1. Yini leyakumangalisa nawucala kucocela labanye ngemlayeto weliBhayibheli?

USAKHUMBULA yini ngesikhatsi ubona kutsi sewulitfolile liciniso? Bekumelula kukucondza konkhe lokuseBhayibhelini! Bewucabanga kutsi bonkhe bantfu batakwemukela loko besewukukholelwa. Bewuciniseka kutsi umlayeto weliBhayibheli utawubenta bajabulele kuphila nyalo futsi babe nelitsemba lelihle ngesikhatsi lesitako. (Hla. 119:105) Ngako wacocela bonkhe bangani bakho netihlobo takho ngemaciniso lebesewuwafundzile. Kepha kwentekani? Wamangala ngobe bantfu labanyenti abakwemukelanga loku bewubatjela kona.

2-3. Ngemalanga aJesu, yini bantfu labanyenti lebebayicabanga ngaye nangemlayeto wakhe?

² Akukafaneli simangale nangabe labanye bangawemukeli umlayeto lesiwushumayelako. Ngemalanga aJesu, bantfu labanyenti abazange bamemukele, nanobe bekenta timangaliso lebetifakazela kutsi usekelwa nguNkulunkulu. Nasi sibonelo, Jesu wavusa Lazaro ekufeni, lokusimangaliso lebebangeke bakhone kusiphika labo bebamphikisa. Nanobe kunjalo, baholi bemaJuda abazange bakholwe kutsi unguMesiya. Bebafuna ngisho nekubulala Jesu naLazaro!—Joh. 11:47, 48, 53; 12:9-11.

³ Jesu bekati kutsi bantfu labanyenti bebangeke bakholwe kutsi unguMesiya. (Joh. 5:39-44) Watjela bafundzi baJohane uMbhabhatisi watsi: “Uyajabula loyo lote sizatfu sekungabata ngami.” (Mat. 11:2, 3, 6) Kungani bantfu labanyenti bangazange bamemukele Jesu?

4. Sitawucoca ngani kulesihloko?

 ⁴ Kulesihloko nakulesilandzelako, sitawucoca ngetizatfu letabangela bantfu labanyenti lebebaphila ngesikhatsi saJesu bangamemukeli. Sitawubona nekutsi kungani bantfu labanyenti lamuhla bangawemukeli umlayeto wetfu. Sitawuphindze sifundze ngekutsi kubaluleke ngani kutsi sibe nekukholwa lokucinile kuJesu kuze singayekeli kumlandzela.

5. Yini lokungenteka yenta labanye bacabanga kutsi Jesu akasuye Mesiya lowetsenjisiwe?

⁵ Labanyenti abamemukelanga Jesu ngenca yendlela lakhula ngayo. Bavuma kutsi bekangumfundzisi lonelikhono futsi enta timangaliso. Kodvwa kubo, bekamane nje ayindvodzana yembati lophuyile. BekawaseNazaretha, lokulidolobha lebebacabanga kutsi alikabaluleki kangako. Ngisho naNathanayeli lowagcine angumfundzi waJesu, wacale watsi: “Kukhona yini lokuhle lokungavela eNazaretha?” (Joh. 1:46) Kungenteka Nathanayeli bekangalitsandzi lelidolobha Jesu lebekahlala kulo. Nobe kungenteka bekacabanga ngesiphrofetho lesikuMikha 5:2, lesitsi Jesu bekatawutalelwa eBhetlehema, hhayi eNazaretha.

6. Yini lokufanele ngabe yasita bantfu lebebaphila ngesikhatsi saJesu babona kutsi unguMesiya?

⁶ Itsini imiBhalo? Umphrofethi Isaya waphrofetha kutsi titsa taJesu betingeke tiyinake ‘imininigwane yesitukulwane [saMesiya].’ (Isa. 53:8) Leminyenti yalemininingwane bekuphrofethiwe ngayo. Kube labantfu batinika sikhatsi sekuhlola yonkhe lemininingwane, bebatawubona kutsi Jesu watalelwa eBetlehema nekutsi usitukulwane seNkhosi Davide. (Luk. 2:4-7) Ngako Jesu watalelwa endzaweni lebekuphrofethwe ngayo kuMikha 5:2. Beyikuphi-ke inkinga? Bantfu bashesha kwenta sincumo. Bebete onkhe emaciniso endzaba. Ngenca yaloko, abazange bamemukele Jesu.

