1. Yini lengenta tikhonti taJehova kutsi ngaletinye tikhatsi tibe nesitunge?

NGALETINYE tikhatsi, labanyenti betfu babanesitunge. Kodvwa kulabanye, kubese kuyaphela kutiva ngalendlela. Kulabanye kungatsatsa sikhatsi lesidze solo banesitunge. Singaba nesitunge ngisho nobe sinebantfu. Labanye bakutfola kumatima kuba nebangani labasha ebandleni lelisha. Labanye babuya emindenini leyenta tintfo letinyenti kanye kanye, kodvwa babese babanesitunge nabashiya imindeni yabo. Kantsi labanye banesitunge ngenca yekutsi lebebashade naye sewushonile. Lamanye emaKhristu, ikakhulukati lawo lasandza kufundza liciniso aba nesitunge nangabe emalunga emindeni nobe bangani bawo bangawemukeli nobe bawaphatsa kabi.

2. Ngumiphi imibuto lesitayiphendvula?

² Jehova wati konkhe ngatsi futsi uyasicondza. Uyati nangabe sinesitunge futsi ufuna kusisita. Jehova usisita njani? Yini tsine lesingayenta kuze sisitakale? Yini lesingayenta kuze sisite labanye ebandleni labanesitunge? Asesicoce ngetimphendvulo talemibuto.

3. Jehova wakhombisa njani kutsi bekanendzaba na-Elija?

³ Jehova ufuna bonkhe labamkhontako kutsi bajabule. Usedvute kuloyo naloyo kitsi, futsi uyabona nangabe siva buhlungu nobe sidvumele. (Hla. 145:18, 19) Cabanga kutsi Jehova wayinaka njani indlela umphrofethi Elija labekativa ngayo nekutsi wamsita njani. Lendvodza leyetsembekile yaphila ngesikhatsi lesimatima kakhulu emlandvweni wema-Israyeli.  Labasemagunyeni ka-Israyeli labebangamtsandzi Jehova bebaphatsa kabi labo labamtsandzako, futsi bebatimisele ngekubulala Elija. (1 Khos. 19:1, 2) Ngetulu kwaloko, Elija bekacabanga kutsi nguye yedvwa umphrofethi waJehova lobekasele futsi loko kwamdvumata kakhulu. (1 Khos. 19:10) Ngekushesha Nkulunkulu wamsita. Jehova watfumela ingilosi kute icinisekise lomphrofethi wakhe kutsi bekangasiyedvwa, bekamanyenti ema-Israyeli lebekesaba Nkulunkulu!—1 Khos. 19:5, 18.

4. Umbhalo waMakho 10:29, 30, ukhombisa njani kutsi Jehova uyabakhatsalela labo labadzele lusito lwemalunga emindeni yabo nobe bangani?

⁴ Jehova uyati kutsi nangabe sikhetsa kukhonta yena, labanye betfu kutawudzingeka badzele tintfo letinyenti. Lokunye lokungasilahlekela kungaba lusito lesilutfola kumalunga emndeni nobe bangani labangasibo boFakazi. Kungenteka umphostoli Phetro bekakhatsatekile ngesikhatsi abuta Jesu atsi: “Sishiye tonkhe tintfo sakulandzela; yini-ke lesitayitfola?” (Mat. 19:27) Ngemusa, Jesu watjela bafundzi bakhe kutsi libandla belitawufana nemndeni wabo. (Fundza Makho 10:29, 30.) Jehova, Babe wetfu losezulwini, wetsembisa kutsi utawubasita labo labafuna kumkhonta. (Hla. 9:10) Cabanga ngaletinye tintfo longatenta kuze Jehova akusite nangabe unesitunge.

5. Kuzuzisa ngani kucabanga ngendlela Jehova lakusita ngayo?

⁵ Cabanga ngendlela Jehova lakusita ngayo. (Hla. 55:22) Loko kutakusita ubone kutsi awusiwedvwa. Lomunye dzadze longakashadi lokutsiwa nguCarol, * futsi umndeni wakubo longasibo boFakazi, utsi: “Nangicabanga ngendlela Jehova langisite ngayo kutsi ngibeketelele tikhatsi letimatima, loko kungenta ngibone kutsi angisingedvwa. Kuyangicinisekisa nekutsi Jehova utawuhlale anami nasesikhatsini lesitako.”

