SIHLOKO LESIFUNDVWAKO 25
“Mine Ngekwami Ngitatifunela Letimvu Tami”
“Mine ngekwami ngitatifunela letimvu tami, ngitelusele.”—HEZ. 34:11.
INGOMA 105 “UNkulunkulu Uluthando”
LOKUTAWUCOCWA NGAKO KULESIHLOKO *
1. Kungani Jehova atifananisa nemfati lomunyisako?
“UMFATI angalukhohlwa yini luswane lolusebeleni lakhe?” Lona ngumbuto Jehova lawubuta ngemalanga emphrofethi Isaya. Nkulunkulu watjela bantfu bakhe watsi: “Nome angakhohlwa, kodvwa mine ngingeke ngikukhohlwe wena.” (Isa. 49:15) Nkulunkulu akakavami kuticatsanisa nemfati, kodvwa wakwenta loko. Jehova wasebentisa lutsandvo make lanalo ngemntfwana wakhe kuze avete indlela latitsandza ngayo tikhonti takhe. Bomake labanyenti bativa ngendlela lefanako nadzadze lokutsiwa nguJasmin lowatsi, “Nangabe umunyisa umntfwana wakho, usuke wakha buhlobo lobusedvute kakhulu naye lobutawuhlala sikhatsi lesidze.”
2. Jehova utiva njani nangabe munye webatfwana bakhe amshiya?
2 Jehova uyabona nangabe munye webantfwana bakhe ayekela kutihlanganisa nelibandla lebuKhristu futsi ayekela nekwenta umsebenti wekushumayela. Cabanga kutsi uva buhlungu kanganani nakabona tigidzi tetikhonti takhe tiyekela kumkhonta nobe tiphola * njalo ngemnyaka.
3. Yini Jehova layifunako?
3 Labanyenti bazalwane nabodzadze wetfu lasebapholile bayabuya ebandleni futsi siyajabula nababuya. Jehova ufuna kutsi babuye, natsi sifuna kutsi babuye. (1 Phet. 2:25) Singasita njani? Ngaphambi kwekutsi siphendvule lombuto, kungaba kahle sati kutsi bayekelelani kuta emihlanganweni nekwenta umsebenti wekushumayela.
KUNGANI LABANYE BAYEKELA KUKHONTA JEHOVA?
4. Umsebenti wekutiphilisa ubaphatamisa njani labanye?
4 Labanye bavumele kutsi umsebenti wekutiphilisa ube yintfo lebalulekile ekuphileni kwabo. Hung * longumzalwane wase-Asia utsi: “Ngacitsa sikhatsi sami lesinyenti kanye nemandla ami ngenta umsebenti wekutiphilisa. Bengititjela kutsi nanginemcebo lomnyenti ngitawukhona kumkhonta kahle Jehova. Ngako ngasebenta ema-awa lamanyenti. Ngacale ngalahlekelwa yimihlangano tikhatsi letinyenti kwaze kwaba ngulapho ngiyekela khona kuya eHholweni. Kubonakala shengatsi Sathane usebentisa lelive kuze ente bantfu bayekele kukhonta Nkulunkulu kancane kancane.”
5. Yini leyentiwa ngulomunye dzadze ngesikhatsi abhekene netinkinga letinyenti?
5 Labanye bazalwane nabodzadze banetinkinga letinyenti letibacedza emandla. Anne lohlala eBritain futsi longumake lonebatfwana labasihlanu utsi: “Munye webantfwana bami watalwa anekukhubateka lokumatima. Ngekuhamba kwesikhatsi, yinye yemadvodzakati ami yayekeliswa kuba nguFakazi, futsi yinye yemadvodzana ami yacala kugula ngengcondvo. Ngacindzeteleka kakhulu kangangekutsi ngayekela kuya emihlanganweni futsi ngayekela kwenta umsebenti wekushumayela. Kancane kancane ngabese ngiyaphola.” Simvela kakhulu Anne nemndeni wakhe kanye nalabanye lababhekene netimo letimatima.
6. Kungasisebentisi seluleko lesikuKholose 3:13, kungamenta njani umuntfu kutsi akhweshe kubantfu baJehova?
6 Fundza Kholose 3:13. Letinye tikhonti taJehova titfukutseliswa tintfo letentiwe ngulabanye bazalwane nobe bodzadze ebandleni. Umphostoli Pawula washo kutsi ngaletinye tikhatsi kungenteka sibe nesizatfu ‘sekukhonona ngalomunye’ umzalwane nobe dzadze. Kungenteka siphatseke kabi ngaletinye tikhatsi. Nasingakanaki, singatfukutsela futsi kutfukutsela kungenta umuntfu akhweshe kulabanye bantfu baJehova. Cabanga ngesibonelo saPablo longumzalwane e-South America. Wacanjelwa emanga ngekutsi wente intfo lembi futsi walahlekelwa ngemalungelo ebandleni. Wenta njani? Utsi, “Ngatfukutsela, futsi kancane kancane ngayekela kuya eHholweni.”
