SIYAKHOLWA kutsi Jehova ucondzisa bantfu bakhe futsi ubanika loko labakudzingako kuze bahlale basedvute naye ‘kulamalanga ekugcina.’ (2 Thim. 3:1) Sonkhe kufanele simlalele Jehova. Simo setfu singasifananisa nesema-Israyeli ngesikhatsi asehlane. Bekufanele ente lokutsite nakeva umsindvo welicilongo.

Jehova watjela Mosi kutsi akhe emacilongo lamabili elisiliva leligcotjiwe lebekatawusetjentiswa “ekubiteni sive nasekudzilitweni kwemathende nase kutfutfwa.” (Num. 10:2) Baphristi bekufanele bashaye lamacilongo ngetindlela letehlukene kuze batjele bantfu loko lobekufanele bakwente. (Num. 10:3-8) Lamuhla, bantfu baNkulunkulu batfola ticondziso ngetindlela letehlukahlukene. Kulesihloko sitawucoca ngetindlela letintsatfu lesitfola ngato ticondziso futsi sitaticatsanisa nemsindvo welicilongo lobewukhala ka-Israyeli. Bantfu baNkulunkulu lamuhla bamenyelwa emibutsanweni lemikhulu, labadzala bayaceceshwa futsi ticondziso lesititfolako emabandleni tiyashintja.

Ngesikhatsi Jehova afuna kutsi “sive sonkhe” sihlangane ekungeneni kwelithende lekukhontela, baphristi bebashaya emacilingo. (Num. 10:3) Tonkhe tive lebetihlala ngasethendeni lekukhontela betiwuva lomsindvo welicilongo. Lebebahlala edvute nelithende lekukhontela bebafika ngekushesha. Lebebahlala khashane nalo kungenteka bebadzinga sikhatsi futsi bekufanele bente imetamo kuze bafike khona. Kunobe ngusiphi simo, Jehova bekafuna kutsi bonkhe bahlangane futsi bative ticondziso.

Lamuhla, asihlangani ethendeni lekukhontela kodvwa siyamenywa emibutsanweni yebantfu baNkulunkulu. Lemibutsano ifaka ekhatsi imihlangano yesigodzi, naleminye imibutsano lekhetsekile lapho sitfola khona lwati lolubalulekile kanye neticondziso. Emaveni lasemhlabeni wonkhe, bantfu baJehova batfola ticondziso letifanako. Ngako-ke labo labesemukelako simemo sekuya kulemibutsano, bayincenye yesicumbi lesikhulu sebantfu labajabulako. Labanye bahamba emabanga lamadze kunalabanye. Ngetulu kwaloko, bonkhe labasemukelako lesimemo bayati kutsi tinyenti tinzuzo labatatitfola.

Labasetindzaweni letikhashane bangazuza yini emibutsanweni lesiba nayo? Ngenca yetebuchwepheshe lesetikhona lamuhla, linyenti lalabantfu labasetindzaweni letikhashane bayazuza emibutsanweni lesiba nayo futsi nabo kuba shengatsi bakhona emibutsanweni lesuke ikhona. Nasi sibonelo, ngesikhatsi kuvakashe ummeleli wendlunkhulu egatjeni laseBenin, leligatja lasakata loluhlelo e-Arlit, eNiger, lokulidolobha lelinetimayini eLugwadvule lwaseSahara. Bekuhlangene bazalwane labangu-21, bodzadze kanye nalabanye labatsandza kufundza ngaNkulunkulu. Ngisho nobe bebasendzaweni lekhashane, bativa shengatsi bakanye nalesicumbi  lesikhulu sebantfu labangu-44 131. Lomunye umzalwane wabhala watsi: “Sibonga kakhulu ngekutsi basisakatele loluhlelo lwemhlangano. Loku kwasikhombisa indlela labasitsandza ngayo bazalwane betfu.”

Nangabe baphristi labangema-Israyeli bashaya linye licilongo, ‘bekubutsana baholi bodvwa, lebebatinhloko tetive,’ baye ethendeni lekuhlangana. (Num. 10:4) Mosi bekabatjela tintfo letitsite aphindze abaceceshe. Loko bekusita labaholi bakhone kunakekela tive tabo. Kube bewungulomunye walabaholi, kungenteka bewungenta konkhe lokusemandleni akho kuze ube khona futsi uzuze.

