1. Jehova usicela kutsi senteni?

LUTSANDVO lolucotfo lubaluleke kakhulu kuJehova. (Hos. 6:6) Ufuna netikhonti takhe tilutsatse njengalolubalulekile. Ngemphrofethi Mikha, Nkulunkulu wetfu usicela kutsi ‘sitsandze lutsandvo lolucotfo.’ (Mik. 6:8, umbhalo longentasi) Kodvwa ngaphambi kwekutsi sente loko, kudzingeka sati kutsi luyini lutsandvo lolucotfo.

2. Luyini lutsandvo lolucotfo?

² Luyini lutsandvo lolucotfo? Ligama lelitsi “lutsandvo lolucotfo,” livela tikhatsi letingaba ngu-230 eHumushweni Lemhlaba Lomusha LemiBhalo Lengcwele. Luyini? “Tinchazelo Temagama LaseBhayibhelini” letitfolakala kulelihumusho titsi “lutsandvo loluhambisana nekutimisela, nekuba cotfo, nekwetsembeka kanye nekunamatsela ngalokucinile entfweni letsite. Livama kusetjentiswa nakukhulunywa ngelutsandvo Nkulunkulu lanalo ngebantfu, kodvwa liphindze likhulume nangelutsandvo lolukhona emkhatsini webantfu.” Jehova uhamba embili ekukhombiseni lutsandvo lolucotfo. Kulesihloko, sitawucoca ngekutsi Jehova ulukhombisa njani lutsandvo lolucotfo kubantfu. Esihlokweni lesilandzelako, sitawucoca ngekutsi njengobe sitikhonti taNkulunkulu singamlingisa njani Jehova ekukhombiseni labanye lutsandvo lolucotfo.

3. Jehova watichaza njani kuMosi?

³ Ngekushesha ngemuva kwekutsi ema-Israyeli aphume eGibhithe, Jehova watjela Mosi intfo letsite lebalulekile lemayelana nelibito lakhe nebuntfu bakhe. Watsi: “NginguJehova, nginguJehova, nginguNkulunkulu lonesihawu neluvelo, lowephuta  kutfukutsela futsi lochichima lutsandvo lolucotfo neliciniso, lokhombisa lutsandvo lolucotfo etinkhulungwaneni tetitukulwane, acolele emaphutsa netiphambeko kanye netono.” (Eks. 34:6, 7) Ngalamavi latsintsa inhlitiyo, Jehova watjela Mosi intfo letsite lebalulekile lemayelana nelutsandvo lwakhe lolucotfo. Iyini?

4-5. (a) Jehova watichaza njani? (b) Ngumiphi imibuto lesitawucoca ngayo?

⁴ Jehova akazange amane atsi unelutsandvo lolucotfo, kodvwa watsi ‘uchichima lutsandvo lolucotfo.’ EBhayibhelini, Jehova uphindze achazwe ngalendlela tikhatsi letisitfupha. (Num. 14:18; Neh. 9:17; Hla. 86:15; 103:8; Jow. 2:13; Jona 4:2) Kuto tonkhe letikhatsi, lenchazelo ibhekisela kuJehova hhayi kubantfu. Akusimangalisi-ke kutsi kungani Jehova atichaza ngalendlela eBhayibhelini. Siyabona kutsi lutsandvo lolucotfo lubalulekile kuye. * Kungako iNkhosi Davide yatsi: “Awu Jehova, lutsandvo lwakho lolucotfo lufika emazulwini . . . Awu Nkulunkulu, lutsandvo lwakho lolucotfo luligugu kakhulu! Ngephansi kwemaphiko akho, kulapho bantfu bakhosela khona.” (Hla. 36:5, 7) NjengaDavide, luligugu yini kitsi lutsandvo lwaNkulunkulu lolucotfo?

⁵ Kuze sicondze kancono kutsi kusho kutsini kuba nelutsandvo lolucotfo, asesicoce nganayi imibuto lemibili: Bobani Jehova labakhombisa lutsandvo lolucotfo? Lusisita njani lutsandvo lwaJehova lolucotfo?

6. Bobani Jehova labakhombisa lutsandvo lolucotfo?

⁶ Bobani Jehova labakhombisa lutsandvo lolucotfo? LiBhayibheli liyasho kutsi singatsandza tintfo letinyenti letifaka ekhatsi “kulima nekufuya,” “liwayini nemafutsa,” “kuyalwa,” “lwati,” “kuhlakanipha,” nasibala nje lokumbalwa. (2 Khr. 26:10; Taga 12:1; 21:17; 29:3) Nobe kunjalo, tintfo atitsandvwa ngelutsandvo lolucotfo; bantfu kuphela labakhonjiswa lolutsandvo. Kodvwa Jehova akalukhombisi lutsandvo lolucotfo kunobe ngubani. Ulukhombisa labo labanebuhlobo lobuhle naye. Nkulunkulu wetfu wetsembekile kubangani bakhe. Unenjongo lenhle ngabo, futsi angeke abalahle.

