1-2. (a) Ngekusho kwembhalo wa-Efesu 6:16, kungani sidzinga “sihlangu lesikhulu sekukholwa”? (b) Ngumiphi imibuto lesitayiphendvula?

UNASO yini “sihlangu lesikhulu sekukholwa”? (Fundza Efesu 6:16.) Siyaciniseka kutsi unaso. Njengesihlangu lesikhulu lesivikela umtimba wakho, kukholwa kuyakuvikela ekutiphatseni kabi, ekwenteni budlova nakuto tonkhe tintfo letingahambisani netimiso taNkulunkulu.

² Nobe kunjalo, siphila “emalangeni ekugcina” futsi kukholwa kwetfu kutawuchubeka kuvivinywa. (2 Thim. 3:1) Ungasihlola njani sihlangu sakho sekukholwa kuze uciniseke kutsi sisecinile? Ungenta njani kuze ugcine kukholwa kwakho kucinile? Sitawucoca ngetimphendvulo talemibuto.

3. Emasotja bekatentani tihlangu tawo, futsi leni?

³ Ngetikhatsi tekubhalwa kweliBhayibheli, tihlangu temasotja betivame kunanyatsiselwa ngesikhumba ngephandle. Emasotja bekagcobisa tihlangu tawo ngemafutsa kuze agcine lesikhumba sisihle futsi avikele tinsimbi taso kutsi tingatfombi. Nangabe lisotja libona kutsi sihlangu salo silimele, belisilungisa khona litohlale lilungele imphi lelandzelako. Lesibonelo singasisebentisa njani nasichaza kukholwa kwetfu?

4. Kungani kufanele usihlolisise sihlangu sakho sekukholwa, futsi loko ungakwenta njani?

⁴ Njengemasotja asendvulo, kufanele usihlolisise futsi  usinakekele sihlangu sakho sekukholwa kuze uhlale ukulungele kulwa. Njengoba singemaKhristu, kufanele silwisane nemimoya lemibi. (Ef. 6:10-12) Kute umuntfu longakunakela sihlangu sakho sekukholwa. Ungaciniseka njani kutsi ukulungele kuvivinywa? Kwekucala, kufanele uthantaze ucele lusito lwaNkulunkulu. Ngako kudzingeka kutsi usebentise liVi lakhe kuze likusite utibone ngendlela Nkulunkulu lakubona ngayo. (Heb. 4:12) LiBhayibheli litsi: “Tsemba Simakadze ngayo yonkhe inhlitiyo yakho, ungeyami ekwatini kwakho.” (Taga 3:5, 6) Unaloko engcondvweni, cabanga ngetincumo losandza kutenta. Nasi sibonelo, uke waba yini netinkinga tetimali? Ucabangile yini ngesetsembiso saJehova lesikuHebheru 13:5 lesitsi: “Ngeke ngize ngikushiye, futsi ngeke ngize ngikulahle”? Lesetsembiso sikucinisekisile yini kutsi Jehova utakusita? Nangabe kunjalo, loko kukhombisa kutsi sihlangu sakho sekukholwa sisesimeni lesikahle.

5. Yini longayitfola nawuhlolisisa kukholwa kwakho?

⁵ Kungenteka kukumangalise loko lotakutfola nawuhlosisisa kukholwa kwakho. Kungenteka utfole kutsi unebutsakatsaka lobewungabati. Nasi sibonelo, ungatfola kutsi kukhatsateka kakhulu, emanga nekudvumateka kukulimatile kukholwa kwakho. Nangabe loku kwentekile kuwe, ungakuvikela njani kukholwa kwakho kutsi kungachubeki kulimala kakhulu?

6. Ngutiphi tintfo letikahle lesingakhatsateka ngato?

⁶ Kukahle kukhatsateka ngaletinye tintfo. Nasi sibonelo, kukahle kutsi sikhatsateke ngekujabulisa Jehova naJesu. (1 Khor. 7:32) Nangabe sente sono lesikhulu, siyakhatsateka ngekulungisa buhlobo betfu naNkulunkulu. (Hla. 38:18) Siphindze sikhatsateke ngekujabulisa labo lesishade nabo, kunakekela emalunga emindeni yetfu kanye nalabo lesikholwa nabo.—1 Khor. 7:33; 2 Khor. 11:28.

7. Ngekusho kwembhalo weTaga 29:25, kungani kungakafanele sibesabe bantfu?

⁷ Kukhatsateka kakhulu kungakulimata kukholwa kwetfu. Sibonelo saloko kutsi singakhatsateka ngekuba nekudla kanye nekwekugcoka lokunyenti. (Mat. 6:31, 32) Ngako-ke singabese sinaka kakhulu kutfola umcebo, futsi singabese sitsandza kakhulu imali. Nasivumela loko kutsi kwenteke, kukholwa kwetfu kuJehova kutawuncipha futsi nebuhlobo betfu naye butawulimala kakhulu. (Mak. 4:19; 1 Thim. 6:10) Singahle sikhatsateke kakhulu nangekutsi bantfu bacabangani ngatsi. Singabese sesaba kuphatfwa kabi bantfu kunekwesaba kungamjabulisi Jehova. Kuze sitivikele kulengoti, kufanele sicele Jehova asiphe kukholwa nesibindzi kuze singesabi kutsi bantfu bacabangani ngatsi.—Fundza Taga 29:25; Luk. 17:5.

