Umuntfu locwaninga ngesimo selitulu uhlolisisa sitfombe lesikhulako ngemshini lokutsiwa yi-radar. Ubona siphepho lesiyingoti lesihamba ngekushesha futsi lesicondze endzaweni lenebantfu labanyenti. Ngenca yekutsi unendzaba ngekuphepha kwebantfu, wenta konkhe lokusemandleni akhe kuze abecwayise ngaphambi kwekutsi sifike.

Ngendlela lefanako, nalamuhla Jehova wecwayisa bantfu labasemhlabeni “ngesiphepho” lesiyingoti kakhulu kwendlula leso labangahle beve ngaso embikweni wesimo selitulu. Jehova ukwenta njani loko? Kungani singaciniseka kutsi Jehova unika bantfu sikhatsi lesenele sekutsi batsatse sinyatselo? Kuze sitfole timphendvulo, asesicale ngekucoca ngaletinye tecwayiso Jehova latiniketa bantfu esikhatsini lesendlulile.

Ngetikhatsi tekubhalwa kweliBhayibheli, Jehova wecwayisa bantfu “ngetiphepho,” nobe ngetehlulelo lebekatatiletsela bantfu labangayilaleli ngemabomu imiyalo yakhe. (Taga 10:25; Jer. 30:23) Ngaso sonkhe sikhatsi, bekabecwayisa asengakabaletseli sehlulelo sakhe bantfu labangamlaleli, abatjela nekutsi yini lokufanele bayente kuze bamlalele. (2 Khos. 17:12-15; Neh. 9:29, 30) Kuze abasite babe nesifiso sekushintja, Jehova bekasebentisa tinceku takhe letetsembekile letisemhlabeni kutsi timemetele ngetehlulelo takhe futsi tibasite babone kutsi kufanele bashintje ngekushesha.—Amo. 3:7.

Nowa bekangulenye yetinceku taNkulunkulu leyetsembekile. Kwaphela iminyaka leminyenti acwayisa bantfu lebebaphila ngesikhatsi sakhe ngaZomcolo lomkhulu lobewuta, futsi labantfu bebatiphatsa kabi baphindze banebudlova. (Gen. 6:9-13, 17) Bekabatjela nekutsi yini lobekufanele bayente kuze basindze, futsi wabashumayela kangangekutsi ngekuhamba kwesikhatsi wabitwa ngekutsi ‘ngumshumayeli wekulunga.’—2 Phet. 2:5.

Nanobe Nowa bekatimisela kulomsebenti, bantfu lebebaphila ngesikhatsi sakhe abazange bawulalele lomlayeto lovela kuNkulunkulu. Bakhombisa kutsi bete kukholwa. Ngako bafa ngesikhatsi Zamcolo ‘ufika ubakhukhula bonkhe.’ (Mat. 24:39; Heb. 11:7) Bebangeke batsi Nkulunkulu akazange abecwayise.

Ngaletinye tikhatsi, Jehova bekacwayisa bantfu sekusele kancane nje kutsi sehlulelo sakhe sifike. Nanobe kunjalo, bekaciniseka kutsi bantfu batfola sikhatsi lesenele sekushintja. Nasi sibonelo, Nkulunkulu wabecwayisa kusenesikhatsi bantfu baseGibhithe ngaphambi kwekutsi kucale Tishayo Letilishumi. Sibonelo saloko kutsi Jehova watfumela boMosi na-Aroni kutsi bayocwayisa Faro netinceku takhe mayelana nesishayo sesi-7, lokwaba sangcotfo lesenta umonakalo lomkhulu. Njengobe lesangcotfo besitawehla ngelilanga lelilandzelako, Nkulunkulu wabaniketa sikhatsi lesenele yini sekutsi bakhone kutiphephisa futsi basindze kulesangcotfo? LiBhayibheli litsi: “Letinye tiphatsimandla taFaro tefikelwa kwesaba ngalamavi abesakhulunywe nguSimakadze, taphutfuma tabutsa tigcili tato netifuyo tato. Kodvwa letinye tato atizange tiwanake emavi aSimakadze; ngako tigcili tato netifuyo tato tatiyekelela ngaphandle tangete tatikhoselisa.” (Eks. 9:18-21) Kuyacaca kutsi Jehova wabanika sikhatsi lesenele, ngobe awuzange ube mkhulu umonakalo lowabangelwa ngulesangcotfo kulabo labasheshe batsatsa sinyatselo.

