1. Ngusiphi sincumo lesincono kakhulu umuntfu langasenta?

NGALOKUVAMILE, tincumo letentiwa batali tibatsintsa sikhatsi lesidze bantfwana. Nangabe batali benta tincumo letimbi, bangababangela tinkinga bantfwana babo. Kodvwa nangabe benta tincumo letikahle, basita bantfwana babo kutsi bajabule ekuphileni. Kodvwa nebantfwana kufanele bente tincumo letikahle. Sincumo lesincono kakhulu umuntfu langasenta kutsi akhonte Jehova, Babe wetfu losezulwini lonelutsandvo.—Hla. 73:28.

2. Ngutiphi tincumo letikahle Jesu nebatali bakhe labatenta?

² Batali baJesu bebatimisele kusita bantfwana babo kutsi bakhonte Jehova, futsi tincumo labatenta takhombisa kutsi kukhonta Jehova bekuyintfo lebaluleke kakhulu ekuphileni kwabo. (Luk. 2:40, 41, 52) NaJesu wenta tincumo letikahle, letamsita wenta loko Jehova lebekafuna akwente. (Mat. 4:1-10) Jesu wakhula waba yindvodza lenemusa, leyetsembekile nalenesibindzi. Nobe ngumuphi umtali lotsandza Jehova bekangatigcabha futsi ajabule ngekuba nendvodzana lefana naye.

3. Ngumiphi imibuto lesitayiphendvula kulesihloko?

³ Kulesihloko, sitawuphendvula lemibuto lelandzelako: Ngutiphi tincumo letikahle Jehova latenta mayelana naJesu? Tincumo letentiwa batali baJesu tingabafundzisani batali labangemaKhristu? Tincumo letentiwa nguJesu, tingabafundzisani labasha labangemaKhristu?

4. Ngusiphi sincumo lesibalulekile Jehova lasenta mayelana neNdvodzana yakhe?

⁴ Jehova wakhetsela Jesu batali labakahle kakhulu. (Mat.  1:18-23; Luk. 1:26-38) Emavi aMariya lasuka enhlitiyweni labhalwe eBhayibhelini akhombisa kutsi bekamtsandza Jehova neliVi lakhe. (Luk. 1:46-55) Indlela Josefa latilalela ngayo ticondziso taJehova beyikhombisa kutsi uyamtsandza Nkulunkulu futsi ufuna kumjabulisa.—Mat. 1:24.

5-6. Jehova wavumela iNdzodzana yakhe kutsi ibhekane nani?

⁵ Naka kutsi Jehova akazange akhetsele Jesu batali labanjingile. Umnikelo lowentiwa nguJosefa naMariya ngemuva kwekutalwa kwaJesu, wakhombisa kutsi bebaphuyile. (Luk. 2:24) Kungenteka kutsi Josefa bekanendzawo lencane lebekasebentela kuyo eceleni kwelikhaya lakhe eNazaretha njengobe bekangumbati. Kungenteka kutsi bebete imali lenyenti nobe tintfo letinyenti, ikakhulukati ngobe bebanebantfwana labasikhombisa nobe ngetulu.—Mat. 13:55, 56.

⁶ Jehova wamvikela Jesu kuletinye tintfo lebetiyingoti, kodvwa akazange amvikele kuto tonkhe tinkinga. (Mat. 2:13-15) Sibonelo saloko kutsi Jesu bekanetihlobo letingakholwa. Asewucabange kutsi kwamdvumata kanjani Jesu kuba nemalunga emndeni lacale angamkholwa kutsi unguMesiya. (Mak. 3:21; Joh. 7:5) Kungenteka Josefa wafa ngesikhatsi Jesu asemusha futsi loko kwamvisa buhlungu Jesu. Kufa kwaJosefa kungenteka bekusho kutsi Jesu njengobe bekayindvodzana lendzala bekufanele ente umsebenti lobewentiwa ngubabe wakhe. (Mak. 6:3) Njengobe Jesu akhula, wafundza indlela yekunakekela umndeni wakubo. Kungenteka bekufanele asebente kamatima kuze awunakekele. Ngako bekati kutsi kunjani kudzinwa ngemuva kwekusebenta lilanga lonkhe.

