1-2. Ngutiphi tinkinga boFakazi labanyenti labanato?

UMPHOSTOLI Pawula wakhutsata Thimothi kanye nawo onkhe emaKhristu kutsi awente ngekutimisela umsebenti wekushamyela. (2 Thim. 4:5) Sonkhe senta lokusemandleni etfu kuze silalele leseluleko saPawula. Kodvwa kuhle kuba netinkinga. Bazalwane betfu labanyenti nabodzadze bayesaba kushumayela. (2 Thim. 4:2) Nasi sibonelo, cabanga ngebazalwane labahlala etindzaweni lapho umsebenti wetfu wekushumayela uvinjelwe khona. Bayashumayela ngisho nobe bati kutsi kungenteka baboshwe!

² Bantfu baJehova babhekana netinkinga letinyenti lokungenteka tibacedze emandla. Nasi sibonelo, labanyenti babo kudzingeka basebente kamatima kuze banakekele imindeni yabo. Bayafisa kwenta lokunyenti emsebentini wekushumayela, kodvwa litsi naliphela liviki basuke bakhatsele kakhulu. Labanye benta lokuncane kakhulu emsebentini wekushumayela ngenca yekugula lokungapheli, nobe kukhula; futsi kungenteka abakhoni ngisho nekuphuma emakhaya abo. Kantsi labanye bahlale bativa bangasilutfo kuJehova. Lomunye dzadze lohlala eMiddle East lokutsiwa nguMary, * utsi: “Kudzingeka ngisebente kamatima kuze ngilawule indlela lengitiva ngayo nangidvumatekile futsi loko kungishiya ngikhatsele. Ngibese ngitiva nginelicala ngobe kubese kuba kuncane kakhulu lengikhona kukwenta emsebentini wekushumayela.”

3. Sitawucoca ngani kulesihloko?

³ Ngisho nobe sibhekene natiphi tinkinga, Jehova utasipha emandla lesiwadzingako kuze sichubeke simkhonta ngelizinga lesingakhona ngalo. Ngaphambi kwekutsi sicoce ngekutsi  Jehova angasisita njani, ase sihlole kutsi wabacinisa njani boPawula naThimothi kuze bente lokunyenti emsebentini wekushumayela nanobe bebanetinkinga.

4. Ngutiphi tinkinga Pawula lebekabhekene nato?

⁴ Pawula bekanetinkinga letinyenti. Bekawadzinga kakhulu emandla ngesikhatsi ashaywa, agcotjwa ngematje futsi avalelwa ejele. (2 Khor. 11:23-25) Wavuma kutsi ngaletinye tikhatsi bekudzingeka alwe kamatima kuze ancobe kudvumateka. (Rom. 7:18, 19, 24) Waphindze waba nenkinga yemphilo, lebeyifana ‘nelinyeva enyameni’ lebekafisa ngatsi Nkulunkulu angalisusa.—2 Khor. 12:7, 8.

5. Yini Pawula lakhona kuyenta nanobe bekanetinkinga?

⁵ Jehova waniketa Pawula emandla ekuchubeka ashumayela nanobe bekanetinkinga. Naka naku Pawula lakwenta. Ngesikhatsi aboshwe endlini eRoma, wabashumayela ngemdlandla baholi bemaJuda, futsi mhlawumbe netiphatsimandla tahulumende. (Imis. 28:17; Fil. 4:21, 22) Washumayela Bogadzi Bembusi labanyenti kanye nabo bonkhe lebebamvakashela. (Imis. 28:30, 31; Fil. 1:13) Kuleso sikhatsi, Nkulunkulu wasebentisa Pawula kuze abhale tincwadzi letasita emaKhristu eliciniso asesikhatsini lesendlulile futsi letichubeka tisita emaKhristu eliciniso lamuhla. Ngetulu kwaloko, sibonelo saPawula sacinisa libandla laseRoma, lokwenta kutsi bazalwane ‘bachubeke bakhuluma livi laNkulunkulu ngesibindzi.’ (Fil. 1:14) Ngisho nobe Pawula bekangakhoni kwenta lebekafise kukwenta kodvwa wenta lokusemandleni akhe, futsi ngenca yaloko ‘tindzaba letimnandzi tachutjekiselwa embili.’—Fil. 1:12.