7. Yini lengenteka kumuntfu lotiva anelicala?
7 Nangabe umuntfu enta sono lesikhulu esikhatsini lesendlulile, kungaphela sikhatsi lesidze solo ativa anelicala. Angeva shengatsi Nkulunkulu angeke asamtsandza. Ngisho nobe aphendvuka, futsi entelwa umusa, angeva shengatsi akakufanelekeli kuphindze abe ngulomunye webantfu baNkulunkulu. Lomunye umzalwane lokutsiwa nguFrancisco wativa ngaleyondlela. Utsi, “Ngasolwa ngenca yekutiphatsa lokubi. Ngisho nobe ekucaleni ngachubeka ngiya emihlanganweni, ngabese ngicala kucindzeteleka futsi bengitiva ngingakufaneli kuba semkhatsini webantfu baJehova. Bengihlale ngitiva nginelicala futsi bengingacabangi kutsi Jehova ungicolele. Ngekuhamba kwesikhatsi ngabese ngiyayekela kutihlanganisa nelibandla. Utiva njani ngebazalwane nabodzadze lababhekene netinkinga letifana naleti lesisandza kucoca ngato? Uyabavela yini? Jehova utiva njani ngabo?
JEHOVA UYATITSANDZA TIKHONTI TAKHE
Umelusi longum-Israyeli bekakhatsateka ngemvu lebeyilahlekile (Buka tigaba 8-9) *
8. Chaza kutsi Jehova uyabakhohlwa yini labo labake bamkhonta.
8 Jehova akabakhohlwa bantfu labake bamkhonta futsi lababese bayayekela kutihlanganisa nelibandla kwesikhashana. Akawukhohlwa nemsebenti labamentele wona. (Heb. 6:10) Umphrofethi Isaya wabhala ngesibonelo lesikhombisa indlela Jehova labanakekela ngayo bantfu bakhe. Watsi: “Ugona emazinyane akhe ngemikhono yakhe, awasondzete edvutane nenhlitiyo yakhe.” (Isa. 40:11) Jehova longumelusi lomkhulu utiva njani nangabe munye wetikhonti takhe ayekela kumkhonta? Jesu wayiveta indlela Jehova lativa ngayo ngesikhatsi abuta bafundzi bakhe atsi: “Nicabangani? Nangabe indvodza letsite inetimvu letilikhulu bese yinye yato iyalahleka, ngeke yini itishiye etintsabeni leti letingemashumi layimfica nemfica, ihambe iyewufuna lena lelahlekile? Ngiyanitjela ngitsi nangabe iyitfola, ijabula kakhulu ngayo kwendlula leti letingemashumi layimfica nemfica lebetingakalahleki.”—Mat. 18:12, 13.
9. Belusi labakahle bangetikhatsi tekubhalwa kweliBhayibheli bebatiphatsa njani timvu tabo? (Buka sitfombe lesisekhasini lekucala.)
9 Kungani Jehova singamfananisa nemelusi? Kungobe ngetikhatsi tekubhalwa kweliBhayibheli, umelusi lokahle bekatinakekela timvu takhe. Nasi sibonelo, Davide walwa nelibhubesi kanye nelibhele kuze avikele umhlambi wakhe. (1 Sam. 17:34, 35) Umelusi lokahle usheshe abone nangabe sekushoda yinye yetimvu takhe. (Joh. 10:3, 14) Lomelusi lokahle angashiya leti letinye timvu endzaweni lephephile nobe acele labanye belusi kutsi batinakekele kuze aciniseke kutsi tiphephile. Angabese uyahamba ayofuna lena lelahlekile. Jesu wasebentisa lomfanekiso kuze afundzise liciniso lelibalulekile. Watsi: “Babe losezulwini akafisi kutsi kubhubhe ngisho namunye kulaba labanjengebantfwana.”—Mat. 18:14.
