1. Sicumbi lesikhulu sebantfu ngelikhulu lekucala satjelwa kutsi senteni?

SICUMBI lesikhulu semadvodza nebafati besiseJerusalema. Besichamuka emaveni lamanyenti lehlukene futsi sikhuluma tilwimi letinyenti letingafani. Ngalelolanga, kwenteka intfo lemangalisako. Lamanye emaJuda, akhona kukhuluma tilwimi talabantfu lebebavakashile. Nanobe loko kwasimangalisa lesicumbi sebantfu, kodvwa lokwashiwo ngemaJuda nalokwashiwo ngumphostoli Phetro kwasimangalisa kakhulu. Loko lesakuva bekufaka ekhatsi umlayeto lobewutsi kuze sisindze, bekufanele sikholwe kuJesu Khristu. Lomlayeto wasitsintsa kakhulu lesicumbi sebantfu. Labantfu batsintseka kakhulu baze babuta batsi: “Kufanele senteni?” Phetro wabaphendvula watsi: ‘Bhajatiswani.’—Imis. 2:37, 38.

2. Sitawucoca ngani kulesihloko? (Buka sitfombe lesisekhasini lekucala.)

² Ngemuva kwaloko, kwenteka intfo lenhle kakhulu. Bantfu labangaba ngu-3 000 babhajatiswa ngalelolanga, baba bafundzi baKhristu. Loko bekusho kucala kwemsebenti lomkhulu wekwenta bafundzi, Jesu latjela balandzeli bakhe kutsi bawente. Nalamuhla, balandzeli bakhe basawenta lomsebenti. Lamuhla, asicoci nebantfu ema-awa lambalwa bese bayakulungela kubhajatiswa. Kungatsatsa tinyanga, umnyaka nobe ngetulu kutsi umfundzi agcine abhajatisiwe. Kudzingeka sisebente ngekutimisela kuze sisite lotsite kutsi abe ngumfundzi waKhristu, futsi nawe uyakwati loku nangabe kukhona lofundza naye liBhayibheli. Kulesihloko, sitawucoca ngekutsi yini longayenta kuze usite lofundza naye liBhayibheli abe ngumfundzi lobhajatisiwe.

3. Njengobe kusho Matewu 28:19, 20, yini umfundzi lokufanele ayente kuze agcine abhajatisiwe?

³ Ngaphambi kwekutsi umfundzi abhajatiswe, kufanele akusebentise loko lokufundziswa liBhayibheli. (Fundza Matewu 28:19, 20.) Nangabe umfundzi akusebentisa lakufundzako, ufana “nendvodza lehlakaniphile” lesemfanekisweni waJesu, leyagubha kwashona kuze yakhe indlu yayo edvwaleni. (Mat. 7:24, 25; Luk. 6:47, 48) Singamsita njani umfundzi kutsi akusebentise loko lakufundzako? Asesicoce ngetintfo letintsatfu lesingatenta.

4. Singamsita njani umfundzi atfutfuke kuze alungele kubhajatiswa? (Buka libhokisi lelitsi, “ Sita Lofundza Naye Kutsi Atibekele Imigomo Futsi Ayifinyelele.”)

⁴ Sita lofundza naye kutsi atibekele imigomo. Kungani kufanele sente njalo? Asesifanekise: Asesitsi uvakashela endzaweni lekhashane. Njengobe uhamba, ungakhetsa kuhle uma etindzaweni letinhle. Ngenca yaloko, angeke ubone kutsi lendzawo loya kuyo ikhashane. Ngendlela lefanako, nangabe umfundzi atibekela imigomo langayifinyelela ngemuva kwesikhashana, utawubona kutsi angawufinyelela newekubhajatiswa. Sebentisa incenye letsi “Umgomo” lesencwadzini letsi Jabulela Kuphila Kuze Kube Phakadze! kuze usite umfundzi atfutfuke. Ngemuva kwesifundvo ngasinye, cocani ngekutsi lomgomo ungamsita njani umfundzi kuze asebentise loko lasandza kukufundza. Nangabe ufuna umfundzi abe nalomunye umgomo, ungawubhala kulesikhala lesitsi “Leminye Imigomo Lotibekela Yona.” Hlale ucoca nemfundzi ngemigomo langayifinyelela ngemuva kwesikhashana naleyo langayifinyelela ngemuva kwesikhatsi.

