1-2. Niketa sibonelo sekutsi singasisebentisa njani seluleko lesikuTaga 4:25?

CABANGA nganati tibonelo letilandzelako. Dzadze losakhulile ucabanga ngetikhatsi letimnandzi latijabulela esikhatsini lesendlulile. Ngisho nobe kuphila kwakhe sekumatima nyalo, uyachubeka enta konkhe langakwenta emsebentini waJehova. (1 Khor. 15:58) Onkhe malanga uticabanga anemndeni wakhe nebangani bakhe ePharadisi. Lomunye dzadze ukhumbula kutsi wake waphatfwa kabi ngulomunye ebandleni, kodvwa ukhetsa kungachubeki acabanga ngako. (Khol. 3:13) Umzalwane uwakhumbula kahle emaphutsa lawenta, kodvwa nyalo unaka kakhulu kuhlala etsembekile kuJehova.—Hla. 51:10.

² LamaKhristu lamatsatfu afana ngani? Onkhe ayakukhumbula lokwenteka esikhatsini lesendlulile, kodvwa akahlali acabanga ngako. Kunaloko, alibuke ngalabovu likusasa.—Fundza Taga 4:25.

3. Kungani kufanele sihlale silibuke ngalabovu likusasa?

³ Kubaluleke ngani kutsi silibuke ngalabovu likusasa? Njengobe umuntfu angeke akhone kuhamba acondze abe abuke emuva, natsi angeke sichubeke sikhonta Jehova nangabe sihlale sicabanga ngetintfo letenteka nobe lesatenta esikhatsini lesendlulile.—Luk. 9:62.

4. Sitawucoca ngani kulesihloko?

⁴ Kulesihloko, sitawucoca ngetintfo letintsatfu letingasenta sihlale sicabanga ngetintfo letenteka esikhatsini lesendlulile. Nati letintfo: (1) kufisa shengatsi kuphila kwetfu ngabe akukashintji kuloko lebekungiko, (2) kutfukutsela, (3) nekutiva  unelicala kakhulu. Esimeni ngasinye sitawubona kutsi timiso teliBhayibheli tingasisita njani kutsi singanaki “tintfo letingemuva” kodvwa sinake “tintfo letitako.”—Fil. 3:13.

5. Umshumayeli 7:10, utsi yini lokungakafaneli siyente?

⁵ Fundza Umshumayeli 7:10. Naka kutsi lelivesi alisho kutsi kukabi kutibuta kutsi: “Kungani emalanga lendlulile bekamnandzi?” Kukhumbula emalanga lamnandzi kusipho lesivela kuJehova. Kunaloko, lelivesi litsi: “Ungabuti utsi: ‘Kwabangelwa yini kutsi tinsuku takadzeni tibe ncono kunaleti tetfu?’” Ngako kufanele sicaphele kutsi singacatsanisi imphilo lebesiyiphila esikhatsini lesendlulile neyanyalo bese sicabanga kutsi tintfo timbi kakhulu nyalo. Lelinye lihumusho leliBhayibheli lilibeka kanje lelivesi: “Ungabuti utsi ‘Yini lebeyenta emalanga akadzeni kutsi abe mnandzi?’ Akusiko kuhlakanipha kubuta lombuto.”

6. Niketa sibonelo sekutsi kungani kungasiko kuhlakanipha kuhlale sicabanga kutsi kuphila kwetfu bekuncono esikhatsini lesendlulile?

⁶ Kungani kungasiko kuhlakanipha kuhlale sicabanga kutsi kuphila kwetfu bekuncono esikhatsini lesendlulile? Kungobe kungasenta sicabange ngetintfo letinhle kuphela letenteka esikhatsini lesendlulile futsi sikhohlwe ngebumatima lebesibhekana nabo. Cabanga ngesibonelo sema-Israyeli asendvulo. Ngemuva kwekuphuma eGibhithe, asheshe akhohlwa kutsi kuphila bekumatima kanganani khona. Kunaloko, banaka kudla lokumnandzi lebebakudla. Batsi: “Sesikhumbule eGibhithe lapho sasidla khona inhlanti mahhala, sasidla emaselwa, nemajoti, nashaladi na-anyanisi, negalikhi.” (Num. 11:5) Kodvwa bebakudla “mahhala” yini vele lokudla? Cha. Ema-Israyeli bewaphatfwa kabi futsi ngaleso sikhatsi bewatigcila eGibhithe. (Eks. 1:13, 14; 3:6-9) Nanobe kunjalo, ngekuhamba kwesikhatsi akhohlwa ngalokuphatfwa kabi futsi afisa kubuyela emuva. Akhetsa kunaka tintfo letinhle lebetenteka esikhatsini lesendlulile  kunekunaka loko Jehova lebekawentela kona. Jehova akazange ajabule ngalesento sabo.—Num. 11:10.

