1, 2. (a) Lehluke kanjani litsemba lemaKhristu eliciniso kunalelo lebantfu labayincenye yalelive laSathane? (b) Ngumiphi imibuto lesitawucoca ngayo?

ONKHE emaKhristu eliciniso anelitsemba lelihle. Kungakhatsaliseki kutsi singemaKhristu lagcotjiwe nobe ‘singuletinye timvu’, sonkhe sinelitsemba lekubona kugcwaliseka injongo yaNkulunkulu yasekucaleni kanye nekungcweliswa kweligama lakhe. (Joh. 10:16; Mat. 6:9, 10) Tonkhe tinceku taJehova tikubuke ngalabovu kugcwaliseka kwaletetsembiso. Siphindze silangatelele kuphila lokuphakadze, ngekutsi sibe yincenye ‘yemazulu lamasha’ nobe incenye ‘yemhlaba lomusha’ lokwetsenjiswe nguNkulunkulu. (2 Phet. 3:13) Njengobe sisalindzele kugcwaliseka kwaletetsembiso, sinelitsemba lekutsi bantfu baNkulunkulu batawuchubeka batfutfuka ebuhlotjeni babo naNkulunkulu.

² Labo labayincenye yalelive laSathane nabo banawo ematsemba latsite, kodvwa abaciniseki kutsi atawuke agcwaliseke yini. Nasi sibonelo, tigidzi tebantfu labagembulako tingahle tetsembe kutsi titawuphumelela ngekutsi titfole sizumbulu semali nge-lotto, kodvwa loko kuyintfo labangaciniseki ngayo. Kukholwa sibili “kukutilindzela ngekuciniseka” tintfo lesetsenjiswe tona. (Heb. 11:1) Ungase utibute kutsi ngingaciniseka njani ngaletetsembiso kutsi titawugcwaliseka sibili? Ngumiphi imiphumela lemihle  yekuba nekukholwa lokucinile etintfweni lotitsembako?

3. Kukholwa kwemaKhristu eliciniso kusekelwe kuphi?

³ Njengebantfu labanesono, asitalwa sinekukholwa futsi akutentakaleli. Kukholwa emaKhristu lanako kusitselo semoya longcwele waNkulunkulu losebenta enhlitiyweni levumako. (Gal. 5:22) LiBhayibheli alisho kutsi Jehova unekukholwa nobe litsi uyakudzinga. Ngenca yekutsi Jehova ungusomandla kanye nemnikati wekuhlakanipha, kute lokungamvimba kutsi agcwalise injongo yakhe. Babe wetfu wasezulwini uyaciniseka kutsi utatigcwalisa tonkhe tetsembiso latentile, futsi kuye kufana nekutsi setigcwalisekile. Ngako-ke, utsi: “Sekwentekile!” (Fundza Sembulo 21:3-6) Kukholwa kwemaKhristu kusekelwe ekutseni Jehova “unguNkulunkulu lowetsembekile,” lohlala akwenta loko lakwetsembisile.​—Dut. 7:9.

4. Nguliphi litsemba emadvodza nebafati basendvulo labanekukholwa lebebanalo?

⁴ Incwadzi yemaHebheru 11 inetibonelo tekukholwa temadvodza nebafati labangu-16. Nakakhuluma ngabo kanye nalabanye labanyenti, lombhali lobekaphefumulelwe watsi: “Kwafakazwa kahle ngabo ngenca yekukholwa kwabo.” (Heb. 11:39) Bonkhe ‘bebakulindzele ngekuciniseka’ kutsi Nkulunkulu utayivusa “intalo” leyetsenjisiwe, kuze ifihlite lesihlubuki lesinguSathane futsi igcwalise injongo yaJehova yasekucaleni. (Gen. 3:15) Leto tinceku letetsembekile tafa ngaphambi kwekuba ‘lentalo’ letsenjisiwe lenguJesu Khristu, ivule indlela yekuyophila ezulwini. (Gal. 3:16) Nobe kunjalo, siyambonga Jehova netetsembiso takhe letitawugcwaliseka, ngobe batawuvuselwa emhlabeni lolipharadisi sebete sono.​—Hla. 37:11; Isa. 26:19; Hos. 13:14.

5, 6. Nguliphi litsemba Abrahama nemndeni wakhe lebebanalo, futsi bakucinisa njani kukholwa kwabo? (Buka sitfombe lesisekucaleni kwalesihloko.)