5. Njengobe kusho Makho 10:17-22, yini Jesu latjela indvodza lenjingile kutsi iyente, futsi kungani?

⁵ Sita umfundzi kutsi ente lushintjo ekuphileni kwakhe. (Fundza Makho 10:17-22.) Jesu bekati kutsi bekutawuba matima kutsi lendvodza lenjingile itsengise tonkhe tintfo tayo. (Mak. 10:23) Kodvwa wayitjela kutsi yente lolushintjo  lolukhulu ekuphileni kwayo. Kungani? Ngobe bekayitsandza. Ngalesinye sikhatsi, singahle singamkhutsati umuntfu lesifundza naye kutsi asebentise lakufundzako ngobe sicabanga kutsi usengakakulungeli kwenta lushintjo loludzingekile. Kungatsatsa sikhatsi kutsi bantfu bakhumule buntfu lobudzala futsi bagcoke buntfu lobusha. (Khol. 3:9, 10) Kodvwa nangabe ushesha kukhuluma nemfundzi ngelushintjo lokudzingeka alwente, naye utawushesha kwenta lolushintjo. Nawukhuluma naye ngalendzaba, utawube ukhombisa kutsi uyamkhatsalela.—Hla. 141:5; Taga 27:17.

6. Kungani kufanele sisebentise imibuto letawenta umfundzi avete lakucabangako?

⁶ Kubalulekile kutsi ubute lofundza naye kutsi ucabangani ngaloko lenifundza ngako. Loko kutakusita ubone kutsi yini umfundzi layicondzako nalayikholelwako. Nawuhlale wenta njalo, kutawuba melula esikhatsini lesitako kucoca naye ngetintfo latitfola kumatima kutemukela. Incwadzi letsi Jabulela Kuphila Kuze Kube Phakadze!, inemibuto leminyenti leyenta kutsi umfundzi avete lakucabangako. Nasi sibonelo, sifundvo 04 sinembuto lotsi: “Ucabanga kutsi Jehova utiva njani nawusebentisa ligama lakhe?” Sifundvo 09 sinembuto lotsi: “Ngutiphi letinye tintfo longatsandza kuthantaza ngato?” Ekucaleni, kungahle kube matima kutsi umfundzi ayiphendvule lemibuto. Ungamsita ngekutsi umceceshe acabange ngemibhalo nangetitfombe letihambisana naloko lenicoca ngako kulencwadzi.

7. Singakusebentisa njani kahle lokwenteke kulabanye?

⁷ Nangabe umfundzi sekakucondza loko lokudzingeka akwente, sebentisa lokwenteke kulabanye bantfu kuze umkhutsate kutsi akwente. Nasi sibonelo, nangabe akutfola kumatima kuya emihlanganweni, ungamkhombisa i-video letsi Jehova Wanginakekela, lesencenyeni letsi “Lokunye Longakuhlola,” esifundvweni 14. Tifundvo letinyenti letisencwadzini letsi Jabulela Kuphila Kuze Kube Phakadze! tinetindzaba letimayelana nalokwenteka kulabanye ngephansi kwencenye letsi, “Chubeka Ufunisisa” nobe letsi “Lokunye Longakuhlola.” * Caphela kutsi ungamcatsanisi umfundzi nalomunye umuntfu ngekutsi utsi, “Nangabe akhona kukwenta, nawe ungakhona.” Akatibonele yena loko lokufanele akwente. Esikhundleni saloko, coca ngetintfo letasita lomuntfu lokukhulunywa ngaye kule-video kutsi asebentise timfundziso teliBhayibheli. Ungakhuluma ngembhalo lobalulekile nobe ngentfo letsite layenta. Nakungenteka, gcizelela indlela Jehova lamsita ngayo lomuntfu.

8. Singabasita njani labo lesibafundzelako kutsi bamtsandze Jehova?

⁸ Sita lofundza naye kutsi atsandze Jehova. Kanjani? Funa ematfuba ekufundzisa umfundzi ngebuntfu baJehova. Sita umfundzi acondze kutsi Jehova unguNkulunkulu lojabulako, nekutsi uyabasita labo labamtsandzako. (1 Thim. 1:11; Heb. 11:6) Mkhombise kutsi utawuzuza ngekusebentisa lakufundzako, umchazele nekutsi loko kukhombisa kutsi Jehova uyamtsandza. (Isa. 48:17, 18) Njengobe lutsandvo lwakhe ngaJehova lukhula, lutamsita kutsi ente lushintjo loludzingekako.—1 Joh. 5:3.