8. Kufanele sente njani nangabe umuntfu asikhulumisa emanga?

⁸ Sathane ‘longuyise wemanga’ usebentisa bantfu bakhe kuze asakate emanga ngaJehova nangebazalwane nabodzadzewetfu. (Joh. 8:44) Nasi sibonelo, tihlubuki tisakata emanga futsi tigucule emaciniso ngenhlangano yaJehova tisebentisa i-internet, titeshi te-TV kanye naleminye imitfombo yetindzaba. Lamanga anguletinye ‘tetikhali taSathane letivutsako.’ (Ef. 6:16) Kufanele sente njani nangabe umuntfu asikhulumisa emanga lafana nalawa? Kufanele singamlaleli! Leni? Kungobe siyakholwa kuJehova  futsi siyabetsemba bazalwane betfu. Ecinisweni, asitihlanganisi sanhlobo netihlubuki. Asiphikisani nato nganobe ngusiphi sizatfu ngisho nobe sifuna kukuva loko letifuna kukusho.

9. Kudvumateka kungasitsintsa njani?

⁹ Kudvumateka kungakunciphisa kukholwa kwetfu. Angeke sitibalekele tinkinga tetfu, futsi ngeke kube kuhlakanipha kwenta njalo. Ngaletinye tikhatsi sitawudvumateka. Kodvwa akukafaneli sihlale sicabanga ngetinkinga tetfu. Nasenta njalo, singakhohlwa ngato tonkhe tintfo letinhle Jehova lasetsembise tona. (Semb. 21:3, 4) Nasitiva sidvumatekile, singaphelelwa ngemandla futsi singabese siyayekela kukhonta Jehova. (Taga 24:10) Kodvwa loku akukafanele kwenteke kitsi.

10. Ngusiphi sifundvo lositfolako encwadzini leyabhalwa ngulomunye dzadze?

¹⁰ Cabanga ngalomunye dzadze lohlala eMelika, lokunakako kukholwa kwakhe aphindze anakekele nendvodza yakhe legula kamatima. Wabhalela indlunkhulu watsi: “Ngaletinye tikhatsi, simo setfu besikhatsata futsi sidvumata kakhulu, kodvwa litsemba letfu licinile. Ngibonga kakhulu ngetintfo Jehova lasiphe tona kuze sicinise kukholwa kwetfu futsi sikhutsateke. Siyasidzinga seluleko kanye nekudvudvutwa. Leseluleko siyasisita kuze sichubeke sikhonta Jehova futsi sikhone kubeketelela netinkinga letiletfwa nguSathane.” Loku lokwashiwo ngulodzadze kusisita sibone kutsi singakhona kuncoba kudvumateka! Kanjani? Khumbula kutsi Sathane usebentisa tinkinga takho kuze akulinge. Metsembe Jehova kutsi utakudvudvuta, futsi ukhombise kubonga ngemfundvo levela kuye.

11. Ngumiphi imibuto lokufanele sitibute yona kuze sibone kutsi kukholwa kwetfu kusecinile yini?

¹¹ Ucabanga kutsi kukholwa kwakho kudzinga kuciniswa yini? Kuletinyanga letimbalwa letengcile, ukhonile yini kugwema kukhatsateka kakhulu? Ukhonile yini kutibamba kuze ungaphikisani netihlubuki ngemanga letiwasakatako? Ukhonile yini kubeketelela kudvumateka? Nangabe kunjalo, kukholwa kwakho kusesimeni lesikahle.  Kodvwa kufanele sihlale sicaphele, ngobe Sathane unaletinye tindlela letama kutisebentisa kuze alwe natsi. Asesicoce ngayinye yato.

12. Kungentekani nangabe sikhatsateka kakhulu ngekutsandza umcebo?

¹² Kutsandza umcebo kungasiphatamisa kuphindze kusente singasasinaki sihlangu setfu sekukholwa. Umphostoli Pawula watsi: “Kute umuntfu lolisotja lotifaka etindzabeni tekutsengiselana, nangabe afuna kwemukelwa nguloyo lamcashe njengelisotja.” (2 Thim. 2:4) Ecinisweni, emasotja aseRoma bekangakavumeleki kutsi ente leminye imisebenti. Bekungentekani nangabe lisotja lingawulandzeli lomtsetfo?

13. Kungani lisotja bekungakafaneli libe nencenye etindzabeni temabhizinisi?

¹³ Cabanga nganasi simo. Kusekuseni futsi licembu lemasotja liticeceshela imphi kodvwa linye lisotja alikho. Lelisotja lisedolobheni futsi litsengisa kudla emakethe. Nasekusentsambama, lamasotja ahlolisisa tihlangu tawo futsi alota netinkemba tawo. Kodvwa lelisotja lelitsengisa kudla licitsa sikhatsi salo lilungiselela kudla lelitakutsengisa ngakusasa. Ngakusasa ekuseni, sitsa sihlasela kungakalindzeleki. Nguliphi kulamasotja lelitawube likulungele kulwa imphi futsi lelitawujabulisa umphatsi walo? Kube bewukulemphi, bewutawufuna kuma eceleni kwelisotja lebelikulungele kulwa yini nobe bewutawuma eceleni kwaleli lebeliphatamisekile?

