1. Yini Jehova lasivumela kutsi siyente?

JEHOVA uyasivumela kutsi sitikhetsele indlela lesifuna kuphila ngayo. Usifundzisa indlela yekwenta tincumo letikahle, uphindze asisite kutsi siphumelele nasenta tincumo letimjabulisako. (Hla. 119:173) Nasichubeka sisebentisa kuhlakanipha lesikutfola eVini laNkulunkulu, sitawenta tincumo letikahle.—Heb. 5:14.

2. Ngubuphi bumatima lesingabhekana nabo ngemuva kwekwenta sincumo?

² Ngisho nome singenta sincumo lesihlakaniphile, kodvwa singahle sikutfole kumatima kucedzela loko lesesikucalile. Nasi sibonelo: Umzalwane losemusha uncuma kufundza lonkhe liBhayibheli. Uchubeka kahle emaviki lambalwa kepha ngenca yetizatfu letitsite ubese uyayekela. Dzadze uncuma kuba lihlahlandlela kodvwa uchubeka uhlehlisa lilanga latawucala ngalo. Labadzala belibandla bancuma kwenta umsebenti wekwelusa ebandleni kodvwa sekuphele tinyanga letinyenti solo bangacali. Letimo tehlukene, kodvwa kunentfo yinye lefanako kuto. Bonkhe bente tincumo kodvwa abakakwenti loko labakuncumile. EmaKhristu elikhulu lekucala aseKhorinte bekanenkinga lefanako. Asesicoce ngaloko lesingakufundza kuwo.

3. Ngusiphi sincumo lesentiwa ngemaKhristu aseKhorinte, kodvwa yini leyenteka?

³ Cishe ngemnyaka wa-55 C.E., emaKhristu aseKhorinte enta sincumo lesibalulekile. Atfola kutsi bazalwane bawo eJerusalema naseJudiya bebahlupheka, babulawa yindlala  futsi lamanye emabandla bekabutsa iminikelo kute abasite. Ngenca yekutsi lamaKhristu bekanemusa futsi ephana, ancuma kutsi atawusita bazalwane bawo. Abuta umphostoli Pawula kutsi yini lebekangayenta kuze asite. Pawula waniketa lelibandla ticondziso futsi wabeka Thithusi kutsi kube nguye lositako ekubutseni iminikelo. (1 Khor. 16:1; 2 Khor. 8:6) Kodvwa ngemuva kwetinyanga letimbalwa, Pawula watfola kutsi lamaKhristu aseKhorinte akazange ayente leminikelo. Ngenca yaloko, iminikelo yawo beyingeke ihambe kanye neminikelo yalamanye emabandla kuze imikiswe eJerusalema.—2 Khor. 9:4, 5.

4. Njengobe kuvetiwe ku-2 Khorinte. 8:7, 10, 11, yini Pawula lakhutsata emaKhristu aseKhorinte kutsi ayente?

⁴ EmaKhristu aseKhorinte bekente sincumo lesikahle, futsi Pawula wawabonga ngekukholwa kwawo lokucinile kanye nesifiso lebekanaso sekufuna kupha labanye. Kodvwa kwadzingeka kutsi Pawula awakhutsate kutsi acedzele loko lebekakucalile. (Fundza 2 Khorinte. 8:7, 10, 11.) Sibonelo sawo sisifundzisa kutsi emaKhristu letsembekile nawo angakutfola kumatima kwenta loko lakuncumile.

5. Ngumiphi imibuto lesitayiphendvula?

⁵ NjengemaKhristu aseKhorinte, singahle sikutfole kumatima kwenta loko lesincume kutsi sitawukwenta. Kungani? Ngesizatfu sekutsi sinesono, singahle sihlehlise kwenta tintfo. Kungavela netimo letibuhlungu lesingakatilindzeli letingahle tisente singakhoni kwenta loko lebesincume kutsi sitawukwenta. (Shu. 9:11; Rom. 7:18) Yini lesingayenta nasifuna kubona kutsi sincumo lesasenta kadzeni sisekahle yini, nekutsi sincume kutsi siyadzinga kusishintja yini? Futsi singaciniseka njani kutsi siyakucedzela lesikucalile?

6. Kunini lapho kufanele sisishintje khona sincumo?

⁶ Letinye tincumo letibalulekile ngeke sitishintje. Sibonelo saloko kutsi angeke sisishintje sincumo lesasenta sekukhonta Jehova, futsi sitimisele kuhlale setsembekile kulesishade nabo. (Mat. 16:24; 19:6) Kodvwa letinye tincumo tingahle tidzinge kushintjwa. Kungani? Kungobe timo tiyashintja. Yini lengasisita kuze tiphumelele tincumo letinhle lesitentako?