Lamuhla, labadzala belibandla abatenti emakhosi etikwemhlambi waNkulunkulu labawelusile. (1 Phet. 5:1-3) Bachubeka benta konkhe lokusemandleni abo kuze beluse umhlambi. Ngako bayaciniseka kutsi baba khona nangabe bamenyiwe kuze baceceshwe, njengaseSikolweni seMsebenti weMbuso. Kulokuceceshwa, labadzala bafundza kutsi bangaphumelela njani ekunakekeleni libandla. Ngenca yalokuceceshwa, labadzala kanye nalabo lababanakekelako basondzelana kakhulu naJehova. Ngisho nobe usengakayi kusinye saletikolwa letiba khona, uyazuza ngobe labo labake baya kuto basebentisa loko labakufundzile kuze basite libandla.

Ngaletinye tikhatsi, umphristi longum-Israyeli bekashaya licilongo lebelikhipha imisindvo leyehlukahlukene. Lomsindvo walelicilongo bewusho kutsi Jehova ufuna sonkhe sive sihambe. (Num. 10:5, 6) Ngalesikhatsi labantfu bahamba, bebahamba ngendlela lehlelekile futsi bekusetjentwa kamatima kuze labantfu bahleleke ngalendlela. Ngaletinye tikhatsi, bekuba matima ngalabanye kutsi bahambe. Kungani?

Kungenteka labanye bebatitjela kutsi lesikhatsi sekuhamba besisheshe sifike futsi bangakasilindzeli. “Ngaletinye tikhatsi lelifu lalihlala etikwelithende kusukela kusihlwa kuze kube ngusekuseni.” Ngaletinye tikhatsi bebatfutsa ngemuva ‘kwemalanga lamabili nome inyanga nome umnyaka.’ (Num. 9:21, 22) Kahlekahle ema-Israyeli bekatfutsa kangakhi? Incwadzi yaNumeri sehluko 33 ikhuluma ngetindzawo letingu-40 lapho ema-Israyeli bekafike ahlale khona.

Ngaletinye tikhatsi, ema-Israyeli bekatfutsela etindzaweni lebetinemtfunti lokahle. Kungenteka bekuwajabulisa ema-Israyeli kuba ‘sehlane lelesabekako.’ (Dut. 1:19) Kungenteka bewuba khona nemcabango wekutsi bebatawutfutsela endzaweni lekabi.

Nasesicale kuhamba lesive, bekufanele sibeketelelane kuze kufike sikhatsi salabanye sekutsi sebangahamba. Bonkhe labantfu bebakuva kukhala kwalelicilongo lebelishintjashintja umsindvo, kodvwa bebangeke bakhone kusuka kanyekanye. Lelicilongo lebelishintjashintja imisindvo belatisa tive lebetihlala empumalanga kutsi tihambe, lobekusive sakaJuda, saka-Isakhari nesakaZebuloni. (Num. 2:3-7; 10:5, 6) Nasetihambile letive, labaphristi bebaphindze bashaye lelicilongo lebelishintjashintja umsindvo kwesibili kuze batise tive letintsatfu lebetihlala eningizimu kutsi nato tihambe. Labaphristi bebachubeka bakwenta loku size sihambe sonkhe lesive.

Kungenteka uke waba nebumatima bekwemukela lushintjo lolutsite loluvela enhlanganweni. Kungenteka bewutitjela kutsi selunyenti lushintjo lolwentekako futsi lolungakalindzeleki. Kungenteka nekutsi uyatijabulela tintfo letikhona nyalo nendlela letenteka ngayo kangangekutsi awufisi kutsi tishintje. Kunobe ngusiphi sizatfu, kungenteka kube matima kutsi ubeketele nawusetayelana nalolushintjo. Nobe kunjalo, nasitimisela kwenta lushintjo loludzingekile sitawubona kutsi lufike ngesikhatsi lesikahle nekutsi Jehova uyajabula ngatsi.

Ngesikhatsi kusaphila Mosi, Jehova wacondzisa tigidzi temadvodza, bafati nebantfwana ehlane. Ngaphandle kwekucondziswa nguJehova, bebangeke baphile. Lamuhla, siyakhona kuba nebuhlobo lobuhle naJehova ngobe uyasicondzisa njengobe siphila kulamalanga layingoti. Shengatsi sonkhe singatimisela kuwulalela umsindvo welicilongo njengobe kwenta ema-Israyeli letsembekile!