NGATALWA nga-1926 eCrooksville, e-Ohio, eMelika. BoMake naBabe bebangakholwa, kodvwa bebasitjela kutsi siye esontfweni. Bengiya esontfweni leMaweseli. Ngesikhatsi ngineminyaka lengu-14 budzala, umfundisi wangihlomelisa ngobe ngemaSontfo angizange sengilove ngisho kanye esontfweni umnyaka wonkhe.

Ngaleso sikhatsi, Margaret Walker longuFakazi WaJehova futsi longumakhelwane wetfu, wavakashela make kute bacoce ngeliBhayibheli. Ngalelinye lilanga ngancuma kuhlala nabo. Make wangicosha ngobe bekacabanga kutsi ngitabaphazamisa. Kodvwa ngachubeka ngetama kulalela loko lebebacoca ngako. Ngemuva kwekusivakashela emahlandla, Margaret wangibuta watsi: “Uyalati yini libito laNkulunkulu?” Ngatsi: “Kute longakwati loko​—nguNkulunkulu.” Watsi: “Tsatsa liBhayibheli lakho ufundze Tihlabelelo 83:18.” Ngatifundza, futsi ngabona kutsi libito laNkulunkulu nguJehova. Ngagijima ngaya kubangani bami, ngatsi: “Nanifika emakhaya nibofundza Tihlabelelo 83:18 emaBhayibhelini enu kuze nibone kutsi ngubani libito laNkulunkulu.” Singasho kutsi ngacala ngaleso sikhatsi kushumayela.

Ngafundzelwa futsi ngabhajatiswa nga-1941. Ngekushesha ngacelwa kutsi ngichube sifundvo sencwadzi selibandla. Ngakhutsata bomake nebantfwana bakitsi labasikhombisa kutsi bete, futsi bebeta bonkhe. Kodvwa babe abengeti ngobe bekangatsandzi kufundza liBhayibheli.

Nganiketwa imisebenti leminyenti ebandleni, futsi bengitsatsa tincwadzi letinyenti letishicilelwa BoFakazi BaJehova ngiye nato ekhaya. Ngalelinye lilanga Babe wakhomba letincwadzi tami, watsi: “Uyayibona yonkhe lemfucuta yakho? Angifuni kuphindze ngiyibone lakhaya futsi uhambe nayo.” Ngahamba ekhaya ngayohlala eZanesville, e-Ohio, kodvwa bengihle ngivakasha ekhaya kute ngikhutsate umndeni wakitsi.

Babe wetama kuyekelisa Make kuya esifundvweni. Ngaletinye tikhatsi nangabe Make sekasendleleni leya esifundvweni, Babe bekamgijimisa futsi amjikise ambuyisele ekhaya. Kodvwa Make bekafike aphume ngalomunye umnyango aye esifundvweni. Ngatjela Make ngatsi: “Ungakhatsateki. Utawudzinwa kugijimisana  nawe.” Ngekuhamba kwesikhatsi Babe wayekela kumvimba kutsi aye esifundvweni.

Ngesikhatsi kucala Sikolwa Semsebenti WemaKhristu nga-1943, ngacala kubeka tinkhulumo ebandleni lebengikulo. Seluleko lebengisitfola ngemuva kwekubeka inkhulumo ngayinye, sangisita kute ngibe sikhulumi lesikahle.

Nga-1944, ngesikhatsi kuchubeka iMphi Yelive Yesibili, ngatjelwa kutsi ngijoyine libutfo lemphi. Ngaya eFort Hayes leseColumbus, e-Ohio kute ngiyohlolwa kutsi ngiphile kahle yini emtimbeni futsi ngagcwalisa timphepha takhona. Ngatjela emaphoyisa kutsi ngeke ngibe lisotja. Angivumela kutsi ngibuyele ekhaya. Kodvwa ngemuva nje kwemalanga lambalwa, kwefika liphoyisa latsi: “Corwin Robison, ngiphetse incwadzi legunyata kutsi uboshwe.”

Ngemuva kwemaviki lamabili, ngaya enkantolo, futsi lijaji latsi: “Kube kuya ngami, botawudzilikelwa lijele. Kukhona yini lofuna kukusho?” Ngaliphendvula ngatsi: “Nkhosi yeNkantolo, bekufanele ngabe ngifakwe ngephansi kwebantfu labashumayelako. Ngishumayela tindzaba letimnandzi teMbuso kubo bonkhe bantfu.” Lelijaji latjela lamanye emajaji latsi: “Aniketeli kutoncuma kutsi lelijaha liyashumayela yini nome cha, kodvwa nitele kutobuka kutsi liyile yini kuyobhalisela imphi nome alikayi.” Ngemuva kwemizuzu letsite, lamajaji atsi ngidliwe licala. Angigweba iminyaka lesihlanu ejele lelise-Ashland, eKentucky.