7. Yini leyenta bantfu labanyenti lamuhla bangabemukeli bantfu baJehova?

⁷ Kunenkinga lefanako yini nalamuhla? Yebo. Bantfu baJehova labanyenti lamuhla abakanjingi futsi abakadvumi. Ngako, bantfu labanyenti bacabanga kutsi “abakafundzi lokuyaphi nekutsi babantfukatana nje.” (Imis. 4:13) Labanye beva shengatsi bantfu baJehova akukafaneli bafundzise ngeliBhayibheli ngobe abakayi etikolweni letatiwako letifundzisa ngenkholo. Labanye batsi BoFakazi BaJehova “bayinkholo yaseMelika,” kodvwa liciniso likutsi linyenti laBoFakazi BaJehova alihlali eMelika. Kantsi labanye batjelwa kutsi boFakazi abakholelwa kuJesu. Kuleminyaka, bekutsiwa bantfu baJehova “Bangemakhomanisi,” futsi “Batinhloli taseMelika.” Ngenca yekutsi labantfu labatjelwe letindzaba bete onkhe emaciniso, abafuni kuba BoFakazi BaJehova.

8. Ngekusho kweMisebenti 17:11, yini bantfu lokufanele bayente kuze babone tinceku taNkulunkulu lamuhla?

⁸ Yini umuntfu langayenta kuze angaphelelwa kukholwa kwakhe? Bantfu kufanele betame kutfola onkhe emaciniso endzaba. Nguloko Lukha longumbhali weliBhayibheli lakwenta. Watimisela kuhlolisisa tonkhe tintfo “ngekucophelela kusukela ekucaleni.” Bekafuna kutsi bantfu labafundza loko lakubhalile bati kutsi tintfo labativile ngaJesu tiliciniso. (Luk. 1:1-4) EmaJuda aseBheriya bekafana naLukha. Ngesikhatsi ativa kwekucala tindzaba letimnandzi letimayelana naJesu, aticatsanisa naloko lokushiwo yimiBhalo yesiHebheru kute aciniseke kutsi kuliciniso yini loko lebekakuvile. (Fundza Imisebenti 17:11.) Ngendlela lefanako, bantfu lamuhla kufanele bawahlolisise emaciniso endzaba. Kufanele  bacatsanise loko labafundziswa kona bantfu baNkulunkulu naloko lokushiwo yimiBhalo. Kufanele bafundze nangaloko lokwentiwe bantfu baJehova lamuhla. Nangabe bahlola yonkhe imininingwane, angeke bavumele loko labakuva ngebantfu kutsi kubadukise.

9. Yini leyenteka ngesikhatsi Jesu ala kwenta sibonakaliso lesivela ezulwini?

⁹ Ngemalanga aJesu, labanye bebangenetiswa timfundziso takhe. Bebafuna kutsi ente lokunyenti. Bebafuna acinisekise kutsi unguMesiya ngekutsi ente “sibonakaliso lesivela ezulwini.” (Mat. 16:1) Kungenteka bebafuna kutsi ente loku ngesizatfu saloko bebakufundze kuDanyela 7:13, 14. Kodvwa bekusengakabi sikhatsi saJehova sekutsi kugcwaliseke lesiphrofetho. Loko lokwafundziswa nguJesu bekufanele ngabe kwabacinisekisa kutsi unguMesiya. Kepha ngesikhatsi ala kubentela lesibonakaliso lebebasifuna, abazange bamemukela.—Mat. 16:4.

10. Jesu wasigcwalisa njani siphrofetho lesabhalwa ngu-Isaya mayelana naMesiya?

¹⁰ Itsini imiBhalo? Umphrofethi Isaya wabhala loku mayelana naMesiya: ‘Angeke amemete nobe aphakamise livi lakhe, futsi angeke ente livi lakhe livakale esitaladini.’ (Isa. 42:1, 2) Ngesikhatsi Jesu ashumayela, bekangafuni kutsi kunakwe yena. Akazange akhe emathempeli lamakhulu nobe agcoke timphahla telikhetselo tenkholo nobe afune bantfu bambite ngeticu tenkholo letibalulekile. Ngesikhatsi kutekwa licala lakhe, Jesu wala kujabulisa iNkhosi Herodi ngekutsi ayentele simangaliso, nanobe kuphila kwakhe bekusengotini. (Luk. 23:8-11) Jesu bekatenta timangaliso, kodvwa lebekubaluleke kakhulu kuye bekukwenta umsebenti wekushumayela. Watjela bafundzi bakhe watsi: “Nguloko lengikutele.”—Mak. 1:38.