Umelusi wetimvu waka-Israyeli unakekela imvu lebeyilahlekile (Buka sigaba 9)
JEHOVA UYATIFUNA TIMVU TAKHE LETILAHLEKILE
10. Ngekusho kwaHezekeli 34:11-16, yini Jehova latsembisa kutsi utayenta ngetimvu takhe letilahlekile?
10 Jehova usitsandza sonkhe, lokufaka ekhatsi nalaba “labancane” labasukile emhlambini wakhe. Asebentisa umphrofethi Hezekeli, Nkulunkulu wetsembisa kutsi utatifuna timvu takhe letilahlekile futsi atisite kuze tiphindze tibe nebuhlobo lobuhle naye. Waveta tintfo letiyinhloko lebekatawutenta kuze afune timvu takhe letidukile, lokutintfo lebetingentiwa ngumelusi longum-Israyeli nangabe alahlekelwe yimvu. (Fundza Hezekeli 34:11-16.) Kwekucala, lomelusi bekatawufuna lemvu, lokuyintfo lebeyitawudzinga sikhatsi nemetamo. Nasekayitfolile lemvu lelahlekile, lomelusi bekayiletsa emhlambini. Ngetulu kwaloko, nangabe lemvu beyilimele nobe ilambile, lomelusi bekayisita ayibhandishe emanceba, ayetfwale futsi ayiphe nekudla. Labadzala lababelusi ‘bemhlambi waNkulunkulu’ kufanele bente lokufanako kuze basite bantfu labangasatihlanganisi nelibandla. (1 Phet. 5:2, 3) Labadzala bayabafuna, babasite kuze babuyele ebandleni futsi bayabakhombisa kutsi bayabatsandza ngekubasita kuze baphindze babe bangani baJehova. *
11. Yini lebeyatiwa ngumelusi lokahle?
11 Umelusi lokahle bekati kutsi timvu tingalahleka. Nangabe imvu ilahlekile, umelusi bekangayijezisi. Cabanga ngesibonelo Nkulunkulu lasibekela sona nakasita letinye tikhonti takhe letike tamshiya sikhatsi lesitsite.
12. Jehova wamphatsa njani Jona?
12 Umphrofethi Jona wasibalekela sabelo sakhe. Nobe kunjalo, Jehova akazange amlahle Jona. Njengemelusi lokahle, Jehova wamsita wamupha emandla kuze akhone kusenta kahle lesabelo sakhe. (Jona 2:7; 3:1, 2) Ngekuhamba kwesikhatsi Nkulunkulu wasebentisa sihlahla semhlafutfo kuze asite Jona acondze kubaluleka kwemphilo yemuntfu. (Jona 4:10, 11) Ngusiphi sifundvo lesisitfolako? Labadzala akukafaneli balahle litsemba ngalasebapholile. Esikhundleni saloko, labadzala kufanele betame kucondza kutsi yini lebangele imvu yakhwesha emhlambini. Nangabe lemvu ibuyela kuJehova, labadzala bayachubeka bayinakekela futsi bayikhombisa kutsi bayayitsandza.
13. Yini lesingayifundza kuloko Jehova lakwenta kumbhali weTihlabelelo 73?
13 Umbhali weTihlabelelo 73 wadvumateka ngesikhatsi abona lababi baphumelela. Bekatibuta kutsi tikhona yini tinzuzo tekwenta intsandvo yaNkulunkulu. (Hla. 73:12, 13, 16) Yini Jehova layenta? Akazange amehlulele lombhali. Ecinisweni, Nkulunkulu wenta kutsi lamavi alomhlabeleli abhalwe eBhayibhelini. Ngekuhamba kwesikhatsi, lomhlabeleli wabona kutsi buhlobo lobuhle naJehova bubaluleke kakhulu kunobe yini, futsi kwenta kuphila kujabulise. (Hla. 73:23, 24, 26, 28) Ngusiphi sifundvo lesisitfolako? Labadzala akukafanele basheshe babehlulele labo lababuta ngetinzuzo tekukhonta Jehova. Labadzala kufanele betame kucondza kutsi kungani bakhuluma futsi benta ngaleyondlela. Labadzala bangasebentisa liBhayibheli kuze babakhutsate.
14. Kungani Elija bekadzinga lusito, futsi Jehova wamsita njani?
14 Umphrofethi Elija wabalekela INdlovukazi Jezebeli. (1 Khos. 19:1-3) Bekacabanga kutsi besekute lomunye lobekangumphrofethi waJehova, futsi bekeva shengatsi nemsebenti wakhe besewungakabaluleki. Elija wacindzeteleka kakhulu waze wafisa nekufa. (1 Khos. 19:4, 10) Kunekutsi Jehova ehlulele Elija, wamcinisekisa kutsi bekanaye futsi bekufanele atsembele emandleni aNkulunkulu nekutsi bewusemnyenti umsebenti lobekufanele awente. Jehova wamlalela ngemusa Elija ngesikhatsi achaza ngekukhatsateka kwakhe futsi wamnika letinye tabelo letinsha. (1 Khos. 19:11-16, 18) Ngusiphi sifundvo lesisitfolako? Sonkhe, ikakhulukati labadzala belibandla, kufanele sitiphatse ngemusa tikhonti taJehova. Ngisho nobe umuntfu atsi usetfukutsele nobe eva shengatsi Jehova ngeke amcolele, labadzala batamlalela nakabatjela indlela lativa ngayo. Batawetama kumcinisekisa kutsi Jehova uyamtsandza.
