1-3. Kungenteka tabangelwa yini tinkinga emkhatsini wabo-Evodiya naSintike, futsi singatigwema kanjani tinkinga letifanako? (Buka sitfombe lesisekucaleni kwalesihloko.)

TINCEKU taJehova tiyitsatsa njengalebalulekile incwadzi lengcwele yaNkulunkulu, liBhayibheli. Njengobe sinesono, sonkhe siyaye sitfole seluleko lesivela eBhayibhelini. Sitawenta njani nasisitfola? Asesicoce ngemaKhristu angelikhulu lekucala, lokungu-Evodiya naSintike. Bekunetinkinga letinkhulu emkhatsini walabesifazane lababili labagcotjiwe. Ngutiphi letinkinga? LiBhayibheli alisho. Kodvwa kute sifanekise, asicoce nganaku lesicabanga kutsi kungenteka bekuyinkinga.

² Asesitsi Evodiya umema bazalwane nabodzadze ekhaya lakhe kuze batewudla naye futsi bajabulele tincociswano. Sintike abengakamenywa, kodvwa weva kutsi bazalwane babenesikhatsi lesimnandzi. Kungenteka Sintike watsi: ‘Nanyalo angikholwa kutsi Evodiya akangimemi! Bengicabanga kutsi sibangani labakhulu.’ Ativa advumele, Sintike wase akasamnambitsi kahle Evodiya. Ngako, wahlela wakakhe umcimbi futsi wamema bazalwane nabodzadze labafanako​—wangamemi Evodiya. Lenkinga lebeyikhona emkhatsini wabo-Evodiya naSintike beyingakuphatamisa  kuthula kwelibandla. LiBhayibheli alisitjeli umphumela waloko lokwenteka, kodvwa kungenteka labodzadze basilalela seluleko semphostoli Pawula.​—Fil. 4:2, 3.

³ Nalamuhla timo letifana naleti tiyaye tibangele tinkinga emabandleni ebantfu baJehova. Nanobe kunjalo, letinkinga tingacatululwa nobe tigwenywe nangabe sisebentisa seluleko lesitfolakala eVini laNkulunkulu liBhayibheli. Nangabe silitsatsa njengalelibalulekile liVi laJehova, sitawulandzela ticondziso talo.​—Hla. 27:11.

4, 5. Ngusiphi seluleko liVi laNkulunkulu lelisinika sona endzabeni yekutibamba mayelana nendlela lesitiva ngayo?

⁴ Akusilula kutibamba nangabe siva shengatsi setfukiwe noma siphetfwe kabi. Kungasidvumata kakhulu nangabe siphatseka kabi ngesizatfu sebuve betfu, libala lesikhumba setfu nobe lenye indlela yekubukeka kwetfu leyehlukile. Kubuhlungu kakhulu nangabe kungumKhristu losivise lobuhlungu. Nangabe sibhekene nesimo lesinjalo lesibangelwa kutsi sinesono, liVi laNkulunkulu linaso yini seluleko lesingasisita?

⁵ Kusukela ekudalweni kwebantfu, Jehova bekasolo ayinaka indlela labenta ngayo. Uyayinaka indlela lesitiva ngayo kanye netento tetfu. Nangabe imicabango yetfu ibuswa yindlela lesitiva ngayo, loko kungabangela kutsi sikhulume emagama labuhlungu lesitatisola ngawo ngekuhamba kwesikhatsi. Kukuhlakanipha kusebentisa seluleko lesitfolakala eBhayibhelini lesimayelana nekutibamba nekungasheshi sicansuke. (Fundza Taga 16:32; Umshumayeli 7:9.) Sonkhe akukafaneli sibe netinhlitiyo letibutsakatsaka futsi kufanele sisheshe sicolele. Kucolela yintfo lebaluleke kakhulu kuJehova naJesu. (Mat. 6:14, 15) Sikhona yini sidzingo sekutsi ufundze kucolela nobe ufundze kutibamba mayelana nendlela lotiva ngayo?

