1. Kungani Jesu acela Jehova kutsi avikele bafundzi bakhe?

NGEBUSUKU bekugcina ngaphambi kwekutsi afe, Jesu bekacabanga ngato tonkhe tinkinga bafundzi bakhe bebatawubhekana nato. Ngenca yekutsi bekabatsandza bafundzi bakhe, Jesu wacela Babe wakhe kutsi ‘abavikele ngenca yalomubi.’ (Joh. 17:14, 15) Jesu bekati kutsi ngemuva kwekutsi sekabuyele ezulwini, Sathane Develi bekatawuchubeka alwa nalabo labafuna kukhonta Jehova. Ngako bantfu baJehova bebatawudzinga kuvikelwa.

2. Singaciniseka njani kutsi Jehova utayiphendvula imithantazo yetfu?

² Jehova wawuphendvula umthantazo waJesu ngobe bekayitsandza iNdvodzana yakhe. Nasetama kamatima kujabulisa Jehova, utasitsandza natsi futsi utayiphendvula imithantazo yetfu nasicela kutsi asisite futsi asivikele. NjengeNhloko yemndeni lekahle, Jehova utawuchubeka abanakekela ngelutsandvo bantfwana bakhe. Nakangakwenti loko, ligama lakhe litawuhlambalateka!

3. Kungani sidzinga kutsi Jehova asivikele lamuhla?

³ Sikudzinga kakhulu kuvikelwa nguJehova. Sathane ucoshiwe ezulwini, ‘utfukutsele kakhulu.’ (Semb. 12:12) Wente labanye bantfu bacabanga kutsi nabasiphatsa kabi basuke “bentela Nkulunkulu umsebenti longcwele.” (Joh. 16:2) Labanye labangakholelwa kuNkulunkulu basiphatsa kabi ngobe sehlukile kubantfu balelive. Kunobe ngukuphi, asesabi. Kungani? Ngobe liVi laNkulunkulu litsi: “INkhosi yetsembekile futsi itanicinisa, iphindze inivikele kulomubi.” (2 Thes. 3:3)  Jehova usivikela kanjani? Ase sicoce ngetindlela letimbili.

4. Yini Jehova lasinikete yona kuze isivikele, njengobe kuvetwe Kubase-Efesu 6:13-17?

⁴ Jehova usinikete tembatfo temphi letingasivikela ekuhlaselweni nguSathane. (Fundza Kubase-Efesu 6:13-17.) Letembatfo temphi ticinile futsi tisebenta kahle! Kodvwa kuze tisivikele, kufanele sihlahle sitigcokile. Kepha sembhatfo ngasinye simelela ini? Ase sibone.

5. Liyini libhande leliciniso, futsi kungani kufanele silibophe?

⁵ Libhande leliciniso limela emaciniso laseVini laNkulunkulu liBhayibheli. Kungani kufanele silibophe? Ngobe Sathane ‘ungubabe wemanga.’ (Joh. 8:44) Sekuphele tinkhulungwane teminyaka akhuluma emanga futsi adukisa “umhlaba wonkhe”! (Semb. 12:9) Kodvwa emaciniso laseBhayibhelini asivikela kutsi singadukiswa. Singalibopha kanjani lelibhande lelingumfanekiso? Ngekutsi sifundze liciniso ngaJehova, simkhonte “ngemoya nangeliciniso,” futsi setsembeke kuko konkhe.—Joh. 4:24; Ef. 4:25; Heb. 13:18.