KUFANELE SITIVE NJANI NGETIMVU TANKULUNKULU LETILAHLEKILE?
15. Ngekusho kwaJohane 6:39, Jesu bekativa njani ngetimvu taBabe wakhe?
15 Jehova ufuna sitive njani ngetimvu takhe letilahlekile? Jesu wasibekela sibonelo lesingafundza kuso. Bekati kutsi tonkhe timvu taJehova tiligugu emehlweni aNkulunkulu, ngako Jesu wenta konkhe langakwenta kuze asite ‘timvu letilahlekile taka-Israyeli’ kutsi tibuyele kuJehova. (Mat. 15:24; Luk. 19:9, 10) Njengobe angumelusi lokahle, Jesu wenta konkhe langakwenta kuze agweme kulahlekelwa nguyinye yetimvu taJehova.—Fundza Johane 6:39.
16-17. Labadzala kufanele bative njani ngekusita labatehlukanisile nelibandla? (Buka libhokisi lelitsi “ Ingativa Njani Imvu Lelahlekile.”)
16 Umphostoli Pawula wakhutsata labadzala belibandla lase-Efesu kutsi balingise sibonelo saJesu. Watsi: “Kufanele nisite lababutsakatsaka ngekutsi nikhandleke, futsi kufanele nikhumbule emavi iNkhosi Jesu leyawasho, latsi: ‘Kunenjabulo lenyenti ekupheni kunasekwemukeleni.’” (Imis. 20:17, 35) Kuyacaca kutsi lamuhla, labadzala kufanele banakekele timvu taJehova. Salvador longulomdzala wase-Spain utsi: “Nangicabanga indlela Jehova latinakekela ngayo timvu takhe letilahlekile, ngiyakhutsateka kutsi ngente konkhe lengingakwenta kuze ngitisite. Njengobe ngingumelusi loceceshwe nguJehova, ngiyaciniseka kutsi ufuna ngitinakekele timvu takhe.”
17 Bonkhe lokukhulunywe ngabo kulesihloko lebebatihlukanisile nelibandla, basitwa kuze babuyele kuJehova. Ngisho nanyalo, labanyenti labatehlukanisile nelibandla bayafuna kubuyela kuJehova. Sihloko lesilandzelako sitawucoca kabanti ngaloko lesingakwenta kuze sibasite babuyele kuJehova.
INGOMA 139 “Zibone Lapho Konke Sekukusha”
^ sig. 5 Kungani labanye lesebakhonte Jehova ngekwetsembeka iminyaka leminyenti balishiya libandla? Nkulunkulu utiva njani ngabo? Lesihloko sitawucoca ngetimphendvulo talemibuto. Lesihloko siphindze sicoce ngaloko lesingakufundza endleleni Jehova lasita ngayo labanye bantfu bangetikhatsi tekubhalwa kweliBhayibheli labamshiya sikhashana.
^ sig. 2 INCHAZELO YELIGAMA: Ummemeteli lopholile ngumuntfu longakase wabika ngemsebenti wekushumayela nekwenta bafundzi tinyanga letisitfupha nobe ngetulu. Nobe kunjalo, labapholile basebazalwane betfu nabodzadzewetfu futsi siyabatsandza.
^ sig. 4 Lamanye emabito ashintjiwe.
^ sig. 10 Sihloko lesilandzelako sitawuchaza indlela labadzala labangatenta ngayo letintfo letintsatfu.
^ sig. 60 KUCHAZWA KWETITFOMBE: Umelusi wasendvulo longum-Israyeli bekakhatsateka ngemvu lelahlekile, ngako bekayifuna futsi ayisite kuze ibuyele emhlambini. Labadzala belibandla benta lokufanako lamuhla.
^ sig. 64 KUCHAZWA KWETITFOMBE: Dzadze losapholile ugibele ibhasi futsi umele kutsi isuke, ubona boFakazi lababili labashumayela lenye indvodza futsi bajabulile.
