1-2. Watsini lomunye umbhali, futsi sitawucoca ngani kulesihloko?

LAMUHLA tigidzi tebantfu titsi tiyakholwa kuJesu kodvwa atikwemukeli loko lakufundzisa. (2 Thim. 4:3, 4) Lomunye umbhali watsi: “Nakungaba khona lomunye ‘Jesu’ lamuhla losho tintfo letashiwo nguJesu . . . , besingeke yini singamemukeli naye njengobe senta eminyakeni lengu-2 000 leyendlulile? . . . Imphendvulo ingu-yebo: Besingeke simemukele.”

² Ngesikhatsi Jesu alamhlabeni, bantfu labanyenti bamuva afundzisa futsi bambona enta timangaliso, kodvwa abazange bakholwe kuye. Kungani? Esihlokweni lesengcile, sicoce ngetizatfu letine letabangela bantfu bangamemukeli Jesu ngenca yaloko lakusho nalakwenta. Nyalo ase sicoce ngaletinye tizatfu letine. Sitawuphindze sibone kutsi yini leyenta bantfu lamuhla bangabemukeli balandzeli baJesu nekutsi yini lesingayenta kuze siciniseke kutsi kute lokungasivimba kutsi sikhonte Jehova.

3. Yini Jesu layenta leyabangela labanye bangamemukeli?

³ Ngesikhatsi alamhlabeni, Jesu watihlanganisa nato tonkhe tinhlobo tebantfu. Wadla netinjinga nalabasemagunyeni, kodvwa waphindze watihlanganisa nalabaphuyile nalabacindzetelwe. Ngetulu kwaloko, bekabavela labo lebebabitwa ngekutsi “toni.” Labanye bantfu lebebatigcabha abazange bamemukele Jesu ngenca yaloko bekakwenta. Babuta bafundzi bakhe batsi: “Kwentiwa yini kutsi nidle futsi ninatse nebatselisi netoni?”  Jesu wabaphendvula watsi: “Bantfu labaphilile abamdzingi dokotela, kodvwa ngulabagulako labamdzingako. Angiketeli kutobita bantfu labalungile, kodvwa ngitobita toni kuze tiphendvuke.”—Luk. 5:29-32.

4. Ngekusho kwemphrofethi Isaya, yini emaJuda lebekufanele ngabe ayilindzela ngaMesiya?

⁴ Itsini imiBhalo? Kusesele sikhatsi lesidze ngaphambi kwekutsi Mesiya efike, umphrofethi Isaya watsi live belingeke limemukele. Lesiphrofetho satsi: “Wedzelelwa futsi bantfu bamecwaya . . . Kwaba shengatsi buso bakhe bufihlelwe tsine. Wedzelelwa futsi sambukela phansi.” (Isa. 53:3) Mesiya bekatawecwaywa “bantfu,” ngako emaJuda angesikhatsi saJesu bekufanele alindzele kutsi Jesu angemukelwa.

5. Bantfu labanyenti lamuhla bacabangani ngebalandzeli baJesu?

⁵ Kunenkinga lefanako yini nalamuhla? Yebo. Baholi benkholo labanyenti bayajabula nangabe bantfu labatiwako, labanjingile nalabatsatfwa njengalabahlakaniphile kulelive baba ngemalunga emasontfo abo. Bayabavumela kutsi babe ngemalunga emasontfo abo nanobe bangaphili ngekuvumelana netimiso taNkulunkulu. Labaholi benkholo batibukela phansi tinceku taJehova letikhutsele futsi letitiphatsa kahle ngobe atikadvumi kulelive. Njengobe Pawula asho, Nkulunkulu ukhetse labo ‘lababukeleka phansi.’ (1 Khor. 1:26-29) Nanobe kunjalo, tonkhe tinceku taJehova letetsembekile tiligugu kuye.

6. Yini Jesu layisho njengobe kubhalwe kuMatewu 11:25, 26, futsi singamlingisa njani?

⁶ Yini lesingayenta kuze singayekeli kukhonta Jehova? (Fundza Matewu 11:25, 26.) Ungawemukeli umbono lelive lelinawo ngebantfu baNkulunkulu. Yemukela kutsi Jehova usebentisa kuphela bantfu labatfobekile kuze bente intsandvo yakhe. (Hla. 138:6) Cabanga nangekutsi tinyenti kangakanani tintfo latifezile asebentisa labo lababukelwa phansi kulelive.

