1. Yini Jehova lasentele yona sonkhe?

SONKHE Jehova usidvonsele kuye. (Joh. 6:44) Ase ucabange kutsi kusho kutsini loko. Jehova nakabukisisa tigidzigidzi tebantfu emhlabeni, wabona kutsi ucotfo nekutsi ungamtsandza, futsi loko kuligugu kuye. (1 Khr. 28:9) Jehova uyakwati, uyakucondza futsi uyakutsandza. Loko kuyasikhutsata!

2. Jesu wasisita njani kutsi sicondze indlela Jehova lakhatsalela ngayo ngamunye wetfu?

² Jehova unendzaba mbamba nawe futsi ubakhatsalela bonkhe bazalwane bakho nabodzadze. Kuze Jesu asisite sikucondze kancono loko, wafananisa Jehova nemelusi. Yini letawentiwa ngumelusi nangabe kulahleka imvu yinye kuletingu-100? ‘Utawushiya etintsabeni leti letingu-99, ahambe ayofuna lena lelahlekile.’ Nasekayitfolile, angeke ayitfukutselele. Utawujabula. Liyini liphuzu? Imvu ngayinye ibalulekile kuJehova. Jesu watsi: ‘Babe losezulwini akafisi kutsi kubhubhe ngisho namunye kulaba labanjengebantfwana.’—Mat. 18:12-14.

3. Sitawucoca ngani kulesihloko?

³ Asifuni nakancane kubadvumata bazalwane betfu nabodzadze. Yini lesingayenta kuze singabakhubi labanye? Yini lesingayenta nangabe lotsite asivisa buhlungu? Lemibuto sitayiphendvula kulesihloko. Kodvwa ase sicale sifundze kabanti ‘ngalaba labanjengebantfwana’ lokukhulunywa ngabo kuMatewu sehluko 18.

4. Bobani ‘laba labanjengebantfwana’?

⁴ ‘Laba labanjengebantfwana’ bafundzi baJesu bebudzala  lobehlukene. Ngisho nobe banganani ngeminyaka, ‘bafana nebantfwana labancane’ ngobe bayafuna kufundziswa nguJesu. (Mat. 18:3) Nanobe bavela etindzaweni letingafani, banemasiko langafani futsi banebuntfu lobungafani, bonkhe bayakholwa kuKhristu. Naye ubatsandza kakhulu.—Mat. 18:6; Joh. 1:12.

5. Jehova utiva njani nangabe lotsite akhuba nobe avisa buhlungu lomunye webantfu bakhe?

⁵ Bonkhe ‘laba labanjengebantfwana’ baligugu kuJehova. Kuze sicondze indlela lativa ngayo, cabanga ngendlela lesitiva ngayo ngebantfwana. Baligugu kitsi. Sifuna kubavikela ngobe bete emandla, kute lokunganani labakwatiko ngekuphila futsi abakahlakaniphi njengebantfu labadzala. Asijabuli nangabe lotsite aphatsa kabi lomunye umuntfu, kanganani-ke nangabe lotsite aphatsa kabi umntfwana. Ngendlela lefanako, Jehova ufuna kusivikela. Uphatseka kabi aze atfukutsele nangabe lotsite akhuba nobe avisa buhlungu lomunye webantfu bakhe!—Isa. 63:9; Mak. 9:42.

6. Ngekusho kwa-1 KubaseKhorinte 1:26-29, lelive libatsatsa njani bafundzi baJesu?

⁶ Nguyiphi lenye indlela bafundzi baJesu labafana ngayo ‘nebantfwana’? Bobani lelive lelibatsatsa njengalababalulekile? Ngulabanjingile, labadvumile nalabasemagunyeni. Ngalokwehlukile, bafundzi baJesu babonakala bangakabaluleki, ‘banjengebantfwana’ labangasilutfo. (Fundza 1 KubaseKhorinte 1:26-29.) Kodvwa Jehova akabatsatsi ngaleyo ndlela.