7. Yini leyasita lomunye dzadze kutsi angahlali afisa shengatsi kuphila kwakhe ngabe akukashintji kuloko lebekungiko?

⁷ Singakugwema njani kuhlale sifisa shengatsi kuphila kwetfu ngabe akukashintji kuloko lebekungiko? Cabanga ngesibonelo salomunye dzadze lowacala kukhonta eBethel leseBrooklyn nga-1945. Ngemuva kweminyaka letsite, washada nalomunye umzalwane lebekasebenta naye eBethel futsi bakhonta khona iminyaka leminyenti. Kodvwa nga-1976, indvodza yakhe yabese iyagula. Lodzadze watsi indvodza yakhe naseyitokufa, yamnika seluleko lebesitamsita naseyishonile. Yatsi kuye: “Umshado wetfu bewumnandzi. Bantfu labanyenti abakase babe nemshado lomnandzi njengalona.” Kodvwa wase uyamcela utsi: “Angeke utikhohlwe tikhatsi letimnandzi lesibe nato ndzawonye kodvwa ungahlali ucabanga ngato. Njengobe sikhatsi sihamba, utawuba ncono. Ungadvumali futsi ungeva buhlungu ngesimo lokuso. Jabula ngetikhatsi letimnandzi lesibe nato sikhonta Jehova ndzawonye. . . . Likhono lekukhumbula tintfo letitsite lisipho lesivela kuNkulunkulu.” Lesi bekuseluleko lesihle.

8. Lodzadze kwamsita njani kusebentisa seluleko sendvodza yakhe?

⁸ Lodzadze wasisebentisa leseluleko sendvodza yakhe. Wachubeka akhonta Jehova ngekwetsembeka kwaze kwaba ngulapho afa sekaneminyaka lengu-92. Nasekusele iminyaka lembalwa kutsi ashone, lodzadze watsi: “Nangicabanga ngeminyaka lengu-63 lengiyisebentisele kukhonta Jehova sikhatsi sonkhe, ngingasho kutsi kuphila kwami bekujabulisa mbamba.” Kungani? Watsi: “Lokujabulisa kakhulu buhlobo betfu lesinabo nebazalwane betfu kanye nelitsemba lesinalo lekuphila emhlabeni lolipharadisi, nekukhonta Nkulunkulu Jehova longuMdali wetfu kuphila kwetfu konkhe.” * Lesi sibonelo lesihle kakhulu semuntfu lowalibuka ngalabovu likusasa!

9. Njengobe kusho Levithikhusi 19:18, kunini lapho kungaba matima khona kucolela umuntfu lositfukutselisile?

⁹ Fundza Levithikhusi 19:18. Ngalesinye sikhatsi kuba matima kucolela umuntfu lesinaye ebandleni, umngani wetfu nobe sihlobo setfu lesisitfukutselisile. Nasi sibonelo, lomunye dzadze wasolwa ngulomunye lakholwa naye ngekumebela imali. Ngekuhamba kwesikhatsi, lodzadze lowamsola wacolisa, kodvwa lodzadze lowasolwa wachubeka acabanga ngaloko lebekwentekile. Wake wativa yini ngalendlela? Ngisho nobe singakase sibhekane nesimo lesifanako, kodvwa linyenti letfu like leva shengatsi angeke likhone kucolela umuntfu lositfukutselisile.

10. Yini lengasisita nasitfukutsele?

¹⁰ Yini lengasisita nasitiva sitfukutsele? Kufanele sikhumbule kutsi Jehova ubona konkhe. Uyakubona konkhe loko lokwenteka kitsi, ngisho nalapho bantfu basiphatsa kabi. (Heb. 4:13) Uva buhlungu nasihlupheka. (Isa. 63:9) Wetsembisa kutsi utabucedza bonkhe buhlungu lobubangelwa kuphatfwa kabi.—Semb. 21:3, 4.

