1-2. (a) Kungani labo labasandza kushada kufanele betsembele kuJehova? (Tihlabelelo 37:3, 4) (b) Sitawucoca ngani kulesihloko?

USANDZA kushada yini, nobe sewutawushada? Nangabe kunjalo, siyaciniseka kutsi uyakulangatelela kuphila nemuntfu lomtsandza kakhulu futsi nijabule. Kuliciniso kutsi tikhona tinkinga emshadweni. Ngetulu kwaloko, kunetincumo letibalulekile lokufanele nitente. Tincumo lenitentako kanye nendlela lenenta ngayo nanibhekene netinkinga, kutawuncuma kutsi nitawuchubeka nijabula yini emshadweni wenu eminyakeni leseta. Nangabe netsembela kuJehova, nitawenta tincumo letihlakaniphile, umshado wenu ucine futsi nitawujabula kakhulu. Naningasisebentisi seluleko saNkulunkulu, kungenteka nibe netinkinga emshadweni wenu futsi ningajabuli.​—Fundza Tihlabelelo 37:3, 4.

² Nanobe lesihloko sicondziswe kulabasandza kushada, kodvwa sitawukhuluma ngetinkinga lokungenteka babe nato bonkhe labashadile. Sitawukhuluma ngaloko lesingakufundza etibonelweni talamanye emadvodza letsembekile kanye nebafati lokukhulunywa ngabo eBhayibhelini. Letibonelo letiseBhayibhelini tisifundzisa tifundvo lesingatisebentisa ekuphileni kwetfu, ngisho nasemshadweni. Sitawuphindze sibone loko lesingakufundza kulabanye labashadene lamuhla.

3-4. Ngutiphi tinkinga labasandza kushada labangahle babe nato?

³ Labanye bangakhutsata labasandza kushada kutsi baphile ngendlela bantfu labanyenti labaphila ngayo lamuhla. Sibonelo saloko kutsi batali netihlobo bangacindzetela labasandza kushada kutsi basheshe babe nebantfwana. Nobe bangani nemalunga emndeni bangabakhutsata kutsi batsenge indlu bese bayigcwalisa ngetintfo letinhle.

⁴ Nabangakanaki, labashadene bangenta tincumo letingabafaka shi etikweletini. Ngemuva kwaloko, bobabili kungahle kudzingeke kutsi basebente ema-awa lamanyenti kuze babhadale letikweleti. Kungadzingeka basebente sikhatsi lesidze kangangekutsi bangase babebete sikhatsi lesenele sekutidadishela liBhayibheli, sekukhonta kwemndeni nesekwenta umsebenti wekushumayela. Kungahle kudzingeke nekutsi basebente sikhatsi lesengetiwe kuze batfole imali lenyenti nobe kuze bangalahlekelwa ngumsebenti wabo, futsi ngenca yaloko bangasakhoni nekuya emihlanganweni. Loko kungenta kutsi bangakhoni kwentela Jehova lokunyenti.

5. Yini loyifundza esibonelweni saKlaus naMarisa?

⁵ Lokwenteke kulabanye kuyakhombisa kutsi kunaka kakhulu kufuna kuba netintfo letinyenti akumenti umuntfu ajabule. Naka lokwenteka kuKlaus naMarisa, labashadene. * Nabasandza kushada bebasebenta onkhe malanga kuze baphile kahle. Kodvwa bebangakajabuli. Klaus utsi: “Besinalokunyenti kunaloko besikudzinga, kodvwa besite imigomo ekukhonteni Nkulunkulu. Ecinisweni, besinetinkinga letinyenti futsi besihlale sicindzetelekile.” Kungenteka nawe unakile kutsi kunaka kutfola tintfo letinyenti akukwenti ujabule. Nakunjalo, ungadvumateki. Kufundza etibonelweni letinhle talabanye kungakusita. Kwekucala, asesibone loko emadvodza langakufundza esibonelweni seNkhosi Jehoshafati.