7. Kungani Jesu abita baFarisi ngekutsi batentisi, futsi yini labayenta?

⁷ Ngesibindzi, Jesu wabalahla baholi benkholo bangesikhatsi sakhe ngobe bebangabafundzisi bantfu kutsi bakhonte Jehova ngendlela lekahle. Nasi sibonelo, wakuveta ebaleni kutentisa kwebaFarisi, lebebakhatsateke kakhulu ngendlela labageza ngayo tandla tabo kunekunakekela batali babo. (Mat. 15:1-11) Kungenteka bafundzi baJesu bamangala ngaloko lakusho. Bambuta batsi: “Uyati yini kutsi loko lokushito kubakhubile baFarisi?” Jesu wabaphendvula watsi: “Tonkhe tihlahla letingakahlanyelwa nguBabe losezulwini titawusishulwa. Bayekeleni. Babaholi labatimphumphutse. Nangabe imphumphutse ihola imphumphutse, totimbili titawugcumukela emgodzini.” (Mat. 15:12-14) Nanobe labaholi benkholo bamtfukutselela Jesu ngenca yaloko lakusho, kodvwa loko akuzange kumvimbe kutsi akhulume liciniso.

8. Jesu wakhombisa njani kutsi akusito tonkhe timfundziso tenkholo letemukelwa nguNkulunkulu?

⁸ Jesu waphindze wakhombisa kutsi letinye timfundziso tenkholo betingemanga. Akazange atsi tonkhe timfundziso tenkholo tiyemukeleka kuNkulunkulu. Kunaloko watsi bantfu labanyenti bebatawuba sendleleni lenkhulu leya ekubhujisweni, kantsi labambalwa bebatawuba sendleleni lencane leya ekuphileni. (Mat. 7:13, 14) Washo ngalokucacile kutsi labanye bebatawutsi bakhonta Nkulunkulu, kantsi abamkhonti. Wabecwayisa watsi: “Caphelani baphrofethi bemanga labeta kini bente shengatsi batimvu kantsi ngekhatsi babukhali  njengetimphisi. Labo nitawubabona ngetitselo tabo.”—Mat. 7:15-20.

9. Ngutiphi letinye timfundziso tenkholo Jesu latsi tingemanga?

⁹ Itsini imiBhalo? Tiphrofetho teliBhayibheli tatsi kushisekela indlu yaJehova bekutawuvutsa njengemlilo ngekhatsi kuMesiya. (Hla. 69:9; Joh. 2:14-17) Loko kwenta Jesu watibeka ebaleni timfundziso tenkholo letingemanga nemikhuba yayo. Sibonelo saloko kutsi baFarisi bebakholelwa kutsi umphefumulo awufi; kantsi Jesu wafundzisa kutsi labafile balele. (Joh. 11:11) BaSadusi bebangakholelwa kutsi labafile batawuvuka ekufeni; kantsi Jesu wamvusa ekufeni umngani wakhe Lazaro. (Joh. 11:43, 44; Imis. 23:8) BaFarisi bebafundzisa kutsi nguNkulunkulu lohlela kusengaphambili kutsi kutowentekani kitsi nobe kutsi sitowentani; Jesu wafundzisa kutsi bantfu bayatikhetsela kutsi bayafuna yini kukhonta Nkulunkulu nobe cha.—Mat. 11:28.

10. Yini leyenta bantfu labanyenti lamuhla kutsi bangakwemukeli loko lesikufundzisako?

¹⁰ Kunenkinga lefanako yini nalamuhla? Yebo. Bantfu labanyenti lamuhla abasemukeli ngobe sisebentisa liBhayibheli kuze sibafundzise kutsi letinye timfundziso tenkholo tingemanga. Baholi benkholo bafundzisa emalunga emasontfo abo kutsi Nkulunkulu ujezisa bantfu lababi esihogweni. Basebentisa lemfundziso lengemanga kuze balawule labantfu. Njengobe sitinceku taJehova letikhonta Nkulunkulu lonelutsandvo, sisita bantfu bacondze kutsi lemfundziso ingemanga. Baholi benkholo baphindze bafundzise kutsi umphefumulo awufi. Kube lemfundziso iliciniso, bekutawuba bete sidzingo sekutsi bantfu bavuswe ekufeni. Ngako sikhombisa bantfu kutsi lemfundziso ayikho eBhayibhelini. Ngisho nobe tinkholo letinyenti tifundzisa kutsi konkhe lesikwentako kuncunywe nguNkulunkulu kusengaphambili, kodvwa tsine sifundzisa kutsi bonkhe bantfu banenkhululeko yekutikhetsela kutsi bayafuna yini kukhonta Nkulunkulu nobe cha. Yini baholi benkholo labayentako nabasiva sitiveta ebaleni timfundziso tabo letingemanga? Esikhatsini lesinyenti, batfukutsela bagane lunwabu!