7. Jehova ukhombise njani kutsi uyabatsandza bantfu?

⁷ Jehova ukhombise kutsi uyabatsandza bonkhe bantfu. Jesu watjela lenye indvodza lokutsiwa nguNikhodemu watsi: “Nkulunkulu walitsandza kakhulu live [bantfu] kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa  ngiyo angabhubhi, kodvwa atfole kuphila lokuphakadze.”​—Joh. 3:1, 16; Mat. 5:44, 45.

8-9. (a) Kungani Jehova atikhombisa lutsandvo lolucotfo tinceku takhe? (b) Sitawucoca ngani nyalo?

⁸ Njengobe sekuvetiwe, Jehova ukhombisa lutsandvo lwakhe lolucotfo kuphela kulabo labanebuhlobo lobuhle naye, lokutinceku takhe. Bufakazi baloko sibubona kuloko lokwashiwo yiNkhosi Davide nemphrofethi Danyela. Nasi sibonelo, Davide watsi: “Chubeka ubakhombisa lutsandvo lolucotfo labo labakwatiko.” ‘Jehova utabakhombisa lutsandvo lolucotfo kuze kube phakadze labo labamesabako.’ NaDanyela watsi: “Awu Jehova Nkulunkulu weliciniso, . . . ubakhombisa lutsandvo lolucotfo labo labakutsandzako nalabagcina imitsetfo yakho.” (Hla. 36:10; 103:17, umbhalo longentasi; Dan. 9:4) Ngekusho kwalamavi laphefumulelwe, Jehova utikhombisa lutsandvo lolucotfo tinceku takhe ngobe tiyamati, tiyamhlonipha, tiyamtsandza futsi tigcina imitsetfo yakhe. Ukhombisa lutsandvo lwakhe lolucotfo kubantfu bakhe labetsembekile kuphela, lokutikhonti takhe teliciniso.

⁹ Ngaphambi kwekutsi sicale kukhonta Jehova, salubona lutsandvo lalukhombisa bonkhe bantfu. (Hla. 104:14) Nobe kunjalo, njengobe sitikhonti takhe, uphindze asikhombise lutsandvo lwakhe lolucotfo. Ecinisweni, Jehova ucinisekisa labo labamkhontako utsi: “Lutsandvo lwami lolucotfo angeke lususwe kuwe.” (Isa. 54:10) Njengobe Davide atibonela, “Jehova utamphatsa ngendlela lekhetsekile umuntfu lowetsembekile kuye.” (Hla. 4:3) Yini lokufanele siyente ngenca yaloko? Umhlabeleli watsi: ‘Bonkhe bantfu labahlakaniphile batatinakisisa letintfo futsi bacabangisise ngelutsandvo lolucotfo Jehova labakhombisa lona.’ (Hla. 107:43, umbhalo longentasi) Sinalamavi laphefumulelwe etingcondvweni, ase sicabange ngetindlela letintsatfu tinceku taJehova letisitakala ngayo kuloko Jehova lakwentako ngenca yekutsi unelutsandvo lolucotfo.

10. Kusisita njani kwati kutsi lutsandvo lwaNkulunkulu lolucotfo luhlala kuze kube phakadze? (Tihlabelelo 31:7)

¹⁰ Lutsandvo lwaJehova lolucotfo luhlala kuze kube phakadze. Lamavi avela tikhatsi letingu-26 kuTihlabelelo 136. Livesi lekucala litsi: “Bongani  Jehova ngobe muhle; lutsandvo lwakhe lolucotfo luhlala kuze kube phakadze.” (Hla. 136:1) Kuvesi 2 kuya kuvesi 26, sitfola emavi latsi “ngobe lutsandvo lwakhe lolucotfo luhlala kuze kube phakadze.” Njengobe sifundza lesihlabelelo, sijabula kakhulu ngetindlela letinyenti Jehova lachubeka asikhombisa ngato lutsandvo lwakhe lolucotfo. Kuphindvwaphindvwa kwemavi latsi “ngobe lutsandvo lwakhe lolucotfo luhlala kuze kube phakadze,” kuyasicinisekisa kutsi indlela Nkulunkulu latsandza ngayo bantfu bakhe angeke ishintje. Kusikhutsata kakhulu kwati kutsi Jehova angeke asheshe ayekele kutsandza labo labamkhontako! Esikhundleni saloko, uyanamatsela kubo, futsi angabashiyi, ikakhulukati nabanetinkinga. Indlela lesisitakala ngayo: Kwati kutsi Jehova akasishiyi kuyasijabulisa, kusinika nemandla lesiwadzingako kute sibeketelele tinkinga tetfu, futsi sichubeke sihamba endleleni leya ekuphileni.​—Fundza Tihlabelelo 31:7.