⁵ UmBhalo waHebheru 11:13 nawukhuluma ngebantfu labaphila ngaphambikwetikhatsi tebuKhristu, utsi: “Bonkhe laba bafa banekukholwa nanobe bangazange bakutfole kugcwaliseka kwaletetsembiso.” Lomunye wabo ngu-Abrahama. Waligcina liphila yini engcondvweni yakhe litsemba lebekanalo mayelana ‘nalentalo’? Jesu waniketa imphendvulo lecacile yalombuto nakatsi: “Uyihlo Abrahama wajabula kakhulu nakutsiwa utawubona lilanga lami, ngako walibona futsi loko kwamjabulisa.” (Joh. 8:56) Kungashiwo intfo lefanako nangaSara, Isaka, Jakobe kanye nalabanye labanyenti lebebanakisise tibusiso lebetitawuta ngeMbuso, ‘losungulwe waphindze wakhiwa nguNkulunkulu.’​—Heb. 11:8-11.

⁶ Abrahama nemndeni wakhe bakucinisa njani kukholwa kwabo? Kungenteka bafundza ngaNkulunkulu ngekulalela bantfu labetsembekile lasebakhulile, ngekwembulelwa nguNkulunkulu nobe ngekufundza tincwadzi tasendvulo letinekwetsenjelwa. Ngetulu kwaloko, abazange bakukhohlwe loko lebebakufundzile mayelana netetsembiso taNkulunkulu kanye naloko lebekumelwe bakwente futsi bachubeka bazindla ngako. Ngenca yekutsi bebaciniseka ngaletetsembiso, lamadvodza nebafati bebakulungele kubhekana nebumatima kanye nekucindzeteleka, yingci-nje nabetsembekile kuNkulunkulu.

7. Ngumaphi emalungiselelo Jehova lasentele wona kuze asisite sicinise kukholwa kwetfu, futsi kufanele sente njani ngawo?

⁷ Kuze sicinise kukholwa kwetfu, Jehova usiphe liVi lakhe liBhayibheli. Kuze ‘sibusiswe’ futsi ‘siphumelele’ kufanele silifundze njalo liVi laNkulunkulu, nakungenteka silifundze onkhe malanga. (Hla. 1:1-3; fundza Imisebenti 17:11.) Njengetikhonti taJehova tangaphambi kwetikhatsi tebuKhristu, kufanele  sichubeke sizindla ngetetsembiso taNkulunkulu futsi sente loko lakufunako. Jehova usibusise ngetintfo letinyenti letisekelwe eBhayibhelini asebentisa “sisebenti lesetsembekile nalesihlakaniphile.” (Mat. 24:45) Ngako, nangabe sikusebentisa loko Jehova lasiphe kona kuze sicinise buhlobo betfu naye, sitawube silingisa tibonelo tasendvulo tebantfu lebebanekukholwa, ‘nalebebalilindzele ngekuciniseka’ litsemba labo leMbuso.

8. Umthantazo ungakucinisa njani kukholwa kwetfu?

⁸ Tikhonti taNkulunkulu tangaphambi kwetikhatsi tebuKhristu taphindze tasitwa ngumthantazo kuze ticinise kukholwa kwato. Kukholwa kwato kwacina njengobe tatibona Nkulunkulu ayiphendvula imithantazo yato. (Neh. 1:4, 11; Hla. 34:4, 15, 17; Dan. 9:19-21) Natsi kufanele sithantaze kuJehova simtjele loko lokusikhatsatako, yena utayiva imithantazo yetfu futsi asisite sikwati kukhutsatela. Kukholwa kwetfu kuyacina nangabe imithantazo yetfu iphendvulwa. (Fundza 1 Johane 5:14, 15.) Ngenca yekutsi kukholwa kusitselo semoya, kufanele ‘sichubeke sicela’ Nkulunkulu kutsi asiphe umoya wakhe, njengobe Jesu asho kanjalo.​—Luk. 11:9, 13.

9. Ngetulu kwekutithantazela tsine, bobani labanye lokufanele sibathantazele?

⁹ Nanobe kunjalo, imithantazo yetfu akufanele ibe yetidzingo tetfu nje kuphela. ‘Angeke setibaleke tonkhe timangaliso lasentela tona’ Jehova, ngako kufanele simbonge futsi simdvumise malanga onkhe. (Hla. 40:5) Imithantazo yetfu kufanele ikhombise kutsi ‘siyabakhumbula labo lababoshiwe, kube shengatsi natsi siboshwe kanye nabo.’ Kufanele sithantazele nebazalwane betfu emhlabeni wonkhe, ikakhulukati ‘labo labasiholako.’ Tinhlitiyo tetfu tiyatsintseka nasibona indlela Jehova laphendvula ngayo imithantazo yetfu.​—Heb. 13:3, 7.

