1. Kwesaba Nkulunkulu kutasivikela njani nasilingeka kutsi sente intfo lembi?

EMAKHRISTU ayamtsandza Nkulunkulu futsi ayamesaba. Kulabanye, loku kungabonakala kutintfo letingahambisani. Nobe kunjalo, asikhulumi ngalokwesaba lokwetfusako. Sitawucoca ngeluhlobo lolukhetsekile lekwesaba. Bantfu labanaloluhlobo lekwesaba bamhlonipha mbamba Nkulunkulu. Abafuni kumdvumata Babe wabo losezulwini ngobe abafuni kulimata buhlobo babo naye.—Hla. 111:10; Taga 8:13.

2. Ngekusho kwemavi eNkhosi Davide labhalwe kuTihlabelelo 86:11, ngutiphi tintfo letimbili lesitawucoca ngato?

² Fundza Tihlabelelo 86:11. Njengobe ucabanga ngalamavi, kuyacaca kutsi Davide bekati kutsi kubaluleke kakhulu kumhlonipha mbamba Jehova. Nyalo, sitawucoca ngekutsi singawasebentisa njani emavi Davide lawasho emthantazweni wakhe. Kwekucala, sitawubuka tizatfu tekutsi kungani kufanele silihloniphe mbamba libito laNkulunkulu. Kwesibili, sitawucoca ngekutsi singakhombisa njani kutsi siyalihlonipha libito laNkulunkulu etintfweni lesitenta malanga onkhe.

3. Yini leyenteka kuMosi leyamsita wakhona kuchubeka alihlonipha libito laNkulunkulu?

³ Cabanga ngendlela Mosi lativa ngayo ngesikhatsi eme emkhatsini wemadvwala futsi abona kwendlula inkhatimulo yaJehova. I-Insight on the Scriptures itsi, “Loku kungenteka kwaba yintfo lemangalisa kakhulu leyake yabonwa ngumuntfu.” Mosi weva lamavi lalandzelako lakhulunywa yingilosi,  latsi: “Jehova, Jehova, Nkulunkulu lonesihawu nemusa; uyephuta kutfukutsela andze ngemusa nangekwetsembeka, ubentela umusa labatinkhulungwane, atsetselele emaphutsa, nalokubi, netono.” (Eks. 33:17-23; 34:5-7) Kungenteka Mosi bekacabanga ngaloko lobekwenteka njalo nje nakasebentisa libito laJehova. Kungako naMosi awecwayisa kufanele ema-Israyeli kutsi alihloniphe libito laNkulunkulu.—Dut. 28:58.

4. Ngubuphi buntfu baJehova lokufanele sizindle ngabo futsi lobutasisita kutsi simhloniphe kakhulu?

⁴ Nasicabanga ngelibito laJehova, kufanele sizindle ngekutsi Jehova ungumuntfu lonjani. Kufanele sicabange ngebuntfu bakhe lobufaka ekhatsi emandla akhe, kuhlakanipha, kulunga nelutsandvo lwakhe. Kucabanga ngalobuntfu bakhe kutawusenta simhloniphe kakhulu.—Hla. 77:11-15.

5-6. (a) Isho kutsini inchazelo yelibito laNkulunkulu?(b) Ngekusho kwa-Eksodusi 3:13, 14 na-Isaya 64:8, ngutiphi tindlela Jehova latisebentisako kuze afeze tinjongo takhe?

⁵ Yini lesiyatiko ngenchazelo yelibito laNkulunkulu? Tati letinyenti tiyavuma kutsi libito lelitsi Jehova lisho kutsi, “Ubangela Kutsi Kubekhona.” Lenchazelo yalo isikhumbuta kutsi kute lokungavimba Jehova kutsi ente loko lakufunako. Sisho ngani?

⁶ Jehova ubangela kutsi tintfo tenteke ngekutsi abe nguloko lakufunako kuze afeze injongo yakhe. (Fundza Eksodusi 3:13, 14.) Etincwadzini tetfu, sihlale sikhunjutwa kutsi sicabange ngebuntfu baNkulunkulu lobuhle. Jehova angabangela nebantfu bakhe labamkhontako labanesono kutsi babe nguloko lakudzingako kuze bamkhonte futsi bafeze injongo yakhe. (Fundza Isaya 64:8.) Jehova usebentisa letindlela kuze afeze injongo yakhe futsi kute lokungamvimba kutsi afeze tinjongo takhe.—Isa. 46:10, 11.