11. Ngekusho kwemavi aJesu lakuJohane 8:45-47, yini Nkulunkulu lafuna kutsi bantfu bakhe bayente?

 ¹¹ Yini lesingayenta kuze singayekeli kukhonta Jehova? Nangabe silitsandza liciniso, kufanele siwemukele emavi aNkulunkulu. (Fundza Johane 8:45-47.) Ngalokwehlukile kuSathane Develi, tsine sitawuhlale silemukela liciniso. Asitenti tintfo letingavumelani naloko lesikukholelwako. (Joh. 8:44) Nkulunkulu ufuna kutsi bantfu bakhe ‘batondze lokubi’ futsi ‘babambisise lokuhle,’ njengobe naJesu enta.—Rom. 12:9; Heb. 1:9.

12. Yini leyabangela emaJuda lamanyenti angamemukeli Jesu ngenca yendlela lafa ngayo?

¹² Ngusiphi lesinye sizatfu lesenta emaJuda angamemukeli Jesu? Pawula watsi: “Sishumayela ngaKhristu lowabulawa elugodvweni, futsi losikhubekiso kumaJuda.” (1 Khor. 1:23) Yini leyabangela emaJuda lamanyenti angamemukeli Jesu ngenca yendlela lafa ngayo? Njengobe Jesu afela elugodvweni, kumaJuda wabonakala asigebengu futsi asoni, hhayi Mesiya.—Dut. 21:22, 23.

13. Yini labangazange bayinake labo labangamemukelanga Jesu?

¹³ Lamanye emaJuda langazange amemukele Jesu akazange anake kutsi bekamsulwa, abekwe licala lelingemanga futsi aphetfwe kabi. Labo bebateka licala laJesu bebanganendzaba nekulunga. Behluleli benkantolo lephakeme yemaJuda bahlangana ngekushesha kuze behlulele Jesu futsi abazange bayilandzele imitsetfo. (Luk. 22:54; Joh. 18:24) Kunekutsi behlulele ngekungakhetsi ecaleni bekabekwe lona, labehluleli bafuna “bufakazi lobungemanga ngaJesu kuze bambulale.” Kodvwa loko akuzange kuphumelele, ngako umphristi lophakeme wetama kwenta Jesu kutsi asho intfo letawumenta abe nelicala. Loko bekuphambene nemtsetfo. (Mat. 26:59; Mak. 14:55-64) Ngemuva kwekutsi Jesu sekavusiwe ekufeni, labehluleli labangakalungi babhadala emasotja emaRoma lebekagadze lithuna laJesu “imali lenyenti” kuze asakate emanga ngaJesu.—Mat. 28:11-15.

14. ImiBhalo yatsini mayelana nekufa kwaMesiya?

¹⁴ Itsini imiBhalo? Nanobe emaJuda  lamanyenti angesikhatsi saJesu bekangakalindzeli kutsi kutawudzingeka Mesiya afe, kodvwa naka naku lokwashiwo yimiBhalo: “Wanikela ngekuphila kwakhe futsi wabalwa kanye netoni; wetfwala sono sebantfu labanyenti, waphindze walamulela toni.” (Isa. 53:12) Ngako emaJuda bekete sizatfu sekungabata ngesikhatsi Jesu abulawa njengesoni.

15. Ngutiphi tintfo BoFakazi BaJehova labasolwe ngato letente labanye kutsi bangabemukeli?

¹⁵ Kunenkinga lefanako yini nalamuhla? Yebo! Jesu wabekwa licala lelingemanga futsi lamudla, nalamuhla bantfu benta lokufanako kuBoFakazi BaJehova. Nati letinye tibonelo. EMelika, ngabo-1930 nangabo-1940 bekutekwa emacala etinkantolo letinyenti lamayelana nenkhululeko yetfu yekukhonta Nkulunkulu. Bekuvele kube sebaleni kutsi lamanye emajaji ayasenyanya. EQuebec naseCanada, emasontfo kanye nahulumende babambisana kuze bamelane nemsebenti wetfu. Bamemeteli labanyenti baboshelwa kucocela bomakhelwane babo ngeMbuso waNkulunkulu. EJalimane, hulumende wemaNazi wabulala bazalwane betfu labanyenti lebebasebasha futsi betsembekile. Eminyakeni yakamuva, bazalwane betfu labanyenti eRussia babekwe licala futsi baboshwa ngenca yekukhuluma ngeliBhayibheli, njengobe tiphatsimandla titsi loko “kuyingoti.” Ngisho ne-Lihumusho Lemhlaba Lomusha LemiBhalo Lengcwele lesiRussia kutsiwa alikho emtsetfweni futsi “liyingoti,” ngenca yekutsi lisebentisa ligama lelitsi Jehova.

16. Njengobe kuvetwe ku-1 Johane 4:1, kungani kungakafaneli sidukiswe tindzaba letingemanga letimayelana nebantfu baJehova?