7. (a) Ngumiphi imibuto lengasita labashadene kutsi bakhulise kahle bantfwana babo? (b) Taga 2:1-6, tingabasita njani batali kutsi baceceshe bantfwana babo?

⁷ Nangabe nishadile futsi nifuna kuba nebantfwana, tibuteni: ‘Sibantfu labatfobekile yini labatsandza Jehova neliVi lakhe? Jehova angasikhetsa yini kutsi sinakekele luswane loluligugu?’ (Hla. 127:3, 4) Nangabe sewungumtali, tibute: ‘Bantfwana bami ngiyabafundzisa yini kutsi kuhle kusebenta kamatima?’ (Shu. 3:12, 13) ‘Ngenta konkhe lokusemandleni yini kuze ngivikele bantfwana bami etintfweni letiyingoti letikulelive laSathane?’ (Taga 22:3) Ngeke ukhone kuvikela bantfwana bakho kuto tonkhe  tinkinga lokungenteka babhekane nato. Loko kungetulu kwemandla akho. Kodvwa ungakhona kubalungiselela tinkinga labatawubhekana nato ekuphileni, ngekutsi uchubeke ubafundzisa ngendlela lenelutsandvo kutsi betsembele eBhayibhelini kuze batfole seluleko. (Fundza Taga 2:1-6.) Nangabe sihlobo senu siyekela kukhonta Jehova, sita bantfwana bakho bafundze eVini laNkulunkulu kutsi kungani kubalulekile kuhlala wetsembekile kuJehova. (Hla. 31:23) Nangabe kufa sihlobo senu lenisitsandzako, khombisa bantfwana bakho emavesi laseBhayibhelini langabasita babeketelele lusizi futsi batfole kuthula.—2 Khor. 1:3, 4; 2 Thim. 3:16.

8. Ngusiphi sicondziso lesikuDutheronomi 6:6, 7, boJosefa naMariya labasilalela?

⁸ Josefa naMariya bakhona kusita Jesu kutsi abe ngumuntfu lowemukelwa nguNkulunkulu ngobe balalela sicondziso saJehova lesiya kubatali. (Fundza Dutheronomi 6:6, 7.) Josefa naMariya bebamtsandza kakhulu Jehova futsi umgomo wabo bekukusita bantfwana babo kutsi nabo bamtsandze.

9. Ngutiphi tincumo letibalulekile Josefa naMariya labatenta?

⁹ BoJosefa naMariya bakhetsa kuhlale bakhonta Jehova bakanye nebantfwana babo. Bebaya maviki onkhe emihlanganweni lebeyiba sesinagogeni leliseNazaretha, futsi njalo ngemnyaka bebagubha liPhasika eJerusalema. (Luk. 2:41; 4:16) Kungenteka bebasebentisa loluhambo loluya eJerusalema kuze bafundzise Jesu nebantfwana bakubo ngemlandvo webantfu baJehova, futsi kungenteka kuloluhambo bebavakashela netindzawo lokukhulunywa ngato emiBhalweni. Njengobe umndeni wabo ukhula, kungenteka kwaba matima kuJosefa naMariya kuchubeka banamatsela eluhlelweni lwekukhonta Nkulunkulu. Kodvwa batfola umvuzo ngekwenta kanjalo! Ngenca yekutsi kukhonta Jehova bekuta kucala kubo, umndeni wabo wahlale usondzelene naJehova.