7. Yini lesingayenta kuze sikhombise kutsi siyabonga kuBabe wetfu losezulwini?

⁷ Singakhombisa kubonga kuBabe wetfu losezulwini ngekutsi sizindle ngetintfo latentile, netintfo labangele kutsi sitente. Sibonelo saloko kutsi sijabula kakhulu  nasicabanga ngato tonkhe tintfo Jehova latidalile. (Hla. 8:3, 4) Nasizindla ngetintfo Jehova labangele kutsi sikhone kutenta kuze sifeze intsandvo yakhe, simhlonipha kakhulu. Libito laJehova lisijabulisa kakhulu, lifaka ekhatsi konkhe loko Babe wetfu langiko, konkhe lakwentile nako konkhe lasatokwenta.—Hla. 89:7, 8.

8. Ngekusho kwaDutheronomi 32:2, 3, yini Jehova lafuna tikhonti takhe tiyente ngelibito lakhe?

⁸ Ngaphambi kwekutsi ema-Israyeli angene eveni lesetsembiso, Jehova wafundzisa Mosi emagama engoma letsite. (Dut. 31:19) Ngako Mosi bekufanele afundzise bantfu lengoma. (Fundza Dutheronomi 32:2, 3.) Nasizindla ngemavesi 2 na-3, kuyacaca kutsi Jehova akafuni kutsi libito lakhe lifihlwe noma silitsatse njengalelingcwele kakhulu kutsi singalibita. Ufuna kutsi libito lakhe latiwe ngibo bonkhe bantfu. Kwawajabulisa kakhulu ema-Israyeli kuva Mosi awafundzisa ngaJehova nangelibito lakhe lelingcwele. Loko Mosi lawafundzisa kona kwakucinisa kukholwa kwawo futsi kwawakhutsata njengalapho litulu lelina kahle likhulisa tihlahla. Yini lesingayenta kuze siciniseke kutsi kufundzisa kwetfu kufana nalelitulu lelina kahle?

9. Yini lesingayenta kuze singcwelise libito laJehova?

⁹ Nasishumayela, singalisebentisa liBhayibheli kuze sikhombise bantfu libito laNkulunkulu lelitsi Jehova. Singabaniketa tincwadzi tetfu, sibakhombise ema-video futsi sibakhombise tintfo letitfolakala ku-website yetfu letidvumisa Jehova. Nasisemsebentini, esikolweni nobe sigibele tintfo tekutfutsa sive, singawatfola ematfuba ekukhuluma nebantfu ngaNkulunkulu wetfu lesimtsandzako nekutsi ungumuntfu lonjani. Singabatjela ngetintfo letinhle Jehova latawusentela tona lapha emhlabeni, futsi nabativa letintfo bangabona kutsi Jehova usitsandza kanganani. Nasitjela labanye liciniso ngaBabe wetfu lositsandzako sisuke singcwelisa libito lakhe. Sisuke sisita bantfu bacondze kutsi bebasolo bafundziswa emanga ngaNkulunkulu. Sifundzisa bantfu imfundvo lebaluleke kakhulu futsi lebakhutsata mbamba.—Isa. 65:13, 14.

10. Nasichuba tifundvo teliBhayibheli, kungani kudzingeka kutsi sente lokungetulu kwekumane sifundzise bantfu timiso taNkulunkulu?

¹⁰ Nasichuba tifundvo teliBhayibheli, sifuna kusita labo lesifundza nabo kutsi balati libito laJehova futsi balisebentise. Ngetulu kwaloko, sifuna kubasita bamati kahle Jehova. Singakhona yini kukufeza loko nangabe sitawumane sendlulisele ticondziso, timiso takhe letingcwele nobe imitsetfo yekutiphatsa? Umfundzi lokahle kungenteka afundze ngemitsetfo yaNkulunkulu futsi ayitsandze. Lomfundzi utawulalela Jehova ngesizatfu sekutsi uyamtsandza yini? Khumbula kutsi Eva bekawati umtsetfo waNkulunkulu kodvwa yena na-Adamu bebangamtsandzi mbamba loyo lobekabanikete lomtsetfo. (Gen. 3:1-6) Ngako kufanele sente lokungetulu nje kwekumane sibafundzise tintfo Nkulunkulu latilindzele kubo netimiso takhe.