6. Kungani kufanele sitigadze singabi nentfukutselo?

⁶ Bantfu labehlulekako kutibamba bavamise kuhlala batfukutsele. Loko kungabangela kutsi labanye bantfu bangatsandzi kutihlanganisa nabo. Umuntfu lohlala atfukutsele angaba nemtselela lomubi ebandleni. Angetama kuyifihla lentfukutselo nobe lenzondo, kodvwa imicabango lemibi lebhacile enhlitiyweni yakhe ‘itawubasebaleni ngalelinye lilanga.’ (Taga 26:24-26) Labadzala belibandla bangakhona kusita umuntfu lonjalo kuze abone kutsi umuntfu lonentfukutselo, inzondo nalobamba emagcubu ute indzawo kulenhlangano yaNkulunkulu. Livi laJehova licacile nalichaza lendzaba. (Lev. 19:17, 18; Rom. 3:11-18) Uyavumelana yini nalo?

7, 8. (a) Jehova uyicondzisa njani inhlangano yakhe yasemhlabeni? (b) Ngutiphi letinye ticondziso letitfolakala eVini laNkulunkulu futsi kungani kufanele sitilalele?

⁷ Jehova ucondzisa futsi ondle labo labayincenye yenhlangano yakhe yasemhlabeni, asebentisa “sisebenti lesetsembekile nalesihlakaniphile” lesicondziswa nguKhristu, ‘loyinhloko yelibandla.’ (Mat. 24:45-47; Ef. 5:23) Njengesigungu lesibusako sangelikhulu lekucala, lesisebenti siyalemukela liVi laNkulunkulu leliphefumlelwe nobe umlayeto walo futsi silitsatsa njengalelibalulekile. (Fundza 1 Thesalonika 2:13.) Ngutiphi letinye ticondziso nobe imiyalo lengasisita letfolakala eBhayibhelini?

⁸ LiBhayibheli litsi kufanele sibe khona njalo emihlanganweni yelibandla. (Heb. 10:24, 25) Lisikhutsata kutsi sitfutfukise timfundziso letinebunye. (1 Khor. 1:10) LiVi laNkulunkulu lisitjela kutsi kufanele sifune  kucala uMbuso wakhe. (Mat. 6:33) ImiBhalo iphindze igcizelele nemsebenti lesinawo wekushumayela endlini ngendlu, etindzaweni tawonkhe wonkhe kanye nekushumayela singakahleli. (Mat. 28:19, 20; Imis. 5:42; 17:17; 20:20) LiVi laNkulunkulu litsi labadzala belibandla kufanele bagcine inhlangano yakhe ihlantekile. (1 Khor. 5:1-5, 13; 1 Thim. 5:19-21) Jehova ufuna kutsi bonkhe labo labasenhlanganweni yakhe bahlale bahlantekile emtimbeni kanye nasebuhlotjeni labanabo naye.​—2 Khor. 7:1.

9. Nguyiphi indlela lekuphela kwayo lesetjentiswako kuze isisite sicondze liVi laNkulunkulu?

⁹ Labanye bangeva shengatsi bangakhona kukuchaza loko lokushiwo liBhayibheli. Nanobe kunjalo, Jesu umise ‘sisebenti lesetsembekile’ kuze sibe yindlela yekuniketa tintfo letisisita sifundze ngaJehova. Kusukela nga-1919, Jesu Khristu bekasolo asebentisa lesisebenti kuze asite balandzeli bakhe balicondze liVi laNkulunkulu futsi balalele loko lelikushoko. Nangabe silalela leticondziso letitfolakala eBhayibhelini, sitabe sitfutfukisa kuhlanteka, kuthula kanye nebunye ebandleni. Ngamunye wetfu kufanele atibute kutsi: ‘Ngetsembekile yini kulendlela Jesu layisebentisako lamuhla?’

