1-2. (a) Ngusiphi simemetelo lesitawukhishwa baholi bemhlaba? (b) Sitawuphendvula miphi imibuto?

CABANGA ngesikhatsi lapho baholi bemhlaba sebasikhiphile simemetelo lokwaphrofethwa ngaso ‘sekuthula nekulondzeka.’ Batawutikhukhumeta batsi lelive alikase libe nekuthula lokufana naloku. Tive titawusenta sicabange kutsi tiyakhona kulungisa tonkhe tinkinga temhlaba. Kodvwa liciniso likutsi ngeke tikuvimbe lokutawenteka ngemuva kwaloko! Leni? Ngekusho kwesiphrofetho lesiseBhayibhelini, “kubhujiswa kuyawubatuma ngekushesha lokukhulu,  . . futsi ngeke bakhone kukubalekela.”—1 Thes. 5:3.

² Kunemibuto lebalulekile ledzinga timphendvulo: Kutawentekani ngesikhatsi ‘sekuhlupheka lokukhulu’? Yini Jehova latawulindzela kutsi siyente ngaleso sikhatsi? Singatilungiselela njani nyalo kuze sikhone kuhlala setsembekile ngesikhatsi sekuhlupheka lokukhulu?—Mat. 24:21.

3. Ngekusho kweSembulo 17:5, 15-18, Nkulunkulu utayibhubhisa njani “iBhabhulona Lenkhulu”?

³ Fundza Sembulo 17:5, 15-18. “IBhabhulona Lenkhulu” itawubhujiswa! Njengobe sivetile ekucaleni, tive ngeke tikhone kukuvimba lokutawenteka ngaleso sikhatsi. Kungani? Kungobe ‘Nkulunkulu utakufaka etinhlitiyweni tato kutsi tente injongo yakhe.’ Iyini injongo yakhe? Ikutsi abhubhise umbuso  wenkholo yemanga kuhlanganise neTinkholo Letitsi TebuKhristu. * Nkulunkulu utawufaka injongo yakhe etinhlitiyweni ‘tetimphondvo letilishumi’ ‘tesilo sasendle lesibovu.’ Letimphondvo letilishumi timelela bonkhe bohulumende labasekela ‘lesilo sasendle’ lesinguMhlabuhlangene. (Semb. 17:3, 11-13; 18:8) Kutawutsi lapho labohulumende nabahlasela inkholo yemanga, loko kutawuba luphawu lwekutsi sekucalile kuhlupheka lokukhulu. Lesi kutawuba sentakalo lesitawutuma bantfu labanyenti emhlabeni futsi sibetfuse.

4. (a) Ngutiphi tizatfu lokungenteka tiniketwe tive ngekuhlasela inkholo yemanga? (b) Yini lokungenteka yentiwe bantfu lebebangemalunga enkholo yemanga?

⁴ Asati kutsi tive titawuniketa tiphi tizatfu ngekuhlasela iBhabhulona Lenkhulu. Kungenteka titsi inkholo yemanga ivimbela kuthula emhlabeni nekutsi ihlale ingena etindzabeni tabohulumende. Tingasho nekutsi itsetse umcebo netintfo letinyenti. (Semb. 18:3, 7) Letive natihlasela inkholo yemanga, kungenteka tingababhubhisi bonkhe bantfu labangemalunga ayo. Kodvwa kubonakala shengatsi titawubhubhisa tonkhe tinhlangano tenkholo yemanga. Nasetibhujisiwe letinhlangano, bantfu lebebangemalunga enkholo yemanga batawubona kutsi baholi bayo behlulekile kugcina tetsembiso tabo, futsi kungenteka labantfu batawutsi kute lokubahlanganisa nayo.

5. Yini Jehova layetsembisile mayelana nekuhlupheka lokukhulu, futsi kungani?

⁵ LiBhayibheli alisho kutsi kutawutsatsa sikhatsi lesinganani kubhujiswa kweBhabhulona Lenkhulu, kodvwa siyati kutsi ngeke kutsatse sikhatsi lesidze. (Semb. 18:10, 21) Jehova wetsembise kutsi ‘utawafinyeta emalanga’ ekuhlupheka lokukhulu kuze kusindze labo “labakhetsiwe,” kanye nenkholo yeliciniso. (Mak. 13:19, 20) Yini Jehova latawulindzela kutsi siyente kusukela nakucala kuhlupheka lokukhulu kuze kube ngulapho kucala imphi ye-Amagedoni?

6. Yini lenye lokufanele siyente ngisho nobe sesitehlukanisile nenkholo yemanga?

⁶ Njengobe kuchaziwe esihlokweni lesendlulile, Jehova ulindzele kutsi bantfu labamkhontako batehlukanise neBhabhulona Lenkhulu.  Kodvwa kufanele sente lokungetulu nje kwaloko. Kufanele sitimisele ekukhonteni Jehova. Ase sicoce ngetindlela letimbili lesingakwenta ngato loko.

