Loko kwakushintja kuphila kwami ngobe ngacala kufuna kwati Nkulunkulu. Ngaphambi kwekutsi nginicocele ngaloko lokwenteka kulobo busuku, asenginicocele ngetintfo letenteka ekuphileni kwami nangisemncane letangenta ngafuna kwati Nkulunkulu.

Ngatalwa nga-1937 eGuesnain, lokulidolobha lelinemayini lelisenyakatfo yeFrance. Babe bekasebenta emayini yemalahle, futsi wangifundzisa kutsi kubalulekile kusebenta kamatima. Wangifundzisa nekutsi ngikwenyanye kungalungi. Wabona kutsi labanyenti lebebasebenta emayini bebangaphatfwa kahle futsi basebenta etindzaweni letiyingoti, ngako bekafuna kubasita. Kuze akhone kubasita, wangenela tinyonyane tetisebenti netitelega. Bekumtfukutselisa nekubona kutentisa kwebaphristi basendzaweni. Linyenti lalabaphristi bebaphila kahle, kodvwa bebacela imali nekudla etisebentini tasemayini lebetiphuyile. Babe yamnyanyisa kakhulu indlela baphristi lebebenta ngayo kangangekutsi akazange angifundzise lutfo ngenkholo. Ecinisweni, besingakhulumi ngaNkulunkulu.

 Njengobe bengikhula, nami ngacala kukwenyanya kungalungi. Lenye yetintfo lebengicabanga kutsi atikalungi kutsi bantfu labanyenti bebenyanya bantfu bekuhamba lebebahlala eFrance. Bengidlala ibhola nalabantfwana bebantfu bekuhamba futsi bengitsandza kuba nabo. Ngaphandle nje kwaloko, make bekawasePoland hhayi eFrance. Bengifuna kutsi bantfu bebuve lobehlukene bahlale kanyekanye ngekuthula futsi baphatfwe ngendlela lefanako.

Nga-1957, hulumende watsi angiye emphini. Kungako bengisetintsabeni tase-Algeria ngalobusuku lobumnyama khwishi lengike ngakhuluma ngabo. Ngemuva kwekumemeta ngitsi, “Nkulunkulu ngicela ungisite!” ngabona imbongolo yesiganga hhayi lisotja lebelitongihlasela! Kwatsi hhemu! Nanobe kunjalo, loku lokwenteka nalemphi, kwangenta ngacabangisisa ngenjongo yekuphila. Kungani silapha? Nkulunkulu unendzaba yini natsi? Kutawuke kube khona yini kuthula lokungapheli?

Ngesikhatsi ngivakashe ekhaya ngisuka emphini, ngahlangana nalomunye Fakazi WaJehova. Wanginika liBhayibheli lemaKatolika lesiFrench, lengacala kulifundza nangibuyela e-Algeria. Emavesi langitsintsa kakhulu ngulakuSembulo 21:3, 4, latsi: “Lithende laNkulunkulu likanye nebantfu . . . Uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona.” * Lamavi angimangalisa. Bengitibuta, ‘Kungenteka yini abe liciniso?’ Ngaleso sikhatsi, kuncane kakhulu lebengikwati ngaNkulunkulu nangeliBhayibheli.

Ngemuva kwekuphuma emphini nga-1959, ngahlangana nalomunye Fakazi lokutsiwa nguFrançois, lowangifundzisa emaciniso lamanyenti laseBhayibhelini. Sibonelo nje, wangikhombisa eBhayibhelini kutsi Nkulunkulu uneligama lelitsi Jehova. (Hla. 83:18) François waphindze wangichazela kutsi Jehova utawuletsa kulunga lamhlabeni, awugucule ube lipharadisi futsi agcwalise emavi lakuSembulo 21:3, 4.

Loko langifundzisa kona kwakunengcondvo, futsi kwayitsintsa inhlitiyo yami. Kodvwa bengibatfukutselele kakhulu labaphristi futsi ngifuna kubakhombisa kutsi bafundzisa tintfo letingekho eBhayibhelini! Bengicabanga njengababe, ngifuna kucedza kungalungi futsi bengite sineke. Loko bengifuna kukwenta ngekushesha!