10. Ngutiphi tibonelo tetinceku taNkulunkulu lesinato letahlala tetsembekile kuye, futsi basitwa yini kutsi bente kanjalo?

¹⁰ Encwadzini yaHebheru sehluko 11, umphostoli Pawula wachaza bumatima tinceku taNkulunkulu lokwadzingeka tibubeketelele. Nasi sibonelo: Lomphostoli wakhuluma ngebafati labanekukholwa labafelwa ngemadvodzana abo kodvwa laphindze avuswa. Wase ukhuluma ngalabanye ‘labebangafuni kukhululwa ngalenye indlela, kuze batfole luvuko loluncono kakhulu.’ (Heb. 11:35) Nanobe singati kutsi abekhuluma ngabobani umphostoli Pawula, bantfu labanjengaNabothi naZakhariya, bagcotjwa ngematje baze bafa ngenca nje yekutsi bebalalela Nkulunkulu futsi benta intsandvo yakhe. (1 Khos. 21:3, 15; 2 Khr. 24:20, 21) Danyela nebangani bakhe bebanelitfuba lelihle ‘lekukhululwa’ nabangetsembeki. Kunekutsi bangetsembeki, kukholwa kwabo kuNkulunkulu kwabenta “bavala imilomo yemabhubesi” futsi “bancoba emandla emlilo.”​—Heb. 11:33, 34; Dan. 3:16-18, 20, 28; 6:13, 16, 21-23.

11. Nguluphi luvivinyo labanye baphrofethi lokwadzingeka balukhutsatelele ngenca yekukholwa kwabo?

¹¹ Baphrofethi labanjengaboMikha naJeremiya ‘baphukutwa . . . baphindze baboshwa ngetinketane ejele’ ngenca yekukholwa kwabo. Labanye njenga-Elija ‘bebazulazula emahlane, nasetintsabeni, nasemihumeni, nasemigedzeni yemhlaba.’ Bonkhe bakhutsatela ngenca yekutsi ‘bebaciniseka ngetintfo lebebatsembele kuto.’​—Heb. 11:1, 36-38; 1 Khos. 18:13; 22:24-27; Jer. 20:1, 2; 28:10, 11; 32:2.

12. Ngubani losibonelo lesihle kakhulu sekukhutsatelela kuvivinywa, futsi yini leyamsita?

¹² Ngemuva kwekutsi umphostoli Pawula akhulume ngekukholwa kwemadvodza nebafati, waphawula sibonelo lesihle kakhulu setfu sonkhe​—lokusibonelo seNkhosi yetfu Jesu Khristu. Umbhalo waHebheru 12:2 utsi: “Ngobe ngenca yenjabulo lebeyibekwe  embikwakhe wabeketelela kufa elugodvweni, wangalinaki lihlazo, futsi wahlala ngesekudla sesihlalo sebukhosi saNkulunkulu.” Ngako kufanele ‘sicabangisise’ ngesibonelo saJesu sekukholwa ngetikhatsi letimatima (Fundza Hebheru 12:3.) EmaKhristu elikhulu lekucala lafela kukholwa kwawo njengemfundzi Antipasi alingisa Jesu, angabulahli bucotfo bawo. (Sem 2:13) Batawutfola umvuzo wekuvuselwa ekuphileni kwasezulwini​—‘lokuluvuko loluncono kakhulu,’ labebabuke embili kulo. (Heb 11:35) Ngemuva kwekutsi uMbuso waNkulunkulu ucale kubusa nga-1914, onkhe emaKhristu lagcotjiwe labesavele afile avuselwa ekuphileni kwasezulwini kute abuse naJesu.​—Sem 20:4.

13, 14. Ngubuphi bumatima uMzalwane Rudolf Graichen labhekana nabo, futsi yini leyamsita wakhona kubukhutsatelela?

¹³ Esikhatsini setfu kunetigidzi tetinceku taNkulunkulu letilingisa Jesu ngekubuka embili emvuzweni wato futsi ativumeli kutsi kuvivinywa kwente kukholwa kwato kube butsakatsaka. Cabanga ngesibonelo saRudolf Graichen lowatalelwa eveni laseJalimane nga-1925. Wakhumbula titfombe tetindzaba letiseBhayibhelini lebetilenga elubondzeni lwasekhaya kubo. Wabhala watsi: “Lesinye sitfombe besisemphisi nelizinyane lemvu, lesinye kusemfanyana kanye nengwe,  lesinye bekuselitfole nelibhubesi​—tonkhe tihleti ngekuthula futsi tiluswe ngumfana lomncane. . . . Letitfombe bengihlale ngitikhumbula njalo.” (Isa 11:6-9) UMzalwane Rudolf waphatfwa kabuhlungu iminyaka leminyenti, wacale wahlushwa ngemaNazi, ngekuhamba kwesikhatsi kwaba ngeMakhomanisi aseJalimane, nanobe kunjalo wachubeka anekukholwa lokucinile ngekuphila emhlabeni lolipharadisi.

