1. Ngutiphi tinkinga bantfu baJehova labangahle babe nato?

UBHEKENE nenkinga lematima yini? Mhlawumbe lotsite ebandleni ukuvise buhlungu. (Jak. 3:2) Mhlawumbe losebenta nabo nobe lofundza nabo esikolweni bayakuhleka ngenca yekutsi ukhonta Jehova. (1 Phet. 4:3, 4) Kungenteka emalunga emndeni etama kukuvimbela kutsi uye emihlanganweni nobe ucocele labanye ngekukholwa kwakho. (Mat. 10:35, 36) Nangabe inkinga lobhekene nayo imatima kakhulu ungahle uve shengatsi kuncono kuyekela kukhonta Jehova. Kodvwa ciniseka kutsi kunobe nguyiphi inkinga lonayo, Jehova utakunika kuhlakanipha kuze ubhekane nayo futsi akunike nemandla ekuyibeketelela.

2. Emavi laKubaseRoma 15:4 atsi kungasisita njani kufundza liVi laNkulunkulu?

² EVini lakhe, Jehova uchaza indlela bantfu labanesono labakhone ngayo kuncoba tinkinga letimatima. Leni? Kuze sitofundza kubo. Nguloko Jehova laphefumulela umphostoli Pawula kutsi akubhale. (Fundza KubaseRoma 15:4.) Kufundza ngaletindzaba kungasidvudvuta futsi kusinike litsemba. Nobe kunjalo, kuze sizuze kufanele sente lokungetulu nje kwekumane sifundze liBhayibheli. Kufanele sivumele imiBhalo ishintje indlela lesicabanga ngayo futsi itsintse netinhlitiyo tetfu. Yini lesingayenta nangabe sidzinga sicondziso kuze sibhekane nenkinga letsite? Naku lesingakwenta: (1) Thantaza, (2) Bona ngeliso lengcondvo, (3) Zindla, futsi (4) Kusebentise. Asicoce ngekutsi singakwenta njani loku. * Sitawubese sisebentisa  lendlela yekudadisha kuze sifundze kulokwenteka eNkhosini Davide nakumphostoli Pawula.

3. Ngaphambi kwekutsi ufundze liBhayibheli, yini lokufanele uyente, futsi kungani?

³ (1) Thantaza. Ngaphambi kwekutsi ucale kufundza liBhayibheli, cela Jehova akusite ubone indlela longazuza ngayo kuloku lokufundzako. Nasi sibonelo, nangabe ufuna seluleko sekutsi ungabhekana njani nenkinga letsite, cela Jehova akusite utfole timiso letiseVini lakhe letingakucondzisa.—Fil. 4:6, 7; Jak. 1:5.

4. Yini longayenta kuze indzaba loyifundza eBhayibhelini ibe yindzaba mbamba kuwe?

⁴ (2) Bona ngeliso lengcondvo. Jehova usinikete likhono lelimangalisako lekucabanga ngetintfo. Kuze indzaba leseBhayibhelini ibe yindzaba mbamba kuwe, tibone ngeliso lengcondvo tintfo letentekako futsi uticabange ungulomuntfu lofundza ngaye. Yetama kubona tintfo latibonako futsi wetame kutiva ngendlela naye bekativa ngayo.

5. Kuyini kuzindla, futsi ungakwenta njani?

⁵ (3) Zindla. Kuzindla kusho kucabangisisa ngaloko lokufundzako nekutsi kukutsintsa njani. Kusisita kutsi sihlanganise imicondvo futsi sikucondze kancono loko lesikufundzako. Kufundza liBhayibheli kepha ungazindli kufana nekupheka kudla kodvwa ungatifaki tonkhe tintfo letingenta lokudla kube mnandzi. Ngako kuzindla kufana nekutifaka tonkhe letintfo letidzingekako kuze kube mnandzi. Kuze ukhone kuzindla, tibute futsi utiphendvule imibuto lenjengaletsi: ‘Lona lokukhulunywa ngaye kulendzaba, wenta njani kuze acatulule lenkinga? Jehova wamsita njani? Ngingatisebentisa njani tifundvo lengitifundzile kuze ngikhone kucinisela nanginetinkinga?’