10. Ngutiphi tifundvo letingatfolwa batali labangemaKhristu kuJosefa naMariya?

¹⁰ Batali labesaba Nkulunkulu bangafundzani kuJosefa naMariya? Lokubaluleke kakhulu kutsi ukhombise bantfwana bakho ngemavi nangetento kutsi umtsandza mbamba Jehova. Sipho lesikhulu kakhulu  longabapha sona kutsi ubasite batsandze Jehova. Sifundvo lesibaluleke kakhulu longabafundzisa sona kubasita kutsi babe neluhlelo loluhle lwekutadisha liBhayibheli, kuthantaza, kuya emihlanganweni nekuya emsebentini wekushumayela. (1 Thim. 6:6) Kuliciniso kutsi kufanele unakekele bantfwana bakho ngetintfo labatidzingako. (1 Thim. 5:8) Kodvwa khumbula kutsi akusiyo imali nobe tintfo labanato letitawubasita kutsi basindze nakubhujiswa lelive laSathane futsi bangene eveni lelisha laNkulunkulu, kunaloko batawusitwa buhlobo lobuhle labanabo naJehova.—Hez. 7:19; 1 Thim. 4:8.

11. (a) Seluleko lesiku-1 Thimothi 6:17-19 sibasita njani batali kutsi bente tincumo letikahle nabakhulisa bantfwana babo? (b) Ngumiphi imigomo umndeni wakho longatibekela yona, futsi ngutiphi tibusiso longatitfola? (Buka libhokisi lelitsi “ Ngumiphi Imigomo Longatibekela Yona?”)

¹¹ Kujabulisa kakhulu kubona batali labanyenti labangemaKhristu benta tincumo letikahle kuze basite bantfwana babo basondzelane naJehova! Bahlale bakhonta Nkulunkulu ndzawonye. Baya emihlanganweni yelibandla nasemihlanganweni yesifundza. Baphindze bashumayele tindzaba letimnandzi. Leminye imindeni iyakhona kushumayela ensimini lengashunyayelwa njalo. Leminye imindeni ivakashela e-Bethel nobe isebente etakhiweni tenhlangano. Imindeni lekhetsa kwenta loko isebentisa imali yayo futsi loko kungase kube matima. Kodvwa Jehova utawubabusisa ngaloko. (Fundza 1 Thimothi 6:17-19.) Bantfwana labakhule emindenini lenjena bavame kuchubeka benta tintfo letinhle labatifundziswe batali babo ngisho sebakhulile, futsi abatisoli! *—Taga 10:22.

12. Yini lokwadzingeka Jesu ayente njengobe akhula?

¹² Babe waJesu losezulwini uhlale enta tincumo letikahle futsi nebatali bakhe balamhlabeni bebenta tincumo letihlakaniphile. Kodvwa njengobe Jesu akhula, kwadzingeka kutsi naye atentele takhe tincumo. (Gal. 6:5) Njengatsi sonkhe, naye bekanelilungelo lekutikhetsela. Bekangakhetsa kwenta loko lokufunwa nguye. Kodvwa wakhetsa kulondvolota buhlobo lobuhle naJehova. (Joh. 8:29) Sibonelo sakhe singabasita njani bantfu labasha lamuhla?

13. Ngusiphi sincumo lesibalulekile Jesu lasenta ngesikhatsi asesemusha?

¹³ Ngesikhatsi Jesu asesemusha, wakhetsa kulalela batali bakhe. Akazange abedzelele batali bakhe ngobe acabanga kutsi yena wati kakhulu kunabo. Kunaloko, “wachubeka abalalela.” (Luk. 2:51) Jesu wenta konkhe lokusemandleni akhe kuze ayente kahle imisebenti lobekufanele ayente njengobe bekayindvodzana lendzala. Wasebenta  kamatima kuze afundze kubata kuJosefa khona atewunakekela umndeni wakubo.

14. Sati njani kutsi Jesu bekangumfundzi lokhutsele weliVi laNkulunkulu?

¹⁴ Kungenteka batali baJesu bamtjela ngesimangaliso lesenteka kuze atalwe nangaloko titfunywa taNkulunkulu letakusho ngaye. (Luk. 2:8-19, 25-38) Jesu akenetiswanga nguloko latjelwa kona, waphindze watitadishela yena imiBhalo. Sati njani kutsi Jesu bekangumfundzi lokhutsele weliVi laNkulunkulu? Kungobe ngesikhatsi asengumfanyana, bafundzisi baseJerusalema “bamangaliswa kucondza kwakhe kanye netimphendvulo takhe.” (Luk. 2:46, 47) Ngesikhatsi aneminyaka lengu-12, Jesu besekatibonele kutsi Jehova unguBabe wakhe.—Luk. 2:42, 43, 49.