10. Incenye yenhlangano yaJehova yasezulwini ichazwe njani encwadzini yaHezekiya?

¹⁰ LiVi laJehova lisitjela ngencenye yenhlangano yakhe yasezulwini. Nasi sibonelo: Umphrofethi Hezekiyeli waba nembono lapho inhlangano yaJehova lesezulwini imelelwe yincola yakhe. (Hez. 1:4-28) Jehova ugibele lencola futsi iya nobe ngabe kukuphi lapho umoya wakhe utsi ayiye khona. Ngetulu kwaloko, lenhlangano yakhe lesezulwini icondzisa inhlangano yakhe lesemhlabeni. Lencola yaJehova beyisolo ihamba! Cabanga ngelushintjo lolwentiwe yinhlangano eminyakeni leminyenti leyendlulile​—futsi khumbula kutsi nguJehova lowenta loloshintjo. Njengobe Jesu kanye netingilosi bakulungele kubhubhisa lelive lalomubi, incola yaJehova ichubeka iya embili njengoba alwelwa bukhosi bakhe nekungcweliswa kwelibito lakhe.

11, 12. Ngutiphi letinye tintfo letentiwe yinhlangano yaJehova?

¹¹ Cabanga ngaloko lekwentiwe yinhlangano yaJehova lesemhlabeni kulamalanga ekugcina. Kwakha. Bantfu labanyenti bebamatasatasa ngemsebenti wekwakha inhloko hhovisi yaBoFakazi BaJehova eWarwick, leseNew York, eMelika. Ticondziswa yi-Worldwide Design/​Construction Department, tinkhulungwane temavolontiya emhlabeni wonkhe tisebenta matima kuze takhe emaHholwa eMbuso kanye nekukhulisa takhiwo temagatja. Sibonga kakhulu ngalamavolontiya latinikele kulomsebenti. Khumbula kutsi Jehova uyababusisa bamemeteli beMbuso wakhe labasemhlabeni wonkhe, labatitfobako futsi banikele ngalabanako kute basekele lomsebenti.​—Luk. 21:1-4.

¹² Imfundvo. Cabanga ngetikolwa letikhona letitfutfukisa imfundvo levela kuNkulunkulu.  (Isa. 2:2, 3) SineSikolwa Semsebenti Semahlahlandlela, Sikolwa Sebavangeli Bembuso, Sikolwa SaseGileyadi, Sikolwa Salabasandza Kufika eBethel, Sikolwa Sebabonisi Labajikeletako Nemakhosikati Abo, Sikolwa Salabadzala Belibandla, Sikolwa Semsebenti WeMbuso kanye neSikolwa Semalunga Emakomidi Emagatja Nemakhosikati Awo. Jehova uyakutsandza kufundzisa bantfu bakhe! Imfundvo leseBhayibhelini siphindze siyitfole ku-website yetfu i-jw.org, lapho sinetincwadzi letitfolakala ngetilwimi letinyenti. Le-website inetincenye letingasita bantfwana, imindeni kanye nalekhuluma ngetindzaba. Uyayisebentisa yini i-jw.org nawushumayela kanye nasekukhonteni kwemndeni?

13. Ngutiphi tintfo lokufanele sitente njengetikhonti taJehova letetsembekile?

¹³ Kulilungelo lelikhulu kuba yincenye yenhlangano yaJehova. Lwati lesinalo ngemiyalo yaNkulunkulu kanye netimiso takhe kusenta sifune kwenta lokulungile futsi siphakamise bukhosi bakhe. Njengobe lelive lichubeka litiphatsa kabi nakakhulu, kufanele ‘sikutondze konkhe lokubi,’ njengobe nje naJehova akutondza. (Hla. 97:10) Asifuni kwenta lokubi ngekutsi sitsi: ‘Lokubi kuhle, nalokuhle sitsi kubi.’ (Isa. 5:20) Ngenca yekutsi sifuna kujabulisa Nkulunkulu, siyetama kuhlala sihlantekile emtimbeni, ekutiphatseni kwetfu kanye nasebuhlotjeni betfu naNkulunkulu. (1 Khor. 6:9-11) Siyamtsandza Jehova, siyametsemba, futsi loko sikukhombisa ngekutsi siphile ngetimiso takhe letiseVini lakhe leliligugu. Senta konkhe lokusemandleni etfu kutsi sisebentise leto timiso emakhaya, emabandleni, emisebentini, etikolweni, nakuletinye tindzawo. (Taga 15:3) Cabanga nangaletinye tindlela lesingakhombisa ngato lutsandvo lwetfu ngaNkulunkulu.