6. Kungani kufanele sikusebentise loko lesikufundzako?

⁶ (4) Kusebentise. Jesu watsi nangabe singakusebentisi loko lesikufundzako, sifana nendvodza leyakha indlu yayo esihlabatsini. Isebenta kamatima, kodvwa imosha emandla ayo. Kungani? Ngobe nakungafika siphepho nobe sikhukhula ingadzilika lendlu. (Mat. 7:24-27) Ngendlela lefanako, nangabe sithantaza, sibona ngeliso lengcondvo, futsi sizindla kodvwa singakusebentisi loko lesikufundzako sitawube sidlala ngemandla etfu. Ngako nangabe sinetinkinga nobe siphatfwa kabi, kukholwa kwetfu kutawuba butsakatsaka. Kodvwa nangabe sidadisha futsi sikusebentisa loko lesikufundzako, sitawenta tincumo letikahle, sibe nekuthula kanye nekukholwa lokucinile. (Isa. 48:17, 18) Sisebentisa letindlela letine lesesicoce ngato, ase sibone kutsi yini lesingayifundza kulokwenteka eNkhosini Davide.

7. Nyalo sitawufundza ngayiphi indzaba leseBhayibhelini?

⁷ Ukile yini waviswa buhlungu ngumngani wakho nobe lilunga lemndeni? Nangabe kunjalo, kutakusita kufundza ngalokwentiwa yiNkhosi Davide ngesikhatsi indvodzana yayo Absalomu imvisa buhlungu futsi yetama kuba yinkhosi.—2 Sam. 15:5-14, 31; 18:6-14.

8. Yini longayenta kuze Jehova akusite?

⁸ (1) Thantaza. Unalendzaba engcondvweni, tjela Jehova indlela lotiva ngayo ngenca yalokuphatfwa kabi lobhekene nako. (Hla. 6:6-9) Mchazele indlela lotiva ngayo. Ngemuva kwaloko, cela Jehova akusite ubone timiso longatisebentisa kuze ukhone kubhekana nalenkinga.

9. Chaza kutsi yini leyenteka emkhatsini waDavide na-Absalomu?

⁹ (2) Bona ngeliso lengcondvo. Cabanga  ngetintfo letenteka kulendzaba nendlela iNkhosi Davide leyatsintseka ngayo. Absalomu wasebenta kamatima iminyaka leminyenti kuze ente bantfu bamtsandze. (2 Sam. 15:7) Ngesikhatsi Absalomu sekabona kutsi sesikhatsi lesikahle, watfumela tinhloli kulo lonkhe live laka-Israyeli kuze tiyowenta bantfu bamemukele kutsi abe yinkhosi yabo. Waphindze wancenga na-Ahithofeli, umngani lomkhulu waDavide lobekaphindze abe ngumeluleki wakhe, kutsi amsekele kulokuvukela. Absalomu wamemetela kutsi uyinkhosi, wetama kuhlasela nekubulala Davide, lokungenteka bekagula kakhulu ngaleso sikhatsi. (Hla. 41:1-9) Davide weva ngaloko bekuhlelwa ngu-Absalomu, wabese uyabaleka eJerusalema. Ekugcineni, libutfo la-Absalomu lalwa nelibutfo laDavide futsi libutfo la-Absalomu lancotjwa, Absalomu indvodzana yaDavide, wabulawa.

10. Yini lebeyingentiwa yiNkhosi Davide?

¹⁰ Cabanga kutsi kungenteka Davide wativa njani njengobe bekwenteka konkhe loku. Bekamtsandza Absalomu, futsi ametsemba Ahithofeli. Kodvwa bobabili bamvisa buhlungu. Bamvisa buhlungu kakhulu baze betama ngisho nekumbulala. Bekungenteka Davide angasabetsembi nalabanye bangani bakhe, acabange kutsi nabo baseluhlangotsini lwa-Absalomu. Bekungenteka aticabangele yena, etame kubaleka kulelive ayedvwana. Bekungenteka futsi aphelelwe ngemandla, kodvwa Davide akazange akwente loko. Kunaloko, wayincoba lenkinga lematima. Yini leyamsita kutsi ente kanjalo?

11. Yini Davide layenta kulesimo lesimatima bekabhekene naso?

¹¹ (3) Zindla. Ngutiphi timiso longatifundza kulendzaba? Phendvula lombuto: “Wasitwa yini Davide?” Davide akazange etfuke, bese ngekushesha wenta tincumo letingakahlakaniphi. Akazange akhatsateke kakhulu, aze angasati nekutsi enteni. Kunaloko, wacela lusito kuJehova. Wacela nebangani bakhe kutsi bamsite. Wakwenta ngekushesha loko bekancume kukwenta. Nanobe bekeve buhlungu kakhulu, kodvwa akazange ayekele kutsemba labanye nobe agcwale inzondo. Wachubeka ametsembe Jehova futsi abetsemba nebangani bakhe.

