1-2. (a) Yini lesisita sikhone kubeketela lilanga nelilanga? Chaza. (b) Sitawucoca ngani kulesihloko?

“NANGICABANGA ngetimo letimatima lengendlule kuto, ngiyati kutsi bengingeke ngikhone kuphumelela kuto ngingedvwana.” Uke wawasho yini lamavi? Labanyenti betfu bakile bawasho. Mhlawumbe uke wawasho ngemuva kwekucabanga ngendlela lokhone kubeketelela ngayo kugula lokumatima nobe ngemuva kwekushonelwa ngumuntfu lomtsandzako. Nawucabanga ngaleto timo, uva shengatsi ukhonile kubeketela lilanga nelilanga ngobe umoya longcwele waJehova bewukuniketa “emandla lamakhulu kakhulu.”—2 Khor. 4:7-9.

² Siyawudzinga umoya longcwele kuze usisite simelane nemoya lomubi walelive. (1 Joh. 5:19) Ngetulu kwaloko, sidzinga emandla kuze silwisane ‘nemabutfo emimoya lemibi.’ (Ef. 6:12) Nyalo, sitawucoca ngetindlela letimbili umoya longcwele longasisita ngato etinkingeni lesibhekana nato. Sitawubese sicoca ngaloko lesingakwenta kuze sizuze emoyeni longcwele.

3. Nguyiphi indlela Jehova lasisita ngayo kuze sibeketelele timo letimatima?

³ Umoya longcwele waJehova uyasisita ngekusipha emandla ekwenta konkhe lesifuna kukwenta ngisho nobe sibhekene nebumatima. Umphostoli Pawula weva shengatsi uyakhona kuchubeka akhonta Jehova ngobe beketsembele ‘emandleni aKhristu.’ (2 Khor. 12:9) Ngesikhatsi Pawula aseluhambweni lwakhe lwesibili asitfunywa selivangeli, akazange acitse sikhatsi lesinyenti enta umsebenti wekushumayela kuphela, kodvwa bekaphindze asebente kuze atisekele. Wahlala eKhorinte ekhaya la-Akhwila naPhrisila, lebebakha emathende. Ngenca yekutsi Pawula bekenta umsebenti lofanako, bekahle  asebenta nabo. (Imis. 18:1-4) Umoya longcwele waniketa Pawula emandla ekwenta umsebenti wekutiphilisa nemandla ekushumayela.

4. Ngekusho kwembhalo wa-2 Khorinte 12:7b-9, Pawula bekanayiphi inkinga?

⁴ Fundza 2 Khorinte 12:7b-9. Kulamavesi, Pawula bekasho kutsini nakatsi ‘unelinyeva enyameni’? Umuntfu uva buhlungu kakhulu nangabe ahlatjwe linyeva. Ngako naPawula bekasho kutsi bekabhekene nenkinga lematima lebeyifana nekuhlatjwa linyeva. Lenkinga lebekabhekene nayo wayibita ngekutsi ‘yingilosi yaSathane’ lebeyichubeka ‘imlimata.’ Kungenteka kutsi akusuye Sathane nemadimoni akhe lebebabangela lenkinga yaPawula lebeyifana nelinyeva enyameni, kodvwa kungenteka kutsi ngesikhatsi babona lenkinga yaPawula betama kuyenta kutsi ibe yimbi kakhulu. Loko bekutawufana nekutsi umuntfu lotsite uhlohlobetela linyeva ekhatsi enyameni. Yini Pawula layenta?

5. Jehova wayiphendvula njani imithantazo yaPawula?

⁵ Pawula wacale wafuna kutsi Jehova alisuse ‘lelinyeva.’ Utsi: “Ngase ngincenga iNkhosi [Jehova] katsatfu . . . kuze lisuke kimi.” Nangetulu kwekuthantaza tikhatsi letinyenti, lelinyeva alizange lisuke. Loku kusho kutsi Jehova akazange ayiphendvule yini imithantazo yaPawula? Cha. Wayiphendvula. Jehova akazange ayisuse lenkinga, kodvwa waniketa Pawula emandla ekuyibeketelela. Jehova watsi: “Emandla ami entiwe aphelela ebutsakatsakeni.” (2 Khor. 12:8, 9) Ngekusitwa nguNkulunkulu, Pawula wakhona kuhlala ajabulile futsi anekuthula!—Fil. 4:4-7.