7. Jehova ufuna sitive njani ngebazalwane betfu nabodzadze?

⁷ Jehova utitsandza tonkhe tinceku takhe, ngisho nobe setimkhonte iminyaka leminyenti nobe tisandza kucala kumkhonta. Bonkhe bazalwane betfu nabodzadze babalulekile kuJehova, ngako natsi kufanele sibatsatse njengalababalulekile. Sifuna ‘kubatsandza bonkhe bazalwane,’ hhayi nje kutsi sitsandze labanye babo. (1 Phet. 2:17) Kufanele sente nobe yini kuze sibavikele futsi sibanakekele. Nangabe sibona kutsi ukhona lesimphetse kabi, akukafaneli sente shengatsi kute lokwentekile, sicabange kutsi kufanele asitsetselele futsi akhohlwe ngako. Yini lengenta labanye bakhubeke? Ngenca yendlela labakhule ngayo, kungenteka labanye bazalwane nabodzadze batibukela phansi. Labanye basandza kucala kukhonta Nkulunkulu; basengakafundzi kutsi kufanele babatsetselele labanye nabente emaphutsa. Kunobe ngutiphi timo, kufanele sente konkhe lesingakwenta kuze sakhe kuthula. Ngetulu kwaloko, nangabe umuntfu avame kuphatseka kabi, kufanele abone kutsi kudzingeka ente konkhe lokusemandleni akhe kuze atfutfukise buntfu bakhe. Nakenta njalo, utawujabula futsi abe nebuhlobo lobuhle nebazalwane bakhe.

8. Sabatsintsa njani bafundzi baJesu simo sengcondvo lebebanaso bantfu bebaphila ngaleso sikhatsi?

⁸ Yini leyenta Jesu wakhuluma ‘ngalaba labanjengebantfwana’? Bafundzi bakhe bebambute umbuto lotsi: “Ngubani vele lomkhulu kunabo bonkhe eMbusweni wemazulu?” (Mat. 18:1) Ngaleso sikhatsi, emaJuda lamanyenti bekatsatsa sikhundla njengentfo lebaluleke kakhulu. Lesinye sati satsi: “Bantfu bebaphilela ludvumo, ligama, kwemukelwa nekuhlonishwa.”

9. Yini lebekufanele yentiwe bafundzi baJesu?

⁹ Jesu bekati kutsi emaJuda lamanyenti bekacabanga kutsi kubalulekile kuba ncono kunalabanye, nekutsi bafundzi bakhe bekufanele basebente kamatima kuze bashintje lendlela yabo yekucabanga. Watsi kubo: “Loyo lomkhulu emkhatsini wenu kufanele  abe njengalomncane kunani nonkhe, naloyo loniholako kufanele abe njengesisebenti.” (Luk. 22:26) Sitiphatsa ‘njengalabancane’ ‘nasitsatsa labanye njengalabakhulu’ kunatsi. (Fil. 2:3) Nangabe sitimisela kucabanga ngalendlela, atawuba mancane ematfuba ekukhuba labanye.

10. Ngusiphi seluleko saPawula lokufanele sisisebentise?

¹⁰ Ngandlela tsite, bonkhe bazalwane betfu nabodzadze bakhulu kunatsi. Kumelula kukubona loko nasinaka buntfu babo lobuhle. Kufanele sihlale sicabanga ngeseluleko umphostoli Pawula lasinika baseKhorinte lesitsi: “Ngubani lokwenta wehluke kulomunye? Ecinisweni yini lonayo longazange uphiwe yona? Nangabe wayiphiwa, utigabatiselani shengatsi awuzange uyiphiwe?” (1 Khor. 4:7) Kufanele sikubalekele kufuna labanye kutsi banake tsine nobe kutitsatsa njengalabakhulu kunalabanye. Nangabe umzalwane anelikhono lekubeka tinkhulumo nobe nangabe dzadze anelikhono lekucalisa tifundvo teliBhayibheli, kufanele kutsi lonkhe ludvumo ahlale alunika Jehova.