9. Ngekuvumelana naMakho 10:29, 30, yini lengasita umuntfu kutsi atidzele kuze abe ngumfundzi lobhajatisiwe?

⁹ Kuze umfundzi atfutfuke aze abhajatiswe, kutawudzingeka adzele lokutsite. Njengalendvodza lenjingile lesike sakhuluma ngayo, labanye  bafundzi kungase kudzingeke badzele umcebo. Nangabe umsebenti labatiphilisa ngawo ungavumelani netimiso teliBhayibheli, kungadzingeka bawushintje. Labanyenti kungahle kudzingeke bashiye bangani labangamtsandzi Jehova. Labanye bangahle balahlwe ngemalunga emindeni langabatsandzi BoFakazi BaJehova. Jesu wavuma kutsi kungahle kube matima ngalabanye bantfu kutsi batidzele ngalendlela. Kodvwa wetsembisa kutsi labo labamlandzelako ngeke badvumateke. Jehova utababusisa ngekubanika umndeni lobatsandzako kubantfu bakhe. (Fundza Makho 10:29, 30.) Ungamsita njani umuntfu lomfundzela liBhayibheli kutsi azuze kulesipho lesihle kangaka?

10. Yini loyifundza kulokwenteka kuManuel?

¹⁰ Bani ngumngani wemuntfu lofundza naye liBhayibheli. Kubalulekile kukhombisa loyo lofundza naye kutsi uyamkhatsalela. Kungani? Naka naku lokwashiwo nguManuel lohlala eMexico. Nakakhumbula ngesikhatsi asachutjelwa sifundvo seliBhayibheli, utsi: “Ngaphambi kwekutsi sifundze, loyo lebekangifundzisa bekangibuta kutsi nginjani. Bekangisita kutsi ngingesabi, ngikhululeke kukhuluma naye nganobe yini. Bengitibonela kutsi ungikhatsalela mbamba.”

11. Lesibafundzelako bangazuza njani nasicitsa sikhatsi nabo?

¹¹ Citsa sikhatsi nalabo lobafundzelako, njengobe naJesu acitsa sikhatsi nebalandzeli bakhe. (Joh. 3:22) Nangabe lofundza naye atfutfuka, mmemele ekhaya lakho kutsi nitonatsa litiya, nitodla nobe nitobukela umsakato we-JW. Kungenteka umfundzi angajabula kakhulu nawungammema ngesikhatsi semaholidi, ngobe kungenteka unesitunge. Kazibwe lohlala e-Uganda utsi: “Kucitsa sikhatsi naloyo bekangifundzela nako kwangisita ngafundza lokunyenti ngaJehova. Ngabona kutsi Jehova ubanakekela kakhulu bantfu bakhe nekutsi bahlala bajabulile. Nguloko lebengikufuna ekuphileni kwami.”

12. Kungani kufanele sihambe nebamemeteli labehlukahlukene nasiyochuba sifundvo?

 ¹² Nawuyochuba sifundvo, hamba nebamemeteli labehlukahlukene. Ngaletinye tikhatsi, singakutfola kumelula kuhamba sodvwa nobe kuhamba nemmemeteli lofanako. Nanobe loko kumelula, lesifundza naye liBhayibheli angazuza nasingeta nebamemeteli labehlukahlukene. Dmitrii lohlala eMoldova utsi: “Ummemeteli ngamunye lobekaba khona nangifundza bekachaza tintfo ngendlela leyehlukile. Loko kwangisita ngabona letinye tindlela lebengingakusebentisa ngato loko bengikufundza. Kwaphindze kwangisita ngangabi nemahloni nangiya kwekucala emihlanganweni ngobe besengibati bazalwane nabodzadze labanyenti.”

13. Kungani kufanele sisite umuntfu lesifundza naye kutsi aye emihlanganweni?

¹³ Sita lofundza naye kutsi aye emihlanganweni yelibandla. Kungani? Ngobe Jehova ufuna kutsi tikhonti takhe tihlangane ndzawonye; kuyindlela lesimkhonta ngayo. (Heb. 10:24, 25) Ngetulu kwaloko, bazalwane nabodzadze ebandleni bafana nemndeni wetfu. Nangabe sihlangene ndzawonye emihlanganweni, kufana nekutsi sisekhaya sidla kudla lokumnandzi. Nangabe usita lofundza naye kutsi aye emihlanganweni, usuke umsita kutsi ente intfo lebaluleke kakhulu lengenta kutsi agcine abhajatisiwe. Kodvwa kungahle kube lukhuni kutsi aye emihlanganweni. Incwadzi letsi Jabulela Kuphila Kuze Kube Phakadze! ingamsita njani umuntfu lofundza naye kutsi ancobe nobe ngutiphi tinkinga letimvimba kutsi aye emihlanganweni?