François kanye nalabanye bangani bami lababoFakazi, bangisita kutsi ngehlise umoya. Bangichazela kutsi njengobe singemaKhristu, umsebenti wetfu akusiko kwehlulela bantfu kodvwa kubanika litsemba ngekubashumayela ngetindzaba letimnandzi teMbuso waNkulunkulu. Loyo ngumsebenti Jesu lawenta futsi watjela nebalandzeli bakhe kutsi bawente. (Mat. 24:14; Luk. 4:43) Kwadzingeka kutsi ngifundze kukhuluma nebantfu ngemusa nangekuhlakanipha ngisho nobe ngingavumelani netinkholelo tabo. LiBhayibheli litsi: “Sisebenti seNkhosi akukafaneli silwe, kodvwa kufanele sibe nemusa kubo bonkhe.”—2 Thim. 2:24.

 Ngenta lushintjo loludzingekile futsi ngabhajatiswa ngaba ngulomunye waBoFakazi BaJehova nga-1959, emhlanganweni wesigodzi. Kulomhlangano, ngabona lomunye dzadze losemusha lokutsiwa ngu-Angèle, futsi ngamtsandza. Ngacala kuvakasha ebandleni lebekakulo futsi sashada nga-1960. Ungumfati lokahle kakhulu futsi usipho lesiligugu lesivela kuJehova.—Taga 19:14.

Kuleminyaka, ngifundze lokunyenti kubazalwane labahlakaniphile nalabavutsiwe. Lesinye sifundvo lengisitfolile kutsi: Kunobe ngusiphi sabelo lesilukhuni, kufanele sitfobeke futsi sisebentise emavi lahlakaniphile latfolakala kuTaga 15:22, latsi: “Emacebo . . . ayaphumelela nangabe kunebeluleki labanyenti.”

Nga-1964, ngabona kutsi bekaliciniso kakhulu lamavi laphefumulelwe. Ngalowo mnyaka, ngacala kuba ngumbonisi lojikeletako, bengivakashela emabandla kuze ngikhutsate bazalwane futsi ngibasite basondzele kuJehova. Kodvwa bengineminyaka lengu-27 futsi bengite sikhatsi lesidze ngenta lomsebenti. Ngako bengenta emaphutsa. Kodvwa ngezama kufundza kuwo. Ngetulu kwako konkhe, ngatfola teluleko letibalulekile ‘kubeluleki’ labakahle nalabavutsiwe.

Ngikhumbula lokunye lokwenteka nangisacala kuba ngumbonisi lojikeletako. Ngesikhatsi ngivakashele lelinye libandla leliseParis, lomunye umzalwane lovutsiwe wacela kukhuluma nami. Ngatsi, “Kulungile.”

Wangibuta watsi: “Louis, nangabe dokotela avakashela bantfu emakhaya, usuke aye kubobani?”

Ngatsi: “Labagulako.”

Watsi: “Ucinisile. Kodvwa nginakile kutsi ucitsa sikhatsi lesinyenti nalabo labanebuhlobo lobuhle naJehova, njengalabadzala belibandla. Libandla letfu linebazalwane labanyenti nabodzadze labadvumatekile, labasha nalabanemahloni. Bangakhutsateka nawungacitsa sikhatsi sakho nabo futsi ubavakashele emakhaya abo kuze udle nabo.”

Leseluleko salomzalwane besinengcondvo futsi sisihle kakhulu. Yangitsintsa inhlitiyo indlela lebekatitsandza ngayo timvu taJehova. Ngako ngatitfoba futsi ngekushesha ngakusebentisa loko lebekakushito. Ngiyambonga Jehova ngebazalwane labanjalo.

 Nga-1969 nanga-1973, ngabekwa kutsi ngengamele Litiko Lebelibuke Tindzaba Tekudla emihlanganweni yetive lemibili lebeyiseColombes, eParis. Emhlanganweni wanga-1973, bekufanele sondle bantfu labangaba ngu-60 000 emalanga lasihlanu. Bengingati kutsi sitawukwenta njani loku. Nalapho, lebekutasisita seluleko lesikuTaga 15:22, lesitsi kufanele sitfole seluleko kulabanye. Ngacela bazalwane labavutsiwe kutsi bangisite. Labanye babo bebasebenta ngenyama, balima tibhidvo, bapheka futsi babatsengi. Sakhona kuwenta kahle lomsebenti lobewubonakala umatima.

Nga-1973, mine nemkami sacelwa kutsi siyosebenta eBethel leseFrance. Umsebenti lebengiwenta bewumatima kakhulu. Bekufanele ngifune indlela yekutsi bazalwane betfu labaseCameroon batfole tincwadzi, njengobe umsebenti wetfu bewuvinjelwe kulelive kusukela nga-1970 kuya ku-1993. Nalapho, bengingati kutsi ngitawukhona yini kuwenta lomsebenti. Umzalwane lobuke umsebenti lowentiwa eFrance kungenteka wakubona loko futsi wangikhutsata watsi: “Bazalwane betfu baseCameroon bayidzinga kakhulu lemfundvo levela kuNkulunkulu. Ngako, asibanike!” Nguloko kanye lesakwenta.