6. Umbhalo wa-1 Phetro 5:9, 10, ungabakhutsata njani labo labanesitunge?

⁶ Cabanga ngendlela Jehova lasita ngayo bazalwane nabodzadze labanesitunge.  (Fundza 1 Phetro 5:9, 10.) Lomunye umzalwane lokutsiwa nguHiroshi, lesekuphele iminyaka leminyenti kunguye yedvwa Fakazi emndenini wakhe, utsi: “Ebandleni, kumelula kubona kutsi wonkhe muntfu unetinkinga. Kwati kutsi sonkhe setama kamatima kukhonta Jehova kungabakhutsata labanye betfu labasemindenini lengasibo boFakazi.”

7. Umthantazo ukusita njani?

⁷ Hlale uthantaza, ufundza liBhayibheli futsi uya emihlanganweni. Loku kufaka ekhatsi kutjela Jehova indlela lotiva ngayo. (1 Phet. 5:7) Massiel utsi: “Lokunye lokubaluleke kakhulu lokwangisita kutsi ngibhekane nesitunge kuthantaza njalo kuJehova.” Ngesikhatsi lodzadze losemusha ancuma kukhonta Jehova, waba nesitunge ngoba umndeni wakubo bewungamkhonti Jehova. Utsi: “Bekafana naBabe mbamba kimi. Bengithantaza kuye onkhe malanga tikhatsi letinyenti ngelilanga, ngimtjela indlela lebengitiva ngayo.”

8. Kukusita njani kufundza liVi laNkulunkulu nekuzindla ngalo?

⁸ Lifundze njalo liVi laNkulunkulu, uzindle ngetindzaba letikulo letikhombisa kutsi Jehova uyakutsandza. Lomunye dzadze lokutsiwa nguBianca, lokwadzingeka kutsi abeketelele emavi ladvumatako lebekashiwo ngumndeni wakhe, utsi: “Kufundza ngetindzaba letiseBhayibhelini nekuzindla ngato kanye nangalokwentekile kuletinye tikhonti taJehova letibhekene nesimo lesifana nesami, kungisita kakhulu.” Lamanye emaKhristu ayibamba ngengcondvo imibhalo ledvudvutako lenjengeTihlabelelo 27:10 na-Isaya 41:10. Kulalela lokurekhodiwe nabalungiselela imihlangano nobe nabatifundzela liBhayibheli kuyabasita labanye kutsi bangasiva kakhulu situnge.

9. Kukusita ngani kuya emihlanganweni?

⁹ Yenta konkhe lokusemandleni akho kuze ube khona njalo emihlanganweni. Imihlangano itakukhutsata futsi ungakhona nekubati kancono bazalwane bakho nabodzadze. (Heb. 10:24, 25) Massiel, lesike sakhuluma ngaye utsi: “Nanobe nginemahloni, ngancuma kuya kuyo yonkhe imihlangano yelibandla futsi ngiphendvule kuyo. Loko kwangisita ngativa ngiyincenye yelibandla.”

10. Kungani kubalulekile kutsi sakhe bungani nebazalwane betfu nabodzadze ebandleni?

¹⁰ Yakha bungani nemaKhristu letsembekile. Yakha bungani ebandleni nebantfu longafundza kubo, bangaba badzala nobe bancane kunawe, nobe babe nemasiko lehlukile kunewakho. LiBhayibheli liyasikhumbuta kutsi kuhlakanipha ‘kutfolakala kulasebakhulile.’ (Jobe 12:12) Labakhulile nabo bangafundza  lokunyenti kulabasebasha labetsembekile. Davide bekamncane kunaJonathani, kodvwa loko akuzange kubavimbele kutsi babe bangani. (1 Sam. 18:1) BoDavide naJonathani bebasitana kutsi bakhonte Jehova nanobe bekunetinkinga letimatima. (1 Sam. 23:16-18) Lomunye dzadze lokutsiwa ngu-Irina, lokunguye kuphela Fakazi emndenini wakubo utsi: “Bazalwane betfu nabodzadze bangafana mbamba nebatali betfu nobe bantfwana bakitsi. Jehova angabasebentisa kutsi babe ngumndeni lesiwudzingako.”