¹⁴ Lobunye buhlungu Rudolf labhekana nabo kufelwa ngumake wakhe lowabulawa ngumkhuhlane lokutsiwa yi-typhus asenkambu yekuhlushwa eRavensbrück kanye nekuhlubuka kwababe wakhe lowasayina kutsi akasesuye lomunye waBoFakazi BaJehova. Ngemuva kwekutsi akhululwe ejele, uMzalwane Rudolf wakhonta njengembonisi wesigodzi futsi ngekuhamba kwesikhatsi wamenyelwa eSikolweni saseGileyadi. Wase uba sitfunywa selivangeli eveni laseChile, lapho wafike waphindze waba ngumbonisi wesigodzi. Tinhlupheko taRudolf betisengakapheli. Ngemuva kwemnyaka ashade nalesinye sitfunywa selivangeli lesinguPatsy, bafelwa yindvodzakati yabo lebeyiseluswane. Ngekuhamba kwesikhatsi umkakhe lobekaneminyaka lengu-43 budzala naye wafa. UMzalwane Rudolf wakukhutsatelela konkhe lokuvivinywa futsi wakhonta njengelihlahlandlela lelivamile nalomdzala welibandla nanobe abesakhulile futsi anemphilo lebutsakatsaka. Umlandvo wekuphila kweMzalwane Rudolf kwakhulunywa ngawo kuSicongosekulindza sa-August 1, 1997 emakhasini 20-25 lesitfolakala ngesiZulu. ^[1]

15. Ngutiphi tibonelo lesinato lamuhla taBoFakazi BaJehova labakhutsatelela kuhlushwa?

¹⁵ BoFakazi BaJehova bayachubeka bajabula ngelitsemba labanalo ngisho nome babhekana nebumatima kanye nekuhlushwa lokuchubekako. Nasi sibonelo: Bazalwane nabodzadze labanyenti basemajele ase-Eritrea, Singapore, kanye naseSouth Korea. Esikhatsini lesinyenti baboshelwa kulalela emavi aJesu ekungatingeneli timphi. (Mat 26:​52) Labanye babo ngu-Isaac, Negede kanye naPaulos, losekuphele iminyaka lengetulu kwalengu-20 basejele lase-Eritrea. Nanobe labazalwane bemukwa lilungelo lekunakekela batali babo kanye nelekushada, kodvwa bachubeka betsembekile nangetulu kwekuphatfwa kabuhlungu. Nasibabuka ku-jw.org sibona nje injabulo ebusweni babo lekhombisa kutsi banekukholwa lokucinile. Loku kwente kutsi bahlonishwe ngulababagadzile emajele.

16. Kungakuvikela njani kukholwa lokucinile?

¹⁶ Tinceku taJehova letinyenti atikake tikhutsatelele kuhlushwa lokumatima. Kuvivinywa kwekukholwa kwato kwehlukile. Letinyenti kudzingeke kutsi tikhutsatelele buphuya ngesikhatsi kunetimphi emaveni ato noma nakunetehlakalo temvelo. Letinye tilingise sibonelo saMosi kanye nalamanye emadvodza letsembekile ngekutsi tishiye imphilo lentofontofo noma ludvumo. Tilwa kamatima netifiso tekuba netintfo letinyenti kanye nekuticabangela tona kuphela. Yini letisita kutsi tikhone kukwenta loko? Tisitwa lutsandvo letinalo ngaJehova kanye nekukholwa lokucinile etetsembisweni taNkulunkulu tekucedza bonkhe bubi emhlabeni kanye nekutsi tiphile phakadze emhlabeni lomusha lonekulunga.​—Fundza Tihlabelelo 37:5, 7, 9, 29.

17. Yini lotimisele kuyenta, futsi sitawucoca ngani esihlokweni lesilandzelako?

¹⁷ Kulesihloko sicoce ngekutsi nasithantaza njalo futsi sizindla ngetetsembiso taNkulunkulu kukholwa kwetfu kutawucina. Nangabe senta kanjalo sitawukhona kukhutsatelela kuvivinywa kwekukholwa kwetfu njengobe ‘sitilindzele ngekuciniseka’ tintfo lesetsenjiswe tona njengemaKhristu. Kunalokunyenti lokushiwo liBhayibheli nalichaza kukholwa, sihloko lesilandzelako sitawucoca ngako.