Faro netinceku takhe becwayiswa ngesishayo sesi-10. Kodvwa abazange basilalele lesecwayiso. (Eks. 4:22, 23) Ngenca yaloko, emadvodzana abo langematubulo afa. Loku kwaba buhlungu kakhulu! (Eks. 11:4-10; 12:29) Bebangakhona yini kusilalela kusenesikhatsi lesecwayiso? Yebo! Mosi wawecwayisa  ngekushesha ema-Israyeli ngalesishayo sesi-10 lebesita, futsi wawatjela kutsi yini lokufanele ayente kuze asindzise imindeni yawo. (Eks. 12:21-28) Bangakhi bantfu labasilalela lesecwayiso? Bantfu labasindza kulesahlulelo saNkulunkulu futsi baphuma eGibhithe, kulinganiselwa kutsi bebangetulu kwetigidzi letintsatfu lokufaka ekhatsi ema-Israyeli kanye “nenhlanganisela lenkhulu” yebantfu betive nebaseGibhithe.—Eks. 12:38.

Njengobe letibonelo tiveta, Jehova bekahlale aciniseka kutsi bantfu bebatfola sikhatsi lesenele sekulalela tecwayiso takhe. (Dut. 32:4) Kungani Nkulunkulu bekenta kanjalo? Umphostoli Phetro uyachaza kutsi Jehova “akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (2 Phet. 3:9) Nkulunkulu bekanendzaba nalabantfu. Bekafuna kutsi baphendvuke futsi bente lushintjo loludzingekako ngaphambi kwekutsi kufike sehlulelo sakhe.—Isa. 48:17, 18; Rom. 2:4.

Nalamuhla, bonkhe bantfu kufanele basilalele secwayiso lesibalulekile lesimenyetelwa emhlabeni wonkhe. Ngesikhatsi Jesu aselamhlabeni, wecwayisa ngekutsi lelive litawubhujiswa ngekushesha ngesikhatsi ‘sekuhlupheka lokukhulu.’ (Mat. 24:21) Mayelana nalesehlulelo lesitako, Jesu washo siphrofetho lesichaza ngalokucacile kutsi yini lebeyitawubonwa balandzeli bakhe nekutsi bebatawubhekana natiphi timo njengobe lesikhatsi besitawube sisondzela. Ngako Jesu watichaza letintfo letibalulekile lesitibona tenteka emhlabeni wonkhe lamuhla.—Mat. 24:3-12; Luk. 21:10-13.

Ngekuvumelana nalesiphrofetho, nyalo Jehova ukhutsata bonkhe bantfu kutsi bakhetse kumkhonta nekumlalela. Ufisa kutsi bantfu labalalelako babe nekuphila lokuncono nyalo nekutsi bajabulele tibusiso tesikhatsi lesitako letitawuletfwa live lelisha lelinekulunga. (2 Phet. 3:13) Jehova ufuna kusita bantfu kutsi babe nekukholwa etetsembisweni takhe. Loko ukwenta ngekutsi abanikete umlayeto lotawusindzisa kuphila kwabo. Lomlayeto ‘utindzaba letimnandzi teMbuso’ Jesu laphrofetha ngato watsi “tiyawushunyayelwa emhlabeni wonkhe, kuze kube bufakazi etiveni tonkhe.” (Mat. 24:14) Nkulunkulu uhlele bantfu bakhe labetsembekile kuze bawumemetele emaveni langaba ngu-240 lomlayeto lovela kuye. Jehova ufuna kutsi bantfu labanyenti kakhulu basilalele lesecwayiso futsi basindze “kulesiphepho” lesitako, lokusehlulelo sakhe lesilungile.—Zef. 1:14, 15; 2:2, 3.

Ngako umbuto lotsi Jehova ubanika sikhatsi lesenele yini bantfu kuze baphendvuke awukabaluleki. Bufakazi bukhombisa kutsi uhlale abanika sikhatsi lesenele. Esikhundleni saloko, umbuto lobalulekile utsi: Bantfu batawusilalela kusengakephuti yini secwayiso saNkulunkulu? Shengatsi tsine njengobe sititfunywa taNkulunkulu, singachubeka sisita bantfu labanyenti kakhulu kutsi basindze nakuphela lelive.