7. Yini lokufanele siyithantazele, futsi kungani?

⁷ Thandazela kuhlakanipha. Jehova waphefumulela Jakobe kutsi abhale nankha emavi: “Nangabe lomunye wenu eswele kuhlakanipha, akachubeke akucela kuNkulunkulu, ngobe bonkhe ubapha ngesandla lesivulekile.” (Jak. 1:5) Ecinisweni, sonkhe ‘siyakuswela kuhlakanipha.’ Ngako tsembela kuJehova nawenta sincumo ngisho sewufuna kusishintja. Nawenta njalo, Jehova utakusita wente tincumo letihlakaniphile.

8. Nguluphi lucwaningo lesingalwenta ngaphambi kwekutsi sente sincumo?

⁸ Cwaninga ngalokujulile. Fundza liVi laNkulunkulu, ufundze tincwadzi letivela enhlanganweni yaJehova, uphindze ukhulume nebantfu labangakunika teluleko letihlakaniphile. (Taga 20:18) Kwenta lolucwaningo kubalulekile ngaphambi kwekutsi uncume kushintja umsebenti, utfutse, nanawufuna kukhetsa imfundvo letakusita ukhone kutisekela futsi uchubeke ukhonta Jehova.

9. Singazuza njani nangabe setsembekile?

⁹ Hlola tisusa takho. Jehova unendzaba netisusa tetfu. (Taga 16:2) Ufuna setsembeke kuto tonkhe tintfo. Ngako nasente tincumo, tisusa tetfu kufanele tikhombise kutsi setsembekile futsi sinetisusa letinhle.  Kube besingaketsembeki ngalokuphelele, besingahle sibe nebulukhuni bekufeza loko lesikuncumile. Nasi sibonelo, umzalwane losemusha uncuma kuba lihlahlandlela lelivamile. Kodvwa ngekuhamba kwesikhatsi, ukutfola kumatima kufinyelela ema-awa labekiwe futsi ubese akasawujabuleli umsebenti wekushumayela. Kungenteka bekacabanga kutsi tisusa takhe tekuba lihlahlandlela bekukujabulisa Jehova. Kodvwa kungenteka nekutsi waba lihlahlandlela ngobe bekafuna kujabulisa batali bakhe nobe lomunye umuntfu lamtsandzako.

10. Yini ledzingekako kuze sente lushintjo?

¹⁰ Cabanga ngemfundzi weliBhayibheli loncuma kuyekela kubhema. Wenta kahle evikini lekucala nelesibili, kodvwa ngekuhamba kwesikhatsi uphindze abheme. Ekugcineni, uyakhona kukuyekela lokubhema. Kutsandza Jehova kanye nesifiso lanaso sekumjabulisa, kumsitile lomfundzi kutsi awuncobe lomkhuba.—Khol. 1:10; 3:23.

11. Kungani kufanele sibe nemigomo lecondzile?

¹¹ Tibekele imigomo lecondzile. Nangabe unemigomo lecondzile, kuba melula kutsi uyifeze. Asesibekise, kungenteka uncume kufundza liBhayibheli njalo. Kodvwa nangabe ungakatakheli luhlelo lolucondzile lwekufundza, kungenteka ungawufezi umgomo wakho. * Mhlawumbe labadzala belibandla bancume kutsi njalo batawelusa umhlambi, kepha kuhambe emalanga solo bangakwenti loko labakuncumile. Kuze baphumelele, bangatibuta nayi imibuto: “Bakhona yini bazalwane nabodzadze labangazuza nasibavakashela? Sisibekile yini sikhatsi lesicondzile sekubavakashela?”

12. Yini lokungadzingeka siyente, futsi kungani?

¹² Kwati longakhona kukwenta. Site sikhatsi kanye netintfo nobe emandla ekwenta konkhe lesingatsandza kukwenta. Ngako kufanele ukwati longakhona kukwenta. Nakunesidzingo, ungasishintja sincumo sakho lowasenta nangabe ubona kutsi ngeke usifeze. (Shu. 3:6) Asesitsi ubuyeketa sincumo sakho, wenta nelushintjo loludzingekako, futsi uva shengatsi ungakhona kusifeza. Nati tindlela letisihlanu letingakusita ucedzele loko losewukucalile.

13. Ungawatfola njani emandla ekufeza loko lokuncumile?

¹³ Thantazela emandla ekwenta loko lokuncumile. Nkulunkulu angakuniketa ‘emandla ekwenta intsandvo yakhe’ futsi uchubeke ufeza sincumo sakho. (Fil. 2:13) Ngako cela kuJehova umoya wakhe longcwele kute utfole emandla lowadzingako. Chubeka uthantaza ngisho nobe umthantazo wakho usengakaphendvulwa. Njengobe Jesu asho: “Chubekani nicela, nitawuphiwa [umoya longcwele].”—Luk. 11:9, 13.

