SIHLOKO LESIFUNDVWAKO 42
Singabasita Njani Labo Lesibafundzela LiBhayibheli Kutsi Bagcine Babhajatisiwe?—Incenye 2
“Hlale utinaka wena nekufundzisa kwakho.”—1 THIM. 4:16.
INGOMA 77 Kukhanya Eveni Lelimnyama
LOKUTAWUCOCWA NGAKO KULESIHLOKO *
1. Sati ngani kutsi umsebenti wekwenta bafundzi usindzisa kuphila kwebantfu?
UMSEBENTI wekwenta bafundzi usindzisa kuphila kwebantfu! Sikwati njani loko? Jesu washo umyalo lobhalwe kuMatewu 28:19, 20, lotsi: “Hambani nente . . . bafundzi . . . , nibabhabhatise.” Kubaluleke ngani kutsi umuntfu abhajatiswe? Kubalulekile nangabe umuntfu afuna kusindziswa. Umuntfu lofuna kubhajatiswa kufanele akholwe kutsi angaphila phakadze ngenca yekutsi Jesu wasifela waphindze wavuswa. Kungako umphostoli Phetro atjela emaKhristu labekanye nawo watsi: “Lubhabhatiso seluyanisindzisa . . . ngekuvuswa kwaJesu Khristu.” (1 Phet. 3:21) Ngako nangabe umfundzi lomusha abhajatiswa, angaba nelitsemba lekuphila phakadze.
2. UmBhalo wa-2 Thimothi 4:1, 2 usikhutsa kutsi sibe bafundzisi labanjani?
2 Kuze sikhone kwenta bafundzi, kufanele sibe ‘nelikhono lekufundzisa.’ (Fundza 2 Thimothi 4:1, 2.) Leni? Ngobe Jesu wasiyala watsi: “Hambani nente . . . bafundzi . . . , nibafundzise.” Umphostoli Pawula watsi “phikelela” kulomsebenti, “ngobe nawenta njalo utawutisindzisa wena nalabo labakulalelako.” Ngako bekunesizatfu lesivakalako sekutsi Pawula atsi: ‘Hlale unaka kufundzisa kwakho.’ (1 Thim. 4:16) Njengobe kufundzisa kufananiswa nekwenta bafundzi, sifuna kufundzisa ngendlela lencono kakhulu.
3. Kulesihloko, yini lesitayifundza mayelana nekuchuba tifundvo teliBhayibheli?
3 Emhlabeni wonkhe sichuba tifundvo teliBhayibheli nebantfu labatigidzi. Kodvwa njengobe sifundzile esihlokweni lesendlulile, sifuna kwati kutsi singabasita njani babe bafundzi baJesu Khristu lababhajatisiwe. Kulesihloko, sitawucoca ngaletinye tintfo letisihlanu letingentiwa ngumfundzisi kuze asite umfundzi atfutfuke aze abhajatisiwe.
SEBENTISA LIBHAYIBHELI NAWUFUNDZISA
Cela umfundzisi losekanesikhatsi kutsi akusite utfutfukise emakhono akho ekutsi uvumele liBhayibheli kube ngilo lelifundzisako (Buka tigaba 4-6) *
4. Kungani umfundzisi kufanele atibambe nakachuba sifundvo seliBhayibheli? (Buka umbhalo longentansi.)
4 Siyakutsandza loko lesikufundzisako lokuseVini laNkulunkulu. Ngenca yaloko, singase sifune kukhuluma sikhatsi lesidze ngako. Nobe kunjalo, ngisho nobe uchuba Sifundvo seSicongesekulindza, Sifundvo SeliBhayibheli Selibandla nobe uchubela umuntfu sifundvo seliBhayibheli, akukafaneli ukhulume kakhulu. Kuze umfundzisi alisebentise kahle liBhayibheli kufanele atibambe, angachazi konkhe lakwatiko ngelivesi nobe ngendzaba letsite leseBhayibhelini. * (Joh. 16:12) Cabanga ngekutsi bekunganani lebewukwati ngeliBhayibheli ngesikhatsi ubhajatiswa naloko lokwatiko nyalo. Kungenteka bewati timfundziso letisisekelo kuphela. (Heb. 6:1) Kukutsetse iminyaka leminyenti kwati loku lokwatiko nyalo, ngako ungetami kufundzisa umfundzi lomusha konkhe ngasikhatsi sinye.