11. Yini Jesu lebekasifundzisa yona ngesikhatsi asebentisa umfanekiso lomayelana nenkhosi nesisebenti sayo?

¹¹ Ngemuva kwekutsi Jesu sekecwayise balandzeli bakhe ngekukhuba labanye, wabese usho umfanekiso lomayelana nenkhosi nesisebenti sayo. Lenkhosi yesula sikweleti lesikhulu salesisebenti lebesingeke sikhone kusibhadala. Ngemuva kwesikhatsi, lesisebenti sala kwesula sikweleti lesincane salesinye sisebenti. Ekugcineni, lenkhosi yavalela ejele lesisebenti lesite umusa. Sifundzani? Jesu watsi: “NaBabe losezulwini utawenta lokufanako kini nangabe ningabacoleli labanye bantfu ngalokusuka enhlitiyweni.”—Mat. 18:21-35.

12. Sibavisa njani buhlungu labanye nangabe singabacoleli?

¹² Loko lokwentiwa ngulesisebenti akuzange kulimate sona kuphela, kodvwa kwalimata nalabanye. Kwekucala, asizange sisikhombise umusa lesi lesinye sisebenti, ngobe “sasifaka ejele kute sihlale lapho site sibhadale konkhe lesasisikweleta kona.” Kwesibili, sativisa buhlungu leti letinye tisebenti letabona loko lesakwenta. Tatsi “leletinye tisebenti natibona konkhe loku lobekwentekile, teva buhlungu kakhulu.” Ngendlela lefanako, lesikwentako kuyabatsintsa labanye. Yini lengenteka nangabe lotsite asiphatsa kabi futsi sale kumcolela? Kwekucala, simvisa buhlungu ngekutsi singamcoleli, singamnaki futsi singamkhombisi lutsandvo. Kwesibili, senta labanye ebandleni bangajabuli nababona kutsi asivani naloyo muntfu.

13. Yini loyifundzako kulokwenteka kulelinye lihlahlandlela?

¹³ Nangabe sicolela bazalwane betfu nabodzadze, siyajabula futsi nalabanye bayajabula. Nguloko lokwenteka kulelinye lihlahlandlela lesitalibita ngekutsi nguCrystal. Waviswa buhlungu ngulomunye dzadze ebandleni. Nakakhumbula utsi: “Emavi akhe lete umusa bekangihlaba njengemukhwa. Bengingafuni ngisho nekuhamba naye nasiyoshumayela. Bese ngite umdlandla ngemsebenti wekushumayela futsi bengingasajabuli.” Crystal bekeva shengatsi unetizatfu letivakalako tekutfukutsela. Kodvwa akazange ahlale amtfukutselele lodzadze nobe anake indlela lativa ngayo. Watitfoba wasebentisa seluleko lesiseBhayibhelini lebesitfolakala esihlokweni lesitsi “Thethelela Ngokusuka Enhliziyweni” ku-Sicongosekulindza sa-October 15, 1999, lesitfolakala ngesiZulu. Wamcolela lodzadze. Crystal utsi: “Nyalo sengiyacondza kutsi sonkhe setama kamatima kugcoka buntfu lobusha nekutsi  Jehova uhlale akulungele kusitsetselela onkhe malanga. Ngiva shengatsi ngetfulwe umtfwalo losindzako. Sengiphindze ngiyajabula.”

14. Ngekusho kwaMatewu 18:21, 22, nguyiphi inkinga lokubonakala shengatsi umphostoli Phetro bekanayo, futsi yini loyifundza emphendvulweni yaJesu?