6. (a) Jehova angayiphendvula njani imithantazo yetfu? (b) Ngutiphi tetsembiso letikulemibhalo lekulesigaba letikunika emandla?

⁶ Uke wamcela yini Jehova kutsi akukhulule enkingeni letsite njengobe kwenta Pawula? Nangabe uke wathantaza ngalenkinga tikhatsi letinyenti kodvwa yangasuki nobe yaba yimbi kakhulu, loku kukwente wacabanga kutsi Jehova akasakutsandzi yini? Nangabe loko kuke kwenteka, khumbula sibonelo saPawula. Jehova wayiphendvula imithantazo yakhe, ngako ciniseka kutsi utayiphendvula neyakho! Kungenteka Jehova angayisusi lenkinga, kodvwa angakupha umoya longcwele longakunika emandla lowadzingako kuze uyibeketelele. (Hla. 61:3, 4) Ngisho noma ‘ungajikwa phansi,’ kodvwa Jehova ngeke akushiye.—2 Khor. 4:8, 9; Fil. 4:13.

7-8. (a) Umoya longcwele ufana njani nemoya? (b) Phetro wakufananisa nani kusebenta kwemoya longcwele?

⁷ Nguyiphi lenye indlela umoya longcwele losisita ngayo? Njengemoya lohhusha kahle elwandle lolutfukutsele, umoya longcwele uyasisita kutsi sichubeke sikhonta Jehova ngisho nobe singabhekana natiphi tinkinga letimatima, futsi utawuchubeka usisita size sifike emhlabeni lomusha Nkulunkulu lasetsembise wona.

⁸ Njengobe umphostoli Phetro abengumdwebi, bekakwetayele kakhulu kuhamba elwandle. Kungenteka nguloko lokwamenta wafananisa kusebenta kwemoya longcwele nekuhamba elwandle. Wabhala watsi: “Siphrofetho asikaze siletfwe ngentsandvo yemuntfu, kodvwa bantfu bebakhuluma lokuvela kuNkulunkulu njengobe bebachutjwa ngumoya longcwele.” Ligama lesiGriki lelitsi ‘kuchutjwa,’ nalihunyushwe njengobe linjalo lisho kucondziswa.—2 Phet. 1:21.

9. Ligama lelitsi kucondziswa lelasetjentiswa nguPhetro lenta bantfu bacabange ngani?

⁹ Ligama lelitsi kucondziswa lelasetjentiswa nguPhetro lakha siphi sitfombe engcondvweni? Lukha lowabhala incwadzi  yeMisebenti wasebentisa ligama lesiGriki leliphose lifane kuze achaze kutsi umkhumbi ‘uhanjiswa’ ngumoya. (Imis. 27:15) Lesinye sati seliBhayibheli satsi ngesikhatsi Phetro abhala kutsi babhali beliBhayibheli bebacondziswa ngumoya longcwele, wasebentisa ligama lebelitawenta bantfu bacabange ngekuhamba ngemkhumbi. Phetro watsi njengobe nje umkhumbi uyahanjiswa ngumoya kuze uye lapho uya khona, kanjalo nemoya longcwele wacondzisa babhali beliBhayibheli kuze bente umsebenti wabo. Lesati saphindze satsi babhali beliBhayibheli bebafana nemikhumbi levule emaseyila ayo. Jehova wayidlala indzima yakhe. Wabanika “umoya,” nobe umoya longcwele. Babhali beliBhayibheli nabo bayidlala indzima yabo. Balandzela sicondziso semoya longcwele.

10-11. Ngutiphi tintfo letimbili lokufanele sitente kuze siciniseke kutsi sicondziswa ngumoya longcwele? Shano sibonelo.

¹⁰ Kuliciniso kutsi sesengca sikhatsi sekutsi kubhalwe tincwadzi letiphefumulelwe. Nanobe kunjalo, Jehova solo usebentisa umoya longcwele kuze acondzise bantfu bakhe. Jehova usayidlala indzima yakhe. Singazuza njani emoyeni longcwele waNkulunkulu? Kufanele siciniseke kutsi natsi sidlala indzima yetfu. Singakwenta njani loko?