5. (a) Ngekuvumelana na-1 Thesalonika 2:13, yini lesifuna umfundzi ayati ngaloko lakufundzako? (b) Singamkhutsata njani umfundzi kutsi acoce ngetintfo latifundzako?
5 Sifuna umfundzi ati kutsi loku lakufundzako kuseBhayibhelini. (Fundza 1 Thesalonika 2:13.) Singakwenta njani loko? Khutsata lomfundzi kutsi acoce ngetintfo latifundzako. Esikhundleni sekutsi kube nguwe lohlale umchazela emavesi, mcele akuchazele lamanye. Msite abone kutsi liVi laNkulunkulu likhuluma naye ngalokucondzile. Mbute imibuto letawuveta loko lakucabangako nendlela lativa ngayo ngemibhalo layifundzako. (Luk. 10:25-28) Nasi sibonelo, ungambuta: “Lombhalo ukusita njani kutsi ubone buntfu baJehova?” “Tingakusita njani letintfo losandza kutifundza eBhayibhelini?” “Utiva njani ngaloku losandza kukufundza?” (Taga 20:5) Lokubaluleke kakhulu akusiko nje kutsi lomfundzi wati kanganani, kodvwa kutsi loku lakwatiko uyakutsandza yini nekutsi uyakusebentisa yini.
6. Kungani kukahle kuhamba nemfundzisi losanesikhatsi nawuyochuba sifundvo seliBhayibheli?
6 Nawuyochuba sifundvo seliBhayibheli, kuyenteka yini uhambe nebamemeteli lasebanesikhatsi bafundzisa? Nangabe kunjalo, ungababuta kutsi usichuba njani lesifundvo nekutsi ulisebentisa kahle yini liBhayibheli nawufundzisa. Kufanele utfobeke nawufuna kutfutfukisa likhono lakho lekufundzisa. (Catsanisa na-Imisebenti 18:24-26.) Ngemuva kwaloko, buta lommemeteli losanesikhatsi kutsi ucabanga kutsi lomfundzi uyakucondza yini loku lakufundzako. Ungamcela lommemeteli kutsi akuchubele lesifundvo nangabe utawuba ngekho liviki linye nobe ngetulu. Loko kutawenta kutsi lesifundvo sichutjwe njalo, futsi lomfundzi utawubona kutsi sibalulekile. Ungatitjeli kutsi lesi sifundvo “sakho” futsi kute umuntfu longakuchubela sona. Umfunela lokuncono lomfundzi futsi ufuna achubeke afundza lokunyenti ngeliciniso.
FUNDZISA NGEMDLANDLA NANGEKUCINISEKA
Cocela umfundzi ngetibonelo talabanye labenta lushintjo ekuphileni kwabo kuze atobona kutsi angakusebentisa njani loko lakufundzako (Buka tigaba 7-9) *
7. Yini letawusita umfundzi kutsi akutsandze loko lakufundzako?
7 Umuntfu lomfundzisako kufanele abone kutsi uyakukholwa futsi uyakutsandza loku lokufundziswa liBhayibheli. (1 Thes. 1:5) Ngako kungenteka akutsandze loku lakufundzako. Mhlawumbe ungamcocela kutsi liBhayibheli likusite njani ekuphileni kwakho. Ngako utawubona kutsi naye lingamsita.