¹⁴ Siyati kutsi kufanele sicolele; futsi yintfo lekahle kutsi siyente. Kodvwa kungahle kube matima kwenta njalo. Kungenteka ngaletinye tikhatsi umphostoli Phetro bekativa ngalendlela. (Fundza Matewu 18:21, 22.) Yini lengasisita? Kwekucala, zindla ngekutsi kukanyenti kangakanani Jehova akucolela. (Mat. 18:32, 33) Kute lokusenta sifanelwe kutsetselelwa nguye, kodvwa usitsetselela ngalokukhululekile. (Hla. 103:8-10) Ngesikhatsi lesifanako, “natsi sibophekile kutsi sitsandzane.” Ngako kutsetselela akusiyo intfo lesingakhetsa kuyenta nobe kungayenti. Kufanele sibatsetselele bazalwane nabodzadze. (1 Joh. 4:11) Kwesibili, zindla ngaloko lokwentekako nasitsetselela. Singamsita lomuntfu losonile, sente libandla libe nebunye, sihlale sibangani baJehova futsi sijabule. (2 Khor. 2:7; Khol. 3:14) Kwekugcina, thantaza kuLoyo losicela kutsi sicolele. Ungamvumeli Sathane aphazamise kuthula lonako nebazalwane bakho. (Ef. 4:26, 27) Sidzinga kusitwa nguJehova kuze sibe nekuthula ebandleni.

15. Ngekusho kwembhalo waKubaseKholose 3:13, yini lokufanele siyente nangabe umzalwane nobe dzadze asiphetse kabi?

¹⁵ Utawenta njani nangabe umzalwane nobe dzadze ente intfo lengakuphatsi kahle? Yenta konkhe lokusemandleni akho kuze ulondvolote kuthula. Thantaza utjele Jehova indlela lotiva ngayo. Mcele amsite lona lokuphetse kabi futsi akusite nawe ubone buntfu bakhe lobuhle lobumenta amtsandze. (Luk. 6:28) Nangabe ungakhoni kukwendlulisa loko  umzalwane wakho lakwente kona, cabanga ngendlela lekahle yekukhuluma naye. Kukahle kuhlale ucabanga kutsi umzalwane wakho angeke akuvise buhlungu ngenhloso. (Mat. 5:23, 24; 1 Khor. 13:7) Nawukhuluma naye, titjele kutsi umzalwane wakho unetisusa letinhle. Yini longayenta nangabe angafuni kwakha kuthula? ‘Chubeka umbeketelela.’ Chubeka uba nesineke. (Fundza KubaseKholose 3:13.) Lokubaluleke kakhulu kutsi ungahlali umtfukutselele, ngobe loko kungalimata buhlobo bakho naJehova. Ungavumeli lutfo kutsi ikukhube. Nawenta njalo, utawube ukhombisa kutsi Jehova umtsandza kwendlula nobe ngabe yini lenye.—Hla. 119:165.

16. Nguyiphi indzima ngamunye wetfu lokufanele ayidlale?

¹⁶ Silitsatsa njengalelibaluleke kakhulu lilungelo lekukhonta Jehova ngebunye ‘singumhlambi munye’ ngephansi ‘kwemelusi munye’! (Joh. 10:16) Incwadzi letsi “Ukuhlelelwa Ukwenza Intando KaJehova” ekhasini 165, itsi: “Njengobe ubujabulela lobunye, kufanele udlale indzima yakho ekubulondvoloteni.” Ngako kufanele “sifundze kubuka bazalwane betfu nabodzadze ngendlela Jehova lababuka ngayo.” KuJehova, sonkhe ‘sinjengebantfwana’ labaligugu. Nguleyo yini indlela lobatsatsa ngayo bazalwane bakho nabodzadze? Jehova uyakunaka futsi ukutsatsa njengalokubalulekile konkhe lokwentako kuze ubasite futsi ubanakekele.—Mat. 10:42.

17. Yini lesitimisele kuyenta?

¹⁷ Siyabatsandza bazalwane betfu nabodzadze. Ngako ‘sitimisele kutsi singenti tintfo letingakhuba umzalwane wetfu nobe timphambukise.’ (Rom. 14:13) Sitsatsa bazalwane betfu nabodzadze njengalabakhulu kunatsi, futsi sifuna kubacolela ngalokusuka enhlitiyweni. Shengatsi singete savuma kutsi labanye basikhube. Kunaloko, “asenteni konkhe lokusemandleni etfu kuze sibe nekuthula nalabanye futsi sakhane.”—Rom. 14:19.