14. Batali labangemaKhristu bangakhombisa njani kutsi betsembekile kuNkulunkulu?

¹⁴ Kukhulisa umntfwana. Batali labangemaKhristu bakhombisa kwetsembeka kwabo kuJehova ngekutsi bakhulise bantfwababo ngekuvumelana neliVi lakhe. Batali labesaba Nkulunkulu abawalandzeli emasiko endzawo uma kutiwa endzabeni yekukhulisa umntfwana. Umbono walelive awemukeleki ekhaya lemKhristu. (Ef. 2:2) Babe lobhatjatisiwe longumKhristu angeke atsi: ‘Eveni lakitsi, bantfwana bafundziswa bafati.’ LiBhayibheli licacile kulendzaba nalitsi: “Bobabe, . . . chubekani nikhulisa [bantfwabenu] ngekubayala nangesicondziso saJehova.” (Ef. 6:4) Batali labesaba Nkulunkulu bafuna bantfwababo bafanane naSamuweli, ngobe Jehova waba naye nasakhula.​—1 Sam. 3:19.

15. Sikhombisa njani kutsi setsembekile kuJehova nangabe senta tincumo letinkhulu?

¹⁵ Kwenta tincumo. Nangabe senta tincumo letinkhulu ekuphileni, indlela lesingakhombisa ngayo kutsi setsembekile kuNkulunkulu kutsi sifune lusito eVini lakhe kanye nasenhlanganweni yakhe. Kuze sifanekise kubaluleka kwekwenta kanjalo; cabanga ngesimo lesibuhlungu lesitsintsa batali labanyenti. Kungumkhuba lovamile kutsi labo labatfutsele kulamanye emave batfumele bantfwana babo labatsandza kutalwa emuva emaveni akubo kute tihlobo tabo nobe bogogo babakhulise, bese bona bachubeka nekusebenta futsi bakhe imali kulelo live labasuke batfutsele kulo. Lesi sincumo umuntfu latentela sona, kepha kufanele sihlale sikhumbula kutsi Nkulunkulu utawusehlulela ngetincumo lesitentako. (Fundza Roma 14:12.) Kukuhlakanipha yini kutsi sente tincumo letibalulekile ngemndeni yetfu kanye nekuphila kwetfu sibe singakasifuni  sicondziso seliBhayibheli? Cha! Siyaludzinga lusito lwaBabe wetfu losezulwini ngoba ngeke sikhone kuticondzisa tsine.​—Jer. 10:23.

16. Nakatala indvodzana yakhe, ngusiphi sincumo lomunye make lokwadzingeka kutsi asente futsi wasitwa yini kutsi ente sincumo lesikahle?