11. Labanye bantfu lamuhla banamiphi imibono lengasiyo?

¹¹ Kunenkinga lefanako yini nalamuhla? Yebo. Bantfu labanyenti lamuhla bajatjuliswa ngemasontfo lamakhulu lanemihlobiso ledule  kakhulu, nabafundisi labaneticu letibonakala tibalulekile, kanye nemikhosi bantfu labanengi lesebakhohliwe kutsi ayikasekelwa eBhayibhelini. Kodvwa bantfu labaya kulamasontfo bafundza lokuncane kakhulu ngaNkulunkulu nangetinjongo takhe. Labo labaya emihlanganweni yetfu yebuKhristu, bayafundza kutsi Jehova ulindzele ini kitsi, nekutsi singaphila njani ngekuvumelana nentsandvo yakhe. EmaHholwa etfu eMbuso ahlobile futsi akahle, kodvwa ete imihlobiso ledulile. Labo labaholako abagcoki timphahla letikhetsekile futsi bete ticu letivakala tibalulekile. Loko lesikufundzisako nalesikukholelwako kusekelwe eBhayibhelini. Nobe kunjalo, bantfu labanyenti lamuhla abawemukeli umlayeto wetfu ngobe asiyenti imikhosi labayitsandzako futsi naloko lesikufundzisako akusiko labafuna kukuva.

12. Njengobe kusho KumaHebheru 11:1, 6, kufanele kusekelwe kuphi kukholwa kwetfu?

¹² Yini lesingayenta kuze singaphelelwa kukholwa kwetfu? Umphostoli Pawula watjela emaKhristu aseRoma watsi: “Umuntfu ukholwa nangabe sekeve livi. Lelivi livakala nangabe kukhona loshumayela ngaKhristu.” (Rom. 10:17) Kukholwa kwetfu sikwakha ngekudadisha imiBhalo, hhayi ngekuhlanganyela emikhosini yenkholo, ngisho nobe ibonakala imihle emehlweni ebantfu. Kufanele sakhe kukholwa lokucinile lokusekelwe elwatini lolungulonalona ngobe “ngaphandle kwekukholwa ngeke kwenteke kutsi umuntfu amjabulise Nkulunkulu.” (Fundza KumaHebheru 11:1, 6.) Ngako, asisidzingi sibonakaliso lesimangalisako lesivela ezulwini lesifakazela kutsi sesilitfolile liciniso. Kudadisha ngekucophelela timfundziso letiseBhayibhelini leticinisa kukholwa, kwenele kuze siciniseke kutsi sesilitfolile liciniso futsi kucedze nekungabata.

13. Yini leyabangela bantfu labanyenti bangamemukeli Jesu?

¹³ Ngemalanga aJesu, bafundzi baJohane uMbhabhatisi bamangaliswa kutsi bafundzi baJesu abakuzili kudla. Jesu wachaza kutsi  bekute sidzingo sekutsi bazile kudla njengobe bekasaphila. (Mat. 9:14-17) Nobe kunjalo, baFarisi kanye nalabanye lebebaphikisa Jesu abazange bamemukele ngobe bekangawagcini emasiko abo. Batfukutsela ngesikhatsi elapha labagulako ngeliSabatha. (Mak. 3:1-6; Joh. 9:16) Bebatigcabha ngekutsi bayaligcina liSabatha kodvwa babe benta libhizinisi ethempelini. Batfukutsela bagcwala kokane ngesikhatsi Jesu atsi benta intfo lembi. (Mat. 21:12, 13, 15) Batfukutsela kakhulu nalabo Jesu labashumayela esinagogeni laseNazaretha ngesikhatsi asebentisa tibonelo tangesikhatsi sema-Israyeli kuze abakhombise kutsi bebaticabangela bona futsi bete kukholwa. (Luk. 4:16, 25-30) Bantfu labanengi abazange bamemukele Jesu ngobe akazange ente ngendlela lebebacanga ngayo.—Mat. 11:16-19.

14. Kungani Jesu awalahla emasiko lebekangavumelani nemiBhalo?

¹⁴ Itsini imiBhalo? Asebentisa umphrofethi Isaya, Jehova watsi: “Labantfu bakhuluma nami ngemilomo yabo futsi bayangidvumisa ngetindzebe tabo, kodvwa inhlitiyo yabo ikhashane kakhulu nami; futsi kungesaba kwabo kusekelwe emiyalweni labayifundziswe bantfu.” (Isa. 29:13) Jesu wenta kahle ngekulahla emasiko ebantfu lebekangahambisani nemiBhalo. Labo lebebacabanga kutsi imitsetfo kanye nemasiko ebantfu kubaluleke kakhulu kuneliBhayibheli, bebangamemukeli Jehova kanye naMesiya lamtfumile.