6. Jehoshafati wasisebentisa njani seluleko lesikuTaga 3:5, 6, ngesikhatsi abhekene nenkinga lematima?

⁶ Nine madvodza, nihle nibona shengatsi kunyenti yini lokufanele nikwente? Nangabe kunjalo, singanisita sibonelo seNkhosi Jehoshafati. Njengobe Jehoshafati bekayinkhosi, bekufanele avikele sonkhe sive. Yini leyamsita kuze ente lomsebenti lomatima kangaka? Jehoshafati wenta konkhe langakwenta kuze avikele sive sakhe. Wavikela emadolobha akaJuda, wahlanganisa nelibutfo lelikhulu lemasotja langetulu kwa-1 160 000. (2 Khr. 17:12-19) Ngekuhamba kwesikhatsi, Jehoshafati wabhekana nenkinga lenkhulu. Libutfo lelikhulu lema-Amoni, bakaMowabi kanye nemadvodza asesifundzeni lesinetintsaba saseSeyiri lasongela yena, nemndeni  wakhe kanye nesive sakhe. (2 Khr. 20:1, 2) Wenta njani Jehoshafati? Wacela Jehova kutsi amsite futsi amuphe emandla. Loko lakwenta bekuhambisana neseluleko lesikuTaga 3:5, 6. (Fundza.) Umthantazo waJehoshafati loku-2 Tikhronike 20:5-12, uveta kutsi bekametsemba kakhulu Babe wakhe wasezulwini lonelutsandvo. Jehova wawuphendvula njani umthantazo waJehoshafati?

7. Jehova wawuphendvula njani umthantazo waJehoshafati?

⁷ Jehova wasebentisa umLevi lokutsiwa nguJahaziyeli kutsi ayokhuluma naJehoshafati. Jehova watsi: “Nibotihlela, nime ngetindzawo tenu bese niyabona kutsi Jehova utanisindzisa njani.” (2 Khr. 20:13-17) Lena akusiyo indlela leyetayelekile yekulwa imphi! Kodvwa leticondziso betingaveli kumuntfu; betivela kuJehova. Ngenca yekutsi Jehoshafati beketsembele ngalokuphelele kuNkulunkulu, wenta njengobe bekatjeliwe. Ngesikhatsi yena nebantfu bakhe bayohlangana nalesitsa, akazange awabeke ngembili emasotja akhe langemachawe kodvwa wabeka bahlabeleli lebebangakahlomi. Jehova akazange amdvumate Jehoshafati; wasincoba lesitsa.​—2 Khr. 20:18-23.

8. Emadvodza angafundzani esibonelweni saJehoshafati?

⁸ Nine madvodza, ningafundza esibonelweni saJehoshafati. Kufanele ninakekele imindeni yenu, ngako nisebenta kamatima kuze niwuvikele futsi niwusekele. Naninetinkinga, ningahle nicabange kutsi ningakhona kuticatulula. Nanobe kunjalo, ningetsembeli emandleni enu. Kunaloko, thantazani kuJehova ninodvwa nimcele anisite. Ngetulu kwaloko, thantazani ngalokusuka enhlitiyweni nebafati benu. Funani sicondziso kuJehova ngekudadisha liBhayibheli kanye netincwadzi lesitinikwa yinhlangano yakhe, futsi nisebentise seluleko lenisitfolako. Labanye bangahle bangavumelani netincumo tenu letisekelwe eBhayibhelini lenitentako, futsi bangaze banitjele kutsi anikahlakaniphi. Banganitjela nekutsi imali kanye netintfo leningatitsenga ngayo kungayivikela imindeni yenu. Kodvwa khumbulani sibonelo saJehoshafati. Beketsembele kuJehova futsi loko wakukhombisa ngetento. Jehova akazange ayilahle lendvodza leyetsembekile futsi nawe angeke akulahle. (Hla. 37:28; Heb. 13:5) Yini lenye lengentiwa ngulabashadane kuze bajabule?

9. Yini lesingayisho ngemphrofethi Isaya nemkakhe?

⁹ Umphrofethi Isaya nemkakhe benta kukhonta Jehova kweta kucala ekuphileni kwabo. Isaya bekangumphrofethi, futsi kungenteka nemkakhe bekanemisebenti lehambisana nekuprofetha ngobe bekabitwa ngekutsi ‘ngumphrofethikati.’ (Isa. 8:1-4) Kusebaleni kutsi Isaya nemkakhe bebanake kukhonta Jehova. Basibonelo lesihle kulabashadene lamuhla!

10. Kudadisha tiphrofetho letiseBhayibhelini kungabasita njani labashadene kutsi batimisele kwentela Jehova lokunyenti?

¹⁰ Labashadene lamuhla bangenta konkhe labangakwenta kuze kukhonta Jehova kute kucala ekuphileni kwabo. Bangacinisa indlela labametsemba ngayo Jehova ngekudadisha tiphrofetho letiseBhayibhelini ndzawonye nangekubona indlela letihlale tigcwaliseka ngayo. * (Thit. 1:2) Bangacabanga ngaloko  labangakwenta kuze basite ekugcwaliseni tiphrofetho letiseBhayibhelini. Sibonelo saloko kutsi bangasita ekugcwaliseni siphrofetho saJesu lesitsi tindzaba letimnandzi titawushunyayelwa emhlabeni wonkhe ngaphambi kwekutsi kuphela kufike. (Mat. 24:14) Nangabe labashadene bachubeka baciniseka mbamba kutsi tiphrofetho letiseBhayibhelini tiyagcwaliseka, batawutimisela kakhulu kwentela Jehova lokunyenti.