14. Singakusita njani simiso lesikuTaga 21:5 kutsi ufeze sincumo losentile?

¹⁴ Hlela. (Fundza Taga 21:5.) Kuze ucedzele nome ngumuphi umsebenti lowucalile, kudzingeka kutsi uwuhlele bese wenta njengobe uhlelile. Ngalokufanako, nawenta sincumo ubala tintfo lofuna kutenta kuze ufeze leso sincumo. Nangabe unemisebenti lelukhuni lokufanele uyente, yehlukanise kuze ibe melula. Njalo nawufeza lena lena lemelula, utawukhona kubona leyo losewuyentile. Pawula wakhutsata emaKhristu aseKhorinte kutsi abekele eceleni iminikelo “ngelilanga lekucala kulelo nalelo viki” kunekutsi abutse umnikelo nasekafikile. (1 Khor. 16:2) Kwehlukanisa imisebenti lelukhuni kuze ibe melula kungakusita  ungacabangi kutsi angeke ukhone kuyifeza.

15. Nawukubhala phansi lofuna kukwenta, utawuba yini umphumela?

¹⁵ Nangabe ukubhala phansi loko lofuna kukwenta, kuba melula kutsi ukufeze. (1 Khor. 14:40) Nasi sibonelo, sigungu salabadzala sikhutsatwa kutsi sikhetse lomdzala lotawubhala tincumo letentiwako, lokufaka ekhatsi nekutsi kufanele tifezwe ngubani futsi nini. Nangabe labadzala balandzela lesicondziso, kutawuba melula kutsi bakufeze kahle loko labakuncumile. (1 Khor. 9:26) Ungenta lokufanako nangetincumo lotentako ekuphileni. Asesibekise, ungabhala luhla lwetintfo lokufanele utente lilanga nelilanga futsi uhlele lotawucala ngako. Loku kungakusita kutsi ukhone kukufeza loko lokucalile futsi ukufeze ngesikhatsi lesincane.

16. Nasewusentile sincumo, yini lelandzelako lokufanele uyente, futsi Roma 12:11 ukusekela njani loko?

¹⁶ Timisele. Kudzinga imetamo kuze wente loko lokuhlelile futsi ukufeze. (Fundza Roma 12:11.) Pawula watjela Thimothi kutsi ‘achubeke atimisela’ futsi ‘aphikelela’ ekubeni ngumfundzisi loncono. Singasisebentisa leseluleko saPawula kunome ngukuphi lesifuna kukwentela Jehova.—1 Thim. 4:13, 16.

17. Efesu 5:15, 16 ungasisita njani kutsi sente njengobe sihlelile?

¹⁷ Sihlele kahle sikhatsi sakho. (Fundza Efesu 5:15, 16.) Khetsa sikhatsi lotawukwenta ngaso loko lokuncumile futsi ungasishintji. Ungalindzi kutfola sikhatsi lesikahle sekwenta loko lokuhlelile ngobe kungenteka singefiki. (Shu. 11:4) Ungativumeli tintfo letincane letingakabaluleki tidle sikhatsi nemandla akho lowadzingako kute wente tintfo letibaluleke kakhulu. (Fil. 1:10) Nakungenteka, khetsa sikhatsi lapho ungeke uphatanyiswe bantfu kuloko lokwentako. Batjele labanye kutsi udzinga sikhatsi sekunaka loko lokwentako. Ungakhetsa kulucisha lucingo lwakho nekutsi imilayeto yakho uyifundze nasewukucedzile lokwentako. *

18-19. Yini lengakusita ungaphelelwa ngemandla ekufeza loncume kukwenta ngisho nobe kungasiko melula?

¹⁸ Naka imiphumela lemihle. Umphumela wesincumo losentile ufana nekufika endzaweni lobewuya kuyo. Nangabe ukufuna mbamba kufika lapho uya khona, utawuhamba ngisho nobe ungatfola kutsi umgwaco loya lapho uya khona uvaliwe futsi kudzingeka uhambe ngalenye indlela. Ngendlela lefanako, nasinaka imiphumela lemihle yetincumo tetfu, angeke sivele siyekele kamelula ngisho sibhekana nebumatima.—Gal. 6:9.

¹⁹ Kwenta tincumo akusimelula, nekutifeza kungaba lukhuni. Kodvwa ngelusito lwaJehova, ungakutfola kuhlakanipha nemandla ekucedzela loko losewukucalile.