15. Yini leyenta bantu labanyenti lamuhla bangabatsandzi BoFakazi BaJehova?

¹⁵ Kunenkinga lefanako yini nalamuhla? Yebo. Bantfu labanyenti bayatfukutsela nangabe BoFakazi BaJehova bangahlanganyeli nabo ekugubheni imikhosi lengakasekelwa eBhayibhelini, lefaka ekhatsi emalanga ekutalwa naKhisimusi. Labanye abajabuli nangabe BoFakazi BaJehova bangahlanganyeli emikhosini yelive nobe bangahlanganyeli emasikweni emingcwabo langahambisani neliVi laNkulunkulu. Labantfu bakholelwa kutsi bakhonta Nkulunkulu ngendlela layemukelako. Kodvwa angeke bamjabulise nangabe bakhetsa emasiko elive kunetimfundziso leticacile letitfolakala eBhayibhelini.—Mak. 7:7-9.

16. Ngekusho kweTihlabelelo 119:97, 113, 163-165, yini lokufanele siyente futsi yini lokungakafaneli siyente?

¹⁶ Yini lesingayenta kuze singaphelelwa kukholwa kwetfu? Kufanele siyitsandze kakhulu imitsetfo yaJehova netimiso takhe. (Fundza Tihlabelelo 119:97, 113, 163-165.) Nangabe simtsandza Jehova, angeke siwagcine emasiko langamjabulisi. Kute lokutawubaluleka kakhulu kitsi kwendlula kutsandza Jehova.

17. Bantfu labanyenti ngesikhatsi saJesu bebalindzele kutsi Mesiya enteni?

¹⁷ Ngemalanga aJesu, bantfu labanyenti bebafuna kutsi kube nelushintjo kutepolitiki. Bebalindzele kutsi Mesiya abakhulule ekucindzetelweni ngumbuso wemaRoma. Kodvwa ngesikhatsi betama kubeka Jesu kutsi abe yinkhosi yabo, wala. (Joh. 6:14, 15) Baphristi kanye nalabanye bebakhatsateke ngekutsi Jesu utawuletsa lushintjo kutepolitiki, bese emaRoma ayatfukutsela emuke baphristi emandla lebekabanike wona. Ngenca yekukhatsateka ngaloko, emaJuda lamanyenti akazange amemukele Jesu.

18. Ngutiphi tiphrofetho letiseBhayibhelini letimayelana naMesiya bantfu labanyenti labangazange batinake?

¹⁸ Itsini imiBhalo? Nanobe tiphrofetho letinyenti tasho kutsi Mesiya utawugcina aLichawe lelincobako, letinye takhombisa kutsi bekutawudzingeka acale afele tono tetfu. (Isa. 53:9, 12) Ngako, kungani emaJuda bekanembono longasiwo ngaMesiya? Bantfu labanyenti  lebebaphila ngesikhatsi saJesu, bebangatinaki tiphrofetho lebetingeke ticedze tinkinga tabo ngekushesha.—Joh. 6:26, 27.

19. Ngumiphi imibono lengasiyo leyente bantfu labanyenti lamuhla bangawemukeli umlayeto wetfu?

¹⁹ Kunenkinga lefanako yini nalamuhla? Yebo. Bantfu labanyenti lamuhla abasemukeli ngobe asifuni kungenela tepolitiki. Bafuna sivote nakunelukhetfo. Kodvwa nangabe sikhetsa kubuswa ngumuntfu, sisuke singamemukeli Jehova. (1 Sam. 8:4-7) Kungenteka bantfu bacabange kutsi kufanele sakhe tikolwa netibhedlela futsi sente naletinye tintfo letisita umphakatsi. Abawemukeli umlayeto wetfu ngobe sisebenta kamatima sishumayela kunekutsi setame kucatulula tinkinga talelive.

20. Njengobe Jesu asho kuMatewu 7:21-23, yini lokufanele ibaluleke kakhulu kitsi?

²⁰ Yini lesingayenta kuze singaphelelwa kukholwa kwetfu? (Fundza Matewu 7:21-23.) Lokufanele kubaluleke kakhulu kitsi, kwenta umsebenti lesawunikwa nguJesu. (Mat. 28:19, 20) Akukafaneli siphatanyiswe kwetama kucatulula tinkinga talelive. Siyabatsandza bantfu futsi sinendzaba netinkinga tabo, kodvwa siyati kutsi indlela lencono yekusita bomakhelwane betfu kutsi sibafundzise ngeMbuso waNkulunkulu futsi sibasite babe nebuhlobo naJehova.

21. Yini lokufanele sitimisele kuyenta?

²¹ Kulesihloko, sicoce ngetizatfu letine letenta bantfu labanyenti bangamemukeli Jesu ngesikhatsi sakhe futsi letenta nalabanye lamuhla kutsi bangabemukeli balandzeli bakhe. Nguleti kuphela yini letizatfu? Cha. Esihlokweni lesilandzelako, sitawucoca ngaletinye tizatfu letine. Shengatsi singatimisela kuhlale simemukela Jesu futsi sihlale sinekukholwa lokucinile!