Kwaphela emaviki lamabili ngisejele leliseColumbus, e-Ohio, futsi ngelilanga lekucala ngahlala esitokisini. Ngathantaza kuJehova ngatsi: “Ngeke ngikhone kuhlala esitokisini iminyaka lesihlanu. Angati kutsi kufanele ngente njani.”

Ngelilanga lelilandzelako bogadzi bangikhipha kulesitokisi. Ngahamba ngayokuma eceleni kwendvodza lendze lesidlakela, nayo lebeyiboshiwe futsi besime sibuke ngephandle kwelifasitelo. Yangibuta yatsi: “Bakubopheleni?” Ngatsi: “NginguFakazi WaJehova.” Yatsi: “Usho mbamba? Pho bakubopheleni?” Ngatsi: “BoFakazi BaJehova abayi emphini futsi abababulali bantfu.” Yatsi: “Bakubophele kutsi awufuni kubulala bantfu, kodvwa babe babopha labanye ngobe babulele bantfu. Kunengcondvo yini kwenta loko?” Ngatsi: “Akunangcondvo.”

Ngemuva kwaloko yatsi: “Kwaphela iminyaka lengu-15 ngikulelinye lijele futsi ngesikhatsi ngilapho bengifundza tincwadzi tenu.” Nangiva loko ngathantaza ngatsi: “Jehova ngisite lendvodza ibe ngumngani wami.” Ngaleso sikhatsi, lendvodza ligama layo lobekunguPaul yatsi: “Nangabe lomunye kulaba akutsintsa, ungimemete. Ngitamulungisa.” Ngako ngesikhatsi ngiselapho, tiboshwa letingu-50 lebengihlala nato atizange tingihluphe.

 Ngesikhatsi emaphoyisa angiyisa ejele lelise-Ashland, ngefike ngakhandza bazalwane labavutsiwe. Basita mine kanye nalabanye kutsi sihlale sisondzelene naJehova. Basinika luhlelo lwekufundza liBhayibheli maviki onkhe, futsi besilungiselela imibuto netimphendvulo temihlangano lebesiyibita ngekutsi yi-Bible Bees. Besisesitokisini lesikhulu lebesinemibhedze lebeyeyame lubondza. Bekunemzalwane lobekahlela insimu yetfu. Abevame kutsi: “Robison, wena utawushumayela tiboshwa letitawulala kulemibhedze lena. Uciniseke kutsi kuba bete siboshwa lesitawulala kuyo size sihambe ungakasishumayeli.” Nguleyo-ke indlela lebesishumayela ngayo ngekuhleleka.

IMphi Yelive Yesibili yaphela nga-1945, kodvwa ngahlala sikhatsi ejele ngemuva kwayo. Bengikhatsatekile ngemndeni wakitsi ngobe Babe abetsite: “Nakungahamba wena, ngitabakhona laba labanye.” Ngemuva kwekukhululwa ejele, kwaba khona intfo lenhle leyangijabulisa. Emalunga emndeni wakitsi lasikhombisa bekaya esifundweni futsi lomunye wabodzadzewetfu abesabhajatisiwe nanobe Babe abesiphikisa.

Ngesikhatsi kucala imphi yaseKorea nga-1950, ngatjelwa kutsi ngijoyine emphini kwesibili. Ngatjelwa kutsi ngiphindze ngibuyele eFort Hayes. Ngemuva kwekuba sebangihlolile, lelinye liphoyisa latsi: “Nguwe lonemandla kubo bonkhe.” Ngatsi: “Nanobe kunjalo kodvwa angeke ngiyingenele imphi.” Ngacaphuna 2 Thimothi 2:3 ngase ngitsi: “Sengivele ngilisotja laKhristu.” Ngemuva kwesikhatsi latsi: “Hamba ekhaya.”

Ngemuva kwaloko, ngaya emhlanganweni webantfu labafuna kuya eBethel, lobewusemhlanganweni wesifundza eCincinnati, e-Ohio. UMzalwane Milton Henschel watsi kunesidzingo sebazalwane labatawusebenta eBethel. Ngagcwalisa lifomu lekuyokhonta khona futsi bangemukela. Nga-August 1954, ngacala kukhonta eBethel leseBrooklyn.

Bengihlale nginemsebenti lomunyenti eBethel. Iminyaka leminyenti bengisebenta ngemishini lebeyishisisa emanti lebeyilapho kushicilelwa khona tincwadzi nasemahhovisi. Ngangisebenta ngemishini futsi ngaphindze ngasebenta kulungisa imishini yetivalo. Ngaphindze ngasebenta nasemaHholweni Emhlangano lasedolobheni eNew York.

