NGEMINYAKA yabo-670 B.C.E., i-Asiriya beyingumbuso wemhlaba, futsi i-The British Museum Blog itsi “beyibusa kusukela eSiphrosi lesenshonalanga kuye e-Irani lesemphumalanga, futsi kwaphela iminyaka ibusa neGibhithe.” Inhlokodolobha yayo, lebekuyiNineve, beyilidolobha lelikhulu kakhulu kunawo onkhe emhlabeni. Beyinematje lamakhulu lasikhumbuto, tingadze letinyenti letinhle, tigodlo letinkhulu kanye nemitapo yetincwadzi lemikhulu. Imibhalo yakadzeni yaseNineve ikhombisa kutsi iNkhosi Ashurbanipal, njengalamanye emakhosi ase-Asiriya, beyitibita ngekutsi “yinkhosi yemhlaba.” Ngaleso sikhatsi, bekubonakala shengatsi kute longancoba i-Asiriya neNineve.

Nobe kunjalo, ngesikhatsi i-Asiriya inemandla kakhulu, umphrofethi waJehova, lokunguZefaniya watsi: ‘[Jehova] utawubhubhisa i-Asiriya, futsi utakwenta iNineve ibe lugwadvule, yome njengelihlane.’ Ngetulu kwaloko, umphrofethi waJehova, lokunguNahume watsi: “Titsatseleni lisiliva, nititsatsele neligolide! . . . Lelidolobha alinalutfo, kute lokuhlala kulo, libhujisiwe! . . . Wonkhe umuntfu lokubonako utakubalekela, atsi: ‘INineve seyibhujisiwe!’” (Zef. 2:13; Nah. 2:9, 10; 3:7) Ngesikhatsi bantfu beva letiphrofetho, kungenteka batibuta: ‘Kungenteka yini vele loko? I-Asiriya lenemandla kungenteka yini incotjwe?’ Kungeka bekubonakala kungeke kwenteke.

Nobe kunjalo, kwenteka loko bebacabanga kutsi angeke kwenteke! Ngaphambi nje kwa-600 B.C.E., i-Asiriya yancotjwa yiBhabhulona nemaMediya. Ekugcineni, iNineve yasala ingenamuntfu futsi bantfu bakhohlwa ngayo! Incwadzi leyakhishwa yi-The Metropolitan Museum of Art itsi “lelidolobha alizange liphindze libe khona, futsi kuseBhayibhelini kuphela lapho bantfu bebafundza ngalo khona.” I-The Biblical Archaeology Society itsi ngasekucaleni kwabo-1800, “kute lebekati kutsi lelidolobha lelikhulu lase-Asiriya belikhona mbamba yini.” Kodvwa nga-1845, Austen Henry Layard, lobekangumvubukuli wacala kugubha etindzaleni teNineve. Lokwatfolakala nakagubha kwaveta kutsi iNineve beyilidolobha lelikhulu.

Kugcwaliseka kwetiphrofetho letimayelana neNineve kusenta siciniseke kakhulu kutsi tiphrofetho letiseBhayibhelini letimayelana nekubhujiswa kwabohulumende labanemandla lamuhla, nato titawugcwaliseka.​—Dan. 2:44; Semb. 19:15, 19-21.