6. Ngekusho kwa-2 KubaseKhorinte 12:9, 10, yini leyasita Pawula kutsi akhone kwenta umsebenti wekushumayela?

⁶ Pawula bekati kutsi konkhe lakhona kukwenta emsebentini waJehova bekungenca yemandla aNkulunkulu hhayi akhe. Watsi emandla aNkulunkulu “abonakala ngalokucacile nawubutsakatsaka.” (Fundza 2 KubaseKhorinte 12:9, 10.) Asebentisa umoya wakhe longcwele, Jehova wanika Pawula emandla ekuwenta kahle umsebenti wakhe wekushumayela nanobe bekaphatfwa kabi, aboshwa futsi abhekana naletinye tinkinga.

7. Ngutiphi tinkinga Thimothi lebekanato lebetingenta kube matima kutsi awente kahle umsebenti wakhe wekushumayela?

⁷ Thimothi losemusha, lobekahamba naPawula naye kwadzingeka kutsi etsembele  emandleni aNkulunkulu kuze awente kahle umsebenti wekushumayela. Thimothi bekahamba naPawula baye etindzaweni letikhashane bayowenta umsebenti wekushumayela. Ngetulu kwaloko, Pawula waphindze wamtfuma kutsi ayovakashela emabandla futsi awakhutsate. (1 Khor. 4:17) Kungenteka Thimothi bekeva shengatsi lomsebenti awukamfaneli. Mhlawumbe kungako Pawula atsi kuye: “Ungavumeli muntfu kutsi edzelele busha bakho.” (1 Thim. 4:12) Ngetulu kwaloko, ngaleso sikhatsi, Thimothi bekanelakhe linyeva enyameni, ‘bekagula kanyenti.’ (1 Thim. 5:23) Kodvwa bekati kutsi umoya longcwele waJehova bewutamnika emandla lawadzingako kuze ashumayele tindzaba letimnandzi futsi asite bazalwane bakhe.—2 Thim. 1:7.

8. Jehova ubacinisa njani bantfu bakhe lamuhla?

⁸ Lamuhla, Jehova unika bantfu bakhe “emandla lamakhulu kakhulu” kuze bachubeke bamkhonta ngekwetsembeka. (2 Khor. 4:7) Ase sicoce ngetintfo letine Jehova lasiniketa tona kuze asicinise futsi asisite sihlale setsembekile kuye: umthantazo, liBhayibheli, bazalwane betfu kanye nemsebenti wekushumayela.

9. Umthantazo ungasisita njani?

⁹ Kuciniswa ngemthantazo. Kubase-Efesu 6:18, Pawula usikhutsa kutsi ‘sithantaze njalo’ kuNkulunkulu. Nasenta njalo, Nkulunkulu utasicinisa. Jonnie, lohlala eBolivia, wabona indlela Jehova lamsita ngayo ngesikhatsi anetinkinga. Umkakhe kanye nebatali bakhe bagula kamatima ngasikhatsi sinye. Bekumatima kakhulu kubanakekela bobatsatfu. Make wakhe washona futsi kwatsatsa sikhatsi lesidze kutsi umkakhe nababe wakhe belulame kulokugula. Nakakhumbula lesikhatsi lebesimatima, Jonnie utsi: “Nangicindzeteleke kakhulu, bekuhlale kungisita kuthantaza kuJehova ngimtjele indlela lebengitiva ngayo.” Jehova wamnika emandla ekucinisela. Lomunye lomdzala welibandla lohlala eBolivia, lokutsiwa nguRonald, watfola kutsi make wakhe unamdlavuza. Wabese uyashona ngemuva kwenyanga. Yini leyamsita wakhona kubhekana nalesimo? Utsi: “Nangithantaza kuJehova ngimtfululela sifuba, ngimtjele indlela lengitiva ngayo. Ngiyati kutsi ungicondza kancono kwendlula nobe ngabe ngubani, lokufaka ekhatsi nami.” Ngaletinye tikhatsi singahle sive shengatsi asikhoni kubeketelela tinkinga tetfu futsi kungenteka singati nekutsi sithantaze sitsini. Kodvwa Jehova usicela kutsi sithantaze kuye ngisho nobe sikutfola kumatima kumchazela indlela lesitiva ngayo.—Rom. 8:26, 27.

