Chubeka Ukhonta Jehova Ngenjabulo
CABANGA ngelilanga lowajabula ngalo ekuphileni kwakho. Ngulapho khona wawushada yini nobe ngulapho utfola umntfwana wakho wekucala? Nobe mhlawumbe ngulapho ubhajatiswa? Kungenteka lelo langa bekulilanga lelakujabulisa kakhulu ekuphileni kwakho. Ngalelo langa bazalwane nabodzadze wakho bajabula kakhulu nabakubona ukhombisa kutsi utsandza Nkulunkulu ngayo yonkhe inhlitiyo yakho, ngawo wonkhe umphefumulo wakho, ngayo yonkhe ingcondvo yakho nangawo onkhe emandla akho!—Makho 12:30.
Akungabateki kutsi kusukela wabhajatiswa, utibonele ngewakho kutsi kuyajabulisa kukhonta Jehova. Nobe kunjalo, bamemeteli labanyenti ibalahlekele injabulo labake baba nayo. Yini lebangele loko kutsi kwenteke? Ngutiphi tizatfu letisenta sichubeke sikhonta Jehova ngenjabulo?
LOKWENTE LABANYE BAPHELELWA YINJABULO
Umlayeto weMbuso usiniketa injabulo lenkhulu. Kungani? Kungobe Jehova usetsembisa kutsi uMbuso wakhe utawucedza lelive lelibi futsi uletse live lakhe lelisha. Zefaniya 1:14 utsi: “Lilanga lelikhulu laSimakadze selisondzele, yebo, lisedvute, futsi lita ngekushesha.” Kodvwa nangabe sibona shengatsi kufanele silindze sikhatsi lesidze kunaleso lebesisilindzele, singase silahlekelwe yinjabulo lebesinayo. Loku kungasenta sehlise lizinga ekukhonteni Nkulunkulu.—Taga 13:12.
Nasicitsa sikhatsi nebazalwane nabodzadzewetfu, siyakhutsateka kutsi sichubeke sikhonta Jehova ngenjabulo. Kutiphatsa lokuhle kwebantfu baJehova kungenteka ngiko lokwasenta saba ngemaKhristu futsi kwasisita sacala kukhonta Nkulunkulu ngenjabulo. (1 Phetro 2:12) Nobe kunjalo, yini lengenteka nangabe umzalwane nobe dzadze waniketwa siyalo ngenca yekungayilaleli imiyalo yaNkulunkulu? Loko kungabadvumata labanye ebandleni futsi kubente bangasajabuli.
Umcebo nawo ungasenta silahlekelwe yinjabulo. Kanjani? Live laSathane letama kusenta sicabange kutsi kufanele sitsenge tintfo lesingatidzingi. Shengatsi singakhumbula emavi aJesu latsi: “Kute umuntfu longakhonta emakhosi lamabili; ngobe uyakutondza lenye, atsandze lenye; uyakwetsembeka kulenye ayedzelele lenye. Ungeke ukhonte Nkulunkulu nemcebo.” (Matewu 6:24) Angeke sikwati kukhonta Jehova ngenjabulo ngesikhatsi lesifanako sibe setama kuba nayo yonkhe intfo lesingaba nayo kulelive.
JABULA NAWUKHONTA JEHOVA
Kukhonta Jehova akusiwo umtfwalo lowesindzako kulabo labamtsandzako. (1 Johane 5:3) Khumbula kutsi Jesu watsi: “Kotani kimi nonkhe nine lenikhatsele nalenisindvwako, ngitaniphumuta. Bekani lijoka lami kini, nifundze kimi, ngobe nginemoya lomuhle futsi nginenhlitiyo letfobekile, nitawutfolela imiphefumulo yenu kuphumula. Ngobe lijoka lami lilula, kantsi nemtfwalo wami awusindzi.” (Matewu 11:28-30) Kuyasicabula kuba ngemaKhristu eliciniso futsi kusenta sijabule. Sinetizatfu letivakalako tekujabula ngenca yekutsi sitisebenti taJehova. Asesicoce ngaletintsatfu tato.—Habakhuki 3:18.
Sikhonta Nkulunkulu lojabulako, uMniki Kuphila wetfu. (Imisebenti 17:28; 1 Thimothi 1:11) Siyacondza kutsi sikweleta Jehova ngekuphila kwetfu njengobe anguMdali wetfu. Ngako shengatsi singachubeka simkhonta ngenjabulo ngisho nobe sineminyaka lemingakhi sabhajatiswa.
Héctor utigcina ajabulile ngekutsi ahlale akhumbula litsemba leMbuso futsi amatasatasa
Cabanga ngaHéctor, lowakhonta Jehova angumbonisi lojikeletako iminyaka lengu-40. Ngisho ‘ebudzaleni bakhe’ solo uyakujabulela kukhonta Jehova. (Tihlabelelo 92:12-14) Kugula kwemfati wakhe kumenta angakhoni kwenta lokunyenti emsebentini waNkulunkulu, kodvwa solo uyajabula. Utsi: “Ngisho nobe kubuhlungu kubona kugula kwemfati wami kuya embili futsi kumatima kumnakekela, angikakuvumeli loko kwangenta ngaphelelwa yinjabulo ekukhonteni Nkulunkulu weliciniso. Kwati kutsi ngikweleta Jehova kuphila kwami, lowasidalela injongo letsite, kungulesinye setizatfu letingenta ngimtsandze kakhulu futsi ngimkhonte ngenhlitiyo yonkhe. Ngenta konkhe lokusemandleni kute ngichubeke ngikhutsele emsebentini wekushumayela, futsi ngiyetama kwenta litsemba leMbuso lite kucala ekuphileni kwami kute ngihlale ngijabulile.”