11. Ngekusho kweTihlabelelo 86:5, yini leyenta Jehova atsetselele?

¹¹ Lutsandvo lwaNkulunkulu lolucotfo lwenta kutsi acolelane. Jehova nakabona umuntfu lowonile aphendvuka futsi ayekele kwenta sono, lutsandvo lwakhe lolucotfo lumenta kutsi amcolele. Naku umhlabeleli Davide lakusho ngaJehova: “Indlela lasiphatsa ngayo ayiyi ngendlela lesona ngayo, nekusijezisa kwakhe akuyi ngemaphutsa lesiwentako.” (Hla. 103:8-11) Davide bekati kutsi kubuhlungu kangakanani kuba nanembeza lonelicala. Kodvwa waphindze wabona kutsi Jehova ‘uhlale akulungele kutsetselela.’ Yini leyenta Jehova kutsi atsetselele? Imphendvulo ikuTihlabelelo 86:5. (Fundza.) Njengobe Davide asho emthantazweni wakhe, Jehova utsetselela ngobe lutsandvo lwakhe lolucotfo luyachichima kulabo labambitako.

12-13. Yini lengasisita nasidvumatekile ngenca yemaphutsa lesawenta?

¹² Kukahle kutsi sitisole nangabe sonile. Kungasenta kutsi siphendvuke futsi sifune tindlela tekulungisa emaphutsa etfu. Kodvwa letinye tikhonti taNkulunkulu tichubeka titisola ngemaphutsa letawenta. Ticabanga kutsi Jehova angeke aticolele nanobe timcelile kutsi atitsetselele, tayekela nekwenta lokubi. Nangabe utiva ngalendlela, kutakusita kufundza ngekutsi  Nkulunkulu uyafuna kukukhombisa lutsandvo lwakhe lolucotfo.

¹³ Indlela lesisitakala ngayo: Nanobe sinesono, singamkhonta Jehova sijabulile nganembeza lohlantekile. Loku kungenteka ngobe “ingati yaJesu iNdvodzana yakhe iyasihlanta kuto tonkhe tono.” (1 Joh. 1:7) Nangabe udvumatekile ngenca yemaphutsa akho, khumbula kutsi Jehova uyafuna futsi uyakulangatelela kucolela soni lesiphendvukile. Naka kutsi Davide waluhlobanisa njani lutsandvo lolucotfo nekutsetselela. Wabhala watsi: “Njengobe emazulu aphakeme kakhulu kunemhlaba, mkhulu kangako-ke umusa lawentela labo labamesabako. Njengobe imphumalanga ikhashane kakhulu nenshonalanga, naye utikhweshise kangako-ke tono tetfu kitsi.” (Hla. 103:11, 12) Jehova uyafuna ‘kutsetselela ngekukhululeka lokukhulu.’​—Isa. 55:7.

14. Davide wayichaza njani indlela lutsandvo lwaNkulunkulu lolucotfo lolusivikela ngayo?

¹⁴ Lutsandvo lwaNkulunkulu lolucotfo luvikela buhlobo betfu naye. Ngesikhatsi Davide athantaza kuJehova, watsi: “Uyindzawo lengibhaca kuyo; utangivikela ngetikhatsi letimatima. Ngitawumemeta ngijabulile ngobe uyangisindzisa. . . . Jehova umkhombisa lutsandvo lolucotfo loyo lowetsembela kuye.” (Hla. 32:7, 10) Emadolobha akadzeni bekatungeletwa lubondza lebelivikela bantfu labahlala kulelo dolobha, ngako lutsandvo lwaJehova lolucotfo lufana nelubondza lolusivikela kunobe yini lengalimata buhlobo betfu naye. Ngetulu kwaloko, lutsandvo lwaJehova lolucotfo lumenta asidvonsele kuye.​—Jer. 31:3.