11. Yini boPhrisila na-Akhwila labakhona kuyenta, futsi kungani?

¹¹ Labashadene labasebasha bangafundza kuPhrisila na-Akhwila lebebangemaJuda lashadene, futsi bahlala eRoma. Bebativile tindzaba letimnandzi ngaJesu futsi besebangemaKhristu. Siyaciniseka kutsi bebajabulile ekuphileni. Kodvwa kuphila kwabo kwashintja ngekushesha ngesikhatsi uMbusi Klawudiyusi atsi onkhe emaJuda akahambe eRoma. Bo-Akhwila naPhrisila bekudzingeka bente lushintjo lolukhulu. Bekudzingeka bashiye indzawo lebebayetayele, bafune likhaya lelisha futsi bacale libhizinisi labo lekwakha emathende kulenye indzawo. Letimo lebebabhekene nato betitakwenta kutsi kungaseti yini kucala ekuphileni kwabo kukhonta Jehova? Kungenteka uyayati imphendvulo yalombuto. Ekhaya labo lelisha lebeliseKhorinte, bo-Akhwila naPhrisila batihlanganisa nelibandla futsi basebenta nemphostoli Pawula kuze bacinise bazalwane lapho. Ngekuhamba kwesikhatsi, batfutsela kulamanye emadolobha lapho khona bekunesidzingo lesikhulu salabebatawushumayela. (Imis. 18:18-21; Rom. 16:3-5) Bebahlale bamatasa futsi bebakujabulela kuphila ndzawonye.

12. Kungani labashadene kufanele batibekele imigomo ekukhonteni Nkulunkulu?

¹² Labashadene lamuhla bangasilingisa sibonelo saPhrisila na-Akhwila ngekutsi bente kukhonta Nkulunkulu kute kucala ekuphileni kwabo. Sikhatsi lesikahle sekutsi laba lababili bakhulume ngemigomo yabo kungaphambi kwekutsi bashade. Nangabe labashadene batibekela imigomo ekukhonteni Nkulunkulu  futsi betame kamatima kuyifinyelela, banematfuba lamanyenti ekubona Jehova abasita ekuphileni kwabo. (Shu. 4:9, 12) Cabanga ngaloko lokwenteka kuRussell na-Elizabeth. Russell utsi: “Ngaphambi kwekutsi sishade, sacoca ngaloko lebesifuna kukwentela Jehova.” Elizabeth utsi: “Sacoca ngaloko kuze kutsi ngekuhamba kwesikhatsi nasenta tincumo, siciniseke kutsi tincumo lesitentako atisivimbeli kutsi sifinyelele imigomo lesitibekele yona.” Timo taRussell na-Elizabeth tabavumela kutsi batfutsele eMicronesia lapho bekunesidzingo lesikhulu khona sebamemeteli.

13. Ngekusho kweTihlabelelo 28:7, utawuba yini umphumela nasetsembela kuJehova?

¹³ NjengaRussell na-Elizabeth, labashadene labanyenti bakhetse kuphila imphilo lemelula kute bacitse sikhatsi lesinyenti bashumayela futsi bafundzisa tindzaba letimnandzi. Nangabe labashadene batibekela imigomo ekukhonteni Nkulunkulu futsi babambisane kuze bayifinyelele, kutawuba nemiphumela lemihle. Batayibona indlela Jehova labanakekela ngayo, bametsembe kakhulu, futsi bajabule mbamba.​—Fundza Tihlabelelo 28:7.

14. Umphostoli Phetro nemkakhe bakhombisa njani kutsi bayasetsemba setsembiso lesikuMatewu 6:25, 31-34?

¹⁴ Labashadene bangafundza nasesibonelweni semphostoli Phetro nemkakhe. Ngemuva kwetinyanga letisitfupha kuye esikhatsini lesingangemnyaka ahlangene naJesu, umphostoli Phetro kwadzingeka ente sincumo lesibalulekile ekuphileni kwakhe. Phetro bekatiphilisa ngekudweba. Ngesikhatsi Jesu atsi akabe ngumlandzeli wakhe, kwadzingeka kutsi Phetro acabange ngemndeni wakhe. (Luk. 5:1-11) Wakhetsa kushumayela naJesu. Wakhetsa kahle! Sinesizatfu lesivakalako sekutsi umfati wakhe wamsekela kulesincumo. LiBhayibheli liveta kutsi ngemuva kwekutsi Jesu sekavusiwe, Phetro wahamba nemkakhe sikhatsi lesitsite. (1 Khor. 9:5) Siyaciniseka kutsi sibonelo sakhe lesihle sekuba ngumfati longumKhristu, senta Phetro waba nenkhululeko yekubhala emavi laphefumulelwe laya emadvodzeni nakubafati labangemaKhristu. (1 Phet. 3:1-7) Kusebaleni kutsi boPhetro nemkakhe bebasetsemba setsembiso saJehova sekutsi utawubanakekela nangabe babeka kucala uMbuso ekuphileni kwabo.​—Fundza Matewu 6:25, 31-34.