8. Yini lenye longayenta kuze usite umuntfu lomfundzela liBhayibheli, futsi kungani?
8 Nawusachuba lesifundvo, mcocele ngebazalwane nabodzadze lebebanetinkinga letifana netakhe futsi batincoba. Ungeta nalotsite losebandleni futsi sibonelo sakhe lesingasita lomfundzi. Nobe ungatfola tintfo letikhutsako letishiwo ngulabanye ku-jw.org ngaphansi kwelichungechunge lelitsi “The Bible Changes Lives.” * Letihloko nema-video kungasita umfundzi abone kutsi liBhayibheli lingakushintja kuphila kwakhe.
9. Singamkhutsata njani umfundzi kutsi acocele umndeni wakhe nobe bangani bakhe ngaloko lakufundzako?
9 Nangabe lomfundzi ashadile, lona lashade naye uyafundzelwa yini? Nangabe angafundzelwa, mcele kutsi abe khona nanifundza. Khutsata umfundzi kutsi acocele umndeni wakhe nebangani bakhe loko lakufundzako. (Joh. 1:40-45) Kanjani? Ungase umbute: “Loku ungakuchazela njani umndeni wakho?” nobe “Ngumuphi umbhalo longawusebentisa kuze uchazele umngani wakho leliphuzu?” Ngaleyondlela utawube ucecesha umfundzi kutsi abe ngumfundzisi. Ngako nasekalungele, angacala abe ngummemeteli longakabhajatiswa. Ungase ubute lomfundzi kutsi ukhona yini lamatiko longatsandza kufundza liBhayibheli. Nangabe akhona, chumana naye ngekushesha futsi ucele kufundza naye. Mkhombise i-video letsi Yini Leyentekako Nakuchutjwa Sifundvo SeliBhayibheli? *
KHUTSATA UMFUNDZI KUTSI AKHE BANGANI EBANDLENI
Khutsata lomfundzi kutsi akhe bangani ebandleni (Buka tigaba 10-11) *
10. Ngekusho kwa-1 Thesalonika 2:7, 8, umfundzisi angasilingisa njani sibonelo saPawula?
10 Bafundzisi kufanele babakhatsalele bafundzi. Batsatse njengebazalwane nabodzadze bakusasa. (Fundza 1 Thesalonika 2:7, 8.) Akusiko melula kutsi bashiye bangani lebebanabo eveni futsi bente lushintjo kuze bakhonte Jehova. Kufanele sibasite batfole bangani labakahle ebandleni. Bani ngumngani wemfundzi ngekutsi ucitse sikhatsi naye hhayi nje nawumfundzisa kuphela kodvwa nangaletinye tikhatsi. Utawubona kutsi uyamkhatsalela nangabe umshayela, umbhalela imilayeto nobe umvakashela ngisho nobe ungaketeli kutomfundzisa.
11. Yini lesifuna bayitfole ebandleni labo lesibafundzelako, futsi leni?
11 Bantfu bavame kutsi: “Wonkhe umuntfu angasita kuze kukhuliswe umntfwana.” Tsine singatsi: “Libandla lonkhe lingasita kuze lente umfundzi.” Ngako nangabe bafundzisi beliBhayibheli labaphumelelako basita labo labafundza nabo kutsi bati labanye ebandleni, labazalwane bangabasita kutsi basondzelane kakhulu naJehova. Labafundzi bangabujabulela budlelwane nebantfu baNkulunkulu, futsi labazalwane nabodzadze bangabasita kutsi babe bangani baJehova baphindze babakhutsate nabanetinkinga. Sifuna umfundzi ngamunye abone kutsi uyincenye yelibandla nekutsi uyincenye yemndeni waNkulunkulu. Sifuna awutsandze lomndeni lonelutsandvo, futsi kutawuba melula kutsi ayekele kutihlanganisa nebantfu labangamsiti kutsi abe ngumngani waJehova. (Taga 13:20) Nangabe bangani bakhe bangasafuni kutihlanganisa naye, utawukwati kutsi angabatfola bangani sibili enhlanganweni yaJehova.—Mak. 10:29, 30; 1 Phet. 4:4.