6. Siyini sivikelo sesifuba lesikulunga, futsi kungani kufanele sisigcoke?

⁶ Sivikelo sesifuba lesikulunga simelela timiso taJehova letilungile. Kungani kufanele sisigcoke lesivikelo sesifuba? Njengobe nje sivikelo sesifuba sivikela inhlitiyo yelisotja kuze ingalimali, nesivikelo sesifuba lesikulunga sivikela tinhlitiyo tetfu letingumfanekiso nobe loko lesingiko ngekhatsi, kuze tingonakaliswa tintfo letimbi talelive. (Taga 4:23) Jehova ulindzele kutsi simtsandze ngenhlitiyo yetfu yonkhe. (Mat. 22:36, 37) Ngako Sathane wetama kwehlukanisa inhlitiyo yetfu ngekutsi asente sitsandze tintfo letikulelive letenyanywa nguJehova. (Jak. 4:4; 1 Joh. 2:15, 16) Nangabe lelichinga lingamsebenteli, wetama kusiphatsa kabi kuze sente tintfo letingamjabulisi Jehova.

7. Sisigcoka njani sivikelo sesifuba lesikulunga?

⁷ Sigcoka sivikelo sesifuba lesikulunga nasemukela timiso taJehova letimayelana nalokulungile nalokungakalungi futsi siphile ngekuvumelana nato. (Hla. 97:10) Labanye bangahle beve shengatsi timiso taJehova tibemuka inkhululeko. Kodvwa nasiyekela kusebentisa timiso letiseBhayibhelini ekuphileni kwetfu sitawube sifana nelisotja lelikhumula sivikelo salo sesifuba lisesemphini ngobe liva ngatsi siyesindza. Lobo bulima mbamba! Kulabo labatsandza Jehova, imiyalo yakhe “ayisiwo umtfwalo,” kodvwa isindzisa kuphila.—1 Joh. 5:3.

8. Kusho kutsini kugcokisa tinyawo tetfu kuze tilungele kumemetela tindzaba letimnandzi?

⁸ Pawula uphindze asikhutsate kutsi sigcokise tinyawo tetfu kuze tilungele kumemetela tindzaba letimnandzi tekuthula. Ngalamanye emagama, kufanele sihlale sikulungele kushumayela tindzaba letimnandzi teMbuso. Nasitjela labanye umlayeto weliBhayibheli, kukholwa kwetfu kuyacina. Kusikhutsata kakhulu kubona bantfu baJehova emhlabeni wonkhe bafuna ematfuba kuze bamemetele tindzaba letimnandzi, kungaba kusemsebentini, esikolweni, etindzaweni temabhizinisi, nabashumayela emtini ngemuti, baya kuyotsenga, bavakashela tihlobo tabo letingasibo boFakazi, bacoca nebantfu lababetayele, ngisho nalapho bavaleleke emakhaya abo. Nasingesaba futsi siyekele kushumayela singafana nelisotja lelikhumula tincabule talo kusaliwa; nalingenta njalo lingalimala tinyawo. Ngenca yaloko, kungaba matima  kutsi litivikele nalihlaselwa, futsi ngeke selikhone kulandzela ticondziso tendvuna yalo.

9. Kungani kufanele siphatse sihlangu lesikhulu lesikukholwa?

⁹ Sihlangu lesikhulu lesikukholwa simelela kukholwa kwetfu kuJehova. Siyakholwa kutsi utatifeza tonkhe tetsembiso takhe. Lokukholwa kutasisita ‘sicime tonkhe tikhali letivutsako talomubi.’ Kungani kufanele sisiphatse lesihlangu lesikhulu? Ngoba siyasivikela kuze singadukiswa timfundziso tetihlubuki, futsi singacedvwa ngemandla bantfu labahlekisa ngatsi ngenca yaloko lesikukholelwako. Nasite kukholwa, sitawuba bete emandla ekulalela Jehova nangabe bantfu basicindzetela kutsi singamlaleli. Ngaso sonkhe sikhatsi nasala kwenta lokutsite lokungeke kumjabulise Jehova, kungaba kusemsebentini nobe esikolweni, kukholwa kwetfu kusuke kusivikela. (1 Phet. 3:15) Ngaso sonkhe sikhatsi nasala umsebenti lotasiholela kahle kodvwa lotasiphazamisa ekukhonteni kwetfu Jehova, kukholwa kwetfu kusuke kusivikela. (Heb. 13:5, 6) Ngaso sonkhe sikhatsi nasikhonta Jehova ngisho siphatfwa kabi, nalapho kukholwa kwetfu kusuke kusivikela.—1 Thes. 2:2.