7. (a) Yini lesingayenta kuze sihlale setsembekile etimisweni taJehova tekutiphatsa? (b) Kungani umbhalo waHebheru 10:24, 25 utsi sihlangane ndzawonye, futsi kungani loku kufanele sikwente kakhulu nyalo?

⁷ Kwekucala, kufanele sihlale setsembekile etimisweni taJehova tekutiphatsa. Kufanele singayemukeli indlela yekutiphatsa yalelive. Sibonelo saloko kutsi ngeke sikwemukele kutiphatsa kabi ngekwelicasi kwanobe nguluphi luhlobo, lokufaka ekhatsi kushada kwebantfu bebulili lobufanako kanye naleminye imikhuba yebutabani. (Mat. 19:4, 5; Rom. 1:26, 27) Kwesibili, kufanele sichubeke sikhonta Jehova sikanye nalamanye emaKhristu. Loku sikwenta nobe ngukuphi, kungaba semaHholweni eMbuso, futsi nangabe kunesidzingo, singakwenta emakhaya alabanye BoFakazi nobe ngasense. Noma kungentekani, ngeke siyekele kuya emihlanganweni kuze sikhonte Jehova. Ecinisweni, kufanele sihlangane ndzawonye ‘ikakhulukati njengobe sibona lilanga lisondzela.’—Fundza Hebheru 10:24, 25.

8. Umlayeto lesiwushumayelako kungenteka ushintje njani esikhatsini lesitako?

⁸ Ngesikhatsi sekuhlupheka lokukhulu, kungenteka umlayeto lesiwushumayelako ushintje. Nyalo sishumayela tindzaba letimnandzi teMbuso futsi setama kwenta bafundzi. Kodvwa ngesikhatsi sekuhlupheka lokukhulu, kungenteka sitawube sishumayela umlayeto locondzile futsi liBhayibheli liwufananisa nesangcotfo lesinemandla. (Semb. 16:21) Kungenteka sitawube sishumayela kutsi ngekushesha lelive laSathane litawubhujiswa ngalokuphelele. Ngesikhatsi lesifanele, sitawatiswa kutsi lomlayeto lesitawube siwushumayela utsini nekutsi sitawushumayela kanjani. Sitawusebentisa tindlela lebesisolo sitisebentisa yini eminyakeni leminyenti leyendlulile kuze sishumayele futsi sifundzise bantfu, nobe sitawusebentisa letinye tindlela letehlukile? Asati. Kunobe ngukuphi, kubonakala shengatsi sitawuba nelilungelo lekuwumemetela ngesibindzi umlayeto waJehova wesehlulelo!—Hez. 2:3-5.

9. Yini tive lokungenteka tiyente ngemlayeto lesitawube siwumemetela, kodvwa yini lesiciniseka ngayo?

⁹ Manyenti ematfuba ekutsi umlayeto lesitawushumayela wente tive tetame kusiphocelela kutsi siyekele ngalokuphelele kushumayela. Njengoba nanyalo setsembela kuJehova kutsi asisekele nasishumayela, nasesikhatsini lesitako sitawetsembela kuye. Siyaciniseka kutsi Nkulunkulu wetfu utasipha emandla ekutsi sikhone kufeza injongo yakhe.—Mik. 3:8.

10. Njengoba kwaphrofethwa embhalweni waLukha 21:25-28, bantfu labanyenti batawutiva njani ngetintfo letitawenteka ngesikhatsi sekuhlupheka lokukhulu?

¹⁰ Fundza Lukha 21:25-28. Ngesikhatsi sekuhlupheka lokukhulu, bantfu batawumangala nababona tintfo lebebacabanga kutsi titawuhlala phakadze seticala kuhhohloka. Batawuva ‘buhlungu’ futsi bakhatsateke ngekutsi batawubulawa ngalesikhatsi lesitawube simatima kakhulu emlandvweni webantfu. (Zef. 1:14, 15) Ngaleso sikhatsi, kungenteka kuphila kutawuba matima ngisho nakubantfu baJehova. Ngesizatfu sekutsi asitihlanganisi nalelive, kungenteka sibhekane nebumatima. Kungenteka sibe bete letinye tintfo lesitidzingako.

11. (a) Kungani tive titawubese tifuna kuhlasela BoFakazi BaJehova? (b) Kungani kufanele singakwesabi kuhlupheka lokukhulu?

