1. Yini Jehova langayenta kuze afeze injongo yakhe?

JEHOVA angaba ngunobe yini lokudzingeka abe ngiyo kuze afeze injongo yakhe. Nasi sibonelo, Jehova ube nguMfundzisi, uMdvudvuti kanye neMshumayeli, nasibala tintfo letimbalwa kulake waba ngito. (Isa. 48:17; 2 Khor. 7:6; Gal. 3:8) Nobe kunjalo, etikhatsini letinyenti usebentisa bantfu kuze bafeze tinjongo takhe. (Mat. 24:14; 28:19, 20; 2 Khor. 1:3, 4) Jehova angasipha kuhlakanipha nemandla lesiwadzingako kute sibe ngunobe yini lokudzingeka sibe ngiyo kuze sitewufeza injongo yakhe. Loku kuyincenye yenchazelo yelibito laJehova, njengobe tati letinyenti ticabanga kanjalo.

2. (a) Yini lengenta kutsi ngaletinye tikhatsi sive shengatsi Jehova akasisebentisi? (b) Sitawucoca ngani kulesihloko?

² Sonkhe siyafuna kutsi Jehova asisebentise kuze sente intsandvo yakhe, kodvwa labanye bangase babone shengatsi Jehova akabasebentisi. Kungani? Kungobe beva shengatsi abakhoni kumentela lokunyenti ngenca yeminyaka yabo, timo tabo nemakhono abo. Labanye bangeva shengatsi loko labamentela kona kwenele futsi kute sidzingo sekutsi bamentele lokungetulu kwako. Kulesihloko, sitawucoca ngekutsi Jehova anganika ngamunye wetfu loko lakudzingako kuze afeze injongo yakhe. Sitawubese sifundza ngetindzaba letiseBhayibhelini tetinceku taJehova, letifaka ekhatsi bafati nemadvodza, leto latiniketa sifiso kanye nemandla ekwenta intsandvo yakhe. Ekugcineni sitawufundza  ngekutsi singamvumela njani Jehova kutsi asisebentise.

3. Jehova angasisita njani sibe nesifiso sekwenta lokutsite njengobe asetsembisa embhalweni waFiliphi 2:13?

³ Fundza Filiphi 2:13. * Jehova angasinika sifiso sekwenta intsandvo yakhe. Angakwenta njani loko? Mhlawumbe singeva kutsi kunalokutsite lokudzingeka kwentiwe ebandleni, nobe kungenteka lomdzala ebandleni afundze incwadzi levela ehhovisini leligatja letsi kunendzawo letsite ledzinga lusito. Loku kungasenta sitibute: ‘Yini lengingayenta kuze ngisite?’ Kungenteka sicelwe kutsi sente umsebenti lotsite lolukhuni, futsi siyatibuta kutsi singakhona yini kuwenta kahle. Nobe ngemuva kwekufundza emavesi latsite eBhayibhelini, singatibuta: ‘Lamavesi ngingawasebentisa njani kuze ngisite labanye?’ Jehova angeke asiphocelele kutsi sente lokutsite. Kodvwa nakabona kutsi siyacabanga ngalesingamentela kona, angasisita sibe nesifiso sekukwenta loko lesicabanga ngako.

4. Jehova angasinika njani emandla ekwenta intsandvo yakhe?

⁴ Jehova angaphindze asinike emandla ekwenta intsandvo yakhe. (Isa. 40:29) Kanjani? Angasebentisa umoya wakhe longcwele kuze atfutfukise emakhono lesinawo. (Eks. 35:30-35) Jehova angasebentisa inhlangano yakhe kuze isifundzise tindlela tekwenta imisebenti letsite. Nakwenteka ungaciniseki kutsi umsebenti lotsite wentiwa njani, cela lusito. Ngetulu kwaloko, ungesabi kucela Babe wetfu losezulwini lowephanako kutsi akuphe “emandla lamakhulu kakhulu.” (2 Khor. 4:7; Luk. 11:13) LiBhayibheli linetibonelo letinyenti tekutsi Jehova wabasita njani bafati nemadvodza ngekubanika loko lebebakudzinga kuze babe nesifiso kanye nemandla ekwenta intsandvo yakhe. Njengobe sitawube sifundza ngaletibonelo, cabanga ngetindlela Jehova langakusebentisa ngato kuze wente lokufanako.