10. Siyini sigcoko sekutivikela lesiyinsindziso, futsi kungani kufanele sisigcoke?

 ¹⁰ Sigcoko sekutivikela lesiyinsindziso litsemba Jehova lasiniketa lona lekutsi utasisindzisa ekufeni futsi abanikete umvuzo labo labenta intsandvo yakhe. (1 Thes. 5:8; 1 Thim. 4:10; Thit. 1:1, 2) Njengobe sigcoko sekutivikela sivikela inhloko yelisotja, litsemba letfu lensindziso livikela indlela lesicabanga ngayo. Kanjani? Lelitsemba lisenta sihlale sinake tetsembiso taNkulunkulu futsi singancotjwa tinkinga tetfu. Sisigcoka njani lesigcoko setfu? Ngekutsi sihlale sicabanga ngendlela Nkulunkulu lacabanga ngayo. Sibonelo saloko kutsi asilibeki litsemba letfu emcebeni, kodvwa silibeka kuNkulunkulu.—Hla. 26:2; 104:34; 1 Thim. 6:17.

11. Iyini inkemba yemoya, futsi kungani kufanele siyisebentise?

¹¹ Inkemba yemoya liVi laNkulunkulu liBhayibheli. Lenkemba inemandla ekuwabeka ebaleni emanga, ngaleyondlela ikhulule bantfu etimfundzisweni temanga nasemikhubeni lemibi. (2 Khor. 10:4, 5; 2 Thim. 3:16, 17; Heb. 4:12) Sifundza kuyisebentisa lenkemba nasitidadishela liBhayibheli nalapho sitfola kuceceshwa enhlanganweni yaNkulunkulu. (2 Thim. 2:15) Ngetulu kwetembatfo temphi, Jehova usiniketa lesinye sivikelo lesinemandla. Siyini?

12. Yini lenye lesiyidzingako, futsi kungani?

¹² Lisotja leselinesikhatsi lilwa timphi liyati kutsi ngeke liphumelele kulwa nelibutfo lelikhulu lilodvwana; liyadzinga kusitwa ngulamanye emasotja. Ngendlela lefanako, ngeke sikhone kulwa naSathane nebalandzeli bakhe sisodvwana. Siyadzinga kusekelwa bazalwane betfu nabodzadze. Jehova usinikete bazalwane betfu nabodzadze labasemhlabeni wonkhe labangasisita.—1 Phet. 2:17.

13. Imihlangano isisita njani, njengobe kusho KumaHebheru 10:24, 25?

¹³ Lenye indlela lesitfola ngayo kusekelwa kutsi siye emihlanganweni. (Fundza KumaHebheru 10:24, 25.) Sonkhe siyadvumateka ngaletinye tikhatsi, nakwenteka loko, imihlangano ingasikhutsata. Siyakhutsateka nasilalela timphendvulo letisuka enhlitiyweni tebazalwane betfu nabodzadze. Tinkhulumo letisekelwe eBhayibhelini nemiboniso kucinisa kutimisela kwetfu kukhonta Jehova. Siyakhutsateka nangekucoca nebazalwane betfu ngaphambi kwekutsi kucale imihlangano nangemuva kwayo. (1 Thes. 5:14) Ngetulu kwaloko, imihlangano isiniketa litfuba lekusita labanye futsi loko kusenta sijabule. (Imis. 20:35; Rom. 1:11, 12) Imihlangano yetfu iphindze isisite nangaletinye tindlela. Iyasisita kuze sitfutfukise emakhono etfu ekufundzisa newekushumayela. Sibonelo saloko kutsi sitfola indlela yekutisebentisa kahle tincwadzi letitfolakala Emathulusini Ekufundzisa. Ngako yilungiselele kahle imihlangano yelibandla. Nakusachubeka imihlangano, lalelisisa. Ngemuva kwemihlangano, kusebentise lokuceceshwa lokutfolile. Nawutenta letintfo utawuba ‘lisotja lelihle laKhristu Jesu.’—2 Thim. 2:3.