¹¹ Kutawufika sikhatsi lapho kungenteka bantfu lebebangemalunga enkholo yemanga letawube ibhujisiwe batawutfukutsela ngobe BoFakazi BaJehova batawube bachubeka bakhonta Nkulunkulu. Singacabanga ngemsindvo lotawusuka ngenca yaloku, ngisho naku-Internet.  Tive kanye nembusi wato longuSathane batasitondza ngoba inkholo yetfu kutawube kungiyo kuphela lengakabhujiswa. Titawube tingakawufezi umgomo wato wekubhubhisa tonkhe tinkholo emhlabeni. Ngako titawubese tifuna kusihlasela. Ngaleso sikhatsi, tive titawuba nguGogi wakaMagogi. * Tive titawuhlangana kuze tihlasele bantfu baJehova ngawo onkhe emandla ato. (Hez. 38:2, 14-16) Kungenteka nyalo sitawucala sikhatsateke ngekutsi kutawentekani ngesikhatsi sekuhlupheka lokukhulu, ikakhulukati ngobe site imininingwane lecondzile ngako. Kodvwa siyaciniseka kutsi ngeke sikwesabe kuhlupheka lokukhulu. Jehova utasiniketa ticondziso letitawusindzisa kuphila kwetfu. (Hla. 34:19) Sitawukhona ‘kusukuma, siphakamise tinhloko tetfu,’ ngobe sitawube sati kutsi ‘kusindziswa kwetfu kutawube sekusedvute.’ *

12. ‘Sisebenti lesetsembekile nalesihlakaniphile’ sisite njani kuze sikulungele lokutawenteka esikhatsini lesitako?

¹² ‘Sisebenti lesetsembekile nalesihlakaniphile’ besisolo sisita kuze sikulungele kuhlala setsembekile ngesikhatsi sekuhlupheka lokukhulu. (Mat. 24:45) Loku sikwente ngetindlela letinyenti, lenye yaletindlela yimihlangano lefike ngesikhatsi yanga-2016 kuya ku-2018. Tinkhulumo lebetibekwa kulemihlangano betisikhutsata kutsi sicinise buntfu lesibudzingako njengobe lilanga laJehova lisondzela. Asesicoce kafishane ngalobuntfu.

13. Singakucinisa njani kwetsembeka kwetfu kuJehova, futsi kungani kufanele sikucinise nyalo?

¹³ Kwetsembeka: Sihloko semhlangano wanga-2016 besitsi “Hlala Wetsembekile KuJehova!” Lomhlangano bewusifundzisa kutsi nangabe sinebuhlobo lobusedvute naJehova, sitawetsembeka kuye. Sakhuntjutwa nekutsi singasondzela kuJehova ngekutsi sithantaze kuye ngalokusuka enhlitiyweni futsi silifundze onkhe malanga liVi lakhe. Kwenta loko kutasinika emandla ekuncoba tinkinga lesihlangabetana nato. Njengobe sikhatsi sekuhlupheka lokukhulu sisondzela, sikulindzele kutsi kwetsembeka kwetfu kuJehova kanye naseMbusweni wakhe kuvivinywe kakhulu. Kungenteka nebantfu batawuchubeka bahlekisa ngatsi. (2 Phet. 3:3, 4) Sizatfu lesihamba embili saloko kutsi asisiyo incenye yalelive laSathane. Kufanele sicinise kwetsembeka kwetfu kuJehova nyalo kuze sitewukhona kuhlala setsembekile nangesikhatsi sekuhlupheka lokukhulu.

14. Nguluphi lushintjo lolutawenteka mayelana nebazalwane labatawube bahola sicumbi lesikhulu emhlabeni? (b) Kungani kutawudzingeka kutsi setsembeke ngaleso sikhatsi?

¹⁴ Ngesikhatsi sekuhlupheka lokukhulu, kutawenteka lushintjo mayelana nebazalwane labatawube bahola bantfu baNkulunkulu emhlabeni. Kutawufika sikhatsi lapho bonkhe labagcotjiwe labaselamhlabeni batawuyiswa ezulwini kuze balwe imphi ye-Amagedoni. (Mat. 24:31; Semb. 2:26, 27) Loku kusho kutsi Sigungu Lesibusako sitawube singasekho lamhlabeni. Nobe kunjalo, sicumbi lesikhulu sitawuchubeka sihlelekile. Sitawuholwa bazalwane labafanelekako labangemalunga aletinye timvu. Kufanele sikhombise kutsi setsembekile kuJehova ngekutsi sibasekele labazalwane futsi silandzele ticondziso labatatitfola  kuNkulunkulu. Kufanele sitilandzele ticondziso tabo nangabe sifuna kusindza!