¹⁶ Lomunye wesifazane lowatala umntfwana wemfana ngesikhatsi ahlala kulelinye live, bekafuna kutfumela lomntfwanakhe emuva ekhaya kute ayonakekelwa bogogo wakhe. Ngesikhatsi atsandza kubeleka, wacala kufundza liBhayibheli nalomunye waBoFakazi BaJehova. Watfutfuka kakhulu futsi wafundza nekutsi Nkulunkulu unike yena umsebenti wekutsi afundzise umntfwanakhe kute agcine akhonta Jehova. (Hla. 127:3; Taga 22:6) Lowesifazane losemusha watfululela sifuba sakhe kuJehova, njengobe imiBhalo itsi sonkhe asente kanjalo. (Hla. 62:7, 8) Waphindze watfululela sifuba sakhe kuloyo bekamfundzisa liBhayibheli kanye nakulabanye ebandleni. Nakuba tihlobo nebangani bakhe bamcindzetela kutsi atfumele lomntfwana emuva kugogo wakhe, wancuma kutsi bekungasikahle kwenta kanjalo. Indvodza yakhe yajabula kakhulu ngendlela libandla lelamsekela ngayo umkakhe kanye nemtfwana, futsi yemukela sifundvo seliBhayibheli, yacala kuya nabo emihlanganweni yelibandla. Lomake weva shengatsi Jehova uwuphendvulile yini umthantazo wakhe losuka enhlitiyweni? Asingabati kutsi wativa kanjalo.

17. Ngusiphi sicondziso lesisitfole ngenhlangano yaJehova nasifundzisa bantfu liBhayibheli?

¹⁷ Kulandzela sicondziso. Indlela lebalulekile lesingakhombisa ngayo kwetsembeka kuNkulunkulu kulandzela sicondziso lesisitfola ngenhlangano yakhe. Nasi sibonelo: Cabanga ngeticondziso lesiniketwe tona lesingatisebentisa nasifundzisa bantfu liBhayibheli. Sikhutsatwa kutsi ngemuva kwekucedza kufundza nemuntfu incwadzi letsi: Lifundzisani Mbambambamba LiBhayibheli?, kufanele sitsatse imizuzu lembalwa simfundzise ngenhlangano yaJehova. Loko singakwenta sisebentisa i-video letsi: Yini Leyentekako EHholweni LeMbuso? kanye nencwajana letsi: Bobani Labenta Intsandvo YaJehova Lamuhla? Sikhutsatwa kutsi nangabe sesicedzile kufundza incwadzi letsi: Lokufundziswa LiBhayibheli futsi nemfundzi atfutfuka kahle, kufanele bese sifundza kanye naye incwadzi letsi: “Tigcineni Elutsandvweni LwaNkulunkulu,” ngisho nobe ngabe sewubhatjatisiwe. Inhlangano isinikete lesicondziso kute bafundzi labasha beliBhayibheli ‘basime ekukholweni.’ (Khol. 2:7) Uyatilandzela yini leticondziso letivela enhlanganweni yaJehova?

18, 19. Ngutiphi letinye tizatfu lesinato tekumbonga Jehova?

¹⁸ Sinetizatfu letinyenti tekubonga Jehova. Simkweleta kuphila kwetfu ngobe ngaphandle kwakhe ngabe asinyakati futsi ngabe asikho lana. (Imis. 17:27, 28) Usiphe sipho lesiligugu kakhulu​—incwadzi yakhe, liBhayibheli. Siyemukela njengemlayeto lovela kuNkulunkulu, njengemaKhristu aseThesalonika latfola liVi laNkulunkulu futsi alemukela.​—1 Thes. 2:13.

¹⁹ Kusebentisa liVi laNkulunkulu kusente sasondzela kuJehova futsi naye wasondzela kitsi. (Jak. 4:8) Babe wetfu losezulwni usinikete lilungelo lelikhulu lekuba yincenye yenhlangano yakhe. Sibonga kakhulu ngaletibusiso. Umhlabeleli wakuveta kahle loku nakahlabelela atsi: “Bongani Simakadze, ngobe muhle, ngobe umusa wakhe ume kuze kube phakadze.” (Hla. 136:1) Tikhatsi letingu-26 encwadzini yeTihlabelelo 136 sitfola emavi latsi: “Umusa wakhe ume kuze kube phakadze.” Nangabe setsembekile kuJehova kanye nasenhlanganweni yakhe, sitakubona kuba liciniso kwalamavi ngobe sitawuphila phakadze!