15. Yini loyifundza kulokwenteka kuTiago na-Esther?

¹⁵ Nangabe sekuphele iminyaka lembalwa ushadile, yini longayenta kuze uchubeke unesifiso sekwentela Jehova lokunyenti? Lokunye longakwenta kufundza kulokwenteke kulabanye labashadile. Nasi sibonelo, ungafundza luchungechunge lwetihloko letitsi “Batinikela Ngekutitsandzela.” Letihloko tasita Tiago na-Esther, labashadene baseBrazil, kutsi babe nesifiso sekusita lapho kunesidzingo lesikhulu khona. Tiago utsi: “Njengobe sifundza ngendlela Jehova lasite ngayo tinceku takhe esikhatsini salamuhla, natsi safuna kulalela seluleko sakhe futsi sibone kutsi utasisita njani.” Bagcine batfutsele e-Paraguay, lapho basita khona ensimini yesiPutukezi kusukela nga-2014. Esther utsi: “Sobabili siwutsandza kakhulu umbhalo waKubase-Efesu 3:20. Lamavi siwabone agcwaliseka tikhatsi letinyenti emsebentini lesiwentela Jehova.” Kulencwadzi yaKubaseEfesu, Pawula wetsembisa kutsi Jehova utosipha lokungetulu kwaloko lesikucelako. Lesetsembiso sifezeke tikhatsi letinyenti!

16. Labashadene labasebasha bangasicela kubobani seluleko nabacabangisisa ngemigomo labatibekele yona?

 ¹⁶ Labashadene labasebasha lamuhla bangafundza kulokwenteke kulabanye labetsembele kuJehova. Kungenteka sekuphele iminyaka leminyenti labanye labashadene basemsebentini wasikhatsi sonkhe. Celani seluleko sabo nanibona kunesidzingo sekucabangisisa ngemigomo lenitibekele yona. Lena ngulenye indlela leningakhombisa ngayo kutsi netsembele kuJehova. (Taga 22:17, 19) Labadzala belibandla nabo bangabasita labasandza kushada labasebasha kutsi batibekele imigomo ekukhonteni Nkulunkulu futsi bayifinyelele.

17. Yini leyenteka kuKlaus naMarisa, futsi yini lesiyifundza kulokwenteka kubo?

¹⁷ Ngaletinye tikhatsi, singafisa kwentela Jehova lokunyenti emsebentini lotsite, kodvwa yena asicondzise kulomunye. Cabanga ngalokwenta kuKlaus naMarisa, lesike sakhuluma ngabo. Ngemuva kweminyaka lemitsatfu bashadile, bahamba bayovolontiya emsebentini wekwakha egatjeni laseFinland. Nobe kunjalo, batjelwa kutsi bebangeke bahlale lapho sikhatsi lesingetulu kwetinyanga letisitfupha. Bacale badvumateka. Kodvwa ngekushesha bamenywa kutsi bayofundza si-Arab, futsi nyalo bajabulile njengobe basita ensimini yesi-Arab kulelinye live. Nakacabanga ngaloko lokwenteka, Marisa utsi: “Bengesaba kwenta intfo lengingazange sengiyente, futsi bekudzingeka ngimetsembe kakhulu Jehova. Ngibonile kutsi Jehova uhlale asisita ngetindlela lesingaticabangi. Ngemuva kwekutsi kwenteke loko, sengimetsemba kakhulu Jehova.” Njengobe sibona kulesibonelo, ungaciniseka kutsi Jehova utawuhlale akubusisa nawumetsemba mbamba.

18. Yini labashadene labangayenta kuze bachubeke betsembela kuJehova?

¹⁸ Umshado usipho lesivela kuJehova. (Mat. 19:5, 6) Ufuna labashadene basijabulele lesipho. (Taga 5:18) Nine lenishadile lenisebasha, kungaba njani kutsi nihlolisise loko lenikwentako ekuphileni kwenu? Nenta konkhe leningakwenta yini kuze nikhombise Jehova kutsi nibonga kakhulu ngetipho laniphe tona? Thantazani kuJehova. Funani timiso letiseVini lakhe letinganisita esimeni lenikuso. Ngemuva kwaloko, sebentisani seluleko Jehova laninika sona. Ningaciniseka kutsi ningajabula ekuphileni nangabe kukhonta Jehova kuta kucala kini!