11. Kuba namuphi umphumela kitsi nasicolela labanye?

¹¹ Sifuna nekukhumbula kutsi nasibacolela labanye, sitawutiva sincono. Nguloko lokwabonwa ngulodzadze lesikhulume ngaye esigabeni 9. Ngekuhamba kwesikhatsi, wakhona kucolela lodzadze lebekamsole ngekweba. Wabona kutsi nasibatsetselela labanye, naJehova uyasitsetselela. (Mat. 6:14) Bekati kutsi lodzadze umphetse kabi kodvwa wakhetsa kumcolela. Umphumela waloko waba kutsi lodzadze wajabula futsi wakhona kunaka kukhonta Jehova.

12. Yini lesiyifundza ku-1 Johane 3:19, 20?

¹² Fundza 1 Johane 3:19, 20. Ngaletinye tikhatsi, sonkhe sihle sitiva sinelicala. Nasi sibonelo, labanye bayatisola ngetintfo labatenta basengakabi boFakazi. Labanye bayatisola ngenca yemaphutsa labawenta ngemuva kwekubhajatiswa. (Rom. 3:23) Kuliciniso kutsi sifuna kwenta lokulungile. Kodvwa “sonkhe siyona tikhatsi letinyenti.” (Jak. 3:2; Rom. 7:21-23) Ngisho nobe singakutsandzi kutiva sinelicala, kodvwa ngaletinye tikhatsi kungasisita. Kungani? Kungobe kutiva unelicala kungakwenta wente lushintjo ekuphileni kwakho futsi utimisele kungawaphindzi emaphutsa lafanako.—Heb. 12:12, 13.

13. Kungani kungakafaneli sihlale sitisola kakhulu?

¹³ Nobe kunjalo, singatisola kakhulu, lokusho kuchubeka sitisola ngisho sesiphendvukile futsi Jehova sekakhombisile kutsi usicolele. Kutisola lokunjalo kuyingoti. (Hla. 31:10; 38:3, 4) Kanjani? Cabanga nganasi sibonelo salomunye dzadze lowativa anelicala ngetono lebekatentile. Watsi: “Bengiva shengatsi ngidlala ngesikhatsi sami nangikhonta Jehova ngobe vele bekangeke angisindzise.” Linyenti letfu kungenteka like lativa ngalendlela. Ngako kufanele sicaphele kutsi singahlali sitisola kakhulu. Kungani? Kungobe Sathane angajabula kakhulu nasingayekela kukhonta Jehova, ngisho nobe Jehova asicolele.—Catsanisa na-2 Khorinte 2:5-7, 11.

14. Yini lesenta siciniseke kutsi Jehova uyasitsandza?

¹⁴ Nobe kunjalo, singahle sitibute, ‘Ngingaciniseka ngani kutsi Jehova solo uyangitsandza?’ Kutibuta lombuto, kukhombisa kutsi Jehova angasicolela. Eminyakeni leminyenti leyendlulile, Sicongosekulindza satsi: “Kungenteka siphindzaphindze emaphutsa lafanako. Kungenteka kubangelwa kutsi asikhoni kulwa nebutsakatsaka lebesinabo sisengakacali kukhonta Nkulunkulu. . . . Ungalilahli litsemba. Ungacabangi  kutsi sewente sono lesingeke sitsetselwe nguJehova. Nguloko kanye Sathane lafuna ukucabange. Lokutsi nje uva buhlungu futsi ukhatsatekile, kubufakazi bekutsi awusiye umuntfu lomubi futsi Jehova angakucolela. Hlale utfobekile futsi uchubeke uthantaza kuNkulunkulu, umcele akutsetselele futsi akusite uphindze ube nanembeza lohlantekile. Kungakhatsaliseki kutsi umntfwana uvelelwa inkinga lefanako tikhatsi letinyenti, uhlale acela babe wakhe kutsi amsite. Ngako chubeka ucela Jehova kutsi akusite futsi utakusita ngobe unemusa.” *

15-16. Labanye bative njani nababona kutsi Jehova solo uyabatsandza?