Ngiyatitsandza tinhlelo taseBethel letifaka ekhatsi kukhulunyelwa kwembhalo lokwentiwa ekuseni, Sifundvo se-Sicongosekulindza kanye nekushumayela nelibandla. Nawucabanga ngako, uyabona kutsi yonkhe imindeni yaBoFakazi BaJehova kufanele ihlale itenta letintfo. Onkhe emalunga emndeni atawuhlala anebuhlobo lobusedvute naJehova nangabe batali nebantfwana bafundza umbhalo welusuku ndzawonye,  baba nekukhonta kwemndeni njalo, babe nencenye emihlanganweni yelibandla futsi bakhutsale emsebentini wekushumayela tindzaba letimnandzi.

Ngibe nebangani labanyenti eBethel nasebandleni. Labanye babo bebagcotjiwe futsi sebasezulwini. Labanye abakagcotjwa. Tonkhe tinceku taJehova tinesono, lokufaka ekhatsi emalunga emndeni waseBethel. Ngihlale ngetama kwakha kuthula nakwentekile sacabana nemzalwane. Ngicabanga ngaMatewu 5:23, 24 nangaloko lokufanele ngikwente nangihishene nemzalwane. Akusiko melula kutsi: “Ngiyacolisa,” kodvwa ngulena indlela yekucatulula tinkinga.

Nyalo sekumatima kutsi ngishumayele emtini ngemuti ngobe sengikhulile, kodvwa angikaliphonsi lithawula. Ngifundze siMandarin Chinese futsi ngiyakujabulela kucoca nebantfu baseShayina lengibatfola esitaladini. Ngalamanye emalanga ekuseni ngihambisa bomagazini labangaba ngu-30 nobe 40.

Sengike ngabuyela kumuntfu lengike ngacoca naye loseShayina! Ngalelinye lilanga, lenye intfombatanyana yangibuka yase iyamamatseka njengobe beyitsengisa titselo. Nami ngamamatseka ngase ngiyihambisela Sicongosekulindza ne-Phaphama! ngesiShayina. Yabatsatsa labomagazini, yase ingitjela kutsi libito layo nguKatie. Nakwenteka angibona Katie beketa kimi sitewucoca. Ngamfundzisa emagama esiNgisi etitselo netibhidvo futsi bekangilingisela nangiwasho. Ngaphindze ngamchazela emavesi eliBhayibheli, ngamnika nencwadzi letsi Lokufundziswa LiBhayibheli. Kodvwa ngemuva kwemaviki lembalwa Katie wanyamalala.

Ngemuva kwetinyanga letimbalwa, ngahambisa bomagazini kulenye intfombatanyana lebeyitsengisa, futsi yabatsatsa. Ngeliviki lelilandzelako yanginiketa lucingo yatsi: “Kunemuntfu loseShayina lofuna kukhuluma nawe.” Ngatsi: “Kute umuntfu lohlala eShayina lengimatiko.” Kodvwa yanginika ngenkhani, ngako ngatsatsa lolucingo ngase ngitsi: “Sawubona, ukhuluma naRobison.” Lomuntfu watsi: “Robby, ukhuluma naKatie. Sengibuyele eShayina.” Ngatsi: “Usho mbamba, sewuseShayina?” Katie watsi: “Yebo. Lentfombatana lekunikete lucingo ngudzadzewetfu. Wangifundzisa tintfo letinyenti letinhle. Ngicela umfundzise ngendlela lebewungifundzisa ngayo.” Ngatsi: “Ngitawenta konkhe lokusemandleni ami Katie. Ngiyabonga kutsi ungitjele kutsi ukuphi.” Ngemuva kwaloko ngakhuluma nasisi waKatie kwekugcina. Ngiyafisa kutsi lamantfombatana lamabili afundze lokunyenti ngaJehova lapho akhona khona.

Sekuphele iminyaka lengu-73 ngikhonta Jehova, futsi ngiyajabula kutsi ungisitile kute ngingatingeneli tindzaba tembusave futsi ngihlale ngetsembekile nangisejele. Bantfwana bakitsi bangitjela kutsi bekubakhutsata kungibona ngibeketelela kuphikiswa nguBabe. Nyalo Make nebantfwana bakitsi labasitfupha sebabhajatisiwe. Ngaphambi kwekutsi ashone, Babe bekahle aya esifundvweni.

Nangabe kuyintsandvo yaNkulunkulu, emalunga emndeni wami kanye nebangani bami lasebashonile batawuphindze baphile emhlabeni lomusha. Cabanga nje kutsi sitawujabula kangakanani njengobe sitawube sikhonta Jehova phakadze sinalabo lesibatsandzako. *​—Fundza umbhalo longentasi.