Jehova usinikete umhlatjelo loyinhlawulo, lowenta kutsi sikujabulele kuphila. Ecinisweni “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Johane 3:16) Tono tetfu tingacolelwa futsi siphile phakadze nasikhombisa kukholwa enhlawulweni lesipho selutsandvo saNkulunkulu. Loku kusizatfu lesihle kakhulu lesingasibangela kutsi sijabule! Kubonga kwetfu ngalenhlawulo kuyosikhutsata kutsi sikhonte Jehova ngenjabulo lenkhulu.
Jesús wenta kuphila kwakhe kwaba lula futsi wakhonta Jehova ngenjabulo iminyaka leminyenti
Umzalwane lobekahlala eMexico libito lakhe lokunguJesús, utsi: “Umsebenti wami wawungigcilata, kangangekutsi ngaletinye tikhatsi ngangisebenta ngisho sekushayisiwe nobe bengingakabopheki kwenta loko. Ngangikwenta nje ngobe ngifuna imali lenyenti. Ngemva kwaloko ngafundza ngaJehova nangendlela lanikela ngayo ngeNdvodzana yakhe ngenca yebantfu. Ngaba nesifiso lesijulile sekumkhonta. Ngako nganikela kuphila kwami kuJehova, futsi ngemuva kweminyaka lengu-28 ngisebentela lenkapani, ngayekela kusebenta futsi ngangenela umsebenti wasikhatsi sonkhe. Nguleyo indlela Jesús lacala ngayo kukhonta Jehova ngenjabulo.”
Siphila imphilo lehlantekile, lesenta sijabule. Usakhumbula kutsi kuphila kwakho bekunjani ngaphambi kwekutsi wati Jehova? Umphostoli Pawula wakhumbuta emaKhristu aseRoma kutsi ‘ake aba Roma 6:17-22) Natsi silandzela timiso taJehova, ngako sikhululilwe ebuhlungwini lobuba khona ngenca yekungatiphatsi kahle nobe yekuphila kuphila lokubi. Loko kusijabulisa kakhulu!
tigcila tesono’ kodvwa abese aba “tigcili tekulunga.” Ngenca yekutsi besekaphila kuphila lokuhlantekile, bekangakhona kubheka phambili ekuphileni lokuphakadze. (“Iminyaka lejabulisa kakhulu ekuphileni kwami nguleyo lengayicitsa ngikhonta Jehova.”—Jaime
Cabanga ngaJaime, lobekangakholelwa kutsi Nkulunkulu ukhona futsi bekakholelwa ekutigucukeleni kwemvelo aphindze abe ngumshayi wesibhakela. Wacala kuya emihlanganweni yebuKhristu futsi watsintseka nakabona bazalwane banelutsandvo. Kute ayekele lemikhuba yakhe lemibi, Jaime kwadzingeka acele Jehova kutsi amsite akwati kuba nekukholwa kuYe. Jaime utsi: “Kancane kancane ngabona kutsi ukhona Nkulunkulu, Babe wetfu lonelutsandvo nalonemusa. Kugcina timiso taJehova tekulunga kungivikele. Kube angiyishintjanga indlela lebengiphila ngayo, kungenteka ngabe ngabulawa njengobe labanye bangani bami lebengishaya nabo sibhakela babulawa. Iminyaka lengiyijabulele ekuphileni kwami nguleyo lengiyicitse ngikhonta Jehova.”
UNGAPHELELWA NGEMANDLA!
Kufanele sitive njani njengobe silindzele kuphela kwalelive lelibi? Khumubula kutsi senta intsandvo yaNkulunkulu futsi sibheke phambili ekuphileni lokuphakadze. “Ngako-ke asingapheli emandla ekwenta lokuhle, ngobe ngesikhatsi lesifanele sitawuvuna nasingadzinwa.” (Galathiya 6:8, 9) Ngelusito lwaJehova shengatsi singabeketela, sisebente ngekutimisela kute sakhe buntfu lobutasenta sikwati kusindza ‘ekuhluphekeni lokukhulu,’ futsi sichubeke sikhonta Jehova ngenjabulo.—Sembulo 7:9, 13, 14; Jakobe 1:2-4.
Singaciniseka kutsi Jehova utasibusisa ngenca yekubeketela kwetfu ngobe uyawati umsebenti lesimentela wona nelutsandvo lesinalo ngaye. Nasichubeka simkhonta ngenjabulo, sitawufanana nemhlabeli Davide lowatsi: “Emehlo ami ayawunamatsela kuSimakadze phakadze naphakadze. Yena ungasesandleni sami sangesekudla, ngiyawuhlala kuye ngitinte. Ngako-ke inhlitiyo yami iyatfokota, nemoya wami uyajabula, nemtimba wami ulondvolotekile.”—Tihlabelelo 16:8, 9.