Lamavesi abala buntfu bebuKhristu lobungu-9: “Titselo temoya nguleti: Lutsandvo, injabulo, kuthula, kubeketela, umusa, buhle, kukholwa, umoya lomuhle, nekutibamba.” Kodvwa loku akusibo kuphela buntfu lobuhle umoya waNkulunkulu longasisita kutsi sibe nabo.

Naka loko umphostoli Pawula lakubhala emavesini langemuva, watsi: “Imisebenti yenyama . . . budlundlulu, kungcola, kutiphatsa lokubi kwekweyisa, kukhonta titfombe, kusebentelana nemimoya, inzondo, kucabana, umona, intfukutselo lengalawuleki, imibango, kwehlukana, emahlelo, kuhawukela, kudzakwa, imicimbi lengalawulwa, naletinye tintfo letifana naleti.” (Gal. 5:19-21) Umphostoli Pawula bekangatibala letinye tintfo ‘njengemisebenti yenyama,’ njengaleto lokukhulunywa ngato kuKholose 3:5. Ngendlela lefanako, ngemuva kwekubhala ngebuntfu lobuhle lobungu-9, watsi: “Kute umtsetfo lomelene naletintfo.” Ngako Pawula akazange abale buntfu lobuhle lesingaba nabo ngekusitwa ngumoya longcwele.

Loku kuyabonakala nasicatsanisa letitselo temoya kanye naloko Pawula lakubhalela libandla lase-Efesu nakatsi: “Titselo tekukhanya tifaka ekhatsi lonkhe luhlobo lwetintfo letinhle, kulunga neliciniso.” (Ef. 5:8, 9) “Buhle,” kulunga neliciniso, buyincenye ‘yetitselo tekukhanya’ kodvwa futsi buyincenye ‘yetitselo temoya.’

Ngendlela lefanako, Pawula wakhutsata Thimothi kutsi ‘alwele kuba nekulunga, kwesaba Nkulunkulu, kukholwa, lutsandvo, kucinisela, kanye nemoya lomuhle’ lokubuntfu lobuhle lobusitfupha. (1 Thim. 6:11) Tintsatfu kuphela letibalwe njengetincenye ‘tetitselo temoya’ (kukholwa, lutsandvo nemoya lomuhle). Ngendlela lefanako, Thimothi bekakudzinga kusitwa ngumoya longcwele kuze abe nalobunye buntfu lobufaka ekhatsi: kulunga, kutinikela kuNkulunkulu nekucinisela.—Catsanisa Kholose 3:12; 2 Phetro 1:5-7.

Ngako-ke, Galathiya 5:22, 23 akabubali bonkhe buntfu lobuhle emaKhristu lokufanele abe nabo. Umoya waNkulunkulu ungasisita kutsi sibe naletincenye letingu-9 letibalwe ‘njengetitselo temoya.’ Kodvwa kunalobunye buntfu lokudzingeka kutsi sibe nabo kuze sibe nebuhlobo lobuhle naNkulunkulu futsi ‘sigcoke buntfu lobusha lobentiwa ngekuvumelana nentsandvo yaNkulunkulu ngekulunga nangebucotfo lobungibo.’—Ef. 4:24.