15. Lutsandvo lwaJehova lolucotfo lufana njani nendzawo levikelekile kanye nendzawo yekukhosela?

¹⁵ Davide wasebentisa lomunye umfanekiso kuze akhombise indlela Nkulunkulu labavikela ngayo bantfu bakhe. Wabhala watsi: ‘Nkulunkulu uyindzawo yami yekukhosela lephephile, unguNkulunkulu longikhombisa lutsandvo lolucotfo.’ Waphindze washo naku ngaJehova: “Unelutsandvo lolucotfo futsi uyindzawo yami levikelekile, uyindzawo yami yekukhosela lephephile futsi ungumkhululi wami, usihlangu sami futsi nguye lengibalekela kuye.” (Hla. 59:17, umbhalo longentasi; 144:2) Kungani Davide afananisa lutsandvo lwaJehova lolucotfo nendzawo levikelekile kanye nendzawo yekukhosela? Ngisho nobe sihlala kuphi, nangabe nje sitikhonti taJehova, utasivikela kuze silondvolote buhlobo betfu lobuligugu naye. Lesicinisekiso siyasitfola nakuTihlabelelo 91. Umbhali walesihlabelelo watsi: “Ngitawutsi kuJehova: ‘Wena usiphephelo sami nendzawo yami levikelekile.’” (Hla. 91:1-3, 9, 14) Mosi wasebentisa umfanekiso lofanako lokhuluma ngendzawo yekukhosela lephephile. (Hla. 90:1, umbhalo longentasi) Ngetulu kwaloko, ngesikhatsi Mosi sekatawufa, washo nawa emavi latsintsa inhlitiyo. Wabhala watsi: “Nkulunkulu usiphephelo lebesisolo sikhona kusukela endvulo, tandla takhe letihlala njalo tingephansi kwakho.” (Dut. 33:27) Emavi latsi “tandla takhe letihlala njalo tingephansi kwakho” asitjelani ngaJehova?

16. Ngutiphi tindlela letimbili Jehova lasisita ngato? (Tihlabelelo 136:23)

¹⁶ Sitiva sivikelekile nangabe Jehova aSiphephelo setfu. Kodvwa ngaletinye tikhatsi sihle sitiva sidvumatekile, singakhoni ngisho nekwentani. Etikhatsini letinjalo, yini Jehova latasentela yona? (Fundza Tihlabelelo 136:23.) Utawufaka tandla takhe ngephansi kwetfu, asiphakamise futsi asisite sikhone kuphindze sitimele. (Hla. 28:9; 94:18) Indlela lesisitakala ngayo: Siyati kutsi singahlala setsembele kuNkulunkulu. Loko kusisita ngetindlela letimbili. Kwekucala, sinendzawo levikelekile lesingaphephela kuyo ngisho nobe sihlala kuphi. Kwesibili, Babe wetfu wasezulwini lositsandzako usikhatsalela mbamba.

17. Ngenca yekutsi Nkulunkulu unelutsandvo lolucotfo, yini lesingaciniseka ngayo? (Tihlabelelo 33:18-22)

¹⁷ Njengobe sesibonile, nangabe sibhekene nebumatima, singaciniseka kutsi Jehova utasisita kuze sihlale setsembekile kuye. (2 Khor. 4:7-9) Umphrofethi Jeremiya watsi: “Jehova unelutsandvo lolucotfo, kungako singakacotfulwa saphela nya, futsi umusa wakhe angeke uze uphele.” (Sil. 3:22) Singaciniseka kutsi Jehova utawuchubeka asikhombisa lutsandvo lwakhe lolucotfo, njengobe nje umhlabeleli asicinisekisa nakatsi “liso laJehova libuke labo labamesabako, labo labetsembele elutsandvweni lwakhe lolucotfo.”​—Fundza Tihlabelelo 33:18-22.

18-19. (a) Yini lokufanele sihlale siyikhumbula? (b) Sitawucoca ngani esihlokweni lesilandzelako?

¹⁸ Yini lesifuna kuhlale siyikhumbula? Ngaphambi kwekutsi sicale kukhonta Jehova, bekasitsandza njengabo bonkhe bantfu. Kodvwa njengobe sitikhonti takhe, uphindze asikhombise lutsandvo lwakhe lolucotfo. Ngenca yekutsi usikhombisa lolutsandvo, usivikela ngetandla takhe. Utawuhlale asisondzeta kuye futsi afeze tonkhe tetsembiso takhe lasetsembise tona. Ufuna siphumelele! (Hla. 46:1, 2, 7) Ngako, ngisho singabhekana nabuphi bumatima, Jehova utasinika emandla lesiwadzingako kuze sihlale setsembekile kuye.

¹⁹ Sesibonile kutsi Jehova utikhombisa njani tikhonti takhe lutsandvo lolucotfo. Kodvwa ulindzele kutsi natsi sikhombisane lutsandvo lolucotfo. Singakwenta njani loko? Sihloko lesilandzelako sitawukhuluma ngalendzaba lebalulekile.