14. Singamkhutsata njani umfundzi kutsi aye emihlanganweni?

¹⁴ Sebentisa sifundvo 10 lesisencwadzini letsi Jabulela Kuphila Kuze Kube Phakadze! kuze ukhutsate umfundzi kutsi aye emihlanganweni. Ngaphambi kwekutsi lencwadzi ikhululwe, labanye bamemeteli bacelwa kutsi basebentise lesifundvo kubantfu labafundza nabo. Batsi isebente kahle kakhulu futsi ibasitile labo labafundza nabo kutsi baye emihlanganweni. Kodvwa ungameli kutsi nize nifike esifundvweni 10 ngaphambi kwekutsi umemele umfundzi emihlanganweni. Mmeme ngekushesha futsi uchubeke ummema. Bafundzi labehlukahlukene banetinkinga letingafani. Ngako tinake tidzingo temfundzi futsi umsite nangabe ungakhona. Ungapheli emandla nangabe kuphela sikhatsi lesidze solo angayi emihlanganweni. Bani nesineke futsi uchubeke ummema.

15. Yini lokungenteka bayesabe labo lesifundza nabo liBhayibheli?

¹⁵ Uyakhumbula yini ngesikhatsi wesaba kuba nguFakazi waJehova? Kungenteka bewuva shengatsi ngeke ukhone kushumayela. Mhlawumbe bewesaba kutsi umndeni nebangani bakho batakuphikisa. Nangabe bewutiva ngalendlela, ungayicondza indlela lativa ngayo lofundza naye liBhayibheli. Jesu washo kutsi labanye bantfu bebatawesaba. Nanobe kunjalo, wakhutsata balandzeli bakhe kutsi bangakuvumeli kwesaba kubente bangamkhonti Jehova. (Mat. 10:16, 17, 27, 28) Jesu wabasita njani balandzeli bakhe kutsi bancobe kwesaba? Singasilingisa njani sibonelo sakhe?

16. Singamcecesha njani umfundzi kutsi acocele labanye ngaloko lakufundzako?

¹⁶ Chubeka ucecesha umfundzi kutsi acocele labanye ngaloko lakufundzako. Kungenteka bafundzi baJesu bebesaba ngesikhatsi abatfuma kutsi bayoshumayela. Kodvwa wabasita ngekutsi abatjele kutsi bashumayele kuphi nekutsi bashumayele batsini. (Mat. 10:5-7) Ungamlingisa njani Jesu? Sita umfundzi abone kutsi angashumayela kuphi. Nasi sibonelo, mbute kutsi ukhona yini lacabanga kutsi kungamsita kufundza liciniso lelitsite leliseBhayibhelini. Ngemuva kwaloko, msite alungiselele latakusho  ngekutsi umkhombise indlela lemelula yekumcocela leliciniso. Nangabe timo tivuma, ningalungiselela nisebentisa tincenye letitsi, “Labanye Bantfu Batsi” naletsi “Lomunye Angase Akubute,” letitfolakala encwadzini letsi Jabulela Kuphila Kuze Kube Phakadze! Nawusebentisa letincenye, cecesha umfundzi kutsi asebentise liBhayibheli kuze aphendvule ngendlela lemelula nalehlakaniphile.

17. Singawusebentisa njani umbhalo waMatewu 10:19, 20, 29-31 kuze sisite umfundzi kutsi etsembele kuJehova?

¹⁷ Sita umfundzi kutsi etsembele kuJehova. Jesu wacinisekisa bafundzi bakhe kutsi Jehova utawubasita ngobe uyabatsandza. (Fundza Matewu 10:19, 20, 29-31.) Khumbuta lofundza naye liBhayibheli kutsi Jehova utamsita. Ungamsita etsembele kuJehova ngekutsi uthantaze naye usho imigomo yakhe. Franciszek lohlala ePoland utsi: “Lobekangifundzisa bekavame kusho imigomo yami nakathantaza. Nangibona indlela Jehova bekayiphendvula ngayo imithantazo yakhe, ngekushesha nami ngacala kuthantaza. Bengibona kutsi Jehova uyangisita ngesikhatsi ngicela sikhatsi emsebentini wami lomusha kuze ngiye emhlanganweni welibandla newesifundza.”

18. Jehova utiva njani ngemsebenti lowentiwa bamemeteli?

¹⁸ Jehova ubakhatsalela kakhulu labo lesifundza nabo liBhayibheli. Uyati kutsi bamemeteli basebenta kamatima kuze basite bantfu basondzelane naye, futsi ngenca yaloko uyabatsandza. (Isa. 52:7) Nangabe kusete lofundza naye liBhayibheli, ungabasita labafundzelwako kutsi batfutfuke baze babhajatiswe ngekutsi uhambe nalabanye bamemeteli nabayochuba tifundvo.