HLALE UKHULUMA NGEKUTINIKELA NEKUBHAJATISWA
Kancane kancane, nangabe lomfundzi atimisele angagcine abhajatisiwe! (Buka tigaba 12-13)
12. Kungani kufanele sikhulume ngekutinikela nekubhajatiswa nemuntfu lesimfundzelako?
12 Hlale ukhuluma ngekutsi kubaluleka ngani kutsi umuntfu atinikele kuJehova futsi abhajatiswe. Sizatfu lesisenta sifundze nebantfu kutsi sifuna kubasita bafundze ngaJehova futsi babhajatiswe. Ngemuva kwekufundza nemuntfu tinyanga letitsite, ikakhulukati nasekacale kuya emihlanganweni yelibandla, kufanele acondze kutsi sifuna kumsita abe nguFakazi waJehova.
13. Ngutiphi tintfo umfundzi lokufanele atente kuze agcine abhajatisiwe?
13 Kunetintfo letimbalwa lona lofundzelwa liBhayibheli lokufanele atente ngaphambi kwekutsi abhajatiswe. Kwekucala, kufanele amati Jehova, amtsandze futsi abe nekukholwa kuYe. (Joh. 3:16; 17:3) Lomfundzi ubese uba ngumngani waJehova futsi asondzelane nebazalwane nabodzadze ebandleni. (Heb. 10:24, 25; Jak. 4:8) Ngekuhamba kwesikhatsi, ubese uyatisola ngetintfo letimbi lebekatenta bese uyatiyekela. (Imis. 3:19) Ngetulu kwaloko, ubese utjela labanye loko lasekakukholelwa. (2 Khor. 4:13) Ngemuva kwaloko, utinikela kuJehova futsi loko ukukhombisa ngekutsi abhajatiswe. (1 Phet. 3:21; 4:2) Leli kuba lilanga lelisijabulisa sonkhe! Nangabe lomfundzi enta letintfo lokumele atente kuze abhajatiswe, chubeka umncoma futsi umkhutsata kutsi achubeke atenta letintfo.
HLALE UHLOLA KUTFUTFUKA KWEMFUNDZI
14. Umfundzisi angakuhlola njani kutfutfuka kwemfundzi?
14 Kufanele sibeketele nasisita umfundzi kutsi atfutfuke kuze agcine abhajatisiwe. Kodvwa kufanele sihlole kutsi unaso yini sifiso sekukhonta Jehova Nkulunkulu. Lomfundzi uyakhombisa yini kutsi uyetama kulalela imiyalo yaJesu? Nobe umane nje ufuna kufundza tintfo letinsha eBhayibhelini?
15. Ngutiphi tintfo umfundzisi latawubona ngato kutsi umfundzi uyatfutfuka yini?
15 Hlale uhlola kutfutfuka kwemfundzi. Nasi sibonelo, uyayiveta yini indlela lativa ngayo ngaJehova? Uyathantaza yini kuJehova? (Hla. 116:1, 2) Uyakutsandza yini kufundza liBhayibheli? (Hla. 119:97) Uba khona njalo yini emihlanganweni yelibandla? (Hla. 22:22) Ulwentile yini lushintjo endleleni laphila ngayo? (Hla. 119:112) Uyawucocela yini umndeni wakhe nobe bangani bakhe loko lakufundzako? (Hla. 9:1) Lokubaluleke kakhulu, uyafuna yini kuba nguFakazi waJehova? (Hla. 40:8) Nangabe lomfundzi angayikhombisi intfutfuko kuletintfo lesesikhulume ngato, ngekuhlakanipha, yetama kutfola kutsi kungani bese ucoca naye ngemusa kepha ungamfihleli lutfo. *