14. Njengoba singemasotja aKhristu, yini lebaluleke kakhulu kitsi?

¹⁴ Kufanele silingise emasotja lakahle. Intfo lebaluleke kakhulu kitsi kutsi sijabulise Baphatsi betfu, lokunguJehova naKhristu. Loku kubaluleke kakhulu kwendlula nobe yini lesingayitfola kulelive laSathane. Siyaciniseka kutsi sinaso sikhatsi kanye nemandla lesiwadzingako kuze sikhonte Jehova, futsi sigcine nesihlangu setfu sekukholwa kanye nato tonkhe tembatfo tetfu temphi letivela kuNkulunkulu tisesimeni lesikahle.

15. Ngusiphi secwayiso Pawula lasiniketa sona, futsi leni?

 ¹⁵ Kufanele sihlale siphapheme! Leni? Umphostoli Pawula wecwayisa kutsi “labo labatimisele ngekunjinga” ‘batawuduka ekukholweni.’ (1 Thim. 6:9, 10) Emavi latsi ‘batawuduka ekukholweni’ asho kutsi singaphatamiseka nasetama kutfola tintfo letinyenti lesingatidzingi. Singabese siba ‘netifiso letinyenti letingenangcondvo naletilimatako.’ Kunekutsi sivumele kutsi leto tifiso takhele etinhlitiyweni tetfu, kufanele sikhumbule kutsi Sathane usebentisa tona njengemathulusi kuze anciphise kukholwa kwetfu.

16. Umfanekiso lokuMakho 10:17-22, kufanele usente sicabange ngamiphi imibuto?

¹⁶ Asesitsi sinayo imali leyenele yekutsenga tintfo letinyenti. Senta kabi yini nasitsenga tintfo lesitifunako sibe singatidzingi? Asenti kabi. Kodvwa cabanga nganayi imibuto: Ngisho nobe sinayo imali yekutsenga intfo letsite, sinaso yini sikhatsi nemandla ekuyisebentisa nekuyinakekela? Ngeke yini bese sesitsandza kakhulu tintfo lesinato? Kutsandza kakhulu tintfo lesinato ngeke yini kusente silingise lendvodza leyala kwemukela simemo saJesu sekutsi yentele Nkulunkulu lokunyenti? (Fundza Makho 10:17-22.) Kubaluleke  kakhulu kutsi siphile imphilo lemelula futsi sisebentise sikhatsi setfu nemandla etfu senta intsandvo yaNkulunkulu!

17. Yini lokufanele singayikhohlwa?

¹⁷ Kufanele singakhohlwa kutsi sisemphini futsi kufanele sihlale sikulungele kulwa lilanga nelilanga. (Semb. 12:17) Bazalwane nabodzadzewetfu ngeke basetfwalele sihlangu setfu sekukholwa. Ngamunye wetfu kufanele agcine kukholwa kwakhe kucinile.

18. Yini lebeyenta emasotja asendvulo kutsi abambisise tihlangu tawo?

¹⁸ Endvulo, lisotja belihlonishwa nangabe linesibindzi emphini, kodvwa belihlazeka nangabe libuyela ekhaya selite sihlangu salo. Tacitus losati semlandvo lesingumRoma wabhala watsi: “Bekulihlazo lelikhulu nangabe lisotja libuya emphini lingakasiphatsi sihlangu salo.” Nguleso sizatfu lebesenta emasotja kutsi abambisise tihlangu tawo.

19. Singasibambisisa njani sihlangu setfu sekukholwa?

¹⁹ Sisuke sibambisisa sihlangu setfu sekukholwa nangabe siya njalo emihlanganweni yebuKhristu futsi sikhuluma ngelibito laJehova nangeMbuso wakhe kulabanye. (Heb. 10:23-25) Ngetulu kwaloko, siphindze sifundze liVi laNkulunkulu onkhe malanga futsi sithantaze kuJehova kuze asisite kutsi sikusebentise ekuphileni kwetfu loko lesikufundzako. (2 Thim. 3:16, 17) Nasenta njalo, kute sikhali saSathane lesitawubangela kutsi silimale kuphila kwetfu konkhe. (Isa. 54:17) ‘Sihlangu setfu lesikhulu sekukholwa’ sitasivikela. Sitawuba nesibindzi sekusebenta nebazalwane kanye nabodzadzewetfu. Sitayincoba lemphi lesiyilwa onkhe malanga yekugcina kukholwa kwetfu kucinile, futsi lokubaluleke kakhulu kutsi sitawuba seluhlangotsini lwaJesu nakancoba Sathane nebalandzeli bakhe emphini.—Semb. 17:14; 20:10.