Bengivame kuya emaveni lakhelene neCameroon kuze ngihlangane nalabadzala bemabandla akhona. Labazalwane bebanesibindzi futsi bahlakaniphile, bangisita satfola tindlela tekutfumela tincwadzi kuze bazalwane baseCameroon batitfole njalo. Jehova wayibusisa imetamo yetfu. Ecinisweni, eminyakeni lengu-20, bantfu bakhe labakulelive akuzange kwenteke kutsi bangasitfoli Sicongosekulindza kanye ne-Our Kingdom Service lebeyiphuma njalo ngenyanga.

Kusukela nje nasicala kwatana na-Angèle, ngabona kutsi unebuhlobo lobuhle naJehova. Loko ngakubona kakhulu ngesikhatsi sesishadile.  Sibonelo nje, ngentsambama yelilanga lesashada ngalo, wangicela kutsi ngithantaze ngitjele Jehova ngesifiso setfu sekumkhonta ngalokugcwele njengobe sesishadile. Jehova wawuphendvula lomthantazo.

Angèle uphindze wangisita kutsi ngimetsembe kakhulu Jehova. Nasi sibonelo: Ngesikhatsi simenywa kutsi siyosebenta eBethel nga-1973, ngangabata ngobe bengiwutsandza umsebenti wekujikeleta. Kodvwa Angèle wangikhumbuta kutsi sinikele kuphila kwetfu kuJehova. Bekufanele sente nobe yini inhlangano lebeyisicela kutsi sikwente. (Heb. 13:17) Bengingamphikisa njani kuloko? Ngako saya eBethel. Umkami uhlakaniphile, uyacabangela futsi umtsandza mbamba Jehova. Loko kuwucinise kakhulu umshado wetfu futsi kwasisita senta tincumo letihlakaniphile kuleminyaka leminyenti sindzawonye.

Njengobe sesikhulile, Angèle uyachubeka nekuba ngumfati lokahle futsi uyangisekela. Nasi sibonelo, kuze sikhone kuya etikolweni tebuKhristu, futsi linyenti lato letichutjwa ngesiNgisi, mine na-Angèle sacala kusebenta kamatima kuze silucondze kancono lolulwimi. Ngako sacala kuya ebandleni lesiNgisi, ngisho nobe besiseminyakeni yabo-70 ngaleso sikhatsi. Ngenca yemisebenti leminyenti lebenginayo njengobe ngililunga leKomidi yeLigatja laseFrance, kufundza lolunye lulwimi bekumatima. Kepha besisitana sina-Angèle. Nyalo njengobe sesiseminyakeni yabo-80, siyachubeka silungiselela imihlangano yelibandla ngesiNgisi nangesiFrench. Siyetama nekuhlala sihlanganyela emihlanganweni yalibandla nasemsebentini wekushumayela nelibandla lesikulo. Jehova uyibusisile imetamo yetfu yekufundza siNgisi.

Nga-2017, satfola lesinye sibusiso. Mine na-Angèle samenywa kutsi siye eSikolweni Semalunga Emakomidi Emagatja Nemakhosikati Awo, lebesise-Watchtower Educational Center ePatterson, eNew York.

Jehova unguMfundzisi wetfu Lomkhulu. (Isa. 30:20) Ngako akusimangalisi kutsi bantfu bakhe lasebakhulile nalabasebasha batfola imfundvo lencono kakhulu! (Dut. 4:5-8) Ngibonile kutsi labasebasha labalalela Jehova kanye nemaKhristu lavutsiwe bayatfutfuka futsi baphumelele. Taga 9:9 titsi: “Fundzisa umuntfu lohlakaniphile khona atewuhlakanipha kakhulu. Fundzisa umuntfu lolungile khona atewuba nelwati lolunyenti.”

Ngalesinye sikhatsi ngihle ngicabanga ngaloba busuku lobebumnyama khwishi ngisetintsabeni tase-Algeria eminyakeni lengu-60 leyendlulile. Ngalobo busuku, bengingati kutsi ngitawuba nemphilo lejabulisa kangaka. Ngifundze lokunyenti kulabanye! Jehova usiphe imphilo lejabulisako naleyenetisako. Ngako sitimisele kungayekeli kufundza kuBabe wetfu losezulwini nakubazalwane nabodzadze labahlakaniphile, labavutsiwe nalabatsandza Jehova.