5. Yini lesingayifundza endleleni Jehova lasebentisa ngayo Mosi nangesikhatsi lamsebentisa ngaso kuze akhulule bantfu bakhe?

⁵ Jehova wenta kutsi Mosi abe ngumkhululi wema-Israyeli. Kodvwa Jehova wamsebentisa nini? Kungalesikhatsi Mosi acabanga kutsi sewuwulungele yini lomsebenti ngemuva kwekutsi ‘sekafundziswe yonkhe inhlakanipho yaseGibhithe’? (Imis. 7:22-25) Cha, Jehova wasebentisa Mosi ngemuva kwekutsi sekamsitile waba yindvodza letfobekile nalenemoya lophansi. (Imis. 7:30, 34-36) Jehova wanika Mosi sibindzi sekukhuluma nembusi waseGibhithe lobekanemandla kakhulu. (Eks. 9:13-19) Yini lesingayifundza endleleni Jehova lasebentisa ngayo Mosi nangesikhatsi lamsebentisa ngaso? Jehova usebentisa labo labetama kumlingisa futsi labetsembela kuye kuze abaphe emandla.—Fil. 4:13.

6. Sifundzani endleleni Jehova lasebentisa ngayo Bhazilayi kuze asite iNkhosi Davide?

⁶ Ngemuva kweminyaka leminyenti leyalandzela, Jehova wasebentisa Bhazilayi kuze asite iNkhosi Davide. Davide kanye nebantfu lebekanabo ‘besebafile yindlala, kudzinwa nekoma’ njengobe bebabalekela Absalomu indvodzana yaDavide. Akanye nalabanye, Bhazilayi lobesekakhululile ngaleso sikhatsi, wabeka kuphila kwakhe engotini kuze asite Davide kanye nalabantfu lebekanabo. Bhazilayi akazange acabange kutsi Jehova bekangeke asamsebentisa ngenca nje yekutsi sewukhulile. Esikhundleni saloko, wasebentisa konkhe lebekanako kuze asite tinceku taNkulunkulu lebetidzinga  lusito. (2 Sam. 17:27-29) Yini lesiyifundzako kuloku? Ngisho nobe sesikhulile ngeminyaka, Jehova angasisebentisa kuze sibasite ngetintfo labatidzingako bazalwane betfu nabodzadze labahlala endzaweni yangakitsi nobe kulamanye emave. (Taga 3:27, 28; 19:17) Kungenteka singakhoni kuya kubo siyobasita, kodvwa singakhona kunikelela umsebenti wemhlaba wonkhe kuze leyo mali isite bazalwane betfu nabodzadze nabadzinga lusito ngisho nobe bahlala kuphi.—2 Khor. 8:14, 15; 9:11.

7. Jehova wamsebentisa njani Simeyoni, futsi loko kusikhutsata njani?

⁷ Jehova wetsembisa Simeyoni, indvodza lebeseyikhulile futsi leyetsembekile yaseJerusalema, kutsi bekangeke afe angakamboni Mesiya. Kungenteka kutsi lesetsembiso samkhutsata kakhulu Simeyoni, njengobe besekuphele iminyaka leminyenti alindzele Mesiya. Jehova wambusisa ngenca yekukholwa kwakhe nekubeketela kwakhe. Ngalelinye lilanga, Simeyoni “aholwa ngumoya longcwele,” waya ethempelini. Wafike wabona Jesu lobekaluswane, futsi Jehova wamsebentisa kuze aphrofethe ngalomntfwana lobekatawuba nguKhristu. (Luk. 2:25-35) Nanobe kungenteka kutsi Simeyoni wafa ngaphambi kwekutsi Jesu acale kushumayela, wajabula kakhulu ngekutsi kunemsebenti lawentele Jehova, futsi kunetintfo letinyenti letinhle latatijabulela esikhatsini lesitako! Emhlabeni lomusha, lendvodza leyetsembekile itawubona kutsi kubusa kwaJesu kutawuba sibusiso kubo bonkhe bantfu labatawuphila emhlabeni. (Gen. 22:18) Natsi siyajabula nangabe Jehova asisebentisa kuze sente umsebenti wakhe.