¹⁵ Bantfu baJehova labanyenti batfole indvudvuto nababona kutsi Jehova solo uyabatsandza. Nasi sibonelo, lomunye umzalwane wakhutsatwa yindzaba layifundza eluchungechungweni lolutsi “LiBhayibheli Liyakugucula Kuphila.” Kulesihloko, lomunye dzadze watsi ngenca yetintfo lebetenteke ekuphileni kwakhe, bekakutfola kumatima kwetsemba kutsi Jehova angamtsandza. Kwaphela iminyaka abhajatisiwe kodvwa solo ativa ngaleyondlela. Nobe kunjalo, kuzindla ngenhlawulo, kwamsita wabona kutsi Jehova uyamtsandza. *

¹⁶ Loko lokwenteka kulodzadze kwamtsintsa njani lomzalwane? Lomzalwane wabhala watsi: “Nangisemncane, bengilwisana nemkhuba wekubukela titfombe letikhombisa kungcola. Kodvwa ngiphindze ngabuyela kulomkhuba. Ngicele labadzala kutsi bangisite futsi ngikhonile kuwuncoba lomkhuba. Labadzala bangisitile ngetsemba kutsi Nkulunkulu uyangitsandza futsi ufuna kungicolela. Ngaletinye tikhatsi ngitiva ngingasilutfo futsi ngive shengatsi Jehova angeke angitsandze. Kufundza ngaloko lokwenteka kulodzadze kwangisita kakhulu. Nyalo sengiyabona kutsi nangitsi Nkulunkulu angeke angicolele, ngalamanye emagama ngisuke ngitsi inhlawulo yeNdvodzana yakhe ayikeneli kutsi ingahlawulela tono tami. Ngisijubile lesihloko kuze ngifundze ngaso nobe nini nangitiva ngingasilutfo.”

17. Yini leyentiwa ngumphostoli Pawula kuze angahlali ativa anelicala?

 ¹⁷ Tibonelo letifana naleti tisikhumbuta ngemphostoli Pawula. Ngaphambi kwekutsi abe ngumKhristu, bekenta tintfo letinyenti letimbi. Pawula bekakukhumbula lebekakwentile kodvwa akazange ahlale acabanga ngako. (1 Thim. 1:12-15) Wakholwa kutsi bekatawucolelwa ngenca yenhlawulo nekutsi lenhlawulo beyisipho lesivela kuNkulunkulu. (Gal. 2:20) Ngako Pawula akazange ahlale ativa anelicala kodvwa wanaka kwentela Jehova lokuncono kakhulu.

18. Yini lesiyifundzile kulesihloko?

¹⁸ Yini lesiyifundzile ngekuhlolisisa letintfo letintsatfu lesesicoce ngato kulesihloko? (1) Kukhumbula tintfo letinhle kusipho lesivela kuJehova, kodvwa ngisho nobe kuphila kwetfu bekuncono kanjani esikhatsini lesendlulile, kuphila eveni lelisha kutawuba ncono kakhulu. (2) Kungenteka labanye basivisa buhlungu, kodvwa nasibacolela sitawukhona kunaka kukhonta Jehova. (3) Kutisola kakhulu kungasenta singakhoni kukhonta Jehova sijabulile. Ngako njengaPawula, kufanele setsembe kutsi Jehova usicolele.

19. Sati ngani kutsi emhlabeni lomusha angeke sitikhumbule tintfo letibuhlungu letenteka esikhatsini lesendlulile?

¹⁹ Sinelitsemba lekuphila phakadze. Nasesiphila emhlabeni lomusha angeke sitikhumbule tintfo letasivisa buhlungu. Mayelana naleso sikhatsi, liBhayibheli litsi: “Tintfo takadzeni tingeke tikhunjulwe.” (Isa. 65:17) Cabanga nje: Labanye betfu sebaze bakhulile solo bakhonta Jehova, kodvwa eveni lelisha, batawuphindze babe basha. (Jobe 33:25) Ngako asitimisele ngekutsi singahlali sicabanga ngetintfo letenteka esikhatsini lesendlulile. Ngako asilibuke ngalabovu likusasa futsi sente konkhe lesingakwenta kuze siphile emhlabeni lomusha!