Ngatalwa nga-1983. Nangisemncane, bengiphila njengabo bonkhe bantfwana kodvwa ngatsi nasengineminyaka lelishumi, ngacala kuva buhlungu lobukhulu wonkhe umtimba. Ngemuva kweminyaka lemibili, ngatsi nangivuka ngangakhoni kunyakata. Ngisho nobe bengetama kamatima kuhambisa imilente yami, kodvwa bengingakhoni. Kusukela ngalelolanga, angizange ngikhone kuphindze ngihambe. Lokugula kwenta kutsi ngingakhoni kuchubeka ngikhula. Kuze kube ngulamuhla, solo nginemtimba lomncane njengewemntfwana.

Ngemuva kwetinyanga letimbalwa ngigula futsi ngingakhoni kuphuma ekhaya, kwefika BoFakazi lababili. Bengivame kubhaca nakufika tivakashi, kodvwa ngalelolanga ngavuma kucoca nalabomake. Njengobe bebakhuluma ngeliPharadesi, ngakhumbula loko lengakuva nangineminyaka lengaba ngu-5 budzala. Ngaleso sikhatsi, sitfunywa selivangeli lebekutsiwa nguJethro, lebesihlala eSuriname, besivame kuta endzaweni yakitsi njalo ngenyanga futsi besifundza nababe liBhayibheli. Jethro bekangiphatsa kahle. Bengimtsandza kakhulu. Gogo namkhulu bebavame kuhamba nami nabaya emihlanganweni yaboFakazi lebeyiba khona endzaweni yakitsi. Lomunye make lokutsiwa nguFlorence lowangivakashela ngalelolanga, wangibuta kutsi ngingatsandza yini kufundza kabanti, ngako ngavuma.

Florence wabese ubuya nendvodza yakhe lokutsiwa nguJustus, futsi babese bangifundzela liBhayibheli. Nababona kutsi angikwati kufundza, babese bangifundzisa kufundza. Ngemuva kwesikhatsi lesitsite, besengikhona kutifundzela. Ngalelinye lilanga, laba labashadene bangitjela kutsi sebabelwe kuyoshumayela eSuriname. Lokwaba buhlungu kutsi bekute e-Orealla lobekatawuchubeka afundza nami liBhayibheli. Kodvwa lokujabulisako kutsi Jehova akangikhohlwanga.

Kungakapheli sikhatsi lesidze, lihlahlandlela lokutsiwa nguFloyd lefika e-Orealla, futsi langitfola endlini njengobe belishumayela endlini ngendlu. Nakangitjela ngekufundza liBhayibheli, ngamoyitela. Wangibuta watsi: “Kungani umoyitela?” Ngamtjela kutsi besengiyifundzile incwajana letsi Yini uNkulunkulu Ayifunayo Kithi? futsi besengicale kufundza incwadzi letsi Ulwazi Oluholela Ekuphileni Okuphakade, * Ngamchazela kutsi kungani ngayekela kufundza. Floyd  wafundza nami incenye lebeyisele encwadzini letsi Ulwazi, kodvwa naye wabese wabelwa kutsi ayokhonta kulenye indzawo. Ngaphindze ngaba bete lotangifundzisa liBhayibheli.

Kodvwa nga-2004, Granville naJoshua, labangemahlahlandlela lakhetsekile, babelwa kutsi bayokhonta e-Orealla. Bebashumayela endlini ngendlu futsi bangitfola. Nabangibuta kutsi ngiyafuna yini kufundza, ngamoyitela. Ngabacela kutsi bafundze nami incwadzi letsi Ulwazi kusukela ekucaleni. Bengifuna kubona kutsi batangifundzisa intfo lefanako yini nalena lengayifundziswa ngulalabanye. Granville wangitjela kutsi kuba nemihlangano kulendzawo. Ngisho nobe bengingakase ngiphume ekhaya eminyakeni lelishumi leyendlulile, bengifuna kuya. Ngako Granville wafika ekhaya wangihlalisa ku-wheelchair futsi wahamba nami eHholweni LeMbuso.

Ngekuhamba kwesikhatsi, Granville wangikhutsata kutsi ngibhalise eSikolweni Semsebenti WemaKhristu. Watsi kimi: “Ukhubatekile kodvwa uyakhona kukhuluma. Ngalelinye lilanga utawubeka inkhulumo yelinyenti. Loko kutakwenteka.” Emavi akhe lakhutsatako anginika litsemba.

Ngacala kushumayela naGranville. Kodvwa imigwaco leminyenti lebesihamba kuyo, beyinetigodzi kakhulu kutsi kungahamba i-wheelchair. Ngako ngacela Granville kutsi angishove ngelibhara. Lendlela yasebenta kahle kakhulu. Nga-April 2005, ngabhajatiswa. Ngekushesha nje ngemuva kwaloko, bazalwane bangicecesha kutsi nginakekele tincwadzi ebandleni futsi ngikwati nekusebentisa umshini we-sound eHholweni LeMbuso.

Kodvwa lokubuhlungu kutsi nga-2007, babe washona engotini yesikebhe. Umndeni wakitsi wetfuka kakhulu. Granville wathantaza kanye natsi futsi wasifundzela emavesi latsite lasikhutsato. Ngemuva kweminyaka lemibili, kwenteka lenye intfo lebuhlungu, Granville washona engotini yesikebhe.

Libandla letfu lelincane leva buhlungu ngaloko lokwenteka futsi lasala nenceku lesebentako yinye lite lomdzala. Ngeva buhlungu kakhulu ngekusi umngani wami Granville besekashonile. Bekangisita kutsi ngisondzele kuJehova futsi bekangisita nangaletinye tintfo. Emhlanganweni lowalandzela, benginencenye yekufundza tigaba esifundvweni seSicongosekulindza. Ngakhona kufundza tigaba tekucala letimbili kodvwa ngemuva kwaloko, ngacala kukhala. Betihushuka nje tinyembeti. Kwadzingeka kutsi ngisuke eplatform.

Ngativa ngincono ngesikhatsi labanye bazalwane labasuka kulelinye libandla beta kutosisita e-Orealla. Ligatja lase litfumela Kojo, lobekalihlahlandlela lelikhetsekile. Lokwangijabulisa kakhulu kutsi umnaketfu lomncane namake, bacala kufundza futsi babhajatiswa. Nga-March 2015, ngabekwa kutsi ngibe yinceku lesebentako. Ngemuva kwesikhashana, ngabeka inkhulumo yelinyenti yekucala. Ngalelolanga, ngamoyitela futsi bekwehla tinyembeti tenjabulo nangikhumbula loko Granville lebekakushito eminyakeni leyendlulile nakatsi: “Ngalelinye lilanga utawubeka inkhulumo yelinyenti. Loko kutakwenteka.”

Umsakato weJW, ungisitile ngafundza ngaboFakazi labasesimeni lesifana nesami. Kodvwa ngisho bakhubatekile, bayajabula ekuphileni. Nami kukhona lengisakhona kutentela kona. Sifiso sami sekwentela Jehova loko lengingakhona kukwenta sangikhutsata ngaba lihlahlandlela lelivamile. Nga-September 2019, ngatfola tindzaba lebengingakatigadzi! Ngaleyo nyanga, ngabekwa kutsi ngibe ngulomdzala ebandleni letfu lebelinebamemeteli lebebangaba ngu-40.

Ngibabonga kakhulu labazalwane nabodzadze labafundza nami futsi bangisita ngakhonta Jehova. Ngetulu kwako konkhe, ngimbonga kakhulu Jehova ngekutsi akangikhohlwanga.