8. Jehova angasisebentisa njani njengobe asebentisa Bhanabasi?

⁸ Ngelikhulu lekucala, lenye indvodza lokutsiwa nguJosefa beyinesifiso sekusetjentiswa nguJehova. (Imis. 4:36, 37) Ngenca yekutsi Josefa bekahamba embili ekukhutsateni labanye, kungenteka nguleso sizatfu lesenta baphostoli bambita ngekutsi nguBhanabasi, lokusho kutsi “Lokhutsata Labanye.” Nasi sibonelo, ngemuva kwekutsi Sawula sekabe ngumKhristu, bazalwane labanyenti bebesaba kutisondzeta kuye ngobe bekake wahlupha labo labakholelwa kuJesu. Nobe kunjalo, Bhanabasi wamdvudvuta waphindze wamsita, futsi kungenteka loko kwamjabulisa kakhulu Sawula. (Imis. 9:21, 26-28) Ngekuhamba kwesikhatsi, bazalwane labadzala belibandla laseJerusalema bebafuna kukhutsata bazalwane labahlala khashane e-Antiyokhi yaseSiriya. Batfuma bani? Batfuma Bhanabasi, futsi leso bekusincumo lesihle kakhulu. EBhayibhelini siyatjelwa kutsi Bhanabasi “wabakhutsata bonkhe kutsi bachubeke batimisela eNkhosini.” (Imis. 11:22-24) Nalamuhla, Jehova angasisita kuze sidvudvute bazalwane betfu nabodzadze. Sibonelo saloko kutsi angasisebentisa kuze sidvudvute labo labashonelwe tihlobo tabo. Angasikhutsata kutsi sifune kuvakashela lotsite logulako nobe locindzetelekile, nobe simshayele lucingo kuze simdvudvute ngemavi lanemusa. Utamvumela yini Jehova kutsi akusebentise njengobe asebentisa Bhanabasi?—1 Thes. 5:14.

9. Sifundzani endleleni Jehova lasita ngayo Vasily kutsi abe ngumelusi lokahle?

⁹ Jehova wasita lomunye umzalwane lokutsiwa nguVasily kutsi abe ngumelusi lokahle. Ngesikhatsi Vasily aneminyaka lengu-26 budzala, wabekwa kutsi abe ngulomdzala welibandla, futsi bekacabanga kutsi ute emakhono lenele kuze asite bazalwane nabodzadze, ikakhulukati labo lababhekene nebumatima. Nobe kunjalo, bazalwane lesebanesikhatsi lesidze bangulabadzala belibandla bamcecesha, futsi waceceshwa nakuya eSikolweni SeMsebenti WeMbuso. Vasily wasebenta kamatima kuze atfutfuke. Sibonelo saloko kutsi wabhala luhla lwetintfo letincane langatifeza. Njengobe afeza ngakunye kwako, bekuncipha kancane kancane kwesaba  kwakhe. Vasily utsi: “Nyalo tingenta ngijabule tintfo lebengitesaba ngaleso sikhatsi. Njalo Jehova nakangisita kuze ngitfole umbhalo lokahle lengingakhutsata ngawo umzalwane nobe dzadze ebandleni, ngijabula kakhulu.” Bazalwane, nangabe nani njengaVasily ninesifiso sekusetjentiswa nguJehova, yena anganinika emandla ekwenta lokunyenti ebandleni.

