalela, lebengitawukhona kutfulula kuye sifuba sami futsi lobekatinginika sicondziso.”
12. Shano sibonelo lesikhombisa kutsi lutsandvo lwaJehova lufana njani nentsambo?
12 LiBhayibheli litsi lutsandvo Jehova lanalo ngebantfu bakhe lufana nentsambo. Lutsandvo lwaNkulunkulu lufana njani nentsambo? Cabanga nganasi sibonelo: Asewuticabange ugcumukele elwandle. Emagagasi lanemandla ayakukhukhula futsi nalamanti ayabandza, sewucala nekucwila. Bese kuchamuka umuntfu lotsite lohamba ngesikebhe, akujikele intfo letsite longayibamba kuze ungacwili. Ujabula kakhulu kodvwa udzinga lolunye lusito kuze ukhone kusindza. Kufanele uphume kulamanti. Udzinga kutsi labantfu labakulesikebhe bakujikele intsambo futsi bakusite ugibele kulesikebhe. Naku Jehova lakusho ngema-Israyeli lebekadukile, watsi: “Ngabadvonsa ngetibopho telutsandvo.” (Hos. 11:4) Lamuhla Nkulunkulu utiva ngendlela lefanako ngalabo lesebayekele kumkhonta futsi labanetinkinga letinyenti nalabakhatsatekile. Ufuna bati kutsi uyabatsandza futsi ufuna kubasita babuyele kuye. Jehova angasebentisa wena kuze usite labo bantfu kutsi babuye kuye.
13. Lokwenteka kuPablo kukhombisa njani kutsi nasibatsandza labanye bangasitakala kuze babuyele kuJehova?
13 Kubalulekile kutsi sicinisekise lesebapholile kutsi Jehova uyabatsandza futsi natsi kufanele sikhombise kutsi siyabatsandza. Pablo lokukhulunywe ngaye esihlokweni lesendlulile futsi lokwaphela iminyaka lengetulu kwalengu-30 apholile utsi: “Ngalelinye lilanga ekuseni, ngatsi nangiphuma ekhaya ngahlangana nadzadze losakhulile lonemusa futsi lowakhuluma ngendlela lekhombisa lutsandvo. Ngakhalisa kwemntfwana futsi ngamtjela kutsi kubonakala shengatsi Jehova utfume yena kuze akhulume nami. Ngancuma lapho kutsi kufanele ngibuyele kuJehova.”
BASEKELE NGELUTSANDVO LABABUTSAKATSAKA
14. Ngekusho kwemfanekiso lotfolakala kuLukha 15:4, 5, yini lebeyentiwa ngumelusi ngemuva kwekutfola imvu lebeyilahlekile?
14 Kufanele sichubeke sibasita futsi sibakhutsata lesebapholile. Njengendvodzana yelulahleko lesemfanekisweni waJesu, lesebapholile kungenteka bayesaba futsi kutawutsatsa sikhatsi kutsi baphindze babe kahle. Ngesizatfu sekutsi bebaseveni laSathane kungenteka sebete buhlobo lobucinile naJehova. Sifuna kubasita bacinise kukholwa kwabo kuJehova. Emfanekisweni wemvu lelahlekile, Jesu washo kutsi lomelusi ubeka lemvu emahlombe akhe bese uyibuyisela emhlambini. Lomelusi usuke asebentise sikhatsi sakhe nemandla akhe kuze atfole lemvu. Uyati kutsi lemvu idzinga lusito ngobe angeke ikhone kutihambela ibuyele emhlambini, ngako uyayetfwala.—Fundza Lukha 15:4, 5.
15. Singabasita njani labapholile kutsi babuyele kuJehova? (Buka libhokisi lelitsi “ Lithulusi Lelibaluleke Kakhulu.”)
15 Kungase kudzingeke sikhatsi nemandla etfu kuze sikhone kusita labapholile bakhone kumelana netinkinga letibenta bangakhoni kukhonta Jehova. Singabasita lasebapholile kutsi bacinise buhlobo babo naJehova sisebentisa liVi lakhe, tincwadzi lesitilungiselelwa yinhlangano futsi bangasitwa nangumoya longcwele waJehova. (Rom. 15:1) Singakwenta njani loko? Lomunye lomdzala utsi: “Labanyenti lesebapholile badzinga kuchutjelwa sifundvo seliBhayibheli nasebafuna mbamba kubuyela kuJehova.” * Nangabe ucelwa kutsi ufundzele umuntfu lopholile, kufanele usijabulele lesabelo nangabe utawukhona kusenta. Lomzalwane lomdzala uphindze atsi: “Lommemeteli lochuba lesifundvo kufanele abe ngumngani lokahle futsi lona lopholile kufanele ametsembe futsi akhone kukhuluma naye ngekukhululeka.”
INJABULO EZULWINI NASEMHLABENI
16. Sati njani kutsi tingilosi tiyasisita?
16 Tinyenti tintfo letentekako letikhombisa kutsi tingilosi tiyasita kuze kutfolakale lesebapholile labafuna kubuyela kuJehova. (Semb. 14:6) Nasi sibonelo, Silvio wase-Ecuador wathantaza ngalokujulile acela lusito kuze abuyele kuJehova. Asathantaza, kwanconcotsa labadzala lababili emnyango wakhe. Labazalwane bajabula ngekumnika lusito lebekaludzinga.
17. Sitawutiva njani nasisita labapholile?
17 Sitawujabula kakhulu nasisita labapholile kutsi babuyele kuJehova. Naka naku lokushiwo nguSalvador lolihlahlandlela futsi lowenta imetamo kuze asite lesebapholile, utsi: “Ngaletinye tikhatsi, ngijabula kakhulu nangibona labapholile babuyela kuJehova, ngize ngifise nekukhala. Ngiyajabula kusetjentiswa nguJehova kuze ngisite tikhonti takhe tibuyele kuye.”—Imis. 20:35.
18. Nangabe sewupholile, yini longaciniseka ngayo?
18 Nangabe ungasayi emihlanganweni yelibandla, ciniseka kutsi Jehova usakutsandza. Ufuna kutsi ubuyele kuye. Kutawudzingeka wente imetamo kuze ubuyele kuye. Njengalobabe losemfanekisweni waJesu, Jehova ukulindzile futsi utakwemukela nawubuya.
INGOMA 103 “Abelusi—Izipho Ezingabantu”
^ sig. 5 Jehova ufuna kutsi labo labangasayi emihlanganweni futsi labangasawenti umsebenti wekushumayela babuyele kuye. Kunyenti lesingakwenta kuze sikhutsate labo labafuna kusemukela simemo saJehova lesitsi: “Buyelani kimi.” Kulesihloko sitawubona kutsi singabasita njani kuze basemukele lesimemo.
^ sig. 7 Lamanye emabito ashintjiwe
^ sig. 15 Labanye lebesebapholile basitwa kudadisha tincenye tencwadzi letsi Tigcineni Elutsandvweni LwaNkulunkulu, kantsi labanye bazuze lokunyenti ngekubuyeketa tihloko tencwadzi letsi Sondzela kuJehova. IKomidi Yemsebenti Yelibandla ngiyo letawuncuma kutsi ngubani lofanelekako kutsi achube lesifundvo.
^ sig. 68 KUCHAZWA KWETITFOMBE: Bazalwane labatsatfu labehlukene basita umzalwane kutsi abuyele kuJehova. Loko bakwenta ngekutsi bachumane naye, bamcinisekise kutsi bayamtsandza nekutsi bamlalele futsi betame kucondza indlela lativa ngayo.