¹¹ Asewucabange nganasi sibonelo. Kuze umshayeli wemkhumbi asitwe ngumoya lohhushako, kufanele ente tintfo letimbili. Kwekucala, kufanele umkhumbi wakhe awuyise lapho umoya ubheka ngakhona. Lomkhumbi ngeke uhambe nangabe umshayeli wawo awumisa esikhumulweni semikhumbi lesikhashane nalapho kuhhusha khona umoya. Kwesibili, kufanele awavule kakhulu emaseyila alomkhumbi. Nangabe ente njalo, nasekuhhusha umoya umkhumbi wakhe utawuhamba ngesikhatsi emaseyila sekagcwele umoya. Ngendlela lefanako, sitawukhona kuchubeka sikhonta Jehova nangabe sisitwa ngumoya wakhe longcwele. Kuze sizuze kulomoya, kufanele sente tintfo letimbili. Kwekucala, kufanele sente loko umoya  waNkulunkulu losicondzisa kutsi sikwente. Kwesibili, tonkhe tintfo kufanele sitente ngekutimisela. (Hla. 119:32) Nangabe senta loku, umoya longcwele utasinika emandla ekuchubeka sikhonta Jehova ngekwetsembeka size sifike emhlabeni lomusha.

12. Sitawucoca ngani nyalo?

¹² Sesicocile ngetindlela letimbili umoya longcwele longasisita ngato. Umoya longcwele usinika emandla futsi usisita kutsi sihlale setsembekile nasibhekene netinkinga. Uphindze usicondzise futsi usisite kuze sente umsebenti Jehova lafuna siwente, futsi kwenta loko kutawusenta sitfole kuphila lokuphakadze. Nyalo sitawucoca ngetintfo letine letitawusenta sizuze ngalokugcwele emoyeni longcwele.

13. Ngekusho kwembhalo wa-2 Thimothi 3:16, 17 imiBhalo ingasisita njani, futsi yini tsine lokufanele siyente?

¹³ Kwekucala, fundza liVi laNkulunkulu. (Fundza 2 Thimothi 3:16, 17.) Nkulunkulu wasebentisa umoya wakhe kuze afake imicabango yakhe etingcondvweni tebabhali beliBhayibheli. Nangabe sifundza liBhayibheli futsi sizindla ngaloko lesikufundzako, imicabango yaNkulunkulu iyangena etingcodvweni nasetinhlitiyweni tetfu. Imicabango lephefumulelwe leseVini laNkulunkulu isisita kutsi sente lushintjo etimphilweni tetfu kuze sijabulise Jehova. (Heb. 4:12) Kuze sizuze kulomoya longcwele kufanele sitinike sikhatsi sekudadisha liBhayibheli njalo, futsi sicabangisise ngaloko lesikufundzako. Nasenta njalo, liVi laNkulunkulu litasicondzisa kuko konkhe lesikushoko nalesikwentako.

14. (a) Kungani sitsi umoya longcwele uhlale ukhona emihlanganweni yebuKhristu? (b) Yini lengasisita kutsi sizuze ngalokugcwele emoyeni longcwele nasisemihlanganweni yebuKhristu?

¹⁴ Kwesibili, khontani Jehova ndzawonye. (Hla. 22:22) Umoya waJehova uhlale ukhona emihlanganweni yebuKhristu. (Semb. 2:29) Kungani sisho njalo? Kungobe nasihlangana nebazalwane betfu nabodzadzewetfu kuze sikhonte Jehova, siyathantaza sicele umoya longcwele, sihlabele tingoma teMbuso letisekelwe eVini laNkulunkulu, futsi silalele ticondziso letisekelwe eBhayibhelini lesitinikwa bazalwane lababekwe ngumoya longcwele. Umoya longcwele uphindze usite bodzadze kutsi balungiselele futsi batetfule kahle tincenye lababelwe tona. Kuze sizuze ngalokugcwele emoyeni longcwele, kufanele site sikulungele kuphendvula emihlanganweni yebuKhristu. Nasenta njalo, sisuke sikhombisa kutsi sikulungele kuzuza emoyeni longcwele, njengemkhumbi lonemaseyila lavulwe kakhulu.