12. Yini Jehova layenta kuze asite Davide?

¹² Jehova wamsita njani Davide? Nawungacwaninga utawubona kutsi Jehova wamnika emandla kuze abeketelele lenkinga. (Hla. 3:1-8; umbhalo longenhla) Jehova wasibusisa sincumo lebesentiwe nguDavide. Wasekela nebangani baDavide labetsembekile ngesikhatsi balwa kuze bavikele inkhosi yabo.

13. Ungamlingisa njani Davide nangabe lotsite akuvisa buhlungu kakhulu? (Matewu 18:15-17)

¹³ (4) Kusebentise. Tibute: ‘Ngingamlingisa njani Davide?’ Kutawudzingeka kutsi uyilungise ngekushesha lenkinga. Ungasebentisa seluleko saJesu lesibhalwe kuMatewu sehluko 18, kuye ngetimo. (Fundza Matewu 18:15-17.) Kodvwa ungasheshi wente tincumo usatfukutsele. Kufanele uthantaze kuJehova umcele akuphe umoya lophansi kanye nekuhlakanipha lokudzingako kuze ubhekane nalesimo. Ungayekeli kubetsemba bangani bakho, vuma kutsi bakusite. (Taga 17:17) Ngetulu kwaloko, sebentisa seluleko Jehova lakunika sona eVini lakhe.—Taga 3:5, 6.

14. Emavi laku-2 KuThimothi 1:12-16; 4:6-11, 17-22, angakukhutsata nawukusiphi simo?

¹⁴ Umndeni wakho uyakuphikisa yini ngenca yekutsi ukhonta Jehova? Uhlala eveni lapho uvinjelwe khona yini umsebenti waBoFakazi BaJehova? Nangabe kunjalo,  kungakukhutsata kufundza 2 KuThimothi 1:12-16; 4:6-11, 17-22. * Pawula wabhala lamavesi ngesikhatsi aboshiwe.

15. Yini longayicela kuJehova?

¹⁵ (1) Thantaza. Ngaphambi kwekutsi ufundze lamavesi, tjela Jehova ngenkinga yakho nendlela lotiva ngayo. Thantaza ngendlela lecondzile. Ngemuva kwaloko, cela Jehova akusite utfole timiso letikulendzaba yaPawula letingakusita wati loko lokufanele ukwente kulenkinga.

16. Chaza kutsi kwentekani kuPawula?

¹⁶ (2) Bona ngeliso lengcondvo. Ticabange usesimeni saPawula. Pawula bekaboshwe ngetinketane ejele laseRoma. Bekake waboshwa esikhatsini lesengcile, kodvwa kuloku uyaciniseka kutsi utawubulawa. Labanye bangani bakhe bamlahlile futsi sewubutsakatsaka.—2 Thim. 1:15.

17. Bekangenta njani Pawula?

¹⁷ Pawula abengacabanga ngesikhatsi lesendlulile, kutsi kube bekangasuye umKhristu loshisekako ngabe akakaboshwa. Bekangawatfukutselela lamadvodza asesifundzeni sase-Asiya lamlahla, futsi bekungenteka angasabetsembi nalalabanye bangani bakhe. Kodvwa Pawula akazange ente njalo. Yini leyamenta waciniseka kutsi bangani bakhe batawuchubeka betsembekile kuye nekutsi Jehova utambusisa?

18. Yini leyentiwa nguPawula kulesimo lesimatima bekabhekene naso?

¹⁸ (3) Zindla. Phendvula lombuto: “Wasitwa yini Pawula?” Nanobe bekati kutsi utawufa ngekushesha, kodvwa akazange akhohlwe kutsi kubaluleke kakhulu kuniketa Jehova ludvumo. Wachubeka acabanga ngekutsi abetawubakhutsata njani labanye. Wetsembela kuJehova ngekutsi ahlale athantaza. (2 Thim. 1:3) Kunekutsi ahlale anake labo labamshiya, wakhombisa kubonga kubangani bakhe labamsekela ngelutsandvo futsi bamsita. Ngetulu kwaloko, wachubeka adadisha liVi laNkulunkulu. (2 Thim. 3:16, 17; 4:13) Lokubaluleke kakhulu kutsi bekaciniseka mbamba kutsi Jehova naJesu bayamtsandza. Bebangakamshiyi futsi bekaciniseka kutsi batambusisa ngemsebenti lawente ngekwetsembeka.