16. Yini letawukhombisa kutsi kufanele uyekele kufundza nemuntfu?
16 Hlale utibuta kutsi uchubeke yini ufundza nalomuntfu lofundza naye. Tibute: ‘Lomfundzi akasilungiseleli yini sifundvo sakhe? Akafuni yini kuya emihlanganweni yelibandla? Solo unemikhuba lemibi yini? Solo ulilunga lenkholo yemanga yini?’ Nangabe imphendvulo yalemibuto kungu-yebo, kuchubeka ufundza nalomuntfu kutawufana nekufundzisa umuntfu longafuni kuba manti kubhukusha! Nangabe lomfundzi angakutsandzi loku lakufundzako futsi angatimiseli kwenta lushintjo, kute sidzingo sekutsi uchubeke ufundza naye.
17. Ngekusho kwa-1 Thimothi 4:16, yini lokufanele yentiwe ngibo bonkhe bafundzisi?
17 Kubaluleke kakhulu kitsi kwenta bafundzi, futsi sifuna kusita labo lesibafundzelako kutsi batfutfuke bagcine babhajatisiwe. Kungako sitawuvumela liBhayibheli kutsi kube ngilo lelifundzisako, futsi sitawufundzisa ngemdlandla nangekuciniseka. Sitawukhutsata umfundzi kutsi akhe bangani ebandleni. Sitawugcizelela kubaluleka kwekutinikela nekubhajatiswa, futsi sitawuhlale sihlola intfutfuko yemfundzi. (Buka libhokisi lelitsi “ Loko Bafundzisi Lokufanele Bakwente Kuze Basite Bafundzi Kutsi Babhajatiswe.”) Siyajabula ngekutsi sinesandla kulomsebenti losindzisa kuphila! Shengatsi singatimisela kwenta konkhe lokusemandleni etfu kuze sisite labo lesibafundzela liBhayibheli kutsi babhajatiswe.
INGOMA 79 Tifundzise Kuhlala Ticinile
^ sig. 5 Nasichuba tifundvo teliBhayibheli, sisuke sinelilungelo lekusita bantfu bafundze kutsi Jehova ufuna bacabange njani, bative njani nekutsi baphile njani. Lesihloko sitawuchubeka nekusichazela kutsi singawatfutfukisa njani emakhono etfu ekufundzisa.
^ sig. 4 Buka sihloko lesitsi “Tintfo Lokungakafanele Utente Nawuchuba Sifundvo SeliBhayibheli” lesitfolakala kubhukwana lotsi Kuphila KwemaKhristu Nemsebenti Wawo wangaSeptember 2016.
^ sig. 8 Chafata ABOUT US > EXPERIENCES.
^ sig. 9 Ku-JW Library®, chafata MEDIA > OUR MEETINGS AND MINISTRY > TOOLS FOR THE MINISTRY.
^ sig. 15 Buka sihloko lesitsi “Kutsandza Jehova Nekumbonga Kutakukhutsata Kutsi Ubhajatiswe” nalesitsi “Ukulungele Yini Kubhajatiswa?” letitfolakala kuSicongosekulindza saMarch 2020.
^ sig. 77 KUCHAZWA KWETITFOMBE: Ngemuva kwesifundvo seliBhayibheli, dzadze losekanesikhatsi ashumayela usita lochuba sifundvo kutsi angenta njani kuze kungabi nguye lokhuluma kakhulu kulesifundvo.
^ sig. 79 KUCHAZWA KWETITFOMBE: Nakusafundvwa, lomfundzi ufundza ngekutsi angaba njani ngumfati lokahle. Ngemuva kwaloko, ucocela indvodza yakhe ngaloko lakufundzile.
^ sig. 81 KUCHAZWA KWETITFOMBE: Lomfundzi nendvodza yakhe bajabulela kuba sekhaya lemngani lamtfole eHholweni LeMbuso.