10. Yini leyentiwa ngu-Abigayili, futsi ufundzani esibonelweni sakhe?

¹⁰ Davide kanye nemadvodza lebekahamba nawo bebacoshwa yiNkhosi Sawula, futsi bebadzinga lusito. Lamadvodza acela kudla kuNabali, indvodza yaka-Israyeli lebeyinjingile. Bekangesabi kumcela ngobe bekavikele umhlambi wakhe ngesikhatsi usehlane. Kodvwa Nabali lobekanemona wala kuwapha kudla. Davide watfukutsela wabila futsi bekafuna kubulala Nabali kanye nawo onkhe emadvodza lasemndenini wakhe. (1 Sam. 25:3-13, 22) Abigayili, umfati waNabali, bekangagcini nje ngekuba muhle, kodvwa bekahlakaniphile. Wakhombisa kuba nesibindzi futsi waguca etinyaweni taDavide wamncenga kutsi angatiletseli licala lengati ngekutiphindziselela kuNabali. Wamkhutsata ngekuhlakanipha kutsi ashiyele konkhe kuJehova. Emavi a-Abigayili lakhombisa kutfobeka nekwenta kwakhe ngekuhlakanipha kwayitsintsa inhlitiyo yaDavide. Davide wabona kutsi Abigayili bekatfunywe nguJehova. (1 Sam. 25:23-28, 32-34) Abigayili wetama kamatima kuba ngumuntfu losebentisekako kuJehova. Ngendlela lefanako, Jehova usengabasebentisa bodzadze labahlakaniphile kuze bacinise imindeni yabo kanye nalabanye ebandleni.—Taga 24:3; Thit. 2:3-5.

11. Yini leyentiwa ngemadvodzakati aShalumi, futsi bobani lamuhla labawalingisako?

¹¹ Ngemuva kweminyaka leminyenti leyalandzela, emadvodzakati aShalumi bekasemkhatsini walabo labasetjentiswa nguJehova kuze bakhe kabusha lubondza lwaseJerusalema. (Neh. 2:20; 3:12) Nanobe babe wawo bekayindvuna, lamadvodzakati aShalumi bekanesifiso sekwenta lomsebenti lolukhuni naloyingoti. (Neh. 4:15-18) Bewahluke kakhulu emadvodzeni aseThekhowa ‘langazange awusekele umsebenti labenikwe wona.’ (Neh. 3:5) Cabanga ngendlela lamadvodzakati aShalumi lajabula ngayo ngesikhatsi lomsebenti uphela ngemuva nje kwemalanga langu-52! (Neh. 6:15) Nalamuhla, bayajabula bodzadze labanesifiso sekwentela Jehova umsebenti lokhetsekile wekwakha kanye nekunakekela takhiwo letinikelwe kuJehova. Emakhono abo, emandla abo kanye nekwetsembeka kwabo kubalulekile kuze lomsebenti uphumelele.

12. Jehova angasisebentisa njani njengobe asebentisa Thabitha?

¹² Jehova wenta kutsi Thabitha ente ‘tintfo letinyenti letinhle futsi ephane ngetipho,’ futsi loko bekakwentela kakhulu bafelokati. (Imis. 9:36) Ngenca yekutsi bekanesandla lesivulekile futsi anemusa, bantfu labanyenti beva buhlungu kakhulu ngesikhatsi afa. Kepha bajabula kakhulu ngesikhatsi umphostoli Phetro amvusa ekufeni. (Imis. 9:39-41) Yini lesiyifundza kuThabitha? Ngisho nobe sibancane ngemnyaka nobe sikhulile, sibadvuna nobe sibasikati, sonkhe singabasita bazalwane betfu nabodzadze.—Heb. 13:16.