15. Umoya longcwele usisita njani nasisemsebentini wekushumayela?

¹⁵ Kwesitsatfu, shumayela. Nasisebentisa liBhayibheli emsebentini wekushumayela, sisuke sivumela umoya longcwele kutsi usisite. (Rom. 15:18, 19) Kuze uzuze ngalokugcwele emoyeni waNkulunkulu, kufanele uwusekele umsebenti wekushumayela futsi ulisebentise liBhayibheli nakuvela litfuba. Lenye indlela longakhona ngayo kucoca nebantfu nawushumayela kutsi usebentise tincociswano letisibonelo letitfolakala kubhukwana lotsi Kuphila KwemaKhristu Nemsebenti Wawo.

16. Nguyiphi indlela lekahle kakhulu yekutfola umoya longcwele?

¹⁶ Kwesine, thantaza kuJehova. (Mat. 7:7-11; Luk. 11:13) Indlela lekahle kakhulu yekutfola umoya longcwele kutsi uwucele kuJehova ngemthantazo. Kute lokungavimbela umthantazo wetfu kutsi ufike kuJehova, futsi kute longavimbela sipho lesihle lesingumoya waNkulunkulu kutsi sifike kitsi, ngisho nelijele nobe Sathane imbala ngeke awuvimbele. (Jak. 1:17) Kufanele sithantaze njani kuze sizuze ngalokugcwele emoyeni longcwele? Kuze sitfole imphendvulo,  asesifundze kabanti ngemthantazo lotfolakala emfanekisweni loseVangelini laLukha. *

17. Ngusiphi sifundvo lesisifundzako emfanekisweni lowashiwo nguJesu losembhalweni waLukha 11:5-9, 13?

¹⁷ Fundza Lukha 11:5-9, 13. Umfanekiso lowashiwo nguJesu usikhombisa indlela lesingathantaza ngayo nasicela umoya longcwele. Kulomfanekiso, lendvodza yatfola loko lebeyikudzinga ‘ngenca yekutsi beyibelesela.’ Ayizange yesabe kucela lusito kumngani wayo ngisho nobe besekusebusuku kakhulu. (mwb18 July) Yini Jesu latsi lomfanekiso usifundzisa yona ngemthantazo? Watsi: “Chubekani nicela, nitawuphiwa; chubekani nifuna, nitawutfola; chubekani ninconcotsa, nitawuvulelwa.” Ngusiphi sifundvo lesisitfolako? Kuze sisitwe ngumoya longcwele, kufanele singakuyekeli kuthantaza siwucele.

18. Ngekusho kwemfanekiso lowashiwo nguJesu, kungani siciniseka kutsi Jehova utasinika umoya longcwele?

¹⁸ Umfanekiso lowashiwo nguJesu uphindze usisite sibone kutsi kungani Jehova atasinika umoya wakhe longcwele. Lendvodza lokukhulunywa ngayo kulomfanekiso beyifuna kusiphatsa kahle sivakashi sayo. Beyifisa kusiniketa kudla sivakashi sayo lebesifike ebusuku, kodvwa beyite lebeyingasinika kona. Jesu watsi lendvodza yavuka ngenca yekutsi lesivakashi besichubeka sibelesela sicela kudla. Yini Jesu lebekasifundzisa yona? Nangabe umuntfu lonesono anesifiso sekusita umngani wakhe lobeleselako, siyaciniseka kutsi Babe wetfu losezulwini futsi lonemusa utawubasita labachubeka bawucela umoya longcwele! Ngako singaciniseka kutsi Jehova utayiphendvula imithantazo yetfu nasithantaza sicela umoya longcwele.—Hla. 10:17; 66:19.

19. Kungani siciniseka kutsi sitawukhona kubeketela?

¹⁹ Siyaciniseka kutsi sitawukhona kubeketelela tinkinga ngisho nobe Sathane angayekeli kusihlasela. Kungani? Ngobe umoya longcwele usisita ngetindlela letimbili. Kwekucala, usiniketa emandla lesiwadzingako kuze sibeketelele tinkinga. Kwesibili, ungemandla lasisita kutsi sichubeke sikhonta Jehova kuze kube ngulapho sifika emhlabeni lomusha. Ngako asitimisele kuzuza ngalokugcwele nasisitwa ngumoya longcwele!