15. Singakukhulisa njani kucinisela kwetfu, futsi loko kubaluleke ngani kutsi sikwente nyalo?

¹⁵ Kucinisela: Sihloko semhlangano wanga-2017 besitsi “Ungalokotsi Uphelelwe Litsemba!” Lomhlangano wasisita kuze sicinise likhono letfu lekubeketela. Safundza kutsi kucinisela kwetfu akuyi ngekutsi simo sitawengca. Kunaloko, kudzingeka setsembele kuJehova kuze sikhone kucinisela. (Rom. 12:12) Shengatsi singete sasikhohlwa setsembiso saJesu lesitsi: “Loyo loyawucinisela kudzimate kube sekugcineni, nguye loyawusindziswa.” (Mat. 24:13) Lesetsembiso sisho kutsi kufanele sihlale setsembekile ngisho nobe sibhekana nabuphi bumatima. Nangabe sibeketelela tonkhe tinkinga nyalo, kukholwa kwetfu kutawucina ngaphambi kwekutsi kufike kuhlupheka lokukhulu.

16. Yini lesenta sibe nesibindzi, futsi singasicinisa njani sibindzi setfu nyalo?

¹⁶ Sibindzi: Sihloko semhlangano wanga-2018 besitsi “Bani Nesibindzi!” Lomhlangano wasikhumbuta kutsi asibi nesibindzi ngenca nje yemakhono lesinawo. Njengoba kudzingeka setsembele kuJehova kuze sicinisele, kufanele siphindze setsembele kuye kuze sibe nesibindzi. Singenta njani kuze sicinise kwetsembela kwetfu kuJehova? Ngekufundza liVi lakhe onkhe malanga futsi sizindle ngekutsi Jehova ubasisindzise njani bantfu bakhe esikhatsini lesendlulile. (Hla. 68:20; 2 Phet. 2:9) Kutawudzingeka sibe nesibindzi lapho tive tisihlasela ngesikhatsi sekuhlupheka lokukhulu, futsi kutawudzingeka setsembele kakhulu kuJehova kunakucala. (Hla. 112:7, 8; Heb. 13:6) Nangabe setsembela kuJehova nyalo, sitawuba nesibindzi lesisidzingako nakasihlasela Gogi. *

17. Kungani kufanele singayesabi i-Amagedoni? (Buka sitfombe lesisekhasini lekucala.)

¹⁷ Njengobe kuchaziwe esehlukweni lesendlulile, linyenti letfu liphile emalangeni ekugcina. Siyetsemba nekutsi sitawusindza nangesikhatsi sekuhlupheka lokukhulu. Imphi ye-Amagedoni itawuba sentakalo sekugcina sekuphela kwalelive. Nobe kunjalo, asesabi lutfo. Kungani? Ngobe lena kutawube kuyimphi yaNkulunkulu. (Taga 1:33; Hez. 38:18-20; Zak. 14:3) Kutawutsi  lapho Jehova aniketa sicondziso, Jesu Khristu utawubese uhola libutfo laNkulunkulu emphini. Utawube analabagcotjiwe labavusiwe kanye nemashumi etinkhulungwane etingilosi. Batawulwa naSathane, nemadimoni akhe kanye nemabutfo akhe alamhlabeni.—Dan. 12:1; Semb. 6:2; 17:14.

18. (a) Yini Jehova layetsembisile? (b) Umbhalo weSembulo 7:9, 13-17, ukusita njani kutsi uciniseke ngelitsemba lakho ngelikusasa?

¹⁸ Jehova uyetsembisa utsi: “Kute sikhali lesilolelwa kulwa nawe lesiyawuphumelela.” (Isa. 54:17) “Sicumbi lesikhulu” setinceku taJehova letetsembekile ‘sitawuphuma ekuhluphekeni lokukhulu’ siphila! Ngako lesicumbi sitawuchubeka simkhonta. (Fundza Sembulo 7:9, 13-17.) LiBhayibheli lisiniketa tizatfu letinyenti tekutsi sitawusindza esikhatsini lesitako. Siyati kutsi Jehova “uyabagcina labetsembele kuye.” (Hla. 31:23) Bonkhe labatsandza Jehova futsi labamdvumisako batawujabula nababona angcwelisa libito lakhe lelingcwele.—Hez. 38:23.

19. Nguliphi likusasa lelihle lesitawuba nalo ngekushesha?

¹⁹ Cabanga ngaloko umbhalo wa-2 Thimothi 3:2-5 lobewungabe uyakusho kube bewuchaza bantfu labaphila emhlabeni lomusha, lapho Sathane angasekho. (Fundza libhokisi lelitsi “ Indlela Bantfu Labatawutiphatsa Ngayo Ngaleso Sikhatsi.”) Umzalwane George Gangas * lobekalilunga leSigungu Lesibusako watsi: “Lomhlaba utawuba yindzawo lekahle nasewunebantfu labakhonta Jehova kuphela! Ngekushesha, utawuba nelilungelo lekuphila eveni lelisha. Utawuphila phakadze njengaJehova. Sitawuphila phakadze.” Leli litsemba lelisijabulisa mbamba!