15. Jesu wakhombisa njani kutsi bekafuna kwenta intsandvo yaJehova?

¹⁵ Ngesikhatsi Jesu afundza ngaloko Jehova labefuna akwente, wakhetsa kwenta intsandvo yaJehova. (Joh. 6:38) Bekati kutsi bekatawutondvwa bantfu labanyenti futsi kucabanga ngaloko bekumvisa buhlungu. Nobe kunjalo, wakhetsa kulalela Jehova. Ngesikhatsi Jesu abhajatiswa nga-29 C.E., intfo lebeyibaluleke kakhulu kuye bekukwenta loko Jehova lakufunako. (Heb. 10:5-7) Ngisho nangesikhatsi afa elugodvweni, wachubeka atimisele kwenta intsandvo yaBabe wakhe.—Joh. 19:30.

16. Bantfwana bangafundzani kuJesu?

¹⁶ Lalela batali bakho. NjengaJosefa naMariya, batali bakho nabo banesono. Nobe kunjalo, batali bakho banikwe nguJehova umsebenti wekukuvikela nekukucecesha. Nangabe ulalela seluleko sabo futsi uhlonipha neligunya labo, tintfo ‘titakuhambela kahle.’—Ef. 6:1-4.

17. Ngekusho kwaJoshuwa 24:15, ngusiphi sincumo labasebasha lokufanele batentele sona?

¹⁷ Khetsa kutsi utawukhonta bani. Kufanele utitfolele wena kutsi ungubani Jehova, iyini intsandvo yakhe nekutsi utayenta njani ekuphileni kwakho. (Rom. 12:2) Utawubese uyakhona kwenta sincumo lesibalulekile ekuphileni kwakho, lokusincumo sekukhonta Jehova. (Fundza Joshuwa 24:15; Shu. 12:1) Nangabe uchubeka ulifundza njalo liBhayibheli futsi ulitadisha, indlela lomtsandza ngayo Jehova itawuchubeka ikhula futsi nekukholwa kwakho kutawucina.

18. Ngusiphi sincumo labasebasha lokufanele basente, futsi kutawuba namuphi umphumela?

 ¹⁸ Khetsa kwenta intsandvo yaJehova ite kucala ekuphileni kwakho. Live laSathane litsi nangabe usebentisa emakhono akho kuze utizuzise wena, utawujabula. Kodvwa siyati kutsi labo labatimisele ngekunjinga “batigwaza yonkhe indzawo ngebuhlungu lobunyenti.” (1 Thim. 6:9, 10) Kodvwa nangabe ukhetsa kulalela Jehova nekwenta intsandvo yakhe ite kucala ekuphileni kwakho, utawuphumelela futsi “kube kuhle kuwe.”—Josh. 1:8.

19. Yini lokufanele ikhunjulwe batali?

¹⁹ Batali, yentani konkhe lokusemandleni enu kuze nisite bantfwana benu kutsi bakhonte Jehova. Tsembelani kuye, futsi yena utanisita kutsi nente tincumo letikahle. (Taga 3:5, 6) Khumbula kutsi bantfwana bakho batawutsintfwa kakhulu nguloko lokwentako kunaloko lokushoko. Ngako yenta tincumo letitawusita bantfwana bakho kutsi bemukeleke kuJehova.

20. Ngutiphi tibusiso labasebasha labatatitfola nabakhetsa kukhonta Jehova?

²⁰ Nine labasha, batali benu banganisita kutsi nente tincumo letikahle ekuphileni. Kodvwa ngini lokufanele nitentele letincumo kuze nijabulise Nkulunkulu. Ngako lingisani Jesu futsi nikhetse kukhonta Babe wenu lonelutsandvo losezulwini. Nanenta njalo, nitawuba nemphilo leyenetisako nalejabulisako nyalo. (1 Thim. 4:16) Kantsi nasesikhatsini lesitako, nitawuba nemphilo lejabulisa kakhulu!