¹⁶ Yini lesingayenta kuze singayekeli kukhonta Jehova? Funa onkhe emaciniso endzaba. ENshumayelweni yakhe yaseNtsabeni, Jesu wecwayisa labo bebamlalele kutsi labanye ‘batakusho konkhe lokubi’ ngabo. (Mat. 5:11) Umtfombo walamanga nguSathane. Wenta labo labaphikisako kutsi basakate emanga lamabi ngebantfu labatsandza liciniso. (Semb. 12:9, 10) Kufanele singawalaleli lamanga. Akukafaneli asente sesabe kukhonta Nkulunkulu nobe ente kukholwa kwetfu kube butsakatsaka.—Fundza 1 Johane 4:1.

17. Tintfo letenteka ngaphambi kwekutsi Jesu afe tabenta njani labanye kutsi bangamemukeli?

¹⁷ Ngaphambi kwekufa kwakhe, Jesu watsengiswa ngulomunye webaphostoli bakhe labangu-12. Lomunye wabo wamphika tikhatsi letintsatfu, futsi bonkhe baphostoli bakhe bamshiya ngebusuku bangaphambi kwekufa kwakhe. (Mat. 26:14-16, 47, 56, 75) Jesu akazange amangale. Bekashito kutsi loko kutawenteka. (Joh. 6:64; 13:21, 26, 38; 16:32) Ngesikhatsi kwenteka letintfo, labanye bebangancuma kungasabi balandzeli bakhe, bebangahle bacabange batsi: ‘Nangabe baphostoli baJesu benta kanjena, angifuni kutihlanganisa nabo!’

18. Ngutiphi tiphrofetho letagcwaliseka ngaphambi kwekutsi Jesu afe?

¹⁸ Itsini imiBhalo? Eminyakeni lengemakhulu ngaphambi kwekutsi Jesu ete emhlabeni, Jehova wasebentisa liVi lakhe kuze avete kutsi Mesiya bekatawutsengiswa ngetinhlavu telisiliva letingu-30. (Zak. 11:12, 13) Lona bekatamtsengisa bekutawuba ngumngani waJesu losedvute. (Hla. 41:9) Umphrofethi Zakhariya wabhalwa watsi: “Shaya umelusi futsi uyekele umhlambi wetimvu uhlakateke.” (Zak. 13:7) Kunekutsi bangamemukeli Jesu ngenca yaletintfo letenteka, bekufanele kucine kukholwa kwebantfu labanetinhlitiyo leticotfo nababona letiphrofetho tigcwaliseka kuJesu.

19. Yini bantfu labanetinhlitiyo leticotfo labayatiko?

 ¹⁹ Kunenkinga lefanako yini nalamuhla? Yebo. Etikhatsini tetfu, boFakazi labambalwa labatiwako bayekele kukhonta Jehova, babatihlubuki babese betama kudukisa nalabanye. Basakate imibiko lemibi ngaBoFakazi BaJehova ledukisako nalengemanga basebentisa emaphephandzaba, i-radio, i-TV kanye ne-Internet. Kodvwa loko akubadukisi bantfu labanetinhlitiyo leticotfo. Kunaloko, bayati kutsi liBhayibheli lasho kutsi tintfo letinjena betitawenteka.—Mat. 24:24; 2 Phet. 2:18-22.

20. Yini lesingayenta kuze singadukiswa bantfu labayekele kukhonta Jehova? (2 KuThimothi 4:4, 5)

²⁰ Yini lesingayenta kuze singayekeli kukhonta Jehova? Kufanele sihlale sicinisa kukholwa kwetfu ngekutsi silidadishe njalo liBhayibheli, sihlale sithantaza futsi sichubeke simatasatasa emsebentini Jehova lasinikete wona. (Fundza 2 KuThimothi 4:4, 5.) Nangabe sinekukholwa, angeke setfuke nasiva imibiko lemibi ngaBoFakazi BaJehova. (Isa. 28:16) Lutsandvo lesinalo ngaJehova, ngeliVi lakhe nangebazalwane betfu, lutasisita kutsi singadukiswa ngulabo labayekele kukhonta Jehova.

21. Ngisho nobe bantfu labanyenti lamuhla bangawemukeli umlayeto wetfu, kodvwa yini lesingaciniseka ngayo?

²¹ Ngesikhatsi saJesu, bantfu labanyenti bangabata futsi bangamemukeli. Nanobe kunjalo, labanyenti bamemukela. Lomunye wabo bekalilunga leNkantolo yemaJuda, futsi wemukelwa ‘nabaphristi labanyenti.’ (Imis. 6:7; Mat. 27:57-60; Mak. 15:43) Ngendlela lefanako, nalamuhla tigidzi tebantfu tikhetse kulandzela Jesu. Kungani? Ngobe tiyalati liciniso lelisemiBhalweni futsi tiyalitsandza. LiVi laNkulunkulu litsi: “Labo labatsandza umtsetfo wakho ngibo labanekuthula lokukhulu; kute lokutawubenta bagileke.”—Hla. 119:165.