14. Siphindze sisitwe ngayiphi lenye indlela?

¹⁴ Siphindze sisitwe tigidzigidzi tetingilosi letinemandla. Cabanga nje ngaloko lokungentiwa yingilosi yinye! (Isa. 37:36) Nyalo, cabanga ngaloko lokungafezwa libutfo lelikhulu letingilosi. Kute umuntfu nobe lidimoni lelingancoba libutfo laJehova lelinemandla. Jehova unemandla lamakhulu, ngako nangabe anatsi sitawuhlale sinemandla kunalabasiphikisako ngisho nobe  banemandla kangakanani. (Khu. 6:16) Lelo liciniso! Hlale ukukhumbula loko nawudvunyatwa ngulokwentiwa nobe lokushiwo ngulosebenta naye, lofundza naye nobe sihlobo lesingasiye Fakazi. Khumbula kutsi awusiwedvwa kulemphi. Ulandzela sicondziso saJehova.

15. Ngekusho kwa-Isaya 54:15, 17, kungani kute muntfu longayekelisa bantfu baNkulunkulu kutsi bashumayele?

¹⁵ Lelive lelibuswa nguSathane linetizatfu letinyenti tekusenyanya. Asitingeneli sanhlobo tindzaba tepolitiki futsi asiyi emphini. Simemetela ngeligama laNkulunkulu, sishumayele kutsi nguMbuso wakhe kuphela longaletsa kuthula futsi silalela timiso takhe letilungile. Sikuveta ebaleni kutsi umbusi walelive unemanga lamabi futsi ungumbulali. (Joh. 8:44) Simemetela nangekutsi live laSathane litawubhujiswa ngekushesha. Kodvwa Sathane nebalandzeli bakhe angeke basiyekelise umsebenti wekushumayela. Esikhundleni saloko, sitawuchubeka sidvumisa Jehova nganobe nguyiphi indlela! Nanobe Sathane anemandla lamakhulu, kepha wehlulekile kuvimbela umlayeto weMbuso kutsi ufike kubantfu labasemhlabeni wonkhe. Sizatfu saloko kutsi sivikelwa nguJehova.—Fundza Isaya 54:15, 17.

16. Jehova utabasindzisa njani bantfu bakhe ngesikhatsi sekuhlupheka lokukhulu?

¹⁶ Yini letawukwenteka ngekushesha? Ngesikhatsi sekuhlupheka lokukhulu, Jehova utasisindzisa ngetindlela letimbili. Kwekucala, utawusindzisa tinceku takhe letetsembekile ngesikhatsi abangela emakhosi emhlaba kutsi abhubhise iBhabhulona Lenkhulu, lokungumbuso wenkholo yemanga. (Semb. 17:16-18; 18:2, 4) Ngemuva kwaloko, utawusindzisa bantfu bakhe nasekabhubhisa live laSathane nge-Amagedoni.—Semb. 7:9, 10; 16:14, 16.

17. Kusisita ngani kuhlale sisondzelene naJehova?

¹⁷ Nasihlala sisondzelene naJehova, Sathane angeke akhone kusilimata phakadze. Ecinisweni, nguye lotawubhujiswa phakadze. (Rom. 16:20) Ngako, tigcoke tonkhe tembatfo temphi futsi ungacali utikhumule! Ungetami kulwa lemphi uwedvwana. Basekele bazalwane bakho nabodzadze, futsi ulandzele ticondziso taJehova. Nawenta njalo, ungaciniseka kutsi Babe wakho losezulwini lokutsandzako utakucinisa futsi akuvikele.—Isa. 41:10.