10. Njengobe kuvetwe KumaHebheru 4:12, kungani kubalulekile kufundza liBhayibheli nekuzindla ngalo?

¹⁰ Kuciniswa ngeliBhayibheli. Pawula bekafundza imiBhalo kuze atfole emandla nendvudvuto, futsi natsi singenta lokufanako. (Rom. 15:4) Njengobe sifundza liVi laNkulunkulu futsi sizindla ngalo, Jehova angasebentisa umoya wakhe kuze usisite sicondze kancono indlela imiBhalo lesebenta ngayo esimeni lesikuso. (Fundza KumaHebheru 4:12.) Ronald, lesike sakhuluma ngaye utsi: “Ngiyajabula kutsi ngenta imetamo yekufundza liBhayibheli njalo ebusuku. Ngizindla kakhulu ngebuntfu baJehova nangendlela labanakekela ngayo bantfu bakhe. Loko kunginika emandla.”

11. LiBhayibheli limcinise njani lomunye dzadze lobekacindzetelekile?

¹¹ Kuzindla ngeliVi laNkulunkulu kusisita kutsi sibe nesimo sengcondvo lesikahle ngetinkinga tetfu. Cabanga ngendlela liBhayibheli lelamsita ngayo lomunye dzadze  longumfelokati lobekaselusizini. Lomunye lomdzala welibandla wamtjela kutsi angatfola tifundvo letilusito nakangafundza incwadzi yaJobe. Watsi nakenta njalo, wacale wamsola Jobe ngenca yendlela bekacabanga ngayo. Ngenhlitiyo bekatsi: “Jobe! Ungacabangi kuphela ngetinkinga takho!” Kodvwa wabese uyabona kutsi naye bekanesimo sengcondvo lesifana nesaJobe. Loko kwamsita washintja indlela bekacabanga ngayo futsi kwamcinisa wakhona kubeketelela buhlungu bekushonelwa yindvodza yakhe.

12. Jehova usinika njani emandla asebentisa bazalwane betfu nabodzadze?

¹² Kuciniswa bazalwane betfu. Jehova uphindze asinike emandla asebentisa bazalwane betfu nabodzadze. Pawula wabhala kutsi bekalangatelela ‘kukhutsatana’ nabazalwane bakhe nabodzadze. (Rom. 1:11, 12) Mary, lesike sacoca ngaye uyakujabulela kuba nebazalwane nabodzadze. Utsi: “Jehova usebentise bazalwane nabodzadze lebebangatati tinkinga lebenginato. Bebasho lokutsite lokungikhutsatako nobe bangibhalele imilayeto, futsi bekuba nguloko kanye lebengisuke ngikudzinga. Kuyasita nekukhuluma nalabanye bodzadze labake baba netinkinga letifanako futsi ngifundze kubo. Nalabadzala belibandla bahlale bangenta ngitive ngibalulekile ebandleni.”

13. Singacinisana njani emihlanganweni yelibandla?

¹³ Sikhutsatana kancono emihlanganweni yelibandla. Nawuya emihlanganweni, ungetama kukhutsata labanye ngekutsi ubatjele kutsi uyabatsandza nekutsi uyabonga ngaloko labakwentako. Nasi sibonelo, ngaphambi kwekutsi kucale imihlangano, lomunye lomdzala welibandla lokutsiwa nguPeter watjela lomunye dzadze lonemyeni longasiye Fakazi, watsi: “Kukhutsata kakhulu kukubona emihlanganweni ukanye nebantfwana bakho labasitfupha futsi batilungiselele kahle timphendvulo.” Emehlo akhe agcwala tinyembeti tenjabulo, futsi watsi: “Bengikudzinga mbamba kuva loko lamuhla.”

14. Kusisita njani kwenta umsebenti wekushumayela?

¹⁴ Kuciniswa ngumsebenti wekushumayela. Nasicocela labanye ngemaciniso laseBhayibhelini, siyajabula ngisho nobe bantfu basilalela nobe bangasilaleli. (Taga 11:25) Lomunye dzadze lokutsiwa nguStacy wabona indlela umsebenti wekushumayela lonikana ngayo emandla. Ngesikhatsi lilunga lemndeni wakhe liyekeliswa kuba nguFakazi, weva buhlungu kakhulu futsi bekasolo atibuta atsi: ‘Kukhona yini lokwengetiwe lokufanele ngabe ngikwentile?’ Stacy bekahlale acabanga ngalenkinga. Yini leyamsita kuze abeketelele lesimo? Ngumsebenti wekushumayela! Nakashumayela, bekacabanga ngalabantfu labasensimini lakuyo lebebadzinga lusito lwakhe. Utsi: “Ngaleso sikhatsi, Jehova wangipha umuntfu lebengimfundzisa liBhayibheli futsi bekatfutfuka kakhulu. Loko kwangikhutsata kakhulu. Umsebenti wekushumayela ungikhutsate mbamba.”