11. Nasifundzisa ngemitsetfo yaNkulunkulu, singabasita njani labo lesifundza nabo kutsi bamtsandze?

¹¹ Timiso taJehova tihlale tikahle kitsi. (Hla. 119:97, 111, 112) Bantfu lesifundza nabo kungenteka bangacabangi ngaleyondlela nangabe bangacondzi kutsi Jehova usinikete lemitsetfo ngoba asitsandza. Ngako singabuta lesifundza nabo kutsi, “Ucabanga kutsi kungani Nkulunkulu acela tikhonti takhe kutsi tingakwenti loku?” Loku kusitjelani ngaye? Sitawukhona kutsintsa tinhlitiyo talabo lesibafundzisako nangabe sibasita kutsi bacabange ngaJehova  futsi balitsandze libito lakhe lelingcwele. Lesifundza nabo batayitsandza imitsetfo yaJehova futsi naye bamtsandze. (Hla. 119:68) Kukholwa kwabo kutawucina futsi batawukhona kubhekana nanobe ngutiphi timo letimatima letiseta.—1 Khor. 3:12-15.

12. Davide wehluleka njani kwenta inhlitiyo yakhe kutsi ihlose intfo yinye, futsi waba yini umphumela?

¹² Umusho lobaluleke kakhulu lotfolakala embhalweni weTihlabelelo 86:11 utsi, “yenta inhlitiyo yami ihlose intfo yinye.” INkhosi Davide yaphefumulelwa kutsi ibhale lamavi. Ngesikhatsi Davide asaphila, wabona kutsi kumelula ngenhlitiyo kutsi yente lokuhle nobe lokubi. Ngalelinye lilanga bekasetulu endlini yakhe futsi wabona umfati walenye indvodza ageza. Ngaleso sikhatsi, inhlitiyo yaDavide beyicabanga intfo yinye yini nobe beyehlukene ekhatsi? Bekasati simiso lebesibekwe nguJehova lesitsi: “Ungamhawukeli umfati wamakhelwane wakho.” (Eks. 20:17) Nobe kunjalo, wachubeka ambuka. Inhlitiyo yakhe yehlukana ekhatsi ngobe waba nesifiso sekulala nalomfati lokutsiwa nguBhatisheba ngesikhatsi lesifanako waba nesifiso sekujabulisa Jehova. Ngisho nobe besekuphele sikhatsi lesidze Davide amtsandza futsi amhlonipha Jehova, wenta intfo lembi. Ngenca yaloko, Davide wenta tintfo letimbi kakhulu, walihlambalata libito laJehova. Waphindze waletsa inhlekelele kubantfu labangenacala, lokufaka ekhatsi umndeni wakhe.—2 Sam. 11:1-5, 14-17; 12:7-12.

13. Sati njani kutsi inhlitiyo yaDavide yaphindze yahlosa intfo yinye?

¹³ Jehova wamyala Davide futsi Davide waphindze waba nebuhlobo lobuhle Jehova. (2 Sam. 12:13; Hla. 51:2-4, 17) Davide watikhumbula tinkinga nebumatima labhekana nabo ngesikhatsi avumela inhlitiyo yakhe kutsi yehlukane ekhatsi. Emavi akhe labhalwe kuTihlabelelo 86:11 angaphindze abekwe ngalendlela: “Ngiphe inhlitiyo lengeke yehlukane ekhatsi.” Jehova wamsita yini Davide kutsi ente inhlitiyo yakhe ingehlukani ekhatsi? Yebo. Ngobe liVi laJehova litsi Davide bekayindvodza ‘lebeyinenhlitiyo lephelele kuJehova Nkulunkulu wakhe.’—1 Khos. 11:4; 15:3.

14. Yini lokufanele sitibute yona, futsi leni?

¹⁴ Sibonelo saDavide siyasikhutsata futsi siphindze sibe secwayiso kitsi. Kwenta kwakhe sono lesikhulu kusecwayiso etikhontini taNkulunkulu lamuhla. Ngisho nobe sinesikhashana nobe sesinesikhatsi  lesidze sikhonta Jehova, kufanele sitibute kutsi, ‘Ngiyalwisana yini nemachinga aSathane ekwehlukanisa inhlitiyo yami.’