13. Jehova wamsebentisa njani Ruth lobekanemahloni, futsi yini Ruth layisho?

¹³ Lomunye dzadze lonemahloni lokutsiwa nguRuth, bekafuna kuba sitfunywa selivangeli. Ngesikhatsi asemncane, bekasuka kulomunye umuti aye kulomunye ngekushesha lokukhulu, aniketa bantfu emapheshana. Ruth utsi: “Bengiwutsandza kakhulu lomsebenti.” Nobe kunjalo, Ruth bekakutfola kumatima kukhuluma nebantfu ngeMbuso waNkulunkulu. Nanobe  bekanemahloni, waba lihlahlandlela lelivamile ngesikhatsi aneminyaka lengu-18. Nga-1946, waya eSikolweni SeliBhayibheli SaseGileyadi futsi ngekuhamba kwesikhatsi watfunyelwa eHawaii naseJapan. Jehova wamsebentisa kakhulu kuze ashumayele tindzaba letimnandzi kulamave. Ngemuva kwekushumayela iminyaka lecishe ibe ngu-80, Ruth utsi: “Jehova bekahlale angicinisa. Ungisitile kuze ngincobe emahloni. Ngiyaciniseka kutsi Jehova angasebentisa nobe ngubani lowetsembela kuye.”

14. Ngekusho kwembhalo waKholose 1:29, yini lokufanele siyente nangabe sifuna kusetjentiswa nguJehova?

¹⁴ Kuwo wonkhe umlandvo, Jehova usebentise tinceku takhe ngetindlela letinyenti letehlukene. Yini Jehova latawubangela kutsi ube ngiyo? Kutawuya ngekutsi utimisele yini kusebenta kamatima. (Fundza Kholose 1:29.) Nangabe ufisa kusetjentiswa nguJehova, yena angabangela kutsi ube ngumshumayeli lokhutsele, umfundzisi lokahle, umdvudvuti lohlakaniphile, sisebenti lesinelikhono, umngani lolusito, nobe abangele kutsi ube ngunobe yini layidzingako kuze ufeze injongo yakhe.

15. Njengobe kusho umbhalo waThimothi 4:12, 15, yini bazalwane labasebasha lokufanele bacele Jehova kutsi abasite kuyo?

¹⁵ Yini leningayenta nine bazalwane labasebasha lesenisondzela ebudzaleni? Kunesidzingo lesikhulu semadvodza lanemandla sekutsi abe tinceku letisebentako ebandleni. Emabandleni lamanyenti, labadzala belibandla banyenti kunetinceku letisebentako. Nine bazalwane labasebasha, ninaso yini sifiso sekwenta lokunyenti ebandleni? Ngalesinye sikhatsi labanye bazalwane batsi: “Mine ngikahle ngingummemeteli.” Nangabe utiva ngaleyondlela, cela Jehova kutsi akusite ube nesifiso sekuba yinceku lesebentako futsi akuphe emandla ekwenta konkhe longakwenta kuze umkhonte. (Shu. 12:1) Siyaludzinga lusito lwakho!—Fundza 1 Thimothi 4:12, 15.

16. Yini lokufanele siyicele kuJehova, futsi leni?

¹⁶ Jehova angabangela kutsi ube ngunobe yini layidzingako kuze ufeze injongo yakhe. Ngako mcele kutsi akuphe sifiso sekwenta umsebenti wakhe, ngemuva kwaloko umcele kutsi akuphe emandla lowadzingako kuze uwente. Ngisho nobe umncane ngemnyaka nobe sewukhulile, sebentisa sikhatsi sakho, emandla akho, kanye netintfo lonato kuze udvumise Jehova nyalo. (Shu. 9:10) Ungavumeli kwesaba nobe kutiva ngatsi awukakulungeli kwenta umsebenti lotsite kukwente uyekele ematfuba lamahle ekwenta umsebenti waJehova ngawo onkhe emandla akho. Sonkhe sinelilungelo lekwenta konkhe lesingakwenta kuze sidvumise Babe wetfu lonelutsandvo!