15. Yini loyifundzako kulokwashiwo nguMary?

¹⁵ Ngenca yetimo labakuto, labanye bangahle beve shengatsi abakhoni kwenta lokunyenti emsebentini wekushumayela. Nawutiva ngaleyondlela, khumbula kutsi Jehova uyajabula nawenta konkhe lokusemandleni akho. Cabanga ngesibonelo saMary lesike sakhuluma ngaye. Ngesikhatsi atfutsela endzaweni lenebantfu labakhuluma lolunye lulwimi, bekeva shengatsi kuncane lakhona kukwenta. Utsi: “Kwaphela sikhatsi lesidze ngikhona kusho emavi lambalwa, kufundza livesi nobe kuhambisa lipheshana kuphela.” Bekeva shengatsi kuncane kakhulu lakwentako  nakaticatsanisa nebantfu labalukhuluma kahle lolulwimi. Nobe kunjalo, washintja indlela lacabanga ngayo. Wabese uyabona kutsi Jehova angamsebentisa ngisho angalukhulumi kahle lolulwimi. Utsi: “Loko lokushiwo liBhayibheli kumelula futsi kungakushintja kuphila kwebantfu.”

16. Labo labangakhoni kuphuma endlini bangasitwa yini kuze batfole emandla?

¹⁶ Jehova uyati kutsi labanye betfu bayafuna kushumayela kodvwa abakhoni kuphuma endlini. Ngako angasisita sishumayele labo labasinakekelako nabodokotela nobe bonesi. Singadvumateka nasingacatsanisa loko besikhona kukwenta ngaphambili nalesikhona kukwenta nyalo. Kodvwa nasibona indlela Jehova lasisita ngayo nyalo, singaba nemandla lesiwadzingako kuze sibeketelele nobe nguluphi luvivinyo sibe sijabulile.

17. Ngekusho kweMshumayeli 11:6, kungani kufanele sichubeke sishumayela ngisho nobe bantfu bangasilaleli?

¹⁷ Asati kutsi nguyiphi inhlanyelo yeliciniso lesiyihlanyelako letawuhluma futsi ikhule. (Fundza Umshumayeli 11:6.) Lomunye dzadze loseminyakeni yabo-80 lokutsiwa nguBarbara, uvame kushumayela asebentisa lucingo nobe ngekubhala tincwadzi. Kulenye yetincwadzi layibhala, wafaka Sicongosekulindza saMarch 1, 2014, lesinesihloko lesitsi “Yini Nkulunkulu Lakwentele Kona?” Bekangati kutsi lencwadzi uyitfumele labashadene labangasesibo BoFakazi BaJehova. Bawufundza kanyenti lomagazini. Lendvodza beyiva shengatsi Jehova ukhuluma nayo ngalokucondzile. Babese bacala kuya emihlanganweni futsi baphindze baba boFakazi ngemuva kweminyaka lengetulu kwalengu-27 bayekeliswa. Cabanga nje indlela Barbara lakhutsateka ngayo futsi watfola emandla nakabona umphumela lomuhle walencwadzi layibhala!

18. Yini lesingayenta kuze sitfole emandla lavela kuNkulunkulu?

¹⁸ Jehova usinika ematfuba lamanyenti ekutfola emandla lavela kuye. Nasisebentisa tintfo Jehova lasinike tona, letifaka ekhatsi umthantazo, liBhayibheli, bazalwane betfu kanye nemsebenti wekushumayela, sisuke sikhombisa kutsi siyetsemba kutsi Jehova angasisita nekutsi uyafuna. Shengatsi singahlala setsembele kuBabe wetfu wasezulwini lotsandza ‘kubakhombisa emandla akhe labo inhlitiyo yabo lephelele kuye.’—2 Khr. 16:9.