15. Kuhlonipha Nkulunkulu kungasivikela njani nasibona titfombe letikhutsata kutiphatsa lokubi?

¹⁵ Asesitsi ubona sitfombe ku-TV nobe ku-internet lesingakwenta ucabange ngekutiphatsa lokubi. Yini loyentako? Kungaba melula kucabanga kutsi lesitfombe nobe le-movie ayikukhutsati kutiphatsa lokubi. Kodvwa ingaba yintfo Sathane layisebentisako kuze ehlukanise inhlitiyo yakho. (2 Khor. 2:11) Lesitfombe singafana nelizembe lelisentjentiswa ngumuntfu kuze ahlakate sigodvo lesikhulu. Lomuntfu ucale akabhe lolugodvo, futsi njengobe achubeka alukabha, lolugodvo lubese lwehlukana ekhatsi. Titfombe letikhutsata kutiphatsa lokubi tingafana yini nalelizembe? Kubuka letintfo letingabonakala shengatsi atisiyo ingoti, ngekuhamba kwesikhatsi tingasibangela kutsi sone kuJehova. Ngako ungavumeli tintfo letingakafaneli kutsi tingene enhlitiyweni yakho. Hlale uhlose intfo yinye kuze uhloniphe libito laJehova.

16. Ngumiphi imibuto lokufanele sitibute yona nasilingwa?

¹⁶ Ngetulu kwekubuka titfombe letikhutsata kutiphatsa lokubi, Sathane usebentisa tintfo letinyenti kuze asilinge kutsi sente lokubi. Yini lokufanele siyente? Kumelula kucabanga kutsi letintfo atisiko timbi kakhulu. Nasi sibonelo, singase sicabange kutsi: ‘Angeke ngiyekeliswe kuba nguFakazi ngekwenta loku, ngako akusiko kubi kangako.’ Kucabanga lokunjalo kubi kakhulu. Kuhle kutibuta imibuto lefana naletsi: ‘Sathane wetama kusebentisa lesilingo kuze ehlukanise inhlitiyo yami yini? Nangivumela tifiso letimbi, ngitalihlambalata yini libito laJehova?’ Loku lengifuna kukwenta kutangisondzeta yini kuNkulunkulu  nobe kutangikhweshisa kuye? Kufanele sizindle ngemibuto lefana nalena. Thantaza ucele kuhlakanipha kuze ukhone kuphendvula lemibuto ngekwetsembeka. (Jak. 1:5) Kwenta njalo kungakuvikela mbamba. Kungakusita kutsi utibalekele tilingo njengobe Jesu enta ngesikhatsi atsi: “Hamba Sathane!”—Mat. 4:10.

17. Niketa sibonelo sekutsi kungani kukabi kuba nenhlitiyo leyehlukene ekhatsi.

¹⁷ Akusiko kahle kutsi inhlitiyo yetfu yehlukane ekhatsi. Cabanga ngelicembu letemidlalo lelinebadlali labangevani. Labanye batifunela bona ludvumo, labanye abafuni kulandzela imitsetfo yekudlala futsi labanye abamhloniphi umceceshi wabo. Licembu lelifana naleli alikavami kuphumelela emidlalweni. Ngalokwehlukile, licembu lelinebunye livame kuphumelela. Inhlitiyo yakho ingafana nalelicembu leliphumelelako nangabe indlela locabanga ngayo, tifiso takho nendlela lotiva ngayo kubambisana kuze ukhonte Jehova. Khumbula kutsi Sathane ufuna kwehlukanisa inhlitiyo yakho. Ufuna kutsi imicabango yakho, tifiso takho nendlela lotiva ngayo kungavumelani netimiso taJehova. Nobe kunjalo, kufanele sikhonte Jehova ngenhlitiyo yetfu yonkhe. (Mat. 22:36-38) Ungamvumeli Sathane kutsi ehlukanise inhlitiyo yakho!

18. Ngekuvumelana nemavi lakuMikha 4:5, Yini lotimisele kuyenta?

¹⁸ Thantaza kuJehova njengobe kwenta Davide, umcele kutsi ente inhlitiyo yakho ihlose intfo yinye, kwesaba libito lakhe. Yenta konkhe longakwenta kuze usebentise lomthantazo ekuphileni kwakho. Onkhe malanga timisele kutsi tonkhe tincumo lotentako, kungaba nguletincane nobe letinkhulu tikhombise kutsi uyalihlonipha libito laJehova lelingcwele. Njengobe unguFakazi waJehova, nawenta njalo utawube ulimelela kahle libito lakhe. (Taga 27:11) Njengemphrofethi Mikha, sonkhe sitawutsi: “Siyawukhonta Jehova Nkulunkulu wetfu phakadze naphakadze.”—Mik. 4:5.