19. Jehova wamsita njani Pawula?

¹⁹ Jehova bekamecwayisile Pawula kutsi bekutawudzingeka abeketelele kuphatfwa kabi ngenca yekuba ngumKhristu. (Imis. 21:11-13) Jehova wamsita njani Pawula? Wayiphendvula imithantazo yakhe futsi ngekuhamba kwesikhatsi wamnika emandla. (2 Thim. 4:17) Pawula watjelwa kutsi utawemukela lomvuzo lebekasebente kamatima kuze awutfole. Jehova waphindze wasebentisa bangani baPawula lebebetsembekile kuze bamsite.

20. Ungakulingisa njani kukholwa kwaPawula njengobe kuvetwe KubaseRoma 8:38, 39?

²⁰ (4) Kusebentise. Tibute: ‘Ngingamlingisa njani Pawula?’ NjengaPawula, singalindzela kutsi siphatfwe kabi ngenca yekutsi sikhonta Jehova. (Mak. 10:29, 30) Kuze sihlale setsembekile kuJehova nasinetinkinga, kufanele sichubeke sithantaza futsi sihlale sidadisha liVi lakhe. Kufanele sihlale sikhumbula kutsi lokubaluleke kakhulu kuniketa Jehova ludvumo. Singaciniseka ngekutsi Jehova akayuze asilahle nekutsi kute lokungamenta angasasitsandzi.—Fundza KubaseRoma 8:38, 39; Heb. 13:5, 6.

21. Yini leyasita Aya naHector bancoba tinkinga lebebanato?

²¹ Ngisho nobe sibhekene natiphi timo, singawatfola emandla ngekufundza ngetibonelo  tebantfu labaseBhayibhelini. Nasi sibonelo, Aya, lolihlahlandlela laseJapan, utsi indzaba yaJona yamsita wancoba kwesaba kushumayela etindzaweni tawonkhe wonkhe. Hector, ungulosemusha lohlala e-Indonesia futsi batali bakhe abasibo boFakazi, utsi sibonelo saRuthe simsita afune kufundza ngaJehova nekumkhonta.

22. Angakusita njani ema-drama eliBhayibheli nobe tindzaba letingephansi kwesihloko lesitsi “Lingisa Kukholwa Kwabo”?

²² Ungatitfolaphi tibonelo tebantfu labaseBhayibhelini letingakusita ube nemandla? Ema-video etfu, ema-drama lalalelwako kanye netindzaba letingephansi kwesihloko lesitsi “Lingisa Kukholwa Kwabo” tenta kutsi tintfo lokukhulunywa ngato eBhayibhelini tibe yintfo mbamba. * Ngaphambi kwekutsi ubukele, ulalele nobe ufundze letindzaba leticwaningwe kahle, cela Jehova akusite utfole tifundvo longatisebentisa. Ticabange ungulomuntfu lokukhulunywa ngaye kulendzaba. Zindla ngalokwentiwa nguletinceku taJehova letetsembekile nekutsi watisita njani kuze tincobe tinkinga lebetibhekene nato. Ngemuva kwaloko, sebentisa letifundvo kulenkinga lonayo. Bonga Jehova ngaloko lasakusite ngako. Khombisa kutsi uyabonga ngalolusito ngekutsi ufune tindlela longakhutsata futsi usekele ngato labanye.

23. Njengobe kusho Isaya 41:10, 13, yini Jehova lasetsembisa yona?

²³ Kumatima kuphila kulelive lelibuswa nguSathane, futsi ngalesinye sikhatsi asati nekutsi sente njani. (2 Thim. 3:1) Kodvwa akudzingeki kutsi sikhatsateke nobe sesabe. Jehova uyatati tinkinga lesibhekene nato. Nakwenteka siwa, wetsembisa kusibamba ngesandla sakhe lesinemandla. (Fundza Isaya 41:10, 13.) Siyaciniseka kutsi Jehova utasisita, futsi liBhayibheli lisinika emandla lesiwadzingako kuze sibeketelele nobe nguyiphi inkinga.