11. Yini lokufanele siyente kuze sibe nebangani labasedvute?

¹¹ Kwakha bungani akusimelula, ikakhulukati nawunemahloni. Lomunye dzadze lonemahloni lokutsiwa nguRatna, lowafundza liciniso nanobe bekaphikiswa, utsi: “Ngabona kutsi ngiyakudzinga kusitwa bazalwane nabodzadze ebandleni.” Kungaba matima kutjela umuntfu indlela lotiva ngayo, kodvwa nawenta njalo lomuntfu angaba ngumngani wakho losedvute. Bangani bakho bayafuna kukukhutsata nekukusita, kodvwa kufanele ubatjele kutsi bangakusita ngani.

12. Umsebenti wekushumayela ungakusita njani kutsi ube nebangani labakahle?

¹² Lenye indlela lekahle yekwakha bungani kutsi sishumayele nalamanye emaKhristu. Carol, lesike sakhuluma ngaye utsi: “Ngitfole bangani labanyenti labakahle ngekutsi ngicitse sikhatsi nebazalwane nabodzadze sisemsebentini wekushumayela futsi senta naleminye imisebenti lehambisana nekukhonta Jehova. Jehova ungisitile kuleminyaka asebentisa labangani.” Kwakha bungani nemaKhristu letsembekile kuhlale kusizuzisa. Jehova usebentisa labangani kuze basikhutsate nasidvumatekile ngenca yekuba nesitunge.—Taga 17:17.

13. Ngumuphi umsebenti lesinawo sonkhe ebandleni?

¹³ Bonkhe ebandleni kufanele bente libandla libe yindzawo lenekuthula, futsi batsandze bonkhe bazalwane kuze kubebete lotiva anesitunge. (Joh. 13:35) Lesikwentako nalesikushoko kungabakhutsata kakhulu labanye! Naka naku lokwashiwo ngulomunye dzadze: “Ngesikhatsi ngifundza liciniso, libandla lafana nemndeni wami. Bengingeke ngibe nguFakazi waJehova kube bengingasitwa ngilo.” Yini longayenta kuze usite labo labanemindeni lengasibo boFakazi kutsi bative bayincenye yelibandla?

14. Yini longayenta kuze wakhe bungani nalabasandza kuba boFakazi?

¹⁴ Yetama kwakha bungani nalabasandza kuba boFakazi. Singacala ngekubemukela ngemusa ebandleni bantfu labasandza kuba boFakazi. (Rom. 15:7) Kodvwa asifuni nje kugcina ngekubabingelela ngemusa. Njengobe sikhatsi sichubeka, sifuna bungani betfu bucine. Ngako bani nemusa, futsi ukhombise kutsi unendzaba nalabo labasandza kuba boFakazi. Yetama kwati tinkinga lababhekana nato, kodvwa ungababuti imibuto letababangela emahloni. Kungaba matima ngalabanye kutsi bakutjele indlela labativa ngayo, ngako ungabacindzeteli kutsi bakhulume. Kunaloko, babute ngekuhlakanipha imibuto letobenta bavete indlela labativa ngayo futsi ubalalele ngesineke njengobe bakuphendvula. Sibonelo nje, ungababuta kutsi balitfole njani liciniso.

15. EmaKhristu lavutsiwe angabasita njani labanye ebandleni?

¹⁵ Bonkhe ebandleni batoba nekukholwa lokucinile nangabe emaKhristu lavutsiwe, ikakhulukati labadzala belibandla babanaka.  Melissa, lowakhuliswa ngumake wakhe ecinisweni utsi: “Ngibabonga kakhulu bazalwane labebafana nababe kimi, lebebacitsa sikhatsi nami futsi banendzaba nami kuyo yonkhe leminyaka. Nobe nini nangifuna kukhuluma, uhlale akhona lotangilalela.” Lomunye umzalwane losemusha lokutsiwa nguMauricio, wativa alahliwe ngesikhatsi lobekamchubela sifundvo seliBhayibheli ashiya liciniso, utsi: “Labadzala belibandla bakhombisa kutsi bayangikhatsalela futsi loko kwangisita kakhulu. Bebahlale bacoca nami, bahamba nami nabayoshumayela, bangicocela nemaphuzu labawatfolile nabatidadishela liBhayibheli, futsi bebadlala nami.” Melissa naMauricio babese bangenela umsebenti wasikhatsi sonkhe.

16-17. Yini lenye lesingayenta kuze sisite labanye?

¹⁶ Sita labanye. (Gal. 6:10) Leo, lositfunywa selivangeli khashane kakhulu nemndeni wakubo, utsi: “Etikhatsini letinyenti, umuntfu udzinga kukhonjiswa umusa ngesikhatsi lesifanele. Ngikhumbula ngalelinye lilanga ngitfole ingoti yemoto. Ngesikhatsi ngifika ekhaya, bengikhatsateke kakhulu. Kodvwa labanye labashadene bangimema kutsi ngiyodla nabo. Angisakhumbuli kutsi sadlani, kodvwa ngiyakhumbula kutsi bangilalela ngemusa. Ngemuva kwaloko ngaba ncono!”

¹⁷ Sonkhe siyayijabulela imihlangano lemincane nalemikhulu ngenca yekutsi sicitsa sikhatsi nalabanye, sicoce ngeluhlelo lwemhlangano. Nanobe kunjalo, Carol lesike sakhuluma ngaye utsi: “Ngiba nesitunge nasisemihlanganweni lemincane nalemikhulu.” Kungani? Utsi: “Nanobe nginemakhulu nobe tinkhulungwane tebazalwane nabodzadze, etikhatsini letinyenti bavame kuhlala nemindeni yabo. Nangibabona ngibese ngitiva nginesitunge.” Kulabanye kumatima kuya emhlanganweni wesifundza nobe wesigodzi ngemuva nje kwekushonelwa ngulebebashade naye. Ukhona yini lomatiko lobhekene naletimo? Kungaba njani kutsi ummeme nibe ndzawonye emhlanganweni lolandzelako?

18. Singawusebentisa njani umbhalo wa-2 KubaseKhorinte 6:11-13 kulabanye?

¹⁸ Citsani sikhatsi ndzawonye. Yetama kucitsa  sikhatsi nebazalwane nabodzadze labehlukahlukene, ikakhulukati labo lokungenteka banesitunge. Sifuna ‘kuvula tinhlitiyo tetfu,’ ikakhulukati kubo. (Fundza 2 KubaseKhorinte 6:11-13.) Melissa lesike sakhuluma ngaye, utsi: “Besijabula kakhulu nangabe bazalwane nabodzadze basimemela emakhaya abo nobe kutsi sivakashe nabo.” Kukhona yini ebandleni lokulo longammema?

19. Kunini lapho lamanye emaKhristu angakutfola kulusito kutsi sicitse sikhatsi nawo?

¹⁹ EmaKhristu lesikanye nawo angajabula kakhulu nasingacitsa sikhatsi nawo. Kungaba matima ngalabanye kuba nemalunga emindeni yabo langasibo BoFakazi BaJehova nawagubha emaholidi. Labanye beva buhlungu kakhulu ngemalanga latsite, njengelilanga labashonelwa ngalo ngumuntfu labamtsandzako. Nangabe sicitsa sikhatsi nebazalwane nabodzadze lababhekene naletimo, sisuke sikhombisa kutsi sibakhatsalela mbamba.—Fil. 2:20.

20. Emavi aJesu lakuMatewu 12:48-50 asisita njani nasinesitunge?

²⁰ Tinyenti tizatfu letingenta umKhristu abe nesitunge. Nanobe kunjalo, kufanele sihlale sikhumbula kutsi Jehova uyayati indlela lesitiva ngayo. Etikhatsini letinyenti, usebentisa bazalwane betfu nabodzadze kuze basisite. (Fundza Matewu 12:48-50.) Natsi sikhombisa kutsi siyabonga ngekutsi sente konkhe lesingakwenta kuze sisite bazalwane betfu nabodzadze ebandleni. Kunobe ngiyiphi indlela lesingahle sitive ngayo